Dirava Kahirakahira Oi Lao

“Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”​—⁠IAMESI 4:⁠8.

1, 2. (a) Nega momo taunimanima be dahaka idia gwau? (b) Iamesi be edena hagoadaia herevana ia henia, bona dahaka dainai unai idia abia be namo?

“DIRAVA be ita ida.” Unai bamona herevadia be bese edia pepe bona ami taudia edia unifom dekenai danu idia torea. Inai hereva “Dirava ita abidadama henia” be inai nega ena moni dekenai idia torea. Taunimanima momo idia gwau Dirava idia tura henia namonamo. To, unai bamona hetura karana ita abia be do ita gwauraia eiava torea gauna sibona lasi, ani?

² Baibel ese ia hahedinaraia, Dirava ita tura henia diba. To ita hekwarahi be namo. Aposetolo edia negai, horoa Keristani taudia haida danu ese edia hetura karana Iehova ida idia hagoadaia be namo. Keristani naria tauna Iamesi ese idia haida ia sisiba henia, badina tauanina gaudia idia ura henia bona lauma dalanai edia goeva karana idia haboioa. Idia ia sisiba henia lalonai, inai hagoadaia hereva mai siahuna ia henia: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:​1-12) Iamesi ena hereva, “raka kahirakahira lao,” ena anina be dahaka?

3, 4. (a) Inai hereva “Dirava dekenai do umui raka kahirakahira lao” dainai, aposetolo edia negai Iamesi ena revareva idia duahia taudia be reana dahaka idia laloa? (b) Dahaka dainai ita diba Dirava kahirakahira ita lao diba?

³ Iamesi be ena revareva idia duahia taudia idia diba momo herevana ta ia gaukaralaia. Iehova ena taunimanima edia namo totona, hahelaga taudia be Ia “kahirakahira idia mai” dalana be Mose ena Taravatu ese ia gwauraia goevagoeva. (Esodo 19:22) Unai dainai reana Iamesi ena revareva idia duahia taudia idia laloatao, namona be Iehova kahirakahira idia lao karana do idia laloa bada. Iehova be tanobada bona guba dekenai do idia matauraia bada herea tauna.

⁴ Unai sibona lasi, Baibel ia diba bada tauna ta ia gwau: “Unai hagoadaia herevana [Iamesi 4:8 dekenai] be helaro mai siahuna ta ia hahedinaraia.” Iamesi ia diba Iehova be hanaihanai mai ena lalokau ida goevadae lasi taudia ia boiria, ia kahirakahira idia lao totona. (2 Sivarai 15:⁠2) Iesu ena boubou gauna ese Iehova kahirakahira ita lao dalana ia kehoa momokani. (Efeso 3:​11, 12) Hari, taunimanima milioni momo dekenai Dirava lao henia dalana ia kehoa vadaeni! To, ia kehoa vadaeni dala namona be ita ese edena bamona ita gaukaralaia diba? Ita be Iehova Dirava kahirakahira ita lao diba daladia toi do ita laloa.

Dirava ‘Oi Dibaia Noho’

5, 6. Mero matamata Samuela ena sivarai ese Dirava ita “diba” ena anina be edena bamona ia hahedinaraia?

⁵ Ioane 17:3 ena hereva hegeregerena, Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” Iesu ia gwau Dirava “do idia diba” neganai, ena hereva ena anina be dahaka? Diba bada taudia momo idia gwau Greek gado gunana ai, idia gaukaralaia herevana be ma gau ta ia herevalaia danu​—⁠ia vara noho karana, unai amo ta be ma tau ta do ia tura henia namonamo.

⁶ Iesu ena nega lalonai Dirava do idia diba namonamo karana be kara matamatana ta lasi. Hegeregere, Heberu Revarevadia dekenai ia gwau Samuela be mero neganai, ia be “Lohiabada ia do diba lasi.” (1 Samuela 3:⁠7) Unai ena anina be Samuela ena diba iena Dirava dekenai be ia maragi momokani, a? Lasi. Iena tama sina bona hahelaga taudia ese gau momo ia dekenai idia hadibaia. To, diba bada tauna ta ia gwau unai siri dekenai idia gaukaralaia Heberu gado herevana be ta “ia diba namo herea momokani totona idia gaukaralaia.” Unai nega ai Samuela be Iehova ia do diba goevagoeva lasi, gabeai Iehova ena hereva gwauraia tauna ai ia lao negana ai Iehova ia diba goevagoeva hegeregerena. Samuela ia tubu daekau lalonai, ia be Iehova ia diba momokani, bona edia hetura karana ia namo herea.​—⁠1 Samuela 3:​19, 20.

7, 8. (a) Dahaka dainai Baibel ena hahediba hereva dobudia dainai ita lalo-manoka lasi? (b) Dirava ena hereva momokani dobudia haida, do ita stadilaia herevadia, be dahaka?

⁷ Emu hetura karana Dirava ida do ia namo momokani totona, ia oi dibaia noho, a? Unai bamona oi karaia totona, Dirava ia henia lauma aniani oi “ura dikadika” be namo. (1 Petero 2:⁠2) Oi laloa lasi hereva badadia sibona oi dibaia be hegeregere. Namona be oi hekwarahi Baibel ena hahediba hereva dobudia haida oi dibaia totona. (Heberu 5:​12-14) Oi be unai bamona hahediba herevadia dainai oi lalo-manoka, bona oi gwau idia auka herea, a? Bema oi be unai bamona, namona be oi laloatao Iehova be “Hadibaia Tauna” Badana. (Isaia 30:20) Goevadae lasi taudia edia lalona dekenai hereva momokani dobudia idia vareai dalana ia diba. Bona oi ia hadibaia gaudia oi lalo-pararalaia totona oi karaia gaukarana ena anina namona ia havaraia diba.​—⁠Salamo 25:⁠4.

⁸ Mani oiemu diba “Dirava ena laloa dobu gaudia” dekenai oi tahua namonamo. (1 Korinto 2:10) Unai be hesiku idia havaraia herevadia lasi, tomadiho stadilaia bona gunalaia taudia ese idia hepapahuahulaia herevadia bamona lasi. Unai be mai anina bada hahediba herevadia, iseda lalokau guba Tamana ena lalona bona kudouna ai idia noho gaudia idia hahedinaraia. Hegeregere, mauri davalaia boubouna, “hunia gauna” helagana, bona Iehova ese ena taunimanima hanamoa totona bona ena ura hagugurua totona ia karaia gwauhamata idauidau​—⁠unai hereva badadia bona idia bamona herevadia ma haida be ta sibona ena tahua karana bona stadi lalonai moale bona anina namona idia havaraia herevadia.​—⁠1 Korinto 2:⁠7.

9, 10. (a) Dahaka dainai hekokoroku be gau dikana, bona dahaka ese ita do ia durua ita dadaraia totona? (b) Iehova ena diba ita laloa neganai, dahaka dainai ita hekwarahi ita manau momokani totona be namo?

⁹ Lauma dalanai hereva momokani dobudia dekenai emu diba ia bada ia lao lalonai, namona be diba bada ese ia havaraia diba gauna​—⁠hekokoroku​—⁠ dainai oi naria namonamo. (1 Korinto 8:⁠1) Hekokoroku be gau dikana, badina taunimanima be unai kara dainai Dirava amo idia daudau momokani. (Aonega Herevadia 16:5; Iamesi 4:⁠6) Namona be oi laloatao, taunimanima ta ese ena diba ia heagilaia be badina lasi. Unai hahedinaraia totona, vanegai saiens gaudia dekenai diba ia bada noho karana ia herevalaia bukana ta ena hamatamaia herevana lalonai, inai hereva mani oi laloa: “Gau momo ai dibaia noho lalonai, ai lalo-parara noho ai diba gaudia be sisina sibona. . . . Ai dibaia gaudia ibounai be anina lasi bema ai do dibaia lasi gaudia ida ai hahegeregerea.” Unai bamona manau karana be moale ia mailaia. Vadaeni, ita ese diba hereadaena​—⁠Iehova Dirava ena diba⁠—ita laloa neganai, do ita manau ena badina badana ita itaia. Dahaka dainai?

¹⁰ Baibel lalonai Iehova idia gwauraia herevadia haida mani oi itaia. “Oiemu laloa be dobu herea momokani.” (Salamo 92:⁠5) “[Iehova ena] aonega be mai ena hetoana lasi.” (Salamo 147:⁠5) “[Iehova ena] diba be ta ese do ia davaria diba lasi.” (Isaia 40:28) “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba?” (Roma 11:33) Ia hedinarai goevagoeva, Dirava ena diba ibounai do ita dibaia diba lasi. (Hadibaia Tauna 3:11) Ia ese gau namodia momo ita dekenai ia hadibaia vadaeni, to diba bada herea be hanaihanai do ia noho, bona ita be unai diba amo eda diba do ita habadaia. Unai gauna ita hoalaia bona ita ia hamanaua danu, ani? Unai hegeregerena, diba ita abia noho lalonai, hanaihanai iseda diba do ita gaukaralaia Iehova kahirakahira ita lao totona bona ma haida ita durudia, idia danu be unai bamona idia karaia totona​—⁠ma haida edia ataiai ita sibona ita atoa totona do ita gaukaralaia lasi, lasi momokani.​—⁠Mataio 23:12; Luka 9:⁠48.

Emu Lalokau Iehova Dekenai Oi Hahedinaraia

11, 12. (a) Dirava ita dibaia karana ese ita dekenai dahaka ia havaraia be namo? (b) Dahaka ese ia hamomokania ta ena lalokau Dirava dekenai be lalokau momokanina?

¹¹ Aposetolo Paulo ese ia hahedinaraia, diba bona lalokau idia gaukara hebou. Ia gwau: “Bona inai gauna lau gurigurilaia noho, umui emui lalokau be do ia bada ia lao noho mai emui diba maoromaoro bona lalo-parara ibounai ida.” (Filipi 1:​9, NW ) Iehova bona iena ura dekenai ita dibaia noho hereva momokani namo hereadia dainai do ita hekokoroku lasi, to namona be unai diba ese iseda lalokau eda guba Tamana dekenai do ia habadaia.

¹² Oibe, momo idia gwau Dirava idia lalokau henia to unai be momokani lasi. Idia be reana edia kudouna lalonai idia noho hemami goadadia idia hahedinaraia. Unai bamona hemami idia namo, bona ia hahedinaraia tauna ita hanamoa danu, bema unai be diba maoromaoro hegeregerena ia hahedinaraia. To, unai gaudia sibona ese Dirava lalokau henia karana korikorina ia hahedinaraia lasi. Dahaka dainai? Mani Dirava ena Hereva lalonai lalokau ena anina oi itaia: “Dirava ita lalokau henia ena anina be inai: Dirava ena taravatu do ita badinaia.” (1 Ioane 5:⁠3) Unai hegeregerena, Iehova lalokau henia karana korikorina be kamonai karadia sibona amo ia hedinarai.

13. Dirava gari henia karana ese edena bamona ita do ia durua iseda lalokau Iehova dekenai ita hahedinaraia totona?

¹³ Dirava gari henia karana ese ita ia durua Iehova ita kamonai henia totona. Unai hemataurai bada karana ia vara badina ia ita dibaia, anina be iena mauri helagana, hairai, siahu, hahemaoro maoromaoro, bona lalokau ita dibaia. Ia dekenai ita lao kahirakahira totona unai bamona gari karana be mai anina bada. Momokani, Salamo 25:14 ia gwau: “Lohiabada idia gari henia taudia, be Lohiabada ese idia dekenai, iena hunia gaudia ia hadibaia noho.” Unai dainai bema dala maorona ai iseda guba lalokau Tamana ita habadua garina ita gari, ia kahirakahira do ita lao diba. Dirava ita gari henia dainai, Aonega Herevadia 3:6 dekenai ia noho aonega sisibana do ita badinaia: “Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” Unai ena anina be dahaka?

14, 15. (a) Dina ta ta lalodiai, iseda mauri lalonai dahaka gau haida ita abia hidi? (b) Gau ta ita abia hidi neganai, edena bamona ita hahedinaraia diba Dirava ita gari henia?

¹⁴ Dina iboudiai abia hidi badadia bona maragidia ita karaia. Hegeregere, oiemu gaukara turadia, sikuli turadia, eiava dekena taudia ida dahaka do umui herevalaia? (Luka 6:45) Oiemu vairanai idia noho gaukaradia be mai emu goada ida do oi karaia, eiava oi haorea totona gaukara sisina sibona oi karaia? (Kolose 3:23) Dirava idia lalokau henia lasi eiava idia lalokau henia bada lasi taudia do oi tura henia namonamo, eiava lauma gaudia idia laloa bada taudia ida emu hetura karana do oi hagoadaia? (Aonega Herevadia 13:20) Dahaka do oi karaia, dala maragidia ai danu, Dirava ena Basileia gaukarana oi durua totona? (Mataio 6:33) Bema dina ta ta ai oi abia hidi gaudia dekenai Baibel ena hakaua herevadia, ataiai idia hedinarai gaudia bamona, ese oi idia hakaua, oi be “oi karaia gaudia ibounai lalonai” Iehova oi laloa momokani.

¹⁵ Anina be, ita abia hidi gaudia ibounai dekenai, namona be inai lalohadai ese ita ia hakaua be namo: ‘Iehova ia ura dahaka do lau karaia? Edena dala ese ia do ia hamoalea bada?’ (Aonega Herevadia 27:11) Unai dala ai Dirava gari henia karana ita hahedinaraia be dala hereadaena iseda lalokau Iehova dekenai ita hahedinaraia totona. Dirava ita gari henia dainai do ita ura lauma dalanai, kara ai, bona tauanina ai ita goeva. Namona be oi laloatao, Iamesi ese Keristani taudia ia hagoadaia ‘Dirava dekenai do idia raka kahirakahira lao’ neganai, unai siri tamona ai inai bamona ia hamaorodia danu: “Kara dika taudia e, emui imana do umui huria. Keristani koikoi taudia e, laloa rua dekena amo umui emui kudouna do umui hagoevaia.”​—⁠Iamesi 4:⁠8.

16. Iehova dekenai ita henia karana amo dahaka do ita hagugurua diba lasi, to ita be hanaihanai dahaka ita karaia diba?

¹⁶ Momokani, Iehova ita lalokau henia ena anina be dika amo ita raka siri sibona lasi. Lalokau ese ita ia hagoadaia danu, kara maorodia ita karaia totona. Hegeregere, Iehova ena harihari bada herea karana be edena bamona ita laloa? Iamesi ia gwau: “Gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia.” (Iamesi 1:17) Momokani, Iehova dekenai gau ta ita henia neganai, iena kohu ita habadaia lasi. Ia be idia noho gaudia bona kohu ibounai edia biaguna. (Salamo 50:12) Bona Iehova dekenai iseda nega bona goada ita henia neganai, ita ese do ia abia diba lasi gauna ta ia dekenai ita henia lasi. Bema ita be ita ura lasi Dirava ena Basileia ena sivarai namona ita harorolaia, ia ese nadi do ia hamaoroa, idia boiboi totona! Vadaeni, dahaka dainai Iehova dekenai iseda kohu, nega, bona goada ita henia? Badina korikori be unai dala amo mai eda kudouna, mauri, lalona, bona goada ibounai ida iseda lalokau ia dekenai ita hahedinaraia.​—⁠Mareko 12:​29, 30.

17. Dahaka ese ita ia hagoadaia diba, mai moale ida Iehova dekenai gau ta ita henia totona?

¹⁷ Iehova dekenai gau ta ita henia neganai, namona be mai moale ida ita karaia, “badina be mai moale danu ia henia tauna be Dirava ese ia lalokau henia noho.” (2 Korinto 9:⁠7) Deuteronomi 16:17 dekenai, inai hakaua herevana ese ita ia durua diba, mai moale ida ita henia totona: “Tau ta ta ibounai ese harihari gauna ta Lohiabada dekenai do idia henia, edia goada, edia goada hegeregerena, Lohiabada emui Dirava ese idia dekenai ia henia hegeregerena.” Iehova ena hariharibada ita dekenai ita laloa neganai, ita ura bada ia dekenai gau momo do ita henia. Unai bamona henia karana ese iena kudouna ia hamoalea, hegeregere, tama eiava sina be ena natuna ena harihari gauna maragina ta ese ia hamoalea bada bamona. Unai dala ai iseda lalokau ita hahedinaraia neganai, Iehova kahirakahira do ita lao.

Guriguri amo Dirava Oi Tura Henia Namonamo

18. Dahaka dainai iseda guriguri hanamoa dalana ita laloa be namo?

¹⁸ Ta ta sibona eda guriguri ese nega namo hereana ta ia kehoa​—⁠unai be nega namona iseda guba Tamana ida ita herevahereva, ia dekenai iseda lalohadai ita gwauraia. (Filipi 4:⁠6) Guriguri be Iehova kahirakahira ita lao dalana ta dainai, namona be iseda guriguri do ita laloa. Hereva mai siahudia do ita gwauraia bona ita hakapudia namonamo be tahua gauna badana lasi, to namona be ita gwauraia herevadia be eda kudouna amo idia mai. Iseda guriguri be edena bamona ita hanamoa diba?

19, 20. Dahaka dainai ita do guriguri lasi neganai, unai ita lalohadailaia guna, bona dahaka gau haida ita lalohadailaia diba?

¹⁹ Ita do guriguri lasi neganai, unai ita lalohadailaia guna be namo. Bema iseda guriguri ita lalohadailaia guna, ita gurigurilaia gaudia do ita gwauraia maoromaoro bona eda guriguri ena anina do ia hedinarai, unai amo nega momo ita kamonai herevadia bona ita laloatao haraga herevadia do ita gwauraia loulou lasi. (Aonega Herevadia 15:​28, 29) Reana Iesu ese ena hahediba taudia dekenai ia hadibaia gurigurina ena kahana badadia haida oi laloa, bena edia anina iseda noho dalana dekenai oi laloa be heduru dalana ta. (Mataio 6:​9-13) Hegeregere, ita sibona ita nanadaia diba, inai tanobada dekenai Dirava ena ura ita karaia noho lalonai, ita ura dahaka kahana maragina ita karaia. Iehova ita hamaoroa diba ita ura eda goada hegeregerena ita do ia gaukaralaia, bona ita dekenai ia henia gaukarana do ita karaia totona iena heduru ita noia, a? Tauanina durua gaudia laloa momo karana ese ita ia hametaua, a? Edena kara dika dainai iseda dika ia gwauatao be namo, bona daika dekenai dika gwauatao karana ita hahedinaraia badabada be namo? Dahaka hedibagani ese ita ia hahisia, bona unai dainai ita lalo-parara Iehova ese ita do ia gimaia haraga be namo, a?

²⁰ Danu, gau ta dainai Iehova ena heduru do idia abia taudia ita laloa diba. (2 Korinto 1:11) To, tanikiu herevadia do ita laloaboio lasi. Bema ita laloa namonamo, Iehova ita tanikiu henia ena badina idauidau do ita davaria bona dina ta ta iboudiai ena kara namo dainai do ita hanamoa bada. (Deuteronomi 8:10; Luka 10:21) Unai bamona ita karaia be mai ena namo ta​—⁠ita ia durua mauri be mai tanikiu ida, dala namona ai do ita laloa.

21. Baibel lalonai edena haheitalai haida ita stadilaia diba, bena Iehova ita guriguri henia negadiai ita do idia durua?

²¹ Stadi karana ese iseda guriguri do ia durua diba danu. Dirava ena Hereva lalonai, abidadama tatau bona hahine edia guriguri namodia momo idia noho. Hegeregere, bema ita vairanai hekwakwanai ta ia noho dainai ita lalo-hekwarahi bona ita eiava eda lalokau taudia ese dika do ita davaria garina ita gari, Iakobo ena guriguri ita duahia diba; iena kakana bona ia badu dikadika tauna, Esau, ida ia hedavari gwauraia neganai ia gwauraia. (Genese 32:​9-12) Eiava Etiopia taudia milioni ta ese Dirava ena taunimanima idia hadikaia gwauraia neganai King Asa ese ia gwauraia gurigurina ita stadilaia diba. (2 Sivarai 14:​11, 12) Bema hekwakwanai ta ese Iehova ena ladana namona ia hadikaia diba dainai ita lalo-hekwarahi, Karamele Ororona ai Elia ese Bala tomadiho henia taudia edia vairanai ia gwauraia gurigurina ita laloa diba, bona Ierusalema ena noho dikana dainai Nehemia ese ia gwauraia gurigurina ita laloa danu. (1 King Taudia 18:​36, 37; Nehemia 1:​4-11) Unai bamona guriguri ita duahia bona lalohadailaia karana ese eda abidadama idia hagoadaia diba bona ita dekenai lalohadai namodia haida idia henia, ita lalo-hekwarahi negadiai dala namona ai Iehova ita guriguri henia totona.

22. Lagani 2003 ena siri badana be dahaka, bona inai lagani lalonai nega ta ta ai ita sibona dekenai edena bamona ita henanadai diba?

²² Momokani, Iamesi ena sisiba ita badinaia bona ‘Dirava dekenai ita raka kahirakahira lao’ be hahenamo bada hereana bona tahua gauna hereadaena, ma gau ta ese ia hanaia diba lasi. (Iamesi 4:⁠8) Unai bamona ita karaia totona, namona be iseda diba Dirava dekenai ita habadaia noho, ia dekenai iseda lalokau ita hahedinaraia badabada, bona eda guriguri lalodiai ia ita tura henia namonamo. Lagani 2003 ai, lagani ena siri Iamesi 4:8 ita laloa noho lalonai, namona be ita sibona ita tahua noho, ita be momokani Iehova kahirakahira ita lao noho eiava lasi. To, unai lagani ena siri dekenai, kahana iharuana be edena bamona? Edena dala ai Iehova be oi dekenai “do ia raka kahirakahira mai,” unai amo dahaka namo do idia vara? Hereva gabena ese unai do ia herevalaia.

Oi Laloatao, A?

• Dahaka dainai Iehova kahirakahira ita lao karana ita laloa bada be gau badana?

• Iehova ita dibaia noho totona edena tahua gaudia haida ita atoa diba?

• Edena bamona ita hahedinaraia diba ita ese Iehova ita lalokau henia momokani?

• Edena dala haida ai guriguri lalonai Iehova ita tura henia namo herea diba?

[Blurb on page 8]

Lagani 2003 ena siri badana be: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”​—⁠Iamesi 4:⁠8.

[Picture on page 4, 5]

Samuela ia tubu daekau lalonai, Iehova ia diba namonamo

[Picture on page 8]

Elia ese Karamele Ororona dekenai ia gwauraia gurigurina ita laloa be namo