“Mai Emui Hereva Tamona” ida Dirava Umui Hanamoa
“Mai emui hereva tamona, umui ese Dirava, iseda Lohiabada Iesu Keriso ena Tamana do umui hanamoa.”—ROMA 15:6.
1. Lalohadai idauidau hamaoromaoroa karana dekenai, Paulo ese ena tadikaka dekenai dahaka ia gwauraia?
KERISTANI taudia iboudiai ese idia abia hidi gaudia eiava idia ura gaudia ibounai be idia hegeregere lasi. To, Keristani taudia iboudiai be mai lalo-tamona ida mauri ia lao henia dalana dekenai idia raka be gau badana. Unai ita karaia diba, a? Oibe, bema hekwakwanai maragidia be gau badadia ai ita halaoa lasi. Aposetolo edia negai, Paulo ese unai hereva be tadikaka dekenai ia gwauraia. Edena dala ai unai mai anina bada herevana ia gwauraia hedinarai? Bona edena dala ai unai sisiba, Dirava ena lauma amo ia vara sisibana unai, be hari ita badinaia diba?
Keristani Lalo-Tamona be mai Anina Bada
2. Paulo ese edena dala ai ia hahedinaraia, lalo-tamona karana be mai anina bada?
2 Paulo ia diba Keristani lalo-tamona be mai anina bada, bona Keristani taudia be lalokau dekenai idia noho totona, sisiba namona ia henia. (Efeso 4:1-3; Kolose 3:12-14) To, lagani 20 ia hanaia lalonai kongrigeisen momo ia haginia bona ma haida ia vadivadi henia murinai, ia diba lalo-tamona karana dekenai noho totona be mai ena hekwarahi. (1 Korinto 1:11-13; Galatia 2:11-14) Unai dainai, Roma dekenai idia noho tadikaka ia hagoadadia, ia gwau: “Dirava, haheauka bona goada ia henia Diravana ese umui emui lalona do ia hatamonaia, . . . unai neganai mai emui laloa tamona, bona mai emui hereva tamona, umui ese Dirava, iseda Lohiabada Iesu Keriso ena Tamana do umui hanamoa.” (Roma 15:5, 6) Hari danu, ita be Iehova Dirava ena lalo-tamona taudia dainai gau badana be ‘mai hereva tamona’ ida ia ita hanamoa. Unai ita karaia noho, a?
3, 4. (a) Roma dekenai idia noho Keristani taudia be edena gabu taudia? (b) Roma Keristani taudia be edena dala ai mai “hereva tamona” ida Iehova idia hesiai henia diba?
3 Roma Keristani taudia momo be Paulo ena turadia. (Roma 16:3-16) Ena be Paulo ena tadikaka edia mauri daladia be idauidau, to ia ese idia ibounai ia abia dae Dirava ese “ia lalokau henia” taudia bamona. Ia gwau: “Iesu Keriso ena ladana dainai Dirava lau hanamoa henia, badina be umui emui abidadama ena sivarai idia gwauraia loaloa tanobada ibounai dekenai.” Ia hedinarai goevagoeva, dala momo ai Roma taudia be haheitalai namona. (Roma 1:7, 8; 15:14) To danu, kongrigeisen taudia haida edia lalohadai gau haida dekenai be idauidau. Hari danu Keristani taudia edia mauri daladia be idauidau dainai, Paulo ese Dirava ena lauma amo ia henia sisibana, lalohadai idauidau hamaoromaoroa karana dekenai idia stadilaia neganai, unai ese idia do ia durua mai “hereva tamona” ida idia hereva totona.
4 Roma dekenai idia noho tadikaka be Iuda taudia bona Idau Bese taudia. (Roma 4:1; 11:13) Toana be Iuda Keristani taudia haida ese Mose ena Taravatu henunai guna idia karaia karadia haida idia hadokoa diba lasi, ena be idia lalo-parara unai karadia amo hahemauri do idia davaria lasi. To, Iuda Keristani taudia momo idia abia dae, Keriso ena boubou gauna ese Keristani taudia ai idia do lao lasi neganai idia badinaia taravatudia amo idia ia ruhaia. Unai dainai, edia kara haida idia haidaua. (Galatia 4:8-11) To, Paulo ia gwau bamona, idia ibounai be Dirava ese “ia lalokau henia” taudia. Idia ibounai ese mai “hereva tamona” ida Dirava idia hanamoa diba, bema dala maorona ai idia ta ta idia laloa. Hari gau haida dekenai reana iseda lalohadai be idauidau danu, unai dainai namona be Paulo ese unai hakaua hereva badana ia gwauraia hedinarai dalana ita laloa namonamo.—Roma 15:4.
“Umui Ta Ta Do Umui Abia Dae”
5, 6. Dahaka dainai Roma kongrigeisen lalonai haida edia lalohadai be idauidau?
5 Paulo ese Roma taudia dekenai ia torea revarevana lalonai, hekwakwanai ta ia herevalaia, unai dainai lalohadai idauidau idia vara. Ia gwau: “Ta be mai ena abidadama, vadaeni gau ibounai ia ania, bona ta ena abidadama ia manoka, vadaeni uma gaudia sibona ia ania.” Dahaka dainai? Mose ena Taravatu henunai boroma idia ania lasi. (Roma 14:2; Levitiko 11:7) To, Iesu ia mase murinai unai Taravatu ena siahu ia ore. (Efeso 2:15) Danu, Iesu ia mase bena lagani toi mai kahana murinai, aneru ta ese aposetolo Petero ia hamaoroa Dirava dekenai aniani ta be ia miro lasi. (Kara 11:7-12) Unai dainai, reana Iuda Keristani taudia haida idia laloa boroma idia ania diba—eiava Taravatu henunai idia ania lasi aniani ma haida idia ania diba.
6 To, reana Iuda Keristani taudia ma haida idia laloa, guna Taravatu ese ia gwauraia miro anianidia idia ania karana be dika herea. Unai bamona taudia bema idia itaia edia Keristani tadikaka ese unai aniani idia ania, reana idia badu. Danu, Idau Bese Keristani taudia haida, edia tomadiho gunana ese aniani ta ania lasi taravatuna ia atoa lasi, be reana ma haida ese aniani idia hepapahuahulaia karana dainai idia hoa. Momokani, ta ese aniani haida ia dadaraia be kerere lasi, to namo lasi ia gwau unai aniani dadaraia karana sibona amo ta be hahemaoro do ia abia. To, unai lalohadai idauidau ese kongrigeisen lalonai hepapahuahu ia havaraia diba. Namona be Roma Keristani taudia idia naria namonamo unai bamona lalohadai idauidau ese mai “hereva tamona” ida Dirava idia hanamoa karana ia koua lasi.
7. Pura ta ta lalonai dina ta hahelagaia karana dekenai, dahaka lalohadai idauidau idia noho?
7 Paulo ese haheitalai iharuana ia gwauraia: “Tau ta ia gwau dina ta be ia bada momokani, bona tau ta ia gwau dina ibounai be hegeregere.” (Roma 14:5a) Mose ena Taravatu henunai, Sabati dinana ai gaukara ta idia karaia lasi. Danu, unai dina ai gabu daudau dekenai idia lao lasi. (Esodo 20:8-10; Mataio 24:20) To, Taravatu ia ore neganai, unai gaudia be siahu lasi. To, reana Iuda Keristani taudia haida idia ura lasi guna idia hahelagaia dinana ai gaukara ta idia karaia eiava gabu daudau dekenai idia lao. Keristani taudia ai idia lao murinai danu, reana dina namba seven be lauma gaudia totona idia atoa siri, ena be Dirava ena matana ai Sabati taravatuna ia ore vadaeni. Unai bamona idia karaia be kerere, a? Lasi, to namo lasi idia gwau Dirava ia ura Sabati dinana idia hahelagaia noho. Vadaeni, Paulo ese ena Keristani tadikaka edia lalomamina ia laloa bada dainai, ia gwau: “Tau ta ta ibounai, namona be idia diba momokani edia laloa be maoromaoro.”—Roma 14:5b.
8. Ena be Roma Keristani taudia ese ma haida edia lalomamina idia laloa be namo, to dahaka idia karaia lasi be namo?
8 Vadaeni, ena be Paulo ese ena tadikaka ia hagoadaia edia lalomamina dainai idia hekwarahi taudia idia haheauka henia, to Paulo ese ma haida ia sisiba auka henidia, badina idia ese edia tadikaka idia veria Mose ena Taravatu henunai idia noho totona, idia laloa unai amo hahemauri idia abia diba. Hegeregere, lagani 61 C.E. bamona ai, Paulo ese Heberu bukana ia torea, unai Iuda Keristani taudia dekenai ia torea revareva mai siahuna lalonai ia hahedinaraia, Mose ena Taravatu henunai idia noho be anina lasi badina Iesu ena boubou gauna dainai Keristani taudia be mai edia helaro hereadaena.—Galatia 5:1-12; Tito 1:10, 11; Heberu 10:1-17.
9, 10. Keristani taudia ese dahaka idia karaia lasi be namo? Mani oi gwauraia.
9 Ita herevalaia bamona, Paulo ia gwau ena be ita abia hidi gaudia be idauidau, to unai ese iseda lalo-tamona ia hadikaia lasi, bema unai kara ese Keristani hakaua herevadia idia hadikaia lasi. Unai dainai, Paulo ese edia lalomamina ia manoka Keristani taudia ia nanadaia: “Dahaka dainai oiemu varavara tauna oi gwauraia kerere?” Bona goada taudia (reana edia lalomamina ia hegeregere dainai Taravatu henunai idia ania diba lasi aniani hari idia ania, eiava Sabati dinana lalonai gaukara idia karaia taudia) ia nanadaia: “Dahaka dainai oiemu varavara oi gwauraia ia be anina lasi?” (Roma 14:10) Paulo ena hereva hegeregerena, namona be edia lalomamina ia manoka taudia ese edia lalomamina ia hegeregere dainai gau haida idia karaia taudia idia gwauraia dika lasi. To danu, namona be idia goada Keristani taudia ese edia lalomamina dainai gau haida idia karaia lasi taudia idia laloa maragi lasi. Namona be idia ibounai idia abia dae ma haida edia kara ena badina be maoro bona namona be idia “laloa lasi [idia sibona idia] bada momokani.”—Roma 12:3, 18.
10 Paulo ese lalohadai maorona be inai bamona ia gwauraia: “Gau ibounai ia ania tauna ese ania lasi tauna do ia gwauraia kerere lasi, bona uma gaudia sibona ia ania tauna danu ese gau ibounai ia ania tauna do ia gwauraia kerere lasi. Badina be Dirava ese unai tau danu ia abia dae vadaeni.” Ma ia gwau: “Keriso ese umui ia abia dae hegeregerena, taunimanima ese Dirava do idia hanamoa totona.” Idia goada taudia bona idia manoka taudia be Dirava bona Keriso ese idia abia dae dainai, namona be ita danu be unai bamona bona ita “ta ta do ita abia dae.” (Roma 14:3; 15:7) Ta ese unai hereva ia dadaraia lasi, ani?
Tadikaka Lalokau Henia Karana ese Hari Lalo-Tamona Ia Havaraia
11. Paulo ena negai ia vara gauna be dahaka?
11 Paulo ese Roma taudia dekenai ia torea revarevana lalonai, ia vara gauna ta ia herevalaia. Iehova be nega daudau lasi neganai gwauhamata taravatuna ta ia kokia bona matamatana ia haginia. Haida ese edia lalohadai idia haidaua be auka. Unuseniai ia vara gauna be hari ia vara lasi, to nega haida unai bamona gaudia be reana idia vara.
12, 13. Hari inai negai, Keristani taudia ese edena bamona idia hahedinaraia diba edia tadikaka edia lalomamina idia laloa?
12 Hegeregere, reana Keristani hahine ta ena tomadiho gunana dekenai edia dabua bona toana idia hahairaia lasi. Hereva momokani ia abia dae murinai, ia dibaia, dina badadia haida totona dabua mai kala idauidau atoa karana bona hemataurai dalana ai vairana penia karadia be kerere lasi, to reana ia abia dae be auka. Baibel ena hakaua herevana ta ia utua lasi dainai, namo lasi ta ese unai Keristani hahine ia veria toho ena lalomamina ia dadaraia totona. To danu, unai hahine ia lalo-parara edia lalomamina ia hegeregere dainai unai gaudia idia gaukaralaia Keristani hahinedia ia gwauraia dika be namo lasi.
13 Haheitalai ma ta mani oi laloa. Reana Keristani tauna ta ia tubu gabuna dekenai kekero muramura gaukaralaia karana idia gwauraia dika. Hereva momokani ia diba murinai, Baibel ena hereva uaina dekenai ia dibaia, ia be Dirava ena harihari gauna bona sisina sibona ita gaukaralaia diba. (Salamo 104:15) Ia ese unai lalohadai ia abia dae. To, ena mauri dalana dainai, ia ese kekero muramura ibounai ia dadaraia, to kekero muramura sisina sibona idia gaukaralaia taudia ia gwauraia dika lasi. Unai dala ai Paulo ena hereva ia badinaia, ia gwau: “Unai dainai maino daladia do ita tahua, bona ita ta ta ese iseda bamona ta ta edia abidadama do ita hagoadaia.”—Roma 14:19.
14. Paulo ese Roma taudia dekenai ia henia sisibana be Keristani taudia ese edena bamona idia badinaia diba?
14 Idia vara gaudia ma haida lalonai danu Paulo ese Roma taudia dekenai ia henia sisiba ita badinaia diba. Keristani kongrigeisen lalonai idia noho taudia be idauidau, bona edia ura gaudia be idauidau. Unai dainai, idia abia hidi gaudia be reana idauidau—hegeregere, edia dabua bona tauanina ena toana dekenai. Momokani, Baibel ese kudou maoro Keristani taudia ibounai ese idia badinaia be namo hakaua herevadia ia gwauraia. Namona be ita ta lasi ese dabua bona huina dekenai ia idau momokani sitaelo, lebulebu sitaelo, eiava taunimanima dikadia ese idia badinaia sitaelo ita badinaia. (1 Ioane 2:15-17) Keristani taudia ese nega ibounai inai idia laloatao, idia laga-ani neganai danu, idia be Guba bona Tanobada edia Lohia Badana ena hesiai taudia. (Isaia 43:10; Ioane 17:16; 1 Timoteo 2:9, 10) To, gau momo dekenai Keristani taudia ese abia hidi namodia momo idia karaia diba.a
Ma Haida Hahekwakwanaia Karana Dadaraia
15. Edena negai Keristani tauna ese ena tadikaka ena namo ia laloa dainai, gau ta do ia karaia lasi herevana ia be mai ena maoro?
15 Paulo ese Roma Keristani taudia dekenai ia henia sisibana lalonai be hakaua hereva badana ma ta ia noho. Nega haida, ena lalomamina ia hadibaia namonamo Keristani tauna, ese ia kerere lasi gauna ta be reana do ia abia hidi lasi. Dahaka dainai? Badina ia lalo-parara ia karaia gauna ta ese reana ma haida do ia hadikaia. Unai neganai, dahaka ita karaia be namo? Paulo ia gwau: “Dala maorona be inai, vamu do ita ania lasi, uaina do ita inua lasi, bona iseda varavara tauna ta do ita hamorua totona kara ta do ita karaia lasi.” (Roma 14:14, 20, 21) Unai dainai, “ita abidadama goada taudia be namo manoka taudia ita durudia edia abidadama do ia gini totona. Ita sibona iseda moale do ita tahua lasi. Ita ibounai ta ta ese iseda badibadinai ia noho tauna do ita hamoalea, iena namo bona iena goada havaraia totona, bona iena abidadama do ia goada totona.” (Roma 15:1, 2) Iseda kara ese Keristani tadikaka ia habadua diba neganai, ia ita lalokau henia dainai iena namo ita tahua bona sibona eda ura gauna ita abia hidi lasi. Reana kekero muramura gaukaralaia dalana be haheitalai namona. Keristani tauna ese uaina sisina sibona ia inua diba. To bema unai kara ese ena tadikaka ia hahekwakwanaia diba, unai do ia karaia lasi herevana ia be mai ena maoro.
16. Edena dala ai ita hahedinaraia diba iseda teritori dekenai idia noho taudia edia hemami ita laloa?
16 Unai hakaua herevana be Keristani kongrigeisen lalonai sibona ita badinaia lasi. Hegeregere, reana ita noho gabuna ai momo idia badinaia tomadihona ena hadibaia herevana dainai, idia laloa pura ta lalonai dina ta be laga-ani totona. Unai dainai, iseda dekena taudia ita hahekwakwanaia lasi bona iseda haroro gaukara ita ha-aukaia lasi totona, bema mai dalana, iseda dekena taudia idia habadua karadia ita karaia lasi. Danu, reana ia taga Keristani tauna ta be haroro taudia be momo lasi ogogami gabuna dekenai ia lao, do ia durudia totona. Reana ia ura ena dekena taudia matamatadia edia hemami ia laloa dainai, dava bada dabua ia atoa lasi bona dava bada gaudia ma haida danu ia hoia lasi herevana ia be mai ena moni unai gaudia ia hoia totona.
17. Dahaka dainai ita abia hidi gaudia lalonai ma haida ita laloa be namo?
17 Ita laloa “abidadama goada” taudia be unai dala dekenai edia mauri idia haidaua be namo, a? Mani inai haheitalai oi laloa: Dala dekenai motuka ita taria neganai, ita itaia natudia haida be dala kahirakahira momokani idia raka. Taravatu ese ia gwauraia sipidi ena bada hegeregerena ita heau noho badina ita be mai eda maoro unai ita karaia totona, a? Lasi, motuka ena sipidi ita hamaragia, unai amo natudia do ita bampaia lasi. Unai hegeregerena, nega haida iseda tadikaka eiava ma haida ita kara henia lalonai, iseda kara ita haidaua be namo. Reana gau ta ita karaia bona ita be mai eda maoro unai ita karaia totona. Baibel ena hakaua herevana ta ita hadikaia lasi. To, bema unai kara amo ma haida eiava lalomamina manoka taudia ita habadua, Keristani lalokauna ese ita do ia hagoadaia iseda kara ita naria namonamo totona. (Roma 14:13, 15) Ita lalo-tamona noho bona Basileia ena gaukara ita habadaia be gau badana, to sibona eda maoro ita hahedinaraia karana be gau badana lasi.
18, 19. (a) Ma haida edia hemami ita laloa dainai, edena dala ai Iesu ena haheitalai ita tohotohoa? (b) Ita ibounai be dahaka gaudia dekenai mai lalo-tamona ida ita kara, bona hereva gabena ese dahaka do ia herevalaia?
18 Unai bamona ita karaia neganai, haheitalai hereadaena ita tohotohoa. Paulo ia gwau: “Keriso ese sibona ena namo ia tahua lasi, Buka Helaga dekenai ia torea hegeregerena, ia gwau: ‘Edia hereva dekenai oi idia hadikaia taudia ese lau danu idia hadikaia vadaeni.’ ” Iesu be mai ena ura ida ita totona ena mauri ia bouboulaia. Mai eda ura ida ita karaia diba gaudia haida ita dadaraia, bema unai amo “manoka taudia” ese ita danu mai lalo-tamona ida Dirava idia hanamoa diba. Momokani, edia lalomamina ia manoka Keristani taudia dekenai lalohadai namona ita hahedinaraia—eiava ita abia hidi diba gaudia eiava ita be mai eda maoro ida ita karaia diba gaudia ita dadaraia—neganai, ia hahedinaraia ita be “Iesu Keriso ena kara” ita tohotohoa.—Roma 15:1-5.
19 Ena be Baibel ena hakaua herevadia idia utua lasi gaudia ita abia hidi neganai iseda lalohadai be idauidau, to tomadiho gaudia dekenai mai lalo-tamona ida ita kara. (1 Korinto 1:10) Hegeregere, tomadiho momokanina idia dagedage henia taudia ita kara henia dalana dekenai unai lalo-tamona ia hedinarai. Dirava ena Hereva ese unai dagedage taudia ia gwauraia idau taudia bona ita ia sisiba henia “idau taudia edia gadona” dainai do ita naria namonamo. (Ioane 10:5) Edena dala ai unai idau taudia ita dibaia diba? Edia kara dainai dahaka ita karaia be namo? Hereva gabena ese unai henanadai do ia herevalaia.
[Footnote]
a Idia do bada lasi natudia ese edia tama sina edia ura hegeregerena dabua idia abia hidi.
Edena Bamona Do Oi Haere?
• Dahaka dainai lalohadai idauidau ese lalo-tamona karana ia hadikaia lasi?
• Dahaka dainai ita Keristani taudia ese ita ta ta eda hemami ita laloa be namo?
• Edena dala haida ai Paulo ena sisiba lalo-tamona karana dekenai be hari ita badinaia diba, bona unai ita karaia ena badina be dahaka?
[Picture on page 21]
Kongrigeisen lalonai Paulo ena sisiba lalo-tamona dekenai be mai anina bada
[Picture on page 23]
Keristani taudia idia lalo-tamona, herevana edia mauri daladia be idauidau
[Picture on page 25]
Inai draiva be dahaka ia karaia be namo?