Keristani Kara Maoromaoro Taravatudia Oi Dibaia Bona Hadibaia
“Oibe, taunimanima haida umui hadibaia, to dahaka dainai umui sibona umui hadibaia lasi?”—ROMA 2:21.
1, 2. Dahaka badina idauidau idia noho Baibel oi stadilaia totona?
BADINA momo idia noho Dirava ena Hereva oi stadilaia totona. Oi ura ia lalonai ia noho hereva momokani—taunimanima, idia vara gaudia, gabudia, bona gau ma haida dekenai—oi dibaia. Oi ura hereva momokani oi diba, ia be tomadiho hereva kereredia hegeregere Toi Tamona eiava hel ena lahi amo ia idau. (Ioane 8:32) Bona namona be oi ura Iehova oi dibaia namonamo, unai amo oi be ia oi tohotohoa diba bona mai maoromaoro ida ia vairanai do oi raka.—1 King Taudia 15:4, 5.
2 Dirava ena Hereva oi stadilaia ena badina badana ta be, oi sibona oi hadibaia ma haida—emu lalokau taudia, oi diba taudia, bona oi do diba lasi taudia—oi hadibaia totona. Keristani taudia momokanidia dekenai unai be maduna ta. Iesu ese ena hahediba taudia dekenai ia gwau: “Do umui lao, bese ibounai be diba tahua taudia do umui halaoa, . . . Bona idia dekenai do umui hadibaia, umui dekenai lau henia hereva ibounai be do idia badinaia.”—Mataio 28:19, 20.
3, 4. Dahaka dainai Iesu ese ia hahegani hegeregerena oi hadibaia be namo?
3 Ma haida hadibaia urana dainai Baibel oi stadilaia be namo herea, bona unai ese oi dekenai moale bada ia mailaia diba. Nega daudau lalonai taunimanima ese hadibaia gaukarana idia matauraia bada. Buka ta (Encarta Encyclopedia) ia gwau: “Iuda taudia huanai, taunimanima badadia momo idia laloa hadibaia taudia be hahemauri dalana hahedinaraia taudia, bona natudia idia hagoadaia edia hadibaia taudia idia matauraia bada, edia tama sina idia matauraia bamona lasi.” Keristani taudia ese Baibel idia stadilaia amo sibodia idia hadibaia bena ma haida idia hadibaia be namo herea.
4 “Taunimanima momo herea ese hadibaia gaukara idia karaia, gaukara ma ta be unai bamona lasi. Tanobada hegegemadai tatau bona hahine milioni 48 bamona be hadibaia taudia.” (The World Book Encyclopedia) Sikuli edia tisa taudia be matamata taudia hadibaia gaukarana idia abia bona idia hadibaia gaudia be lagani momo lalonai mai ena siahu unai natudia dekenai. To Iesu ena hahegani, ma haida hadibaia ena hahegani, ese unai ia hereaia; oi hadibaia gaudia dainai mauri hanaihanai do idia abia. Aposetolo Paulo ese Timoteo ia hagoadaia neganai, unai ia hahedinaraia, ia gwau: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Timoteo 4:16) Oibe, emu hadibaia gaukara ese ta ia hamauria diba.
5. Dahaka dainai Keristani hadibaia gaukarana ese sikuli ena hadibaia gaukarana ia hereaia momokani?
5 Oi sibona oi hadibaia bena ma haida oi hadibaia gaukarana be guba bona tanobada ena Lohia Badana, Ataiai Momokani Diravana, ese ia henia bona ia hakaua gaukarana. Unai dainai unai hadibaia gaukara ese sikuli ena hadibaia gaukarana ia hereaia, herevana sikuli dekenai diba hamatamaia gaudia, gaukara dibaia daladia, eiava medikol gaudia idia hadibaia. Keristani tauna ia karaia hadibaia gaukarana lalonai, stiuden tauna ese ia dibaia gaudia be Dirava ena Natuna, Keriso Iesu, ia tohotohoa bona ma haida ia hadibaia unai bamona idia karaia totona.—Ioane 15:10.
Dahaka Dainai Oi Sibona Oi Hadibaia?
6, 7. (a) Dahaka dainai ita sibona ita hadibaia guna be namo? (b) Edena dala ai aposetolo edia negai idia noho Iuda taudia be hadibaia taudia namodia ai idia lao lasi?
6 Dahaka dainai ita sibona ita hadibaia guna be namo? Badina taunimanima haida do ita hadibaia namonamo diba lasi bema ita sibona ita hadibaia guna lasi. Paulo ese lalona veria herevana lalonai unai ia hahedinaraia, ia be mai anina unai negai idia noho Iuda taudia dekenai bona hari inai negai Keristani taudia dekenai danu. Paulo ia henanadai: “Oibe, taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, ‘Henaoa lasi,’ to umui be umui henaoa, a? Umui gwau, ‘Heudahanai lasi,’ to umui be umui heudahanai, a? Kaivakuku be umui kirikirilaia, to umui ese Dirava diba lasi taudia edia dubu gaudia umui henaoa, a? Mai hekokoroku danu umui gwau Dirava ena Taravatu umui diba, to iena Taravatu umui makohia dainai Dirava umui hadikaia inai.”—Roma 2:21-23.
7 Paulo ese henanadai ia gaukaralaia dalana ai, Taravatu Ten ese ia gwauraia kerere rua ia gwauraia: Henaoa lasi, bona heudahanai lasi. (Esodo 20:14, 15) Paulo ena nega ai, Iuda taudia haida idia heagi badina Dirava ena Taravatu idia abia. ‘Dirava ena Taravatu ese idia ia hadibaia vadaeni. Bona idia gwau idia be matakepulu taudia edia hakaua taudia, bona dibura noho taudia edia diari. Bona memero maragidia edia hadibaia taudia.’ (Roma 2:17-20) To, idia haida be koikoi taudia badina hehuni ai idia henaohenao bona heudahanai. Unai amo Taravatu bona Taravatu ia Henia Tauna idia matauraia lasi. Oi itaia diba, idia be hegeregere lasi momokani ma haida idia hadibaia totona; idia sibodia idia hadibaia lasi danu.
8. Reana edena dala ai Paulo ena nega ai idia noho Iuda taudia haida ese ‘dubu gaudia idia henaoa’?
8 Paulo ese dubu ena kohu henaoa karana ia herevalaia. Iuda taudia haida ese unai kara idia karaia momokani, a? Paulo be dahaka ia laloa? Momokani, unai siri ese unai kara ia herevalaia badabada lasi dainai, ita diba momokani lasi edena bamona Iuda taudia haida ese ‘dubu gaudia idia henaoa.’ To guna, Efeso hanua ena hereva torea tauna ia gwau Paulo ena turadia be “gau idia henaoa lasi dubu dekenai,” unai ese ia hahedinaraia taunimanima haida idia laloa Iuda taudia be unai kara idia karaia. (Kara 19:29-37) Idia ese kaivakuku tomadiho henia dubudia amo kwalimu taudia eiava tomadiho goadalaia taudia ese idia henaoa dava bada gaudia idia gaukaralaia eiava idia hoihoilaia, a? Dirava ena Taravatu hegeregerena, kaivakuku dekenai idia noho golo bona siliva idia hadikaia be namo, idia abia bona gaukaralaia be maoro lasi. (Deuteronomi 7:25)a Unai dainai reana Paulo ese Iuda taudia, Dirava ena hahegani idia dadaraia bona kaivakuku tomadiho henia dubudia amo idia abia gaudia idia gaukaralaia eiava idia hoihoilaia taudia, ia herevalaia.
9. Dahaka kara kereredia haida idia karaia bona unai be hegeregere Ierusalema ena dubu amo kohu idia henaoa bamona?
9 To, Josephus ese Iuda taudia foa, edia gunalaia tauna be Taravatu hadibaia tauna, ese Roma dekenai idia karaia kerere badana ia herevalaia. Unai taudia foa ese Iuda tomadihona ia abia dae Roma hahinena ta ena lalona idia ania, idia dekenai golo bona dava bada gaudia ma haida do ia henia, harihari gaudia bamona Ierusalema ena dubu dekenai do idia abia lao totona. Ia amo unai dava bada gaudia idia abia neganai, idia sibodia ese idia gaukaralaia— unai be hegeregere dubu amo kohu idia henaoa bamona.b Ma haida be animal dikadia idia bouboulaia bona mai mataganigani ida dubu lalonai kohu idia hoihoilaia, eiava dubu be ‘henaoa taudia edia ruma ai idia halaoa,’ unai dala ai Dirava ena dubu amo kohu idia henaoa bamona.—Mataio 21:12, 13; Malaki 1:12-14; 3:8, 9.
Keristani Kara Maoromaoro Taravatudia Hadibaia
10. Roma 2:21-23 ai, Paulo ena hereva ena anina be dahaka bona ita laloaboio lasi be namo?
10 Herevana edena dala ai aposetolo edia nega ai idia noho taudia idia henaohenao, idia heudahanai, bona dubu amo kohu idia henaoa, to namona be ita ese Paulo ia gwauraia herevana ena anina ita reaia lasi. Ia henanadai: “Oibe, taunimanima haida umui hadibaia, to dahaka dainai umui sibona umui hadibaia lasi?” Paulo ese ia gwauraia haheitalai amo kara maoromaoro taravatudia ia herevalaia. Ia ese Baibel ena hahediba herevadia eiava histori ia herevalaia lasi. Paulo be ta ese ia sibona bona ma haida ia hadibaia karana ia herevalaia neganai, ia ese Keristani kara maoromaoro taravatudia dibaia bona hadibaia karana ia herevalaia.
11. Dirava ena Hereva oi stadilaia neganai, dahaka dainai Keristani kara maoromaoro taravatudia oi laloa namonamo be namo?
11 Roma 2:21-23 ena hereva ita badinaia totona, Dirava ena Hereva amo Keristani kara maoromaoro taravatudia ita dibaia, ita dibaia gaudia hegeregerena ita kara, bena ma haida ita hadibaia unai bamona idia karaia totona. Unai dainai, Baibel oi stadilaia neganai, Iehova ena taravatu idia hahedinaraia herevadia oi laloa namonamo, badina idia be Keristani kara maoromaoro taravatudia edia badina. Baibel lalonai oi davaria sisiba bona hadibaia herevadia oi laloa dobu. Bena mai gari lasi ida oi dibaia gaudia oi badinaia. Unai bamona oi karaia totona oi gari lasi bona oi lalo-goada. Nega momo goevadae lasi taudia ese ekskius idauidau idia gwauraia haraga, idia gwau gau ta ia vara neganai Keristani kara maoromaoro taravatudia idia laloa lasi be hegeregere, eiava idia laloa lasi be namo. Reana Paulo ese ia gwauraia Iuda taudia be unai bamona kara idia manadalaia, edia kara dainai ekskius idauidau idia gwauraia eiava ma haida idia hakaua kerere totona. To, Paulo ena hereva ese ia hahedinaraia, Keristani kara maoromaoro taravatudia ita laloa maragi lasi eiava sibona eda ura dainai ita dadaraia lasi.
12. Iseda kara namona eiava dikana ena anina Iehova Dirava ena ladana dekenai be edena bamona, bona dahaka dainai unai oi laloatao be namo?
12 Baibel lalonai oi davaria kara maoromaoro taravatudia dibaia bona badinaia karana dekenai, aposetolo Paulo ese badina badana ia hahedinaraia. Iuda taudia edia kara kerere ese Iehova ena ladana ia hadikaia: “Mai hekokoroku danu umui gwau Dirava ena Taravatu umui diba, to iena Taravatu umui makohia dainai Dirava umui hadikaia inai. Buka Helaga be inai bamona ia gwau, ‘Umui be Iuda taudia dainai, Iuda lasi taudia ese Dirava ena ladana idia hadikaia.’ ” (Roma 2:23, 24) Hari danu bema Keristani kara maoromaoro taravatudia ita dadaraia, unai taravatu ia Henia Tauna ena ladana ita hadikaia. To, Dirava ena taravatu ita dogoatao auka neganai, iena ladana do ita hanamoa, ia do ita abia isi. (Isaia 52:5; Esekiela 36:20) Unai oi diba ese oi do ia hagoadaia bema hedibagani o hekwakwanai oi davaria bona toana be Keristani kara maoromaoro taravatudia oi dadaraia be auka lasi dalana. Ma danu, Paulo ena hereva ese ita dekenai gau ma ta ia hadibaia. Emu kara ese Dirava ena ladana do ia hanamoa eiava hadikaia oi diba be namo, to danu, namona be ma haida oi hadibaia lalonai idia oi durua idia itaia, idia dibaia kara maoromaoro taravatudia idia badinaia dalana ese Iehova do ia hanamoa eiava do ia hadikaia danu. Keristani kara maoromaoro taravatudia ese moale idia habadaia bona gorere idia koua sibona lasi. To unai kara maoromaoro taravatudia ia henia bona unai idia badinaia karana ia hagoadaia Tauna ena ladana ia hanamoa danu.—Salamo 74:10; Iamesi 3:17.
13. (a) Edena dala ai Baibel ese kara maoromaoro taravatudia badinaia karana dekenai ita ia durua? (b)Tesalonika Ginigunana 4:3-7 dekenai ia noho sisiba ena hereva badana mani oi gwauraia.
13 Kara maoromaoro taravatudia ita badinaia eiava badinaia lasi ese taunimanima ma haida edia mauri ia hanamoa eiava hadikaia danu. Dirava ena Hereva lalonai haheitalai haida oi itaia diba, idia ese Dirava ena kara maoromaoro taravatudia badinaia ena namo bona badinaia lasi dainai ia vara dika idia hahedinaraia. (Genese 39:1-9, 21; Iosua 7:1-25) Kara maoromaoro taravatudia badinaia karana dekenai inai bamona sisiba goevagoevana oi davaria danu: “Dirava ena ura be inai: Do umui helaga, heudahanai bona sihari kava karadia do umui rakatania momokani.” Bona “umui ta ta ibounai be helaga bona hemataurai dalana ai sibona emui tauanina umui biagua dalana do umui diba be namo, mai matabodaga danu do umui karaia lasi, Dirava idia diba lasi besedia edia kara bamona; unai amo ta ese ena tadikaka ia hahisia lasi bona ena maoro ia hadikaia lasi, . . . badina Iehova ese ita ia boiria, kara miro ita karaia noho totona lasi, to do ita helaga totona.”—1 Tesalonika 4:3-7; NW.
14. Tesalonika Ginigunana 4:3-7 dekenai ia noho sisiba dainai reana oi sibona dekenai dahaka henanadai oi henia diba?
14 Unai siri amo ta be maoromaoro ia itaia diba heudahanai karana ese Keristani kara maoromaoro taravatudia ia makohia. To, unai siri dekenai emu lalo-parara oi habadaia diba. Siri haida ese dala idia kehoa idia ita stadilaia bona laloa dobu totona, unai amo idia ita lalo-pararalaia namonamo. Hegeregere, reana Paulo ese ia gwauraia hereva ena anina oi laloa dobu, ia gwau sihari kava karana ‘amo ta ese ena tadikaka ia hahisia bona ena maoro ia hadikaia’ diba. Unai be dahaka maoro ia herevalaia, bona unai oi lalo-pararalaia namonamo ese edena bamona oi ia hagoadaia Keristani kara maoromaoro taravatudia oi badinaia noho totona? Unai bamona tahua karana amo oi davaria anina namona ese edena bamona oi ia durua diba, ma haida oi hadibaia bona durua Dirava do idia matauraia totona?
Oi Hadibaia Totona Oi Stadi
15. Sibona emu stadi oi karaia neganai, edena tulu oi gaukaralaidia diba?
15 Iehova ena Witnes taudia be sibodia eiava ma haida hadibaia totona idia stadi neganai, idia davaria henanadai dekenai diba ma haida idia tahua totona, idia dekenai idia noho tuludia idia gaukaralaia. Gado momo dekenai ia noho tulu ta be Watch Tower Publications Index. Bema oi dekenai ia noho, oi gaukaralaia diba Iehova ena Witnes taudia idia halasia Baibel idia herevalaia bukadia ai idia noho hereva haida oi tahua totona. Hereva badadia ta ta eiava Baibel siridia edia lista amo unai oi tahua diba. Gado badadia momo dekenai Iehova ena Witnes taudia ese idia gaukaralaia diba tulu ma ta be Watchtower Library. Inai CD-ROM dekenai ia noho kompiuta program ese buka idauidau ia hahedinaraia. Unai program amo ta ese hereva badadia bona siri idia hahedinaraia herevadia ia tahua diba. Bema unai tulu ta eiava ruaosi be oi dekenai idia noho, namona be ma haida hadibaia totona Dirava ena Hereva oi stadilaia neganai, hanaihanai idia oi gaukaralaia.
16, 17. (a) Tesalonika Ginigunana 4:6 (NW ) ese ta ena maoro ia herevalaia, edeseniai unai hereva dekenai diba oi davaria diba? (b) Edena dala idauidau ai sihari kava karana ese ma haida edia maoro ia hadikaia diba?
16 Ataiai ia noho sirina, 1 Tesalonika 4:3-7, mani ita laloa. Unai siri ai ia noho herevana, maoro, dainai henanadai ia vara. Daika ena maoro? Bona edena dala ai ta ena maoro idia hadikaia diba? Ai gwauraia vadaeni stadi tulu idauidau oi gaukaralaia neganai, unai siridia dekenai diba bada do oi davaria diba, Paulo ese ia gwauraia maoro dekenai danu. Unai bamona hereva ma haida be Insight on the Scriptures, Volium 1, rau 863-4 ai; True Peace and Security—How Can You Find It?, rau 145 ai; The Watchtower, November 15, 1989, rau 31 ai idia noho.
17 Unai bamona stadi oi karaia neganai, do oi itaia unai buka ese idia hahedinaraia Paulo ena hereva be idia momokani. Sihari kava tauna ese Dirava dekenai ia kara dika bona gorere ia davaria diba. (1 Korinto 6:18, 19; Heberu 13:4) Sihari kava tauna ese ia kara dika henia kekeni eiava hahine ena maoro idauidau ia hadikaia. Iena kara maoromaoro badinaia karana bona lalona ena mamina namona ia hadikaia. Bema ia do kekeni, ia be rami-hebou kekenina bamona do ia headava ena maoro ia hadikaia bona vaira negana ai do ia adavaia tauna ena maoro ia hadikaia danu badina rami-hebou kekenina do ia abia lasi. Ia ese kekeni ena tama sina edia lalona ia hahisia bona bema ia be headava hahine, ena tau ena lalona ia hahisia danu. Unai matabodaga tauna be ena ruma bese taudia ese kara maoromaoro idia badinaia dainai ladana namona idia abia ena maoro ia hadikaia. Bema ia be Keristani kongregesen lalonai ia noho tauna, kongregesen ena ladana namona ia hadikaia danu.—1 Korinto 5:1.
18. Baibel dekenai Keristani kara maoromaoro taravatudia oi stadilaia ese edena dala ai oi ia durua?
18 Unai bamona hereva, ta ena maoro dekenai, ese oi ia durua unai siri ena anina oi lalo-pararalaia namonamo totona, ani? Unai bamona stadi be mai ena namo bada. Unai bamona oi karaia neganai, oi ese oi sibona do oi hadibaia. Dirava ena hereva be momokani bona ena siahu be bada, unai dekenai emu lalo-parara do oi habadaia. Emu lalona do oi hadaia goada Keristani kara maoromaoro taravatudia do oi badinaia, herevana dahaka hedibagani oi davaria. Bona hadibaia tauna namona ai oi lao diba! Hegeregere, ma haida dekenai Baibel ena hereva momokani oi hadibaia lalonai, 1 Tesalonika 4:3-7 ena anina be idia dekenai oi gwauraia diba, unai amo Keristani kara maoromaoro taravatudia dekenai edia lalo-parara bona edia laloa bada karana do oi habadaia. Unai dala ai, emu stadi karana ese oi bona ma momo ia durua diba Dirava umui matauraia totona. Paulo ese Tesalonika taudia dekenai ia torea revarevana amo, haheitalai tamona sibona ai gwauraia. Keristani kara maoromaoro taravatudia be mai ena kahana idauidau ma haida, bona danu, Baibel ena haheitalai bona sisiba ena hereva badadia ma momo idia noho, idia oi stadilaia, badinaia, bona ma haida dekenai oi hadibaia diba.
19. Dahaka dainai Keristani kara maoromaoro taravatudia oi badinaia be gau badana?
19 Keristani kara maoromaoro taravatudia badinaia be aonega karana, bona unai ita daradaralaia lasi. Iamesi 3:17 ia gwau, “Dirava dekena amo aonega ia abia tauna ena kara ginigunana be inai: Ia laloa goevagoeva.” Unai ese Dirava ena kara maoromaoro taravatudia badinaia karana ia herevalaia. Momokani, Iehova ia ura ena ladana ai idia gaukara bona Baibel idia hadibaia taudia ese “laloa goevagoeva” karana dekenai haheitalai namona idia hahedinaraia. (1 Timoteo 4:12) Hahediba taudia gunadia, hegeregere Paulo bona Timoteo, ese edia mauri dalana amo idia hahedinaraia idia be laloa goevagoeva taudia; matabodaga karadia idia dadaraia, bona Paulo ia gwau: “Umui be Dirava ena taudia dainai, heudahanai, sihari kava karadia, bona matabodaga, bona kohu ura dikadika kara, be do umui karaia lasi momokani. Lebulebu hereva, hereva kavakava, hevaseha hereva mai miro danu be namo lasi.”—Efeso 5:3, 4.
20, 21. Dahaka dainai oi be aposetolo Ioane ese 1 Ioane 5:3 dekenai ia torea herevana ida oi lalo-tamona?
20 Ena be Dirava ena Hereva ai idia noho kara maoromaoro taravatudia be idia hedinarai goevagoeva, to idia be maduna metauna lasi. Aposetolo oredia amo ia mauri daudau aposetolo tauna, Ioane, dekenai unai ia momokani. Lagani momo lalonai ia itaia gaudia amo ia diba Keristani kara maoromaoro taravatudia ese dika idia havaraia lasi. To idia be mai ena namo, heduru idia henia, bona anina namona idia havaraia. Ioane ese unai ia hahedinaraia, ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”—1 Ioane 5:3.
21 To mani oi itaia, Ioane ia gwau lasi Dirava ita kamonai henia bona Keristani kara maoromaoro taravatudia ita badinaia be mauri dalana hereadaena badina hekwakwanai bona dika idauidau amo ita ia naria. Lasi. To badina maorona ia gwauraia, unai be Iehova Dirava ita lalokau henia ena anina, dala hereadaena be iseda lalokau ia dekenai ita hahedinaraia. Momokani, Dirava lalokau henia totona ita sibona eiava ma haida ita hadibaia neganai, iena taravatu hereadaena ita abia dae bona badinaia. Oibe, unai ena anina be ita sibona bona ma haida dekenai Keristani kara maoromaoro taravatudia ita hadibaia.
[Footnotes]
a Ena be Josephus ia gwau lasi Iuda taudia ese helaga gaudia idia matauraia lasi, to Dirava ena taravatu be inai bamona ia gwauraia lou: “Namona be ta ese siti ma haida idia tomadiho henia diravadia ia gwauraia dika lasi, o tano idau edia dubu kohudia ia henaoa lasi, eiava dirava ta ena ladana dekenai idia hahelagaia dava bada gaudia ia henaoa lasi.”—Jewish Antiquities, Buka 4, karoa 8, paragraf 10.
b Jewish Antiquities, Buka 18, karoa 3, paragraf 5.
Oi Laloatao, A?
• Ma haida ita do hadibaia lasi neganai, dahaka dainai sibona ita hadibaia totona ita stadi be namo?
• Iseda kara ena anina Iehova ena ladana dekenai be edena bamona?
• Sihari kava tauna ese daika ena maoro ia hadikaia diba?
• Keristani kara maoromaoro taravatudia badinaia karana dekenai, dahaka oi ura karaia?
[Picture on page 20]
“Iena taravatu be metau lasi”