Lauma Dalanai Tahua Gaudia Gaukaralaia Emu Havaraia Tauna Hanamoa Totona

“BEMA bouti taria tauna ia diba lasi edena gabu ia lao, herevana lai be edena kahana amo ia toa, to ia be lai maorona lasi.” Unai hereva be aposetolo edia negai ia noho Roma aonega tauna ta ese ia gwauraia. Unai hereva ese ia hamomokania bema ta ia ura ena mauri be mai ena anina, namona be tahua gaudia do ia laloa guna.

Baibel ese tahua gaudia idia atoa taudia edia haheitalai ia herevalaia. Lagani 50 lalonai, Noa ia gaukara goada “lagatoi badana ia karaia” ena ruma bese taudia ia hamauria totona. Peroveta tauna Mose “be Dirava do ia henia davana namona ia laloa.” (Heberu 11:7, 26) Mose ena gabu ia abia tauna, Iosua, be Dirava ese maduna ta ia henia, unai be Kanana taudia do ia tuari henia bona edia tano do ia abia.​—Deuteronomi 3:​21, 22, 28; Iosua 12:​7-​24.

Aposetolo edia negai, aposetolo Paulo ese Iesu ena hereva, “Basileia ena Sivarai Namona be tanobada ibounai dekenai do idia harorolaia” ia laloa bada, bona unai be iena tahua gauna ai ia halaoa. (Mataio 24:14) Paulo be ‘idau bese taudia edia vairanai [Iesu] ena ladana do ia gwauraia’ gaukarana bona Lohiabada Iesu amo ia kamonai hereva bona matahanai ese idia hagoadaia. Unai dainai ia ese Asia Minor amo ela bona Europe dekenai Keristani kongrigeisen haida ia haginia.​—Kara 9:​15; Kolose 1:​23.

Oibe, gunaguna ema bona hari, Iehova ena hesiai taudia ese tahua gaudia namodia idia atoa bona idia hagugurudia karana amo Dirava ena ladana idia hanamoa. Hari inai negai, edena bamona lauma dalanai tahua gaudia ita atoa diba? Dahaka tahua gaudia ita atoa, bona dahaka ita karaia diba ita hagugurudia totona?

Ura Maorodia be mai Anina Bada

Taunimanima edia mauri lalonai tahua gaudia idauidau idia abia hidi diba, bona inai tanobada dekenai tahua gaudia idia atoa taudia idia noho danu. To, tiokratik tahua gaudia be tanobada ena tahua gaudia amo idia idau. Tanobada taudia be kohu idia ura henia dikadika bona dagi bona siahu idia mataganiganilaia, unai dainai edia tahua gaudia momo idia atoa unai gaudia abia totona. Ita hekwarahi siahu bona ladana bada abia totona be maoro lasi! Iehova Dirava ena ladana idia hanamoa tahua gaudia be ia ita tomadiho henia karana bona ena Basileia durua totona ita karaia karadia. (Mataio 6:33) Unai bamona tahua gaudia ita abia hidi, badina ita ese Dirava bona iseda dekena tauna ita lalokau henia bona ita ura Dirava ita badinaia.​—Mataio 22:37-​39; 1 Timoteo 4:7.

Namona be lauma dalanai ita atoa tahua gaudia be mai eda ura maorodia ida ita tahua, herevana idia be hesiai gaukara ita habadaia eiava lauma dalanai ita goada ita lao. To, nega haida mai eda ura maorodia ida ita tahua gaudia be idia guguru lasi. Edena bamona tahua gaudia ita atoa diba, bona dahaka ita karaia unai gaudia ita hagugurua totona?

Namona be Iseda Ura Ia Goada

Mani Iehova ese edena bamona tanobada ia karaia dalana ita laloa. Inai hereva: “Adorahi ia ore, bona daba ia mai,” ese ia hahedinaraia Iehova ese ia karaia gaudia be edia nega korikori ai ia karaia haorea. (Genese 1:​5, 8, 13, 19, 23, 31) Unai dina ta ta lalodiai ia karaia gaudia ia do hamatamaia lasi neganai, ena tahua gauna ia diba, bona ia diba dahaka do ia karaia unai tahua gauna ia hagugurua totona. Bona Dirava ese gau ibounai ia havaraia ena palani ia hagugurua. (Apokalupo 4:11) Iobu ia gwau: “[Iehova] ena ura hegeregerena ia karaia noho nega ibounai.” (Iobu 23:13) Iehova be “ia karaia vadaeni gaudia ibounai ia itaia” bona idia be “namo herea” dainai ia moale!​—Genese 1:​31.

Iseda tahua gaudia ita hagugurua totona, iseda ura ia goada be namo. Dahaka ese ita do ia durua unai bamona ura goadana ita hahedinaraia totona? Ena be tanobada be toana lasi bona anina lasi, to Iehova be gabeai do ia vara gauna ia itaia diba​—ia dekenai hairai bona hanamoa do ia mailaia, tanobada hairaina ia itaia. Unai hegeregerena, iseda tahua gauna hagugurua urana ita habadaia totona, namona be do ia havaraia gau namodia ita laloa. Ena mauri lagani be 19 merona, Tony, be unai bamona ia karaia. Tony be nega ginigunana, Iehova ena Witnes taudia edia brens opesi ta Western Europe dekenai ia vadivadi, bona ia itaia gaudia ia laloaboio lasi. Unai nega amo, Tony ena lalona dekenai inai henanadai ia laloa momo, ‘Lauegu mauri be edena bamona, bema unai gabu dekenai lau noho bona lau gaukara?’ Tony be unuseniai do ia gaukara diba ia lalohadailaia momo bona ia gaukara goada unai tahua gauna ia hagugurua totona. Lagani haida murinai, brens opesi dekenai do ia gaukara totona ena aplikeisen idia abia dae neganai, ia moale bada herea!

Edia tahua gaudia idia hagugurua vadaeni taudia ita bamoa karana ese ita ia durua diba iseda tahua gauna hagugurua lalohadaina ita dogoatao noho totona. Ena mauri lagani 30 merona, Jayson, be mero matamata neganai, haroro gaukara ia moalelaia lasi. To, haisikuli ia haorea murinai, mai ena ura bada ida painia gaukara lalonai ia vareai, bona ful-taim Basileia harorolaia tauna ai ia lao. Dahaka ese Jayson ia durua painia gaukara urana ia abia totona? Ia gwau: “Idia painia taudia lau hereva henia bona haroro negadiai idia lau bamoa karana ese egu painia gaukara urana ia habadaia.”

Tahua Gaudia Ita Torea Karana ese Ita Ia Durua

Ita lalohadailaia tahua gaudia be pepa dekenai ita torea neganai, idia hedinarai goevagoeva. Solomona ia gwau hereva maorodia be au ta mai ena matana bamona, mai edia goada ida ita idia hakaua dala maorona ita badinaia totona. (Hadibaia Tauna 12:11) Unai hereva ita torea neganai, iseda lalona bona kudouna dekenai do ita laloatao noho. Unai dainai, Iehova ese Israela ena king taudia ia hamaorodia buka ta dekenai ena Taravatu do idia torea. (Deuteronomi 17:18) Unai dainai, namona be iseda tahua gaudia bona ita hagugurua daladia be pepa ta dekenai ita torea, bona do ita davaria hekwakwanai bona ita hanaia daladia edia lista ita torea danu. Danu, ita do ia durua bada bema, edena diba haida do ita tahua, edena bamona gaukara do ita dibaia, bona daidia ese ita do idia durua ita diba namonamo.

Lauma dalanai tahua gaudia atoa karana ese Geoffrey ia durua bada. Ia be lagani momo lalonai Asia tanona ena daudau teritori ta dekenai spesel painia gaukara ia karaia. Iena hahine ia mase neganai, ia lalohisihisi bada. Unai lalohisihisi ia hanaia murinai, Geoffrey be ena lalona ia hadaia tahua gaudia haida do ia atoa bona ena painia gaukara do ia karaia goadagoada. Iena palani be pepa dekenai ia torea murinai, ia ura hua toi dokonai Baibel stadi toi do ia hamatamaia ia gurigurilaia. Dina ta ta ai, ia karaia gaudia ia laloa lou, bona dina 10 murinai ia hagugurudia gaudia ia sekea. Ena tahua gauna ia davaria, a? Ena ripoti dekenai Baibel stadi matamatadia foa ia torea, unai dainai mai moale ida ia gwau diba, oibe!

Nega Kwadogina Lalonai Tahua Gaudia be Maka Bamona Oi Atoa

Oi hamatamaia neganai, tahua gaudia haida hagugurua totona be auka. Ita herevalaia vadaeni merona, Tony ia laloa, Iehova ena Witnes taudia edia brens opesi dekenai do ia gaukara lalohadaina be nihi ta sibona. Unai bamona ia laloa badina guna ia be mauri dalana dikana ia noholaia, bona Dirava dekenai ena mauri ia do gwauhamatalaia lasi. To ena lalona ia hadaia ena mauri be Iehova ena dala hegeregerena do ia haidaua, bona ia ura bapatiso do ia abia be ena tahua gauna ai ia halaoa. Unai tahua gauna ia hagugurua murinai, heduru bona regula painia ia atoa ena tahua gaudia bona do ia hamatamaia deiti be ena kalenda dekenai ia makaia. Lagani haida lalonai painia gaukara ia karaia murinai, brens opesi dekenai do ia gaukara totona ia atoa tahua gauna hagugurua dalana be ia auka lasi.

Namona be ita ese gabeai ita ura hagugurua tahua gaudia ita haria, bona nega kwadogina lalonai ita tahua gaudia ai ita halaodia. Unai nega kwadogina ai ita tahua gaudia be dala dekenai idia atoa maka bamona, ita do idia durua gabeai ita ura tahua gaudia ita hagugurua totona. Hanaihanai unai maka gaudia ita sekea loulou ese ita do ia durua iseda tahua gaudia ita tahua noho totona. Ita palanilaia gauna be Iehova dekenai ita gurigurilaia loulou karana ese ita do ia durua unai dala ita badinaia noho. Aposetolo Paulo ese ita ia hagoadaia: “Nega ibounai do umui guriguri.”​—1 Tesalonika 5:​17.

Gaukara Goada Bona Hekwarahi Noho

Ena be palani ita karaia namonamo bona mai iseda ura ibounai ida ita tahua, to nega haida ita tahua gaudia ita hagugurua diba lasi. Reana, hahediba tauna Ioane Mareko be ia lalohisihisi bada badina aposetolo Paulo ia ura lasi ena misinari laolao iharuana ai Mareko ese do ia bamoa! (Kara 15:37-40) Mareko ese unai lalohisihisi amo gau haida ia dibaia be namo bona hesiai gaukara ma haida karaia totona ena palani ia haidaua be namo. Mareko be unai bamona ia karaia. Gabeai, Paulo ese Mareko ia hanamoa, bona Babulonia dekenai aposetolo Petero ida ia gaukara hebou karana ia moalelaia. (2 Timoteo 4:​11; 1 Petero 5:​13) Reana, ena hahenamo badana be Baibel lalonai ia noho Iesu ena mauri bona hesiai gaukara ia sivarailaia bukana ia torea.

Lauma dalanai ita atoa tahua gaudia ita hagugurua totona, hekwakwanai haida idia vara diba. Namo lasi ita hesiku, to ita tahua namonamo, dahaka dainai hekwakwanai idia vara, edena bamona ita hanamoa diba, bona reana iseda tahua gauna ita haidaua. Bema gau haida ese iseda tahua gaudia hagugurua dalana idia koua, namona be ita gaukara goada bona ita hekwarahi noho. Aonega King Solomona ese ita ia hagoadaia ia gwau: “Oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.”​—Aonega Herevadia 16:3.

To, nega haida iseda noho dalana dainai, ita hegeregere lasi iseda tahua gauna ita hagugurua totona. Hegeregere, gorere eiava ruma bese ena maduna idauidau ese iseda tahua gaudia hagugurua daladia idia koua. Namona be ita laloaboio lasi, iseda ahuna badana be mauri hanaihanai—guba dekenai eiava tanobada Paradaisona ai. (Luka 23:43; Filipi 3:13, 14) Edena bamona unai ita abia diba? Aposetolo Ioane ia gwau: “Dirava ena ura ia karaia noho tauna be do ia noho ela bona hanaihanai.” (1 Ioane 2:17) Ena be iseda noho dalana ese ita ia koua iseda tahua gauna ita hagugurua totona, to ‘Dirava ita gari henia, bona iena oda ita badinaia’ noho diba. (Hadibaia Tauna 12:13) Lauma dalanai ita atoa tahua gaudia ese ita idia durua Dirava ena ura ita karaia noho totona. Unai dainai, namona be tahua gaudia ita gaukaralaia iseda Havaraia Tauna ita hanamoa totona.

[Box on page 4]

Lauma Dalanai Ita Atoa Diba Tahua Gaudia

○ Dina ta ta ibounai Baibel ita duahia

○ Idia halasia Gima Kohorona bona Awake! ta ta ita duahia

○ Iseda guriguri dalana ita hanamoa

○ Lauma helaga ena huahua ita hahedinaraia

○ Hesiai gaukara ita habadaia

○ Emu haroro bona hahediba dalana hanamoa

○ Haroro gaukara dalana hanamoa, gabu bona nega idauidau ai, telefon ai, bona bisinesi teritori ai