Duahia Taudia Edia Henanadai

Salamo 102:26 ia gwau tanobada bona guba “be do idia ore.” Unai ena anina be ita noholaia tanobadana be Dirava ese do ia hadikaia, a?

Salamo torea tauna be guriguri amo Iehova ia hamaoroa, ia gwau: “Oi ese gunaguna tanobada oi karaia, bona oiemu imana dekena amo guba danu oi karaia. Idia be do idia ore, to oi be do oi noho. Idia be do idia dika lao, dabua idia dika lao bamona. Bona oi ese idia do oi negea bamona, ma do idia boio momokani.” (Salamo 102:​25, 26) Unai siri be tanobada hadikaia karana ia herevalaia lasi, to ia hahedinaraia Dirava be do ia noho hanaihanai. Danu ia hahedinaraia dahaka dainai unai hereva momokani ese Dirava ena hesiai taudia ia hagoadaia diba.

Salamo torea tauna be reana Babulonia dekenai ia davaria hisihisina ia herevalaia. Ia gwau, iena mauri be “kwalahu ia ore haraga bamona.” Lalohekwarahi ese iena tauanina ia hadikaia dainai ena “kopina be ia siahu bada, lahi ese ia gabua noho bamona.” Ia hesiku bada, “taunimanima ese idia moia patapata rei bamona,” bona ia laloa ia “be ruma ena guhi dekenai sibona ia noho manu bamona.” Hahetoho momo ia davaria bona ia lalohisihisi dainai ia aniani namonamo lasi. (Salamo 102:​3-​11) Salamo torea tauna be ena helaro ia haboioa lasi. Dahaka dainai? Badina Iehova be gau ta do ia karaia Siona, eiava Ierusalema dekenai.

Ena be Siona idia hadikaia vadaeni, to Iehova ia gwauhamata Siona do ia haginia lou. (Isaia 66:⁠8) Unai dainai, salamo torea tauna be mai lalogoada ida ia gwau: “Siona do oi bogahisihisi henia. Nega ia ginidae vadaeni, oi ese Siona dekenai do oi laloa namo henia. Oi gwauraia guna ena nega ia ginidae vadaeni. Badina be Lohiabada ese Siona do ia haginia lou.” (Salamo 102:​13, 16) Bena salamo torea tauna be ena hisihisi ia herevalaia. Ia hahedinaraia bema Dirava be ena siahu amo Ierusalema ia haginia lou, Iehova be salamo torea tauna ena lalohekwarahi amo ia hamauria diba. (Salamo 102:​17, 20, 23) Bona ma gau ta ese salamo torea tauna ena lalona ia veria Iehova ia abidadama henia totona. Unai be dahaka? Dirava be noho hanaihanai Diravana.

Iehova be ia noho hanaihanai, to salamo torea tauna ena mauri be kwadogi sibona. Salamo torea tauna ese Iehova ia hamaoroa: “Egu Dirava e, oi noho hanaihanai.” (Salamo 102:24) Bona ma ia gwau: “Oi ese gunaguna tanobada oi karaia, bona oiemu imana dekena amo guba danu oi karaia.”​​—⁠Salamo 102:⁠25.

Herevana tanobada bona guba be lagani momo idia noho vadaeni, to unai be Iehova ena noho hanaihanai karana ida ita hahegeregerea diba lasi. Salamo torea tauna ia gwau: “Idia [tanobada bona guba] be do idia ore, to oi be do oi noho.” (Salamo 102:26) Tanobada bona guba korikori idia ore diba. To momokani, Iehova ia gwau tanobada bona guba be do idia noho ela bona hanaihanai. (Salamo 119:90; Hadibaia Tauna 1:⁠4) To bema Dirava ia ura, unai gaudia be ia hadikaia diba. Danu, Dirava be ia mase diba lasi. Ia ese ia havaraia gaudia be “idia noho hanaihanai,” badina Ia naridia namonamo. (Salamo 148:⁠6) Bema Iehova be ia havaraia gaudia ia hamatamataia lou lasi, “idia be do idia dika lao, dabua idia dika lao bamona.” (Salamo 102:26) Taunimanima edia dabua be idia dika haraga diba, unai hegeregerena Iehova ese ia havaraia gaudia be idia dika diba​—⁠bema unai be Iena ura. To, siri ma haida amo ita itaia hegeregerena, unai be Dirava ena ura lasi. Dirava ena Hereva ese ita ia hadibaia Iehova be ia ura inai tanobada korikorina bona guba korikorina be do idia noho hanaihanai.​​—⁠Salamo 104:⁠5.

Iehova be hanaihanai ena gwauhamata ia hagugurua dainai, unai ese ita ia hagoadaia bada. Herevana dahaka hahetoho ita davaria, to bema Iehova dekenai ita boiboi, ita diba momokani Iehova be “ena bese . . . taudia edia guriguri, be do ia kamonai, bona edia noinoi do ia laloa.” (Salamo 102:17) Oibe, Salamo 102 be tanobada hadikaia karana ia herevalaia lasi, to Iehova ena gwauhamata ia herevalaia, unai be hagoadaia gauna.