Keristani Taudia Idia Heduru Heheni be Gau Badana
“Ita ibounai be . . . tauanina tamona ena kahana taudia.”—EFESO 4:25.
1. Ensaiklopidia ta ese tauanina be edena bamona ia gwauraia?
TAUNIMANIMA edia tauanina be Dirava ese ia havaraia hoa gauna ta! Buka ta (The World Book Encyclopedia) ia gwau: “Nega haida taunimanima idia gwau tauanina be masini ta—taunimanima ese idia karaia masini oredia ibounai ia hereaia. Momokani, tauanina be masini ta lasi. To ia be dala idauidau momo ai masini ta ida ita hahegeregerea diba. Masini hegeregerena, tauanina be mai ena kahana idauidau. Tauanina ena kahana ta ta, masini ena kahana ta ta hegeregerena, be mai edia gaukara. To kahana ibounai idia gaukara hebou bona unai dainai tauanina eiava masini be ia heau namonamo.”
2. Edena dala ai tauanina bona Keristani kongregesen idia hegeregere?
2 Oibe, tauanina be mai ena kahana idauidau, bona idia ta ta edia gaukara be mai anina bada. Tauanina ena varovaro ta, masolo ta, eiava kahana ma ta ia noho kava lasi. Unai hegeregerena, Keristani kongregesen lalonai idia noho taudia ta ta ese lauma dalanai kongregesen idia hagoadaia bona hahairaia diba. (1 Korinto 12:14-26) Namo lasi kongregesen tauna ta ia laloa ia be ma haida ia hereaia, to danu, namo lasi ta ia laloa ia be anina lasi.—Roma 12:3.
3. Efeso 4:25 ese edena bamona ia hahedinaraia Keristani taudia idia heduru heheni be gau badana?
3 Tauanina ena kahana idauidau idia gaukara hebou hegeregerena, Keristani taudia idia heduru heheni be gau badana. Aposetolo Paulo ese abidadama tamona horoa taudia ia hamaoroa: “Unai dainai hereva koikoi do umui hadokoa momokani. Umui ibounai ta ta dekenai hereva momokani do umui gwauraia, badina ita ibounai be Keriso ena tauanina tamona ena kahana taudia.” (Efeso 4:25) Lauma Israela taudia—“Keriso ena tauanina” taudia unai—be “tauanina tamona ena kahana taudia” dainai, idia ese ta ta dekenai mai momokani ida idia herevahereva bona idia gaukara hebou. Oibe, idia ibounai be idia ta ta ena. (Efeso 4:11-13) Mai moale ida tanobada helarona idia abia Keristani taudia momokanidia be idia danu idia lalo-tamona bona idia gaukara hebou.
4. Edena dala idauidau ai kamonai matamata taudia ita durua diba?
4 Lagani ibounai, tanobada paradaisona lalonai idia ura noho taudia tausen momo be bapatiso idia abia. Kongregesen taudia ma haida ese mai moale ida unai taudia idia durua ‘hereva badadia idia tahua’ totona. (Heberu 6:1-3) Idia ita durua diba daladia be edia Baibel henanadai ita haerelaia bona haroro gaukara lalonai idia ita durua. Hanaihanai Keristani heboudia ena kahana idauidau lalonai ita vareai karana amo, haheitalai namona ita henia bona unai matamata taudia ita durua diba. Dika idia vara negadiai, hagoadaia herevadia ita henia diba. (1 Tesalonika 5:14, 15) Namona be ma haida ita durua daladia ita tahua, “hereva momokani ena dala dekenai idia raka noho” totona. (3 Ioane 4) Herevana ita be matamata eiava ita buruka vadaeni, hari sibona hereva momokani lalonai ita vareai eiava hereva momokani lalonai lagani momo ita noho, ita ese iseda tadikaka edia namo lauma dalanai ita habadaia diba—iseda heduru idia abia be gau badana.
Heduru Idia Henia
5. Akwila bona Prisikila be edena dala ai Paulo idia durua bada?
5 Edia abidadama tamona taudia durua karana amo moale idia davaria taudia haida be Keristani headava taudia. Hegeregere, Akwila bona ena adavana Prisikila ese Paulo idia durua. Edia ruma dekenai idia abia dae, ia ida palai rumadia idia karaia hebou, bona ia idia durua Korinto dekenai kongregesen matamata idia haginia totona. (Kara 18:1-4) Bona ita diba lasi dalana ta ai, Paulo totona kahirakahira edia mauri idia haboioa. Roma dekenai idia noho neganai, Paulo ese unuseniai idia noho Keristani taudia dekenai ia gwau: “Prisikila bona Akwila dekenai lauegu hanamoa hereva lau siaia inai. Idia be lau danu ai gaukara hebou taudia Keriso Iesu ena hesiai gaukara lalonai. Idia ese lau durua totona kahirakahira idia mase. Lau ese idia lau hanamoa bada, to lau sibona lasi, Iuda lasi ekalesia orea taudia ibounai danu.” (Roma 16:3, 4) Akwila bona Prisikila bamona, hari Keristani taudia haida ese kongregesen idia hagoadaia bona tomadiho hebou taudia be dala idauidau ai idia durua, nega haida dagedage bona hamasea karadia amo Dirava ena hesiai taudia ma haida idia hunia, herevana unai idia karaia dainai sibona edia mauri idia haboioa diba.
6. Apolo ese dahaka heduru ia abia?
6 Akwila bona Prisikila ese hereva namonamo Keristani tauna Apolo idia durua danu, ia ese Iesu Keriso ena sivarai be Efeso ai idia noho taudia dekenai ia hadibaia. Unai nega ai, Apolo be Ioane ese ia karaia bapatisona sibona ia diba, unai bapatiso amo idia hahedinaraia Taravatu gwauhamatana dekenai idia karaia kara dika amo idia helalo-kerehai. Akwila bona Prisikila idia lalo-parara Apolo ese heduru ia abia be namo, unai dainai ia dekenai “Dirava ena dala ibounai idia hadibaia maoromaoro.” Reana ia dekenai idia hahedinaraia Keristani bapatiso ena anina be ta be ranu henunai ia diho bona lauma helaga ia abia. Apolo be ia dibaia gaudia ia badinaia. Gabeai Akaia dekenai, ia ese “Dirava ena hariharibada dainai, . . . Iesu badinaia taudia dekenai durua bada ia henia. Badina be Apolo ese taunimanima edia vairanai, iena hereva goada dekena amo Iuda taudia ia halusia. Ia ese Buka Helaga dekena amo ia hedinaraia momokani Iesu be Keriso.” (Kara 18:24-28) Ita ida idia tomadiho hebou taudia edia hereva ese nega momo ita idia durua, iseda lalo-parara Dirava ena Hereva dekenai ita habadaia totona. Unai dala dekenai danu, ita heduru heheni be gau badana.
Tauanina Dalanai Heduru Henia
7. Keristani taudia ma haida be tauanina dalanai idia dabu neganai, Filipi taudia ese dahaka idia karaia?
7 Filipi dekenai idia noho Keristani kongregesen taudia ese Paulo idia lalokau henia bada, bona Tesalonika dekenai ia noho neganai tauanina dalanai ia idia durua gaudia idia siaia. (Filipi 4:15, 16) Ierusalema dekenai idia noho tadikaka be tauanina dalanai idia dabu neganai, Filipi taudia ese mai edia ura ida heduru idia henia, herevana idia danu idia dabu. Paulo ese Filipi dekenai idia noho tadikaka bona taihu edia kara namona ia laloa bada dainai, ia gwau abidadama taudia ma haida dekenai idia be haheitalai namona.—2 Korinto 8:1-6.
8. Epafrodito be edena bamona kara ia hahedinaraia?
8 Paulo be dibura dekenai ia noho neganai, Filipi taudia ese harihari gaudia sibona idia siaia lasi, to Epafrodito idia siaia danu. Paulo ia gwau: “Keriso ena gaukara totona Epafrodito kahirakahira ia mase. Iena mauri ia negea gwauraia, lau dekenai durua totona, bona umui karaia diba lasi durua gauna, be ia ese do ia karaia totona.” (Filipi 2:25-30; 4:18) Baibel ese ita ia hadibaia lasi Epafrodito be elda tauna eiava hesiai tauna ta. To, ia be sibona ena ura ia tahua lasi bona heduru bada ia henia Keristani tauna, bona Paulo dekenai ena heduru be mai anina bada. Epafrodito bamona tauna ta be emu kongregesen lalonai ia noho, a?
Idia be “Durua Bada Herea” Idia Henia
9. Arisitako ese edena dala ai haheitalai namona ia hahedinaraia?
9 Akwila, Prisikila, bona Epafrodito bamona lalokau tadikaka bona taihu be kongregesen iboudiai dekenai do idia laloa bada. Iseda tomadiho tamona taudia haida be reana aposetolo edia negai ia noho tauna Arisitako hegeregerena. Ia bona ma haida be “durua bada herea” idia henia, reana haida edia lalona idia hagoadaia eiava dala idauidau ai heduru idia henia. (Kolose 4:10, 11) Arisitako be Paulo ia durua karana amo ia hahedinaraia nega dikana lalonai ia be turana korikorina. Ia be Aonega Herevadia 17:17 ese ia herevalaia tauna bamona, ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” Namona be ita ibounai ita hekwarahi, iseda Keristani tadikakadia ita “durua bada herea” totona, ani? Bona hisihisi idia abia taudia ita durua be mai anina bada.
10. Petero ese Keristani elda taudia dekenai dahaka haheitalai namona ia hahedinaraia?
10 Keristani elda taudia ese edia tadikaka bona taihu idia durua bada be gau badana. Keriso ese aposetolo Petero ia hamaoroa: “Oiemu tadikaka dekenai goada do oi henia.” (Luka 22:32) Petero be unai ia karaia diba, badina Keristani kara namodia ia hahedinaraia, bona Iesu ena toreisi lou murinai ia hahedinaraia namonamo. Elda taudia e, mai emui ura bona hebogahisi ida unai bamona umui karaia be namo, badina emui tadikaka be emui heduru idia abia be gau badana.—Kara 20:28-30; 1 Petero 5:2, 3.
11. Timoteo ena kara ita laloa ese edena dala ai ita ia durua diba?
11 Paulo ida ia loaloa hebou tauna Timoteo be elda tauna ta, bona ia ese Keristani taudia ma haida ia laloa bada. Ena be Timoteo be mai ena gorere, to abidadama goadana ia hahedinaraia bona Paulo ‘ia durua sivarai namona’ idia harorolaia totona. Unai dainai aposetolo tauna ese Filipi taudia dekenai ia gwau diba: “Lau dekenai ta ia noho lasi Timoteo hegeregerena, iena laloa bona lauegu laloa be tamona. Bona ia ura bada umui do ia durua.” (Filipi 2:20, 22; 1 Timoteo 5:23; 2 Timoteo 1:5) Timoteo ena kara ita tohotohoa neganai, ita ida Iehova idia tomadiho hebou taudia dekenai ita be hahenamo ta. Momokani, ita sibona eda tauanina ena manoka bona hahetoho idauidau ita haheaukalaia, to danu abidadama goadana bona iseda tadikaka bona taihu dekenai lalokau ita hahedinaraia be namo. Namona be hanaihanai ita laloatao, idia ese iseda heduru idia abia be gau badana.
Ma Haida Idia Laloa Bada Hahinedia
12. Doreka ena haheitalai amo dahaka ita dibaia?
12 Ma haida edia namo idia laloa bada Dirava gari henia hahinedia amo Doreka be ta. Ia mase neganai, Petero idia boiria bona atai daiutuna dekenai idia hakaua daekau. Unuseniai “vabu hahine ibounai be Petero kahirakahira idia gini, idia tai noho. Bona Doreka ia mauri noho neganai ia karaia dabua ibounai, kouti bona hetaru idia hedinarai henia.” Petero ese Doreka ia hamauria lou bona ita daradara lasi ia ese ena “kara namona bona hebogahisi kara” ia hahedinaraia lou. Hari inai nega ena Keristani kongregesen lalonai, hahine haida be Doreka bamona, idia ese dabua idia karaia eiava lalokau karadia ma haida idia karaia, dabu taudia idia durua totona. To momokani, edia kara namodia badadia be Basileia gaukarana bona hahediba taudia halaoa gaukarana idia durua karadia.—Kara 9:36-42; Mataio 6:33; 28:19, 20.
13. Lidia be edena dala ai ia hahedinaraia ena Keristani tadikaka ia lalodia?
13 Dirava ia gari henia hahinena ladana Lidia be ma haida edia namo ia laloa bada. Ia be Tuatira hahinena, to lagani 50 C.E. ai Paulo be Filipi dekenai ia haroro neganai, unuseniai ia noho. Toana be Lidia be Iuda tomadihona ia abia dae hahinena, to reana Filipi dekenai Iuda taudia be momo lasi bona dubu danu be lasi. Ia bona abidadama hahine ma haida be tomadiho totona sinavai ta badinai idia hebou neganai, aposetolo tauna be idia dekenai sivarai namona ia gwauraia. Unai sivarai ia gwau: “Lohiabada ese iena [Lidia ena] lalona ia kehoa, bona ia ese Paulo ia kamonai henia. Ia, mai ena ruma taudia danu bapatiso idia abia, gabeai ai dekenai ia noinoi, ia gwau, ‘Bema umui laloa lau be Lohiabada lau abidadama henia hahine, namo umui mai egu ruma, unuseni umui noho.’ Ia ura bada ai noho ia dekenai.” (Kara 16:12-15) Lidia ia ura ma haida dekenai kara namodia ia karaia dainai, Paulo bona ena bamodia ia doria ia danu idia noho totona. Hari inai negai, hebogahisi bona lalokau Keristani taudia ese unai bamona heabidae karana idia hahedinaraia neganai, unai ita laloa bada!—Roma 12:13; 1 Petero 4:9.
Umui Matamata Taudia Emui Heduru Danu Ai Abia be Namo
14. Edena dala ai Iesu Keriso ese matamata taudia ia kara henidia?
14 Dirava ena hebogahisi bona lalokau Natuna, Iesu Keriso, ese Keristani kongregesen ia hamatamaia. Taunimanima be ia danu idia noho neganai idia gari lasi, badina lalokau bona hebogahisi karadia ia hahedinaraia. Nega ta, haida ese edia natudia maragidia be Iesu dekenai idia mailaia neganai, iena hahediba taudia idia ura idia luludia. To Iesu ia gwau: “Lau ura maragi idia mai lau dekenai, umui lulua lasi, badina idia bamona be Dirava ena Basileia taudia. Momokani lau hamaoroa umui, daika ese Dirava ena Basileia be natuna maragina bamona ia abia dae lasi, ia be do ia vareai lasi unuseni.” (Mareko 10:13-15) Basileia ena helaro idauidau ita abia totona, natudia maragidia bamona ita manau bona diba ita tahua be namo. Iesu ese unai maragidia ia rosia bona ia hanamoa karana amo, idia dekenai iena lalokau ia hahedinaraia. (Mareko 10:16) Hari umui matamata taudia be edena bamona? Namona be umui diba, umui ai lalokau henia bona kongregesen lalonai umui noho be gau badana.
15. Dahaka hereva momokanidia Iesu ena mauri dekenai be Luka 2:40-52 ai idia noho, bona matamata taudia dekenai dahaka haheitalai namona ia hahedinaraia?
15 Iesu be ia do matamata neganai, Dirava bona Buka Helaga ia lalokau henia. Iena mauri lagani be 12 neganai, ia bona ena tama sina, Iosepa bona Maria, be edia hanua Nasareta amo idia lao Ierusalema dekenai, Pasova ariana idia hahelagaia totona. Idia giroa lou neganai, Iesu ena tama sina idia davaria Iesu be taunimanima huanai ia noho lasi. Gabeai ia idia davaria dubu ena daiutu ta lalonai ia helai noho, Iuda hadibaia taudia edia hereva ia kamonai bona idia dekenai henanadai ia henia. Iosepa bona Maria be ia noho gabuna idia diba lasi dainai ia hoa, bena ia nanadaia: “Umui diba lasi egu Tamana ena ruma be lauegu noho ruma, a?” Iena tama sina danu ia giroa lou, idia ia kamonai henia noho, bona ia tubu daekau mai aonega ida. (Luka 2:40-52) Iesu ese iseda matamata taudia dekenai haheitalai namona ia hahedinaraia! Namona be idia ese edia tama sina idia kamonai henia bona lauma gaudia dibaia karana dekenai edia ura idia habadaia.—Deuteronomi 5:16; Efeso 6:1-3.
16. (a) Iesu be dubu dekenai ia haroro neganai, memero haida be dahaka idia boiboilaia? (b) Hari inai negai, Keristani matamata taudia dekenai dahaka dala namo hereana ia noho?
16 Oi matamata dainai, reana sikuli dekenai bona emu tama sina ida ruma ta ruma ta dekenai Iehova oi herevalaia. (Isaia 43:10-12; Kara 20:20, 21) Iesu ena mase ia kahirakahira lalonai, ia be dubu dekenai ia haroro bona gorere taudia ia hanamoa neganai, memero haida idia boiboi: “Hosana, Davida ena natuna ita hanamoa!” Hahelaga taudia badadia bona taravatu hadibaia taudia be unai dekenai idia badu, idia gwau: “Inai maragidia edia hereva oi kamonai, a?” Iesu ia haere: “Oibe. Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’ ” (Mataio 21:15-17) Unai natudia bamona, umui kongregesen ena matamata taudia dekenai be dala namo hereana ia noho Dirava bona ena Natuna umui hanamoa totona. Ai ura umui be ai ida Basileia ita harorolaia hebou.
Dika Ia Vara Neganai
17, 18. (a) Dahaka dainai Paulo ese Iudea dekenai idia noho Keristani taudia totona moni ia haboua? (b) Mai edia ura ida edia Iudea tadikaka totona moni idia henia karana ese edena dala ai Iuda bona Idau Bese Keristani taudia ia durua?
17 Herevana iseda noho dalana be edena bamona, lalokau ese ita ia hagoadaia dika idia davaria Keristani tadikaka ita durua totona. (Ioane 13:34, 35; Iamesi 2:14-17) Paulo ese ena tadikaka bona taihu Iudea dekenai ia lalokau henia dainai, idia totona Akaia, Galatia, Makedonia, bona Asia ena kahana dekenai idia noho kongregesen amo moni ia haboua. Ierusalema dekenai idia noho hahediba taudia ese idia davaria dagedage, tuari, bona hitolo bada ese Paulo ia gwauraia “hisihisi,” “dagedage” bona “[edia] kohu be haida ese idia dadia” karadia idia havaraia. (Heberu 10:32-34; Kara 11:27–12:1) Unai dainai Paulo be Iudea ai idia noho ogogami Keristani taudia totona moni haboua gaukarana ia gunalaia.—1 Korinto 16:1-3; 2 Korinto 8:1-4, 13-15; 9:1, 2, 7.
18 Iudea dekenai idia noho helaga taudia totona moni idia henia karana ese ia hamomokania, Iehova idia tomadiho henia Iuda taudia bona Idau Bese taudia huanai tadikaka laloa bada karana ia noho. Idau Bese Keristani taudia ese moni idia henia karana amo idia hahedinaraia edia Iudea tadikakadia amo lauma dalanai idia abia gaudia dainai idia tanikiu henidia. Unai dainai, lauma bona tauanina dalanai ta ta idia durua heheni. (Roma 15:26, 27) Hari inai negai danu, iseda tadikaka ese dika idia davaria neganai idia totona ita henia kontribusen be mai iseda ura ida bona lalokau dainai ita henia. (Mareko 12:28-31) Unai dala ai danu ita heduru heheni be gau badana, bona unai amo sisina ia abia tauna do ia “hegeregere” danu.—2 Korinto 8:15.
19, 20. Dika idia vara negadiai Iehova ena taunimanima ese heduru idia henia ena haheitalai mani oi gwauraia.
19 Keristani taudia idia heduru heheni be gau badana ita diba dainai, iseda abidadama tamona tadikaka bona taihu ita durua haraga. Hegeregere, lagani 2001 ena matamana ai, El Salvador dekenai tano ia mareremarere bada bona ororo ena kahana idia makohia neganai, ia vara gauna mani oi laloa. Ripoti ta ia gwau: “Tadikaka ese El Salvador ena gabu ibounai dekenai heduru idia henia. Tadikaka oreadia Guatemala, United States, bona Canada amo idia mai ai idia durua totona. . . . Nega kwadogina lalonai ruma 500 mai kahana bona Kingdom Hall mai hairaidia toi idia haginia. Unai sibona edia ura idia dadaraia tadikaka edia gaukara goada bona gaukara hebou namonamo karana ese haroro namona ia henia.”
20 Ripoti ta South Africa amo be ia gwau: “Mozambique ena gabu badana ia hadikaia abata dikana ese iseda Keristani tadikaka momo edia mauri ia hadikaia danu. Mozambique dekenai ia noho brens opesi ese dala ia karaia edia dabu gaudia momo ia henia totona. To brens tadikaka idia noia ai gaukaralaia vadaeni dabua namodia be idia dabu tadikaka totona ai siaia. Ena lata be mita 12 konteina be dabua amo ai hahonua bona Mozambique dekenai idia noho tadikaka dekenai ai siaia.” Oibe, unai dala ai danu, ita heduru heheni be gau badana.
21. Stadi hereva gabena dekenai dahaka do ita kikilaia?
21 Guna ita herevalaia bamona, tauanina ena kahana ibounai be mai anina bada. Keristani kongregesen lalonai unai be ia momokani danu. Idia ibounai idia heduru heheni be gau badana. Ma danu, mai lalo-tamona ida idia gaukara hebou be namo. Unai ia vara totona heduru idia henia gaudia haida be stadi hereva gabena ese do ia hahedinaraia.
Edena Bamona Do Oi Haere?
• Tauanina bona Keristani kongregesen be edena dala ai idia hegeregere?
• Keristani taudia ginigunadia be edia tadikaka idia dabu neganai edena bamona idia kara?
• Edena Baibel haheitalai haida ese idia hahedinaraia Keristani taudia idia heduru heheni be gau badana?
[Picture on page 4]
Akwila bona Prisikila ese ma haida edia namo idia laloa
[Pictures on page 6]
Dika idia vara negadiai, Iehova ena taunimanima ese idia ta ta bona ma haida idia durua