Iseda Dirava Iehova Ena Ladana ai Do Ita Raka

“Ita be iseda Dirava Iehova ena ladana ai do ita raka, ela bona hanaihanai.”​—⁠MIKA 4:​5, NW.

1. Noa ena nega ai kara dika be edena bamona, bona edena dala ai Noa ena kara be idau?

BAIBEL ese ia hahedinaraia Dirava ida ia raka tauna ginigunana be Enoka. Bona tau iharuana be Noa. Baibel ia gwau: “Noa be kara maoromaoro tauna ta. Ia hahedinaraia ena nega ai idia noho taudia huanai ia be mai ena kerere lasi. Noa be Dirava momokanina ida ia raka.” (Genese 6:​9, NW ) Noa ena nega ai, taunimanima be tomadiho goevana amo idia raka siri. Unai nega ia dika momokani badina kamonai lasi anerudia ese hahine idia adavaia bona edia natudia idia havaraia, bona idia gwauraidia Nefilim taudia, “goada taudia mai ladana,” eiava “edia sivarai danu be bada” taudia. Unai dainai, tanobada be dagedage amo ia honu! (Genese 6:​2, 4, 11) To, Noa ese ia hahedinaraia ia be kerere lasi tauna, bona “kara maoromaoro ia harorolaia tauna.” (2 Petero 2:⁠5) Dirava ese Noa ia oda henia lagatoi ta do ia haginia, abata amo ia bona ena ruma bese idia roho mauri totona, bona “Noa ese unai bamona ia karaia, Dirava ena hereva ibounai hegeregere.” (Genese 6:22) Momokani, Noa be Dirava ida ia raka.

2, 3. Ita totona, Noa be dahaka haheitalai namona ia hahedinaraia?

² Paulo be abidadama taudia ia herevalaia neganai, Noa ia gwauraia danu. Ia gwau: “Noa ese Dirava ia abidadama henia, vadaeni Dirava ese dohore idia vara gaudia Noa dekenai ia hadibaia guna. Vadaeni Noa ese Dirava ia kamonai henia bona lagatoi badana ia karaia. Noa, mai ena hahine bona natudia danu ese lagatoi dekenai idia mauri noho, dika idia davaria lasi. Noa ena abidadama ese tanobada taudia ibounai ia kota henia bamona. Bona Noa ena abidadama dainai, Dirava ese kara maoromaoro tauna ia gwauraia.” (Heberu 11:⁠7) Ia be haheitalai namo hereana! Noa ia diba momokani Iehova ena hereva be do ia guguru, unai dainai, ena nega, goada, bona kohu ia gaukaralaia Dirava ena hahegani ia hagugurua totona. Unai hegeregerena, hari inai negai, momo ese inai tanobada gaudia idia dadaraia, bona edia nega, goada, bona kohu idia gaukaralaia Iehova ena hahegani idia badinaia totona. Unai bamona taudia edia abidadama karana ese idia sibona bona ma haida do ia hamauria. Edia abidadama ita tohotohoa be namo!​—⁠Luka 16:9; 1 Timoteo 4:⁠16.

³ Reana Noa bona ena ruma bese ese abidadama karana idia hahedinaraia be auka, hegeregere Noa ena tubuna, Enoka bamona, stadi hereva ginigunana lalonai ita herevalaia tauna. Enoka ena nega hegeregerena, Noa ena negai Iehova tomadiho henia taudia be momo lasi​—⁠abidadama taudia 8 sibona be Abata amo idia roho mauri. Dagedage bona kara dika tanobadana ai, Noa be kara maoromaoro ia harorolaia. Danu, ena be unai nega ai tau ta ese abata ia do itaia lasi, to Noa bona ena ruma bese ese tanobada ibounai dekenai do ia vara abata totona lagatoi badana idia karaia. Reana idia raraia taudia dekenai unai be kara idauna ta.

4. Iesu ia gwau Noa ena negai idia noho taudia edia kerere be dahaka?

⁴ Hoa gauna be, Iesu ese Noa ena nega ia gwauraia neganai, ia ese idia vara dagedage, tomadiho koikoi, eiava matabodaga karadia ia herevalaia lasi​—⁠ena be unai kara be dika momokani. To, Iesu ese ia herevalaia momo gauna be, taunimanima ese Dirava ena hadibaia herevana idia kamonai lasi karana. Ia gwau “idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana.” Aniani, inuinu, bona headava​—⁠unai kara be kerere, a? Lasi, unai be “vaia taunimanima edia mauri dalana”! To abata be ia mai noho, bona Noa be kara maoromaoro ia harorolaia noho. Namona be iena hereva bona kara amo idia diba, dika be do ia vara. To, “idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao.”​—⁠Mataio 24:​38, 39.

5. Noa bona ena ruma bese be edena kara rua idia goadalaia be gau badana?

⁵ Unai nega ita laloa neganai, ita itaia Noa be mauri dalana maorona ia abia hidi. To, Abata ia do mai lasi negana ai, taunimanima ibounai amo oi idau totona, gari lasi karana be mai anina bada. Noa bona ena ruma bese be lagatoi badana idia haginia bona animal idauidau be unuseniai idia hakaua vareai totona, lalogoada be mai anina bada. Nega haida, reana unai abidadama taudia haida idia laloa namona be tanobada amo idia idau lasi, to “vaia taunimanima edia mauri dalana” idia noholaia, a? Reana, idia be unai bamona lalohadai idia abia danu, to edia abidadama ia manoka lasi. Lagani momo murinai, Noa ena abidadama dainai, Abata amo ia roho mauri​—⁠to ita be inai tanobada oromana dikana ai lagani momo herea do ita noho lasi. To, unai nega idia laloa bada lasi taudia bona “vaia taunimanima edia mauri dalana” idia noholaia taudia be Iehova ese ia hamasedia.

Taunimanima be Dagedage Idia Mamia Lou

6. Abata murinai, tanobada oromana be edena bamona?

⁶ Abata ia ore murinai, taunimanima edia mauri ia namo lou. To, taunimanima idia do goevadae lasi, bona “maragi negana dekena amo, edia laloa be dika.” (Genese 8:21) Danu, ena be demoni be taunimanima bamona do idia hedinarai lou diba lasi, to idia do gaukara noho. Karaharaga ia hedinarai, Dirava idia diba lasi tanobada taudia be “Satani ese . . . ia gunalaia noho,” bona hari inai nega bamona, tomadiho momokani taudia be “Satani ena koikoi karadia . . . koua” totona idia hekwarahi bada.​—⁠1 Ioane 5:19; Efeso 6:​11, 12.

7. Abata murinai, dagedage karadia be edena bamona idia bada idia lao haraga?

⁷ Nimiroda ena nega ai, tanobada be taunimanima edia dagedage amo ia honu lou. Taunimanima edia namba ia bada ia lao bona masini idauidau idia karaia dainai, dagedage karadia idia bada idia lao haraga. Gunaguna, tuari kaia, io, peva, diba, bona kariota idia gaukaralaia. Gabeai, lagani 1900 murinai, musket, cannon, ipidi, bona tuari kohudia mai siahudia ma haida idia gaukaralaia. Tanobada Tuarina Ginigunana ai, gari idia havaraia tuari kohu matamatadia idia gaukaralaia, hegeregere peleini, tanika, sabmarini, bona gasi mai ena poisini. Unai tuari lalonai, unai tuari kohudia ese taunimanima milioni momo idia hamasea. Unai bamona ia vara dainai ita hoa, a? Lasi.

8. Apokalupo 6:​1-4 be edena bamona ia guguru?

⁸ Lagani 1914 ai, Iesu be Dirava ena guba Basileiana ena King ai ia lao, bona “Lohiabada ena Dina” ia matamaia. (Apokalupo 1:10) Apokalupo bukana ena matahanai ta lalonai, ia hahedinaraia Iesu be hosi kurokurona ta ai ia guia King ta bamona, bona tuari dekenai ia kwalimu. Hosi guia taudia ma haida be ia murinai idia mai, idia ta ta be taunimanima dekenai idia vara dika idauidau idia laulaulaia. Idia ta be hosi kakakakana ai ia guia, bona ia ese “tanobada dekena amo maino do ia kokia, taunimanima sibodia ta ta do idia alaia mase totona. Unai tau dekenai tuari kaia badana ta idia henia.” (Apokalupo 6:​1-4) Unai hosi bona guia tauna ese tuari idia laulaulaia, bona tuari kaia badana ese hari tuari lalodiai idia gaukaralaia tuari kohu dikadia ia laulaulaia. Unai tuari kohu haida be niuklia gaudia, bona idia ta ta be taunimanima milioni momo idia hamasea diba; roketi danu be kilomita tausen momo gabudia dekenai unai niuklia gaudia idia abia lao diba; bona danu, taunimanima milioni momo idia hamasea diba kemikol muramura bona gorere idia havaraia bomu gaudia.

Iehova Ena Hadibaia Hereva Ita Laloa Bada

9. Hari inai nega bona Abata ia do mai lasi negana be edena bamona idia hegeregere?

⁹ Noa ena negai, taunimanima dikadia bona Nefilim taudia edia dagedage karadia dainai, Iehova ese taunimanima ia hadikaia ore. Hari be edena bamona? Noa ena negai dagedage karadia be bada, to hari inai nega ena dagedage karadia be maragi, a? Lasi momokani! Danu, Noa ena nega bamona, taunimanima be sibodia edia ura karadia idia karaia, “vaia taunimanima edia mauri dalana” idia noholaia, bona idia ura lasi hadibaia herevana idia kamonai. (Luka 17:​26, 27) Vadaeni, Iehova ese taunimanima do ia hadikaia ore lou karana be ita daradaralaia, a? Lasi.

10. (a) Baibel ena peroveta herevadia ese dahaka hadibaia herevana idia gwauraia loulou? (b) Hari inai negai, edena dala tamona be aonega dalana?

¹⁰ Lagani handred momo gunanai, Abata be do lasi neganai, Enoka be iseda nega lalonai Dirava ese taunimanima do ia hadikaia ore karana ia perovetalaia. (Iuda 14, 15) Iesu danu ese do ia vara “hisihisi bada herea” ia herevalaia. (Mataio 24:21) Peroveta taudia ma haida ese unai nega idia gwauraia danu. (Esekiela 38:​18-23; Daniela 12:1; Ioela 2:​31, 32) Bona Apokalupo bukana ese unai nega ia gwauraia hedinarai goevagoeva. (Apokalupo 19:​11-21) Namona be ita ta ta ese Noa ita tohotohoa bona kara maoromaoro harorolaia gaukarana ita karaia goadagoada. Iehova ena hadibaia herevana ita laloa bada bona mai lalokau ida iseda dekena taudia ita durua unai bamona idia karaia totona. Unai amo Noa hegeregerena, Dirava ida ita raka. Momokani, mauri idia ura abia taudia be Dirava ida idia raka noho be gau badana. To, dina ta ta ai ita davaria hahetoho dainai, edena bamona unai ita karaia diba? Namona be ita abia dae momokani Iehova ese iena ura do ia hagugurua vaitani.​—⁠Heberu 11:⁠6.

Hekwakwanai Negadiai, Dirava ida Raka Noho

11. Aposetolo edia negai idia noho Keristani taudia be edena dala ai ita tohotohoa diba?

¹¹ Aposetolo edia negai, horoa Keristani taudia idia gwauraidia Iesu ena “Dala” dekenai idia raka taudia. (Kara 9:​2, NW ) Edia mauri dalana ibounai dekenai Iehova bona Iesu Keriso idia abidadama henia. Edia Biaguna ese ia rakalaia dalana idia badinaia. Hari danu, kamonai Keristani taudia be unai bamona idia karaia.

12. Iesu be hoa dalanai hutuma ia ubua murinai, dahaka ia vara?

¹² Iesu ia haroro negana lalonai ia vara gauna ta ese ia hahedinaraia, abidadama goadana be mai anina bada. Dina ta ai, Iesu be hoa dalanai taunimanima 5,000 bamona ia ubua. Taunimanima idia hoa. To unai murinai ia vara gauna mani oi laloa. Baibel ia gwau: “Taunimanima be unai toa Iesu ese ia karaia gauna idia itaia, vadaeni idia gwau, ‘Momokani, tanobada dekenai do ia mai peroveta tauna be inai.’ To Iesu ia diba idia be do idia mai, do idia dogoatao, edia king dekenai do idia halaoa gwauraia. Unai dainai ia be sibona ororo dekenai ma ia daekau lou.” (Ioane 6:​10-15) Unai hanuaboi ai, gabu ma ta dekenai ia lao. Iesu ia ura lasi edia king ai ia lao dainai, reana momo idia moale lasi. Iesu be hegeregere king ai ia lao totona badina ena aonega be hegeregere, bona ia be mai ena siahu taunimanima ia durua totona. To, Iehova ese unai nega ia abia hidi lasi Iesu ia King totona. Danu, Iesu ena Basileia be guba gauna, tanobada gauna lasi.

13, 14. Momo be dahaka lalohadai idia hahedinaraia, bona edena bamona edia abidadama ia tohoa?

¹³ To, hutuma be Iesu murinai idia lao bona Ioane ia hereva bamona, “gohu ena kahana dekenai” idia davaria. Iesu ese King dagina ia dadaraia, to dahaka dainai idia be ia murinai idia lao? Momo be Mose ena negai Iehova ese tano gagaena ai aniani ia henia karana idia herevalaia momo, unai amo idia hahedinaraia idia be tauanina gaudia idia laloa bada. Idia ura Iesu be idia totona tauanina gaudia do ia henia noho. Iesu be edia lalohadai kererena ia diba dainai, hereva momokani ia hadibaia matamaia edia laloa dalana idia haidaua totona. (Ioane 6:​17, 24, 25, 30, 31, 35-40) To, haida be Iesu dekenai idia maumau, badina inai haheitalai ia gwauraia: “Momokani, momokani umui lau hamaoroa, Taunimanima ena Natuna iena tauanina bema umui ania lasi, bona iena rarana danu bema umui inua lasi, mauri be umui emui lalona dekenai do ia noho lasi. To lauegu tauanina do ia ania, bona lauegu rarana do ia inua tauna ese mauri hanaihanai do ia abia, bona dokona dina dekenai lau ese do lau hatorea isi.”​—⁠Ioane 6:​53, 54.

¹⁴ Nega momo Iesu ena haheitalai ese taunimanima edia lalona ia veria, bona unai amo idia hahedinaraia, idia ura momokani Dirava ida idia raka eiava lasi. Inai haheitalai be unai bamona danu. Bona haida be idia badu. Baibel ia gwau: “Iesu ena diba tahua taudia momo ese inai hereva idia kamonai, vadaeni idia gwau, ‘Unai hereva be ia metau, daika ese do ia abia dae diba?’ ” Iesu ia hahedinaraia, namona be ena hereva ena anina be lauma dalanai idia lalopararalaia. Ia gwau: “Lauma ese mauri ia havaraia, tauanina ese namo ta ia havaraia lasi. Lau ese umui lau hamaoroa herevadia be lauma bona mauri.” To, momo be idia ura lasi kamonai, bona Baibel ma ia gwau: “Unai neganai iena diba tahua taudia momo ese Iesu idia rakatania, bona ia danu idia raka hebou lou lasi.”​—⁠Ioane 6:​60, 63, 66.

15. Iesu ena hahediba taudia haida be edena lalohadai maorona idia abia?

¹⁵ To, Iesu ena hahediba taudia haida be unai bamona idia karaia lasi. Momokani, Iesu idia rakatania lasi hahediba taudia be Iesu ena hereva idia lalopararalaia namonamo lasi. To, edia abidadama Iesu dekenai be ia goada. Idia ta be Petero, bona ia ese Iesu idia rakatania lasi hahediba taudia ibounai edia lalohadai ia gwauraia hedinarai, ia gwau: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.” (Ioane 6:68) Unai be lalohadai maorona bona haheitalai namona!

16. Dahaka hahetoho ita davaria diba, bona edena lalohadai maorona ita abia be namo?

¹⁶ Hari, ita danu be unai hahediba taudia bamona, hahetoho ita davaria diba. Reana, ita lalohisihisi badina Iehova ena gwauhamata be ita laloa negana ai idia guguru haraga lasi. Reana, ita laloa Baibel idia herevalaia bukadia ese Baibel siri edia anina idia gwauraia dalana be auka. Eiava, iseda Keristani tadikaka eiava taihu ta ena kara dainai ita lalohisihisi. Unai gaudia dainai Dirava ida ita raka karana do ita hadokoa be maoro, a? Lasi! Iesu idia rakatania hahediba taudia ese idia hahedinaraia, idia be tauanina gaudia idia laloa bada. Unai bamona ita karaia lasi be namo.

“Ita be Boio Taudia Lasi”

17. Dirava ida ita raka noho totona, dahaka heduru ita abia be namo?

¹⁷ Aposetolo Paulo ia gwau: “Buka Helaga ena hereva ibounai be Dirava ena Lauma ese ia havaraia.” (2 Timoteo 3:16) Baibel amo, Iehova ese ita ia hamaoroa goevagoeva: “Dala be inai, ia dekenai do umui raka lao.” (Isaia 30:21) Dirava ena Hereva ita kamonai henia neganai, unai ese ita ia durua iseda raka dalana ita “naria namonamo” totona. (Efeso 5:15) Baibel ita stadilaia bona ita dibaia gaudia ita laloa dobu neganai, unai ese ita idia durua ‘hereva momokani ena dala dekenai do ita raka noho.’ (3 Ioane 3) Momokani, Iesu ia hereva bamona, “Lauma ese mauri ia havaraia, tauanina ese namo ta ia havaraia lasi.” Lauma dalanai ita abia hakaua herevadia sibona ese ita idia hakaua maoromaoro diba, idia be Iehova ena Hereva, iena lauma, bona iena orea amo idia mai herevadia.

18. (a) Haida be edena aonega lasi karana idia karaia? (b) Edena bamona abidadama karana ita badinaia be namo?

¹⁸ Hari inai negai, tauanina gaudia idia laloa eiava edia ura ia guguru lasi dainai idia lalohisihisi taudia, be nega momo inai tanobada gaudia idia tahua goadagoada. Idia laloa edia “biaguna be do ia giroa mai haraga lasi” dainai, ‘idia naria’ noho be anina lasi, bona Basileia idia tahua guna lasi to sibodia edia ura idia tahua. (Mataio 24:42) Unai dala dekenai idia raka be aonega karana lasi. Mani aposetolo Paulo ena hereva ita itaia, ia gwau: “Ita be Dirava ena dala do ita rakatania lasi. Ita be boio taudia lasi. Lasi, to ita be abidadama taudia dainai, mauri do ita abia.” (Heberu 10:39) Enoka bona Noa bamona, ena be heiriheiri negana ai ita noho, to Dirava ida ita raka noho be hahenamo badana. Ia ida ita raka dainai, ita diba momokani Iehova ena ura be do idia guguru, kara dika do ia ore, bona kara maoromaoro tanobadana do ia vara. Unai be helaro namo hereana!

19. Mika ese tomadiho momokani taudia edia dala be edena bamona ia gwauraia?

¹⁹ Dirava ena lauma ese ia hasiahua peroveta tauna Mika ia gwau, tanobada taudia be “ta ta ena dirava ena ladana ai do idia raka.” Bena Mika be ia sibona bona kamonai hesiai taudia ma haida ia herevalaia bona ia gwau: “To ita be iseda Dirava Iehova ena ladana ai do ita raka, ela bona hanaihanai.” (Mika 4:​5, NW ) Bema oiemu ura be Mika ena hegeregerena, herevana inai nega ena heiriheiri ia bada ia lao, to Iehova kahirakahira oi noho. (Iamesi 4:⁠8) Namona be ita ta ta be mai eda kudouna ibounai ida ita ura, Iehova iseda Dirava ida do ita raka noho hari ela bona hanaihanai!

Edena Bamona Do Oi Haere?

• Noa ena nega bona hari iseda nega be edena bamona idia hegeregere?

• Noa bona ena ruma bese be edena dala idia abia hidi, bona edena bamona edia abidadama ita tohotohoa diba?

• Iesu ena hahediba taudia haida ese edena lalohadai kererena idia hahedinaraia?

• Keristani taudia momokanidia be edia lalona idia hadaia dahaka do idia karaia?

[Pictures on page 26]

Noa ena nega hegeregerena, hari taunimanima be vaia sibodia edia ura karadia idia karaia noho

[Picture on page 27]

Ita be Basileia harorolaia taudia dainai, “ita be boio taudia lasi”