Lalohisihisi Taudia Edia Lalona Hagoadaia
“Lohiabada ese, lau ia abia hidi vadaeni, . . . taitai taudia ibounai do lau durua, bona hagoadaia totona.”—ISAIA 61:1, 2.
1, 2. Daidia edia lalona ita hagoadaia be namo, bona dahaka dainai?
IEHOVA, lalona hagoadaia momokani gaudia ibounai ia henia Diravana, ese ita ia hadibaia ma haida be dika idia davaria neganai, idia ita laloa bada. Ita ia hadibaia “gari taudia do [ita] hagoadaia” bona taitai taudia edia lalona ita hagoadaia. (1 Tesalonika 5:14) Iseda tadikaka be unai bamona heduru idia ura neganai ita durudia. Kongregesen lalonai idia noho lasi taudia dekenai lalokau ita hahedinaraia danu, bona guna ita idia lalokau henia lasi taudia dekenai danu.—Mataio 5:43-48; Galatia 6:10.
2 Iesu Keriso ese Baibel ia perovetalaia gaukarana ia duahia bona ena anina ia sibona dekenai ia gwauraia: “Lohiabada Dirava ena Lauma be lauegu latanai ia noho. Badina be Lohiabada ese, lau ia abia hidi vadaeni, . . . ogogami taudia dekenai Sivarai Namona do lau [harorolaia] totona. Lohiabada ese lau ia siaia vadaeni, . . . taitai taudia ibounai do lau durua, bona hagoadaia totona.” (Isaia 61:1, 2; Luka 4:16-19) Hari inai negai idia noho horoa Keristani taudia be nega daudau lalonai idia diba unai gaukara idia karaia danu be mai anina, bona “mamoe idaudia” taudia ese unai gaukara ai idia bamoa mai moale ida.—Ioane 10:16.
3. Edena bamona taunimanima ita durudia diba, bema idia henanadai, “Dahaka dainai Dirava ese dika ia koua lasi?”
3 Dika ia vara bona taunimanima idia lalo-metau neganai, nega momo idia henanadai, “Dahaka dainai Dirava ese hisihisi ia koua lasi?” Baibel ese unai henanadai ia haerelaia goevagoeva. To, Baibel ia do stadilaia lasi tauna be reana nega sisina daudau ia hanaia murinai, unai haere ena anina ibounai do ia lalo-pararalaia. Iehova ena Witnes taudia edia buka idauidau amo heduru ia abia diba.a To, heduru abia matamaia totona, haida be Baibel ena hereva ta hegeregere Isaia 61:1, 2 dekenai idia duahia bona unai ese edia lalona ia hagoadaia, badina ia hahedinaraia Dirava ia ura taunimanima be edia lalona ia hagoadaia gaudia idia abia.
4. Poland dekenai Witnes hahinena ta be edena dala ai ia lalo-metau sikuli kekenina ta ia durua, bona unai ekspiriens ese edena bamona oi ia durua ma haida oi durua totona?
4 Matamata taudia, bona buruka taudia danu, be hagoadaia hereva idia abia be namo. Poland dekenai, ia lalo-metau kekenina ta be ia diba hahinena ta amo sisiba ia noia. Unai hahine, Iehova ena Witnes hahinena ta, ese mai manau ida ia hereva henia neganai, ia lalo-parara unai kekeni be henanadai bona daradara amo ia honu: “Dahaka dainai kara dika be bada herea? Dahaka dainai taunimanima idia hisihisi? Dahaka dainai lauegu tadina, ena tauanina kahana ia mase kekeni, ia hisihisi? Dahaka dainai egu kudouna ia namo lasi? Dubu ia gwau Dirava ena ura dainai unai bamona idia vara. Bema unai be momokani, ia do lau abidadama henia noho lasi!” Unai Witnes hahinena be ena lalona dekenai ia guriguri murinai, ia gwau: “Lau moale badina unai gaudia dainai lau oi nanadaia. Oi do lau durua toho.” Unai hahine ese ia hamaoroa, ia be do kekeni neganai ia be gau haida dekenai ia daradara danu, bona Iehova ena Witnes taudia ese ia idia durua. Unai hahine ia gwau: “Lau dibaia gauna be Dirava ese taunimanima ia hahisia lasi. Idia ia lalokau henia, edia namo ia laloa bada, bona kahirakahira tanobada dekenai gau badadia haida do ia karaia. Gorere, buruka, bona mase do idia ore, bona kamonai taudia be do idia mauri hanaihanai—inai tanobada latanai.” Unai hahine ese unai kekeni dekenai Apokalupo 21:3, 4; Iobu 33:25; Isaia 35:5-7 bona 65:21-25 edia hereva ia hahedinaraia. Idia herevahereva daudau murinai, unai kekeni be mai lalo-maino ida ia gwau: “Hari lau diba dahaka totona lau mauri. Ia namo bema lau mai bona oi lau itaia lou?” Ia ida pura ta ta lalonai nega rua Baibel stadi idia karaia.
Dirava ese Ia Henia Hagoadaia Hereva amo Hagoadaia
5. Hebogahisi ita hahedinaraia neganai, dahaka be lalona do ia hagoadaia momokani gauna?
5 Haida edia lalona ita ura hagoadaia neganai, mai hebogahisi ida ita hereva henidia be maoro. Ita hekwarahi lalohisihisi tauna dekenai eda hereva bona eda gado regena amo ita hahedinaraia iena noho ita laloa bada. Anina lasi herevadia gwauraia karana amo unai ia vara diba lasi. Baibel ese ita ia hamaoroa Buka Helaga ena hereva amo “do ita gini goada, bona Dirava ena namo dekenai do ita naria, mai haheauka danu.” (Roma 15:4) Unai ita laloa dainai, nega namona ta ai Dirava ena Basileia ena anina ita herevalaia, bona idia vara hekwakwanai do ia haoredia dalana be Baibel amo ita hahedinaraia diba. Bena unai Basileia dekenai do ita tabekau diba ena badina ita herevalaia. Unai dala amo, edia lalona do ita hagoadaia.
6. Namona be taunimanima ita durua dahaka idia lalo-pararalaia totona, unai amo Baibel ena hagoadaia hereva ena namo ibounai do idia abia?
6 Ta ese hagoadaia herevadia edia namo ibounai ia mamia totona, namona be Dirava momokanina ia diba, ia be edena bamona Tauna, bona ena gwauhamata dekenai ita tabekau ena badina do ia diba. Bema ita durua tauna be Iehova ia do tomadiho henia lasi, namona be inai hereva ita hahedinaraia. (1) Baibel lalonai idia noho hagoadaia herevadia be Iehova, Dirava momokanina, amo idia mai. (2) Iehova be Siahu Ibounai Diravana, guba bona tanobada ia Havaraia Tauna. Ia be lalokau Diravana bona hebogahisi mai lalokauna bona hereva momokani amo ia honu. (3) Bema Dirava ena Hereva lalonai diba maoromaoro abia karana amo Dirava kahirakahira ita lao, ita do ia hagoadaia diba lalo-hekwarahi ita haheaukalaia totona. (4) Taunimanima idauidau ese idia davaria hahetoho ta ta be Baibel ena siri idauidau ese idia hahedinaraia.
7. (a) Dahaka do ita hagugurua diba bema ita hahedinaraia namonamo ‘Keriso dainai Dirava ena durua ia bada’? (b) Bema ta ia lalo-parara, ia karaia karadia be idia dika, edena bamona oi hagoadaia diba?
7 Haida ese lalohisihisi taudia, Baibel idia abia dae taudia, be lauma dalanai idia hagoadaia totona, 2 Korinto 1:3-7 idia duahia. Unai idia karaia neganai, inai hereva “Dirava ena durua ita abia danu ia bada, Keriso dainai” be idia hahedinaraia namonamo. Unai siri ese ta ia durua diba, bena do ia lalo-parara Baibel dekenai iena lalona hagoadaia herevadia idia noho, bona do ia laloa bada be namo. Unai ese dala ia kehoa diba, reana ma nega ta ai, emui herevahereva umui habadaia totona. Bema ta ia laloa iena hisihisi be ia karaia kara dikadia dainai ia davaria, ita hahemaoro henia lasi, to reana ita hamaoroa 1 Ioane 2:1, 2 bona Salamo 103:11-14 dekenai idia torea herevadia be iena lalona do idia hagoadaia. Unai dala amo Dirava ese ia henia hagoadaia hereva amo ma haida ita hagoadaia.
Dagedage Eiava Moni Ena Hekwakwanai Dainai Mauri Ia Auka Neganai
8, 9. Edena dala ai dagedage dainai idia hisihisi taudia edia lalona hagoadaia herevadia ita henia namonamo diba?
8 Taunimanima milioni momo be dagedage karadia—dagedage raskol karadia eiava tuari ena dagedage—ese edia mauri idia hadikaia. Edena bamona edia lalona ita hagoadaia diba?
9 Keristani taudia momokanidia idia naria namonamo, unai amo edia hereva ta eiava kara ta amo idia hahedinaraia lasi tanobada ena hepapahuahu dekenai kahana ta dekenai idia gini. (Ioane 17:16) To idia ese Baibel amo idia hahedinaraia, hari inai mauri aukana be do ia noho hanaihanai lasi. Salamo 11:5 idia duahia diba, Iehova ena lalohadai dagedage idia ura henia taudia dekenai do idia hahedinaraia totona eiava Salamo 37:1-4 idia duahia diba bena idia hahedinaraia Dirava ese ita ia hagoadaia ita sibona ese dika ena davana ita henia lasi to ia ita abidadama henia. Salamo 72:12-14 ese Solomona Badana, Iesu Keriso, hari guba dekenai King dagi ai ia lohia tauna, ena hemami hisihisi idia davaria kava taudia dekenai ia hahedinaraia.
10. Bema oi be lagani momo tuari negana lalonai oi noho, idia gwauraia siridia ese edena bamona oi ia hagoadaia diba?
10 Taunimanima haida edia mauri lalonai tuari ia vara loulou badina orea haida be siahu abia totona idia hepapahuahu. Idia laloa tuari bona ena murinai idia vara dika be mauri lalonai idia vara gaudia sibona. Idia laloa edia dala tamona be, bema tano ma ta dekenai idia heau lao, reana edia noho do ia namo. To idia momo be unai bamona idia karaia neganai idia hegeregere lasi, bona idia karaia toho taudia momo be edia mauri idia haboioa. Nega momo tano ma ta dekenai idia heau lao taudia idia davaria gauna be hekwakwanai haida idia rakatania to hekwakwanai ma haida idia abia. Salamo 146:3-6 ese unai taudia ia durua diba, tano ma ta dekenai idia heau lao karana ia hereaia gauna ta idia laloa noho totona. Mataio 24:3, 7, 14 eiava 2 Timoteo 3:1-5 edia peroveta herevadia ese ia durudia diba, edia noho idia lalo-pararalaia namonamo totona bona idia haheaukalaia negana ena anina idia diba totona. Unai gauna be, ita be inai tanobada gunana ena dokona ai ita noho. Salamo 46:1-3, 8, 9 bona Isaia 2:2-4 ese reana do idia durudia bena idia diba maino negana ta do ia vara momokani.
11. West Africa dekenai, hahine ta be edena siri ese ena lalona idia hagoadaia, bona dahaka dainai?
11 West Africa dekenai tuari ta ena nega lalonai, buleti idia pidia lao pidia mai lalonai hahine ta be ena ruma amo ia heau mauri. Iena mauri be gari bona lalohisihisi amo ia honu. Gabeai, unai ruma bese be tano ma ta dekenai idia noho neganai, tau ese edia headava pepana ia gabua, unai hahine mai ena bogana bona edia natuna mero, ena mauri lagani be ten, ia siaidia, bona unai tau be pris tauna ai ia lao. Ta ese unai hahine dekenai Filipi 4:6, 7 bona Salamo 55:22 edia hereva, bona Gima Kohorona bona Awake! edia hereva ia hahedinaraia neganai, ena lalona ia hagoadaia bona ena mauri ena anina ia davaria.
12. (a) Moni ena hekwakwanai idia davaria taudia dekenai Baibel be dahaka heduru ia henia? (b) Witnes hahinena ta Asia dekenai be edena dala ai hoihoi hahinena ta ia durua?
12 Moni ena hekwakwanai ese taunimanima milioni momo edia mauri ia hadikaia. Nega haida tuari bona ena murinai idia vara dika idauidau dainai unai ia vara. Nega haida, gavamani ese aonega lasi daladia ia badinaia bona siahu taudia edia mataganigani bona koikoi dainai, taunimanima idia haboua moni idia haorea bona edia kohu idia henia lou. Ma haida be nega ta unai bamona tanobada ena kohu idia biagua lasi. Unai taudia ibounai edia lalona ia goada diba badina Dirava ese ita ia hamaoroa ia idia abidadama henia taudia do ia durua bona kara maoromaoro tanobadana ta ia gwauhamatalaia, ia lalonai taunimanima be edia gaukara ena anina do idia moalelaia. (Salamo 146:6, 7; Isaia 65:17, 21-23; 2 Petero 3:13) Asia tanona ta dekenai, Witnes hahinena ta be hoihoi hahinena ta ena lalo-hekwarahi herevadia moni ena hekwakwanai dekenai ia kamonai neganai, ia hadibaia ia vara gauna be tanobada ibounai lalonai idia vara gaudia edia kahana ta. Mataio 24:3-14 bona Salamo 37:9-11 idia herevalaia, unai murinai Baibel idia stadilaia hanaihanai.
13. (a) Bema taunimanima be gwauhamata koikoidia dainai idia lalohisihisi, Baibel amo edena bamona idia ita durua diba? (b) Bema taunimanima idia laloa edia noho ena dika ese ia hamomokania Dirava ia noho lasi, edena bamona idia ida unai oi herevalaia diba?
13 Taunimanima be lagani momo lalodiai idia hisihisi eiava gwauhamata koikoi momo dainai idia lalohisihisi, bona reana idia be Aigupito dekenai Israela taudia bamona, “edia laloa ibounai ia ore” dainai idia kamonai lasi. (Esodo 6:9) Unai bamona taudia dekenai, reana hekwakwanai idia haheaukalaia namonamo totona bona momo edia mauri idia hadikaia kara kereredia idia dadaraia totona, Baibel ese idia ia durua diba daladia oi hahedinaraia be namo. (1 Timoteo 4:8b) Reana haida idia laloa edia noho ena dika ese ia hamomokania Dirava ia noho lasi eiava ia ese idia ia laloa lasi. Reana idia dekenai siri maorona ta oi herevalaia bona Dirava ese heduru ia henia to momo ese idia abia dae lasi idia lalo-pararalaia totona oi durudia be namo.—Isaia 48:17, 18.
Lai Gubadia Bona Tano Mareremarere Idia Vara Neganai
14, 15. Dika ta dainai momo idia daradoko neganai, Iehova ena Witnes taudia be edena dala ai hebogahisi karana idia hahedinaraia?
14 Lai gubana ta, tano mareremarere ta, lahi ta, eiava gau ta ia pou neganai dika bada ia vara diba. Reana taunimanima momo do idia lalohisihisi. Dahaka do ita karaia diba, idia mauri noho taudia edia lalona ita hagoadaia totona?
15 Namona be taunimanima be ma haida ese idia lalodia bada ena hemami idia abia. Tano ta dekenai terorist taudia edia dagedage karana ta dainai dika ia vara murinai, taunimanima momo idia daradoko. Idia momo be edia ruma bese taudia, idia ia ubua tauna, edia turana, edia moni gaukara, eiava idia ia durua gauna ta idia haboioa. Iehova ena Witnes taudia be edia noho gabudia ai unai taudia idia durua, idia haboioa gaudia momo dainai idia dekenai sori herevana bona Baibel amo hagoadaia herevadia idia gwauraia. Taunimanima momo ese edia hebogahisi karana idia moalelaia bada.
16. El Salvador ena kahana ta dekenai dika ta ia vara neganai, dahaka dainai unuseniai Witnes taudia edia haroro gaukara be anina namona ia havaraia?
16 Lagani 2001 lalonai, El Salvador dekenai tano mareremarere badana ta dainai kopukopu bada herea ia diho bona taunimanima momo ia hamasea. Witnes hahinena ta ena natuna mero, ena mauri lagani be 25, bona mero ena maoheni kekenina ena tadina kekeni rua danu be idia mase. Unai mero ena sinana bona iena maoheni kekenina be maoromaoro haroro gaukara idia karaia goadagoada. Momo ese idia hamaorodia idia gwau, Dirava ese idia mase taudia ia abia eiava unai be Dirava ena ura. Unai Witnes hahinedia ese Aonega Herevadia 10:22 ena hereva idia gwauraia bona idia hahedinaraia Dirava ia ura lasi do ita hisihisi. Idia ese Roma 5:12 idia duahia, bena idia hahedinaraia mase be Dirava ena ura dainai lasi to taunimanima edia kara dika dainai ia vara. Salamo 34:18, Salamo 37:29, Isaia 25:8, bona Apokalupo 21:3, 4 dekenai idia noho hagoadaia herevadia idia gwauraia danu. Taunimanima idia kamonai namonamo, badina unai hahine ruaosi edia ruma bese taudia be unai dika lalonai idia mase, bona Baibel stadi momo idia hamatamaia.
17. Dika ia vara neganai, reana edena bamona heduru do ita henia?
17 Dika ia vara neganai, reana tauanina dalanai heduru do ia abia haraga tauna ta do oi davaria. Anina be reana doketa do oi ringi henia, hospital dekenai ia oi abia lao, eiava aniani bona noho gabuna ia abia totona oi karaia diba karadia do oi karaia. Lagani 1998 ai, Italy dekenai unai bamona dika ta ia vara neganai, nius torea tauna ta be Iehova ena Witnes taudia ia itaia, idia be “kara haida idia karaia, idia hisihisi taudia idia durua totona, bona idia laloa lasi unai taudia be edena tomadiho taudia.” Gabu haida dekenai, nega dokona totona idia perovetalaia gaudia ese hisihisi bada idia havaraia. Unai bamona gabudia dekenai, Iehova ena Witnes taudia be Baibel ena peroveta herevadia idia hahedinaraia, bona Baibel dekenai Dirava ena Basileia ese noho namo momokanina do ia mailaia ena gwauhamata amo taunimanima edia lalona idia hagoadaia.—Aonega Herevadia 1:33; Mika 4:4.
Ruma Bese Tauna ta Ia Mase Neganai
18-20. Ruma bese ta lalonai mase ia vara neganai, edia lalona hagoadaia totona dahaka oi gwauraia eiava karaia diba?
18 Dina ta ta iboudiai taunimanima milioni momo be edia lalokau tauna ta ia mase dainai idia taitai. Reana Keristani haroro gaukara oi karaia eiava dina ta ta ena gaukara idauidau oi karaia neganai idia lalohisihisi taudia do oi davaria. Edia lalona oi hagoadaia totona dahaka oi gwauraia eiava karaia diba?
19 Unai tauna ia lalohisihisi bada herea, a? Idia taitai noho varavara taudia ese ruma idia hahonua, a? Reana oi gwauraia diba gaudia be momo, to oi aonega be gau badana. (Hadibaia Tauna 3:1, 7) Reana aonega dalana be hebogahisi oi hahedinaraia, Baibel herevalaia buklet, magasin, eiava pepapepa ta oi rakatania, bena dina haida murinai oi giroa lou heduru ma haida henia totona. Nega namona ai, oi hadibadia oi ura Baibel amo lalona hagoadaia herevadia haida oi gwauraia. Unai ese edia hemami ia hanamoa diba. (Aonega Herevadia 16:24; 25:11) Mase taudia oi hatorea isi lou diba lasi Iesu ia karaia hegeregerena. To Baibel ena hereva mase ena anina dekenai oi herevalaia diba, ena be reana unai nega ai lalohadai kereredia do oi hamaoromaoroa toho lasi. (Salamo 146:4; Hadibaia Tauna 9:5, 10; Esekiela 18:4) Baibel ena gwauhamata herevadia toreisi lou dekenai oi duahia diba. (Ioane 5:28, 29; Kara 24:15) Edia anina hahedinaraia totona, reana Baibel dekenai toreisi lou ena sivarai ta oi hahedinaraia. (Luka 8:49-56; Ioane 11:39-44) Ita dekenai unai helaro namona ia henia lalokau Diravana ena kara namodia ita gwauraia hedinarai danu. (Iobu 14:14, 15; Ioane 3:16) Unai hahediba herevadia ese oi idia durua dalana bona idia oi abia dae ena badina oi herevalaia.
20 Idia lalohisihisi taudia be Kingdom Hall dekenai oi boiria mai neganai, reana idia do ia durua edia dekena taudia idia lalokau henia momokani taudia bona hagoadaia heheni daladia idia diba taudia idia hedavari henia totona. Sweden dekenai, hahine ta ia lalo-parara unai be ena mauri ibounai lalonai ia tahua gauna.—Ioane 13:35; 1 Tesalonika 5:11.
21, 22. (a) Dahaka ita karaia be namo, bema ita ura ma haida edia lalona ita hagoadaia? (b) Baibel ia diba namonamo tauna ta ena lalona be edena bamona oi hagoadaia diba?
21 Bema oi diba tau ta, kongregesen lalonai eiava murimurinai, be ia lalohisihisi noho, nega haida emu hemami be oi diba lasi dahaka do oi gwauraia eiava karaia, a? Greek gado herevana, nega momo Baibel lalonai idia hahanaia “lalona hagoadaia,” ena anina be “ta badinai ia noho totona ia boiria mai.” Lalona hagoadaia tauna korikorina ai oi lao ena anina be oi noho hegaegae lalohisihisi taudia oi durua totona.—Aonega Herevadia 17:17.
22 Bema oi ura oi hagoadaia tauna be Baibel ena hereva mase, mauri davalaia boubouna, bona toreisi lou dekenai ia diba vadaeni be edena bamona? Turana ta, unai hahediba herevadia ia abia dae tauna, ia ida ia noho be hagoadaia karana. Bema ia ura hereva, oi kamonai namonamo. Namo lasi oi laloa hereva latana ta do oi gwauraia. Bema siri haida umui duahia, namona be oi laloa unai be Dirava ese ia gwauraia herevadia, umui ruaosi emui lalona idia hagoadaia totona. Unai siri ese idia gwauhamatalaia gaudia dekenai umui ruaosi emui lalo-goada oi gwauraia hedinarai. Dirava ena hebogahisi oi hahedinaraia bona Dirava ena Hereva lalonai idia noho hereva momokani namo hereadia umui herevalaia karadia amo, oi ese lalohisihisi taudia oi hagoadaia diba “durua ibounai ia henia Diravana,” Iehova, amo goada idia abia totona.—2 Korinto 1:3.
[Footnote]
a Diba ese Mauri Dekenai Ita Ia Hakaua Lao bukana, karoa 8; Buka Helaga Herevalaia bukana, rau 188-195, 157-161; Is There a Creator Who Cares About You? bukana, karoa 10; bona Dirava ese Ita Ia Laloa Eiava? buklet itaia.
Emu Haere be Dahaka?
• Dika ia vara neganai, taunimanima momo idia gwau unai be daika ena kerere, bona edena bamona ita durudia diba?
• Edena bamona ma haida ita durua diba Baibel dekenai idia noho hagoadaia herevadia amo namo bada idia davaria totona?
• Umui noho gabudia dekenai dahaka gaudia ese taunimanima momo dekenai lalohisihisi idia havaraia noho, bona edena bamona edia lalona ita hagoadaia diba?
[Pictures on page 29]
Lalo-metau negana ai lalona hagoadaia momokani sivaraina gwauraia
[Credit Line]
Refugee camp: UN PHOTO 186811/J. Isaac
[Picture on page 30]
Turana ta be lalohisihisi tauna ida ia noho neganai, ena lalona ia hagoadaia