Hadibaia Tauna Badana Tohotohoa

“Unai dainai do umui lao, bese ibounai be diba tahua taudia do umui halaoa, . . .  umui hadibaia, umui dekenai lau henia hereva ibounai be do idia badinaia.”​—⁠MATAIO 28:​19, 20.

1, 2. (a) Edena dala ai ita ibounai be hadibaia taudia? (b) Hadibaia gaukarana dekenai, Keristani taudia be dahaka maduna idauna idia abia?

OI BE hadibaia tauna ta, a? Dala ta ai ita ibounai be hadibaia taudia. Dala ia diba lasi loaloa tauna dekenai dala oi hahedinaraia, emu gaukara hebou tauna dekenai gaukara ta karaia dalana oi hadibaia, eiava natuna ta dekenai ena tamaka varodia kwatua dalana oi gwauraia hedinarai negadiai, oi be oi hadibaia noho. Unai bamona dala idauidau ai ma haida oi durua ese moale ia mailaia, ani?

² Hadibaia gaukarana dekenai, Keristani taudia korikoridia be mai edia maduna idauna. Hahegani ita abia ‘bese ibounai be diba tahua taudia do ita halaoa, bona idia do ita hadibaia.’ (Mataio 28:​19, 20) Kongregesen lalonai, ita be mai iseda hadibaia negadia. Idia hegeregere vadaeni tatau idia abia hidi “naria taudia” bona “hadibaia taudia” ai idia lao totona, bona edia ura be kongregesen do idia haginia goada. (Efeso 4:​11-13; NW ) Hahine badadia be edia dina ta ta Keristani gaukara idauidau lalonai hahine matamatadia dekenai “kara namo do idia hadibaia.” (Tito 2:​3-5) Ita ibounai idia hagoadaia iseda abidadama tamona taudia ita hagoadaia totona, bona unai sisiba ita badinaia diba bema Baibel ita gaukaralaia ma haida ita durua totona. (1 Tesalonika 5:11) Dirava ena Hereva hadibaia taudia ai ita lao bona nega daudau lalonai namo bada idia havaraia diba lauma gaudia be ma haida ida ita herevalaia be hahenamo badana!

3. Edena dala ai iseda hadibaia daladia ita hanamoa diba?

³ To, edena dala ai iseda hadibaia daladia ita hanamoa diba? Gau ginigunana be, Hadibaia Tauna Badana, Iesu, ita tohotohoa. To, reana haida idia laloa, ‘Edena bamona ia ita tohotohoa diba? Ia be goevadae.’ Momokani, ita be hadibaia taudia goevadaedia lasi. To, herevana iseda diba be edena bamona, ita gaukara goada diba Iesu ena hadibaia dalana ita tohotohoa totona. Namona be ena hadibaia daladia foa​—⁠auka lasi daladia, henanadai namodia, hereva maorodia, bona haheitalai namodia​—⁠ita kikilaia.

Auka Lasi Dalanai Hadibaia

4, 5. (a) Dahaka dainai auka lasi herevadia be Baibel ena hereva momokani ena toana badana ta? (b) Auka lasi dalanai oi hadibaia totona, dahaka dainai ita gaukaralaia herevadia oi laloa namonamo be gau badana?

⁴ Dirava ena Hereva ena hereva momokani badadia be idia auka lasi. Iesu ena guriguri lalonai, ia gwau: “Egu Tamana e, . .  lau hanamoa oi, badina be inai gaudia aonega taudia bona diba momo taudia dekena amo oi hunia vadaeni, to natudia matamata dekenai oi hedinaraia vadaeni.” (Mataio 11:25) Iehova ese dala ia kehoa kudou maoro bona manau taudia be iena ura idia diba totona. (1 Korinto 1:​26-28) Unai dainai, auka lasi herevadia be Baibel ena hereva momokani ena toana badana ta.

⁵ Baibel stadi oi karaia eiava kamonai taudia oi lou henia neganai, edena bamona auka lasi dalanai oi hadibaia diba? Hadibaia Tauna Badana amo dahaka ita dibaia? Iesu ese ena hereva idia kamonai taudia, idia “sikuli bada lasi bona aonega bada lasi taudia,” edia kudouna ia hamarerea totona, idia lalo-pararalaia herevadia ia gaukaralaia. (Kara 4:13) Unai dainai, auka lasi dalanai oi hadibaia totona, gau ginigunana be ita gaukaralaia herevadia oi laloa namonamo. Ita ura lasi hereva aukadia momo ita gwauraia, ma haida edia kudouna ita veria Dirava ena Hereva ena hereva momokani idia dibaia totona. Unai bamona ‘hereva idau herea’ ese edukeisen bada lasi eiava diba bada lasi taudia ia hahemaraia diba. (1 Korinto 2:​1, 2) Iesu ena haheitalai ese ia hahedinaraia, auka lasi herevadia oi abia hidi namonamo neganai, mai siahu ida hereva momokani oi gwauraia hedinarai diba.

6. Edena dala ai Baibel stiuden tauna dekenai hereva idauidau momo do ita gwauraia lasi?

⁶ Auka lasi dalanai ita hadibaia totona, namona be ita naria namonamo danu iseda Baibel stiuden tauna dekenai hereva idauidau momo ita gwauraia lasi. Iesu ese ena hahediba taudia edia diba ena hetoana ia laloa. (Ioane 16:12) Namona be ita danu ese ita stadi henia tauna ita laloa. Hegeregere, Diba ese Mauri Dekenai Ita Ia Hakaua Lao bukana amo stadi ita karaia neganai, hereva ibounai ita gwauraia hedinarai be anina lasi.a Danu, namo lasi ita karaia haragaharaga, hegeregere ita makaia vadaeni kahana haorea be mai anina bada gauna. To, aonega dalana be stiuden tauna idia durua bada gaudia bona ena diba hegeregerena stadi ita karaia be namo. Iseda tahua gauna be ita ura unai stiuden ita durua Keriso ena hahediba tauna ta bona Iehova tomadiho henia tauna ta ai ia lao totona. Namona be nega ita atoa unai stiuden tauna ita durua ia dibaia noho gauna ia lalo-pararalaia goevagoeva. Unai amo, hereva momokani ese ena kudouna ia hamarerea bona ia veria diba kara ta ia karaia totona.​—⁠Roma 12:⁠2.

7. Kongregesen dekenai hereva ita henia neganai, dahaka heduru herevadia ese ita idia durua diba auka lasi dalanai ita hadibaia totona?

⁷ Kongregesen dekenai hereva haida ita henia, bona bema helai taudia huanai kamonai matamata taudia idia noho, edena bamona edia ‘anina idia hedinarai’ herevadia ita gaukaralaia diba? (1 Korinto 14:⁠9) Namona be ita idia durua diba heduru herevadia toi mani ita laloa. Gau ginigunana be, helai taudia do idia lalo-pararalaia lasi herevadia edia anina oi gwauraia hedinarai. Dirava ena Hereva lalo-pararalaia karana amo hereva idauidau ita dibaia. Bema hereva haida hegeregere, “Hesiai tauna mai ena kamonai, bona mai ena kara maoromaoro,” “mamoe idaudia,” bona “Babulonia badana” ita gaukaralaia, namona be auka lasi herevadia amo ita gwauraia hedinarai, unai amo ena anina ia hedinarai goevagoeva diba. Gau iharuana be, hereva momo gwauraia lasi. Hereva idauidau momo oi gwauraia neganai, reana idia kamonai taudia edia ura be do ia ore ia lao. Hereva ena anina do ia hedinarai goevagoeva bema anina lasi herevadia momo oi gwauraia lasi. Gau ihatoina be, gau momo herea oi herevalaia lasi. Hereva tahua namonamo karana amo hereva namodia momo ita davaria diba. To dala namona be hereva badadia haida sibona dekenai unai oi hapararaia, bona unai hereva badadia idia hamomokania herevadia bona idia makaia negana lalonai oi hahedinaraia goevagoeva diba gaudia sibona oi gaukaralaia.

Henanadai Namodia Gaukaralaia

8, 9. Edena dala ai ruma tauna ena ura ia habadaia henanadai ta ita abia hidi diba? Haheitalai gwauraia.

⁸ Iesu ese henanadai ia gaukaralaidia namonamo ena hahediba taudia edia lalona dekenai idia noho gaudia idia gwauraia bona edia lalona ia hagoadaia bona ia hadibaia totona. Henanadai ia gaukaralaia karana amo edia kudouna ia hamarerea. (Mataio 16:​13, 15; Ioane 11:26) Edena dala ai ita be Iesu bamona henanadai namodia ita gaukaralaia diba?

⁹ Ruma-ta-ruma-ta ai haroro gaukara ita karaia neganai, henanadai ita gaukaralaia diba taunimanima edia ura ita habadaia totona, unai amo dala ita kehoa diba Dirava ena Basileia ita herevalaia. Edena dala ai ruma tauna ena ura ia habadaia henanadai ta ita abia hidi diba? Gau ibounai itaia namonamo. Ruma ta dekenai ita lao neganai, idia noho gaudia ita itaia namonamo. Unai gabu ai maragidia edia gadara gaudia idia noho, unai ese ia hahedinaraia natudia be unai ruma dekenai idia noho, a? Bema oibe, reana ita henanadai diba, ‘Emu natuna ia tubu daekau neganai, tanobada be do edena bamona be nega ta oi laloa, a?’ (Salamo 37:​10, 11) Ruma ena iduara dekenai loka haida idia noho, eiava alam bona sekiuriti gaudia idia atoa, a? Reana ita henanadai diba: ‘Oi laloa nega ta do ia mai bena unai neganai oi bona lau be iseda ruma ai bona dala ai raskol garina do ita gari lasi, a?’ (Mika 4:​3, 4) Wilisea ena heau dalana ta ia noho, a? Reana ita henanadai: ‘Oi laloa nega ta do ia mai bona idia mauri taudia ibounai be gorere lasi maurina do idia moalelaia, a?’ (Isaia 33:24) Heduru herevadia momo be Buka Helaga Herevalaia bukana dekenai oi davaria diba.b

10. Edena dala ai henanadai ita gaukaralaia diba Baibel stiuden tauna ena kudouna ai idia noho lalohadai bona hemami ita “davaria diba” totona, to dahaka ita laloatao be namo?

¹⁰ Baibel stadi ita karaia neganai, edena bamona henanadai ita gaukaralaia namonamo diba? Ita be Iesu bamona lasi, taunimanima edia lalona ita itaia diba lasi. To, dala namona ai bona aonega dalanai ita gaukaralaia henanadai ese ita ia durua diba, stiuden tauna ena lalohadai bona hemami ita “davaria diba” totona. (Aonega Herevadia 20:⁠5) Hegeregere, reana ita be Diba bukana lalonai inai karoa, “Kara Maoromaoro ese Moale Ia Havaraia,” ita stadilaia. Unai karoa ese Dirava ena lalohadai koikoi karadia dekenai, sihari kava, bona gau ma haida dekenai ia herevalaia. Reana stiuden tauna be buka lalonai idia noho henanadai dekenai haere maorona ia henia, to ia dibaia noho gaudia ia abia dae, a? Reana ita henanadai: ‘Iehova ena lalohadai unai bamona gaudia dekenai oi abia dae, a?’ ‘Edena bamona unai Baibel ena hakaua herevadia be emu mauri lalonai oi badinaia diba?’ To, namona be oi laloatao, stiuden tauna oi matauraia. Ita ura lasi stiuden idia hahemaraia henanadai ita henidia.​—⁠Aonega Herevadia 12:⁠18.

11. Edena dala ai taunimanima vairanai hereva idia henia taudia ese henanadai idia gaukaralaia namonamo diba?

¹¹ Taunimanima vairanai hereva idia henia taudia danu ese henanadai idia gaukaralaia namonamo diba. Durua henanadai​—⁠kamonai taudia ese do idia haerelaia badabada lasi henanadai​—⁠be idia ia durua hereva maorodia idia lalohadailaia. Iesu ese nega momo unai bamona henanadai ia gaukaralaidia. (Mataio 11:​7-9) Ma danu, hereva henia tauna ese hamatamaia herevadia ia gwauraia murinai, henanadai ia gaukaralaia diba, do ia kikilaia gaudia edia hereva badadia ia hahedinaraia totona. Reana ia gwau diba: “Hari iseda herevahereva lalonai, inai henanadai edia haere do ita tahua . . .⁠” Bena ena hereva hadokoa totona, reana unai henanadai ia gwauraia lou diba, ia kikilaia hereva badadia ia hahedinaraia lou totona.

12. Mani haheitalai ta amo oi hahedinaraia edena bamona Keristani elda taudia ese henanadai idia gaukaralaia amo edia tadikaka idia durua diba, Dirava ena Hereva amo goada idia abia totona.

¹² Keristani elda taudia be mamoe vadivadi henia gaukarana lalonai, henanadai idia gaukaralaia amo “manoka taudia” idia durua diba, Iehova ena Hereva amo goada idia abia totona. (1 Tesalonika 5:14) Hegeregere, lalo-metau tauna idia durua totona, reana elda ta ese Salamo 34:18 ena hereva ia gaukaralaia diba. Unai siri ia gwau: “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.” Elda tauna ia ura unai lalo-manoka tauna ia itaia unai hereva be ia totona, unai dainai ia henanadai diba: ‘Iehova be daidia kahirakahira ia noho? Nega haida oi “lalohisihisi,” a? Bema, Baibel ese ia gwauraia hegeregerena, Iehova be unai bamona taudia kahirakahira ai, unai ena anina be ia be oi kahirakahira dekenai, ani?’ Unai bamona hagoadaia herevadia mai hebogahisina ese lalo-metau tauna ia hagoadaia diba.​—⁠Isaia 57:⁠15.

Hereva Maorodia

13, 14. (a) Bema tau ta ia gwau, ia itaia diba lasi Diravana ia abidadama henia lasi, reana edena bamona ita durua diba? (b) Dahaka dainai ita diba taunimanima ibounai edia lalona do ita veria lasi?

¹³ Iseda haroro gaukara lalonai, ita ura hereva mai edia badina maorodia amo taunimanima edia kudouna ita hamarerea. (Kara 19:8; 28:​23, 24) Unai ena anina be hereva aukadia do ita gaukaralaia, ma haida ese Dirava ena Hereva amo ia mai hereva momokani idia abia dae momokani totona, a? Lasi vaitani. Hereva maorodia be hereva aukadia amo ita gwauraia be anina lasi. Nega momo auka lasi dalanai hereva maorodia ita gwauraia ese anina namona ia havaraia. Mani haheitalai ta ita itaia.

¹⁴ Bema tau ta ia gwau ia itaia diba lasi Diravana ia abidadama henia lasi, edena bamona ita haere diba? Gau ta ia vara bona ia vara ena badina ita herevalaia diba. Gau ta ia vara neganai, ita abia dae badina ta dainai unai gauna ia vara. Reana ita gwau: ‘Bema oi be gunika gabuna ta dekenai oi noho bona ruma namona ta oi itaia, bona ia lalonai aniani momo idia noho (ia vara gauna), do oi abia dae haraga tau ta (badina ta) ese unai ruma ia haginia bona ia lalonai aniani gaudia ia atoa. Unai hegeregerena, tanobada dekenai idia noho gaudia bona aniani idauidau momo (idia vara gaudia) ita itaia neganai, ita abia dae tau ta (badina ta) ese unai gaudia ibounai ia havaraia, ani?’ Baibel ese inai ia gwauraia goevagoeva: “Momokani, ruma ibounai be mai edia karaia tauna, to gau ibounai ia karaia tauna be Dirava sibona.” (Heberu 3:⁠4) To, ena be hereva maorodia momo ita gwauraia, taunimanima haida edia lalona be do ita veria lasi. Baibel ese ita ia hadibaia “kudou-maoro taudia” sibodia be abidadama taudia ai do idia lao.​—⁠Kara 13:​48, NW; 2 Tesalonika 3:⁠2.

15. Dahaka hereva maorodia ita gaukaralaia diba Iehova ena kara bona dala idauidau ita hahedinaraia totona, bona haheitalai rua ese unai ita gaukaralaia diba dalana be edena bamona idia hahedinaraia?

¹⁵ Iseda hadibaia gaukara lalonai, herevana ia be haroro gaukara ai eiava kongregesen lalonai, hereva maorodia ita gaukaralaia diba Iehova ena kara bona ena dala idauidau ita hahedinaraia totona. Anina namona ia havaraia gauna be Iesu ese nega momo ia gaukaralaia dalana, bona ia hahedinaraia lalohadaina be, ‘Bema inai ia vara diba, ma ta be do ia vara momokani.’ (Luka 11:13; 12:24) Unai hadibaia dalana ese ta ena lalona ia veria diba. Reana ita ura hahedinaraia hel lahi ena hahediba herevana be anina lasi neganai, ita gwau diba: ‘Lalokau tamana ta ese ena natuna panisia totona, ena imana rua be lahi dekenai do ia atoa lasi. Bema ia be unai bamona, vadaeni iseda lalokau guba Tamana be hel ena lahi dekenai ta ia hahisia karana ia ura henia lasi momokani!’ (Ieremia 7:31) Iehova ese ena hesiai taudia ta ta ia naridia karana ita hadibaia totona, reana ita gwau diba: ‘Bema Iehova ese hisiu bilioni ta ta edia ladadia ia diba, ia idia lalokau henia bona ena Natuna ena dava bada rarana amo ia hoia taudia be ia lalodia bada momokani!’ (Isaia 40:26; Kara 20:28) Unai bamona hereva maorodia mai edia siahu ese ita idia durua diba taunimanima ma haida edia lalona ita veria totona.

Haheitalai Namodia

16. Dahaka dainai hadibaia gaukarana lalonai haheitalai be mai anina bada?

¹⁶ Anina namona idia havaraia haheitalaidia ese iseda hereva idia hanamoa, unai amo ma haida ese iseda hadibaia dalana idia ura henia bada. Dahaka dainai hadibaia gaukara lalonai haheitalai be mai anina bada? Hadibaia tauna ta ia gwau: “Gau ta ena toana laloa lasi dalanai ita laloa be taunimanima dekenai ia auka momokani karana ta.” Haheitalai ese iseda lalona dekenai mai anina bada laulau idia havaraia, unai amo ita idia durua lalohadai matamatadia ita lalo-pararalaia namonamo totona. Iesu ese haheitalai ia gaukaralaia namonamo. (Mareko 4:​33, 34) Unai hadibaia dalana ita gaukaralaia diba dalana mani ita itaia.

17. Edena gaudia foa ese haheitalai namona ia havaraia diba?

¹⁷ Edena bamona haheitalai be haheitalai namona? Gau ginigunana be, iseda kamonai taudia ese unai idia lalo-pararalaia, idia diba vadaeni gaudia ita gaukaralaia. Ita laloatao, Iesu ena haheitalai momo be ena kamonai taudia ese dina ta ta ai idia karaia gaudia amo ia abia. Gau iharuana be, oi gwauraia haheitalai ese oi gwauraia hereva ena anina ia hahedinaraia be namo. Bema oi hahegeregerea gauna ia maoro lasi, unai haheitalai ese kamonai taudia edia kamonai karana ia hadikaia diba. Gau ihatoina be, emu haheitalai lalonai anina lasi hereva idauidau oi gwauraia lasi. Namona be oi laloatao, Iesu ese ena hereva ena anina idia hahedinaraia gaudia sibona ia gaukaralaia, to anina lasi gaudia ia gwauraia lasi. Gau namba foa be, haheitalai ta ita gaukaralaia neganai, namona be unai ita badinaia diba dalana ita hahedinaraia. Bema unai bamona ita karaia lasi, haida ese unai haheitalai ena hereva badana badinaia dalana do idia lalo-pararalaia lasi.

18. Edena dala ai haheitalai namodia ita lalodia diba?

¹⁸ Edena dala ai haheitalai namodia ita lalodia diba? Sivarai lata herea mai ena hereva idauidau ita laloa be anina lasi. Haheitalai kwadogidia ese anina namona idia havaraia diba. Namona be oi kikilaia herevana ia haheitalaia gauna ta oi laloa. Hegeregere, reana Dirava ese dika ia gwauatao karana ita kikilaia, bona ita ura Kara 3:​19 ena hereva badana ita hahedinaraia, unuseniai ia gwau Iehova ese “emui kara dika do ia kokia,” eiava dahua oho. Unai be kara ta ia gwauraia, to dahaka gau korikorina ta ita herevalaia diba unai hereva ita hahedinaraia totona​—⁠pensolo ena raba ta, a? dabua ta, a? Reana ita gwau: ‘Iehova ese iseda kara dika ia gwauatao neganai, inai be hegeregere dabua ta (eiava pensolo ena raba) ia abia bona ia dahua oho bamona.’ Unai bamona auka lasi haheitalai ena anina do idia lalo-pararalaia haraga.

19, 20. (a) Haheitalai namodia be edeseniai ita davaria diba? (b) Iseda buka bona magasin lalonai idia halasia haheitalai namodia haida be dahaka? (Maua itaia danu.)

¹⁹ Edeseniai haheitalai namodia, haida edia sivarai momokanidia danu, oi davaria diba? Sibona emu mauri lalonai eiava emu abidadama tamona taudia, noho daladia idauidau amo idia mai taudia unai, amo oi tahua. Gabu idauidau momo amo haheitalai oi abia hidi diba, hegeregere idia mauri bona mauri lasi gaudia amo, ruma gaudia, eiava emu gabu dekenai idia vara gaudia edia sivarai badadia oi gaukaralaia diba. Haheitalai namodia ita davaria dalana namona ta be ita noga, dina ta ta ai idia vara gaudia ita “itaia” namonamo. (Kara 17:​22, 23) Taunimanima vairanai hereva henia karana ia kikilaia bukana ta ia gwau: “Taunimanima edia mauri bona gaukara idauidau ia itaia tauna be taunimanima idauidau momo ida ia herevahereva, gau idauidau ia itaia namonamo bona henanadai ia henia ela bona ia lalo-pararalaia, bona haheitalai idauidau do ia gogoa, bona ia ura ia gaukaralaia negana ai ia do idia durua bada.”

²⁰ Haheitalai namodia ita abia gabuna ma ta ia noho​—⁠Gima Kohorona bona Awake! magasin, bona Iehova ena Witnes taudia ese idia halasia buka ma haida unai. Unai buka bona magasin ese haheitalai idia gaukaralaia dalana amo gau momo oi dibaia diba.c Hegeregere, Diba bukana ena karoa 17 bona paragraf 11 dekenai ia noho haheitalai mani ita laloa. Dala dekenai idia heau hebou motuka idauidau be kongregesen lalonai idia noho tadikaka mai edia kara idauidau ida ia hahegeregerea. Dahaka dainai anina namona ia havaraia? Unai haheitalai be dina ta ta ai ia vara gauna ta, bona hereva badana ia hahedinaraia, bona ena anina ita ta ta dekenai ita itaia diba. Reana iseda hadibaia gaukarana lalonai, buka bona magasin lalonai idia noho haheitalai ita gaukaralaidia diba, reana Baibel stiuden ena noho dalana hegeregerena ita gaukaralaia diba eiava tok ta dekenai ita henia totona gau haida ita haidaua diba.

21. Dirava ena Hereva hadibaia tauna namona ai oi lao ese dahaka ahuna namona ia mailaia?

²¹ Hadibaia tauna namona ai oi lao ena ahuna be bada. Ita hadibaia neganai, ita diba gaudia be ma haida ida ita herevalaia; ita dekenai idia noho gaudia ita gaukaralaia idia ita durua totona. Unai bamona henia karana ese moale ia mailaia, badina Baibel ia gwau: “Henia kara ena moale be bada, abia kara ena moale be maragi.” (Kara 20:35) Dirava ena Hereva hadibaia taudia dekenai, unai moale ena badina be idia diba, ena namo do ia noho hanaihanai gauna korikorina​—⁠Iehova ena hereva momokani unai​—⁠be ma haida dekenai idia henia noho. Danu, ita moale badina ita diba ita ese Hadibaia Tauna Badana, Iesu Keriso, ita tohotohoa noho.

[Footnotes]

Oi Laloatao, A?

• Edena dala ai auka lasi dalanai ita hadibaia diba bema Baibel stadi ta ita karaia? bema kongregesen dekenai hereva ta ita henia?

• Ruma-ta-ruma-ta ai haroro gaukara ita karaia neganai, edena dala ai henanadai ita gaukaralaidia namonamo diba?

• Edena dala ai hereva maorodia ita gaukaralaia diba Iehova ena kara bona dala idauidau ita hahedinaraia totona?

• Edeseniai haheitalai namodia ita davaria diba?

[Box/Picture on page 31]

Inai Haheitalai Oi Lalodiatao, A?

Henunai be haheitalai namodia haida. Unai haheitalai idia gwauraia buka eiava magasin oi itaia bona edena bamona unai haheitalai ese idia herevalaia gaudia edia anina idia hahedinaraia oi tahua be namo, ani?

• Gaba toua taudia bona ane abia kekeni eiava motuka badana amo maua metaudia idia kokia taudia rua bamona, headava namona idia ura haginia taudia ese turana namona ena heduru idia abia be namo.​​—⁠Gima Kohorona, May 15, 2001, rau 16.

• Ta ese ena lalohadai ta be ena adavana ia hamaorolaia be bolo ta ia dekenai ia tahoa bamona. Bema ia tahoa metaira, ena adavana ese do ia gobea be haraga, to bema ia tahoa auka, reana do ia haberoa.​—⁠Diba ese Mauri Dekenai Ita Ia Hakaua Lao, rau 144

• Lalokau hahedinaraia karana dibaia be gado matamatana dibaia bamona.​​—⁠Gima Kohorona, February 15, 1999, rau 18, 22-3.

• Labana taudia ese edia koia gaudia amo animal idia abidia hegeregerena, lauma dikadia ese meamea amo taunimanima idia abidia.​​—⁠Diba ese Mauri Dekenai Ita Ia Hakaua Lao, rau 111.

• Iesu ese Adamu ena bese taudia ia hamauria karana be hegeregere hebogahisi taga tauna ta ia mai bona kampani ena abitorehai (kara koikoi biaguna tauna ese ia karaia gauna) ena davana ia karaia bona faktori ia kehoa lou bamona, unai amo idia gaukara taudia hutuma be namo idia davaria.​​—⁠Gima Kohorona, February 15, 1999, rau 16.

[Pictures on page 28]

Keristani taudia momokanidia be Dirava ena Hereva hadibaia taudia

[Picture on page 29]

Elda taudia ese henanadai idia gaukaralaia amo edia tadikaka idia durua diba, Dirava ena Hereva amo goada idia abia totona