Dirava ese Palani ta amo Ena Ura Do Ia Hagugurua

“Gau ibounai be Dirava ese ia karaia, iena palani hegeregerena.”—EFESO 1:11.

1. Dahaka dainai Iehova ena Witnes taudia edia kongrigeisen ibounai be April 12, 2006 ai do idia hebou?

WEDNESDAY, April 12, 2006 adorahi ai, taunimanima 16 milioni bamona be Lohiabada Ena Anibou totona do idia hebou. Hebou gabudia ta ta ai, beredi bona uaina—Keriso ena tauanina bona rara idia laulaulaia gaudia—be helai taudia vairanai do idia atoa. Memorial tok ena dokona kahanai, hereva ia henia tadikaka ese Iesu ena mase ena anina ia herevalaia neganai, paraoa bona uaina be helai taudia dekenai do idia siaia loaloa. Iehova ena Witnes taudia edia kongrigeisen haida lalonai, ta eiava haida sibona ese paraoa do idia ania bona uaina do idia inua. To kongrigeisen momo dekenai, tadikaka bona taihu be paraoa bona uaina idia abia lasi. Dahaka dainai guba dekenai idia lao Keristani taudia sibona ese paraoa bona uaina idia abia, to tanobada dekenai do idia noho taudia momo herea be unai bamona idia karaia lasi?

2, 3. (a) Edena dala ai Iehova ese ena ura ia hagugurua matamaia? (b) Dahaka dainai Iehova ese tanobada ia karaia?

² Iehova be mai ena ura. Bona unai ura ia hagugurua totona, ‘gau ibounai do ia karaia iena palani hegeregerena.’ (Efeso 1:11) Gau ginigunana be ena Natuna tamona sibona ia havaraia. (Ioane 1:1, 14) Bena, Iehova ese unai Natuna amo ena lauma natudia, guba bona tanobada, bona taunimanima ia karaia.—Iobu 38:4, 7; Salamo 103:19-21; Ioane 1:2, 3; Kolose 1:15, 16.

³ Kerisendom ena hahediba herevana be, tanobada be hahetoho abia gabuna sibona, bema taunimanima ese hahetoho idia hanaia, idia be guba dekenai do idia daekau bona aneru ai do idia lao. To Iehova ese tanobada ia karaia ena badina be unai lasi. Ia ese tanobada ia karaia ‘taunimanima ese idia noholaia totona.’ (Isaia 45:18) Dirava ese tanobada ia karaia taunimanima totona bona idia dekenai ia henia. (Salamo 115:16) Dirava ena ura be tanobada ibounai be paradaiso ai do ia halaoa, kara maoromaoro taudia amo do ia honu, bona idia ese tanobada do idia naria. Dirava ese tau bona hahine ginigunadia ia hamaoroa lasi guba dekenai do idia daekau.—Genese 1:26-28; 2:7, 8, 15.

Iehova Ena Ura be Satani ese Ia Hepapahuahulaia

4. Matamana negana ai, Iehova ena lohia siahuna hepapahuahulaia karana be edena bamona ia vara?

⁴ Dirava ena lauma natuna ta ia gwau-edeede bona Iehova ena ura ia hadikaia. Dirava ese ia henia ura kwalimu ia gaukaralaia kerere. Iehova ena lohia siahuna henunai idia noho taudia ibounai edia maino ia hadikaia. Satani ese tau bona hahine ginigunana ia veridia Dirava idia dadaraia totona. (Genese 3:1-6) Ia be Iehova ena siahu ia hepapahuahulaia lasi, to Iehova ena lohia siahuna ena maoro ia hepapahuahulaia. Unai dainai matamana negana amo, tanobada ai unai hepapahuahu badana ia vara.

5. Dahaka hepapahuahu herevana ma ta ia vara, bona daidia dekenai ia be mai anina danu?

⁵ Iehova ena lohia siahuna ena hepapahuahu lalonai hereva ma ta ia vara danu, Iobu ena nega lalonai Satani ese unai ia hahedinaraia. Aneru bona taunimanima ese Iehova idia kamonai henia bona ena hesiai gaukara idia karaia ena badina ia hepapahuahulaia. Satani ena hereva amo ia hahedinaraia, Iehova ena hesiai taudia be sibodia edia namo totona Iehova idia hesiai henia, to bema hahetoho idia davaria Ia do idia rakatania. (Iobu 1:7-11; 2:4, 5) Ena be unai hepapahuahu herevana be Iehova ena tanobada hesiai tauna ta dekenai ia gwauraia, to ia be mai anina danu aneru bona Iesu dekenai.

6. Iehova ese edena dala ai ena ura ia haidaua lasi bona ena ladana ena anina hegeregerena ia kara?

⁶ Iehova be ena ura ia haidaua lasi bona ena ladana ena anina hegeregerena ia kara. Ia be Peroveta Tauna bona Hamauria Tauna ai ia sibona ia halaoa.a Ia ese Satani ia hamaoroa: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW ) Iehova ese unai “hahine,” eiava Iehova ena guba oreana amo, Satani ena hereva do ia hakoikoia bona Adamu ena bese taudia do ia hamauria bona mauri hanaihanai do idia abia.—Roma 5:21; Galatia 4:26, 31.

‘Iena Ura, Hunia Gauna’

7. Paulo ese edena bamona Iehova ena ura ia hahedinaraia?

⁷ Aposetolo Paulo ese Efeso Keristani taudia ia tore henidia bona, Iehova ese ena palani amo ena ura ia hagugurua dalana ia gwauraia hedinarai. Ia gwau: “Dirava ese sibona ena ura gauna, iena palani, gunaguna ia laloa, hunia gauna, ita dekenai ia hadibaia. Inai palani be Keriso dekena amo Dirava ese do ia karaia haorea. Inai palani do ia haorea nega korikori ia ginidae neganai, Dirava ese do ia karaia haorea. Inai palani ena anina be, Dirava ia karaia gaudia ibounai, guba dekenai bona tanobada dekenai, be Keriso ese do ia biagua.” (Efeso 1:9, 10) Iehova ena ura be tanobada bona guba ai, aneru bona taunimanima ibounai be mai lalotamona ida iena lohia henunai do idia noho. (Apokalupo 4:11) Unai amo Ena ladana do ia hahelagaia, iena ‘ura gauna tanobada dekenai do ia karaia, guba dekenai idia karaia bamona,’ bona do ia hahedinaraia Satani be koikoi tauna.—Mataio 6:10.

8. Inai hereva “palani” ena anina be dahaka?

⁸ Iehova ena ura be “palani” ta amo do ia hagugurua. Paulo ese unai ia herevalaia neganai, ia ese Greek herevana ta ia gaukaralaia, ena anina korikorina be, “ruma bese haheaua dalana.” Unai hereva be gaukara haheaua dalana ta ia herevalaia. Iehova ese dala hereadaena ai ena gaukara ia haheaua, unai amo ena palani hehunina ia hagugurua diba. Bona lagani handred momo lalonai, unai palani be metairametaira ia hahedinaraia noho.—Efeso 1:10; 3:9.

9. Iehova ese iena ura, hunia gauna unai, be edena bamona metairametaira ia hahedinaraia?

⁹ Iehova ese gwauhamata idauidau amo, Eden umana lalonai ia gwauraia Garana amo ena ura do ia hagugurua dalana, be metairametaira ia hahedinaraia. Aberahamo ida ia karaia gwauhamatana amo ia hahedinaraia, unai Garana be Aberahamo ena bese amo do ia vara bona ia amo “tanobada besedia ibounai” ese namo do idia davaria. Unai gwauhamata ese dala ia kehoa ma haida be unai Garana ida do idia gaukara hebou totona. (Genese 22:17, 18) Iehova ese Israela bese korikorina ida ia karaia taravatu gwauhamatana amo ia hahedinaraia, ia ura idia be ‘helaga taudia ai do idia lao.’ (Esodo 19:5, 6) Davida ida ia karaia gwauhamatana amo ia hahedinaraia, unai Garana be Basileia ta do ia lohiaia ela bona hanaihanai. (2 Samuela 7:12, 13; Salamo 89:3, 4) Taravatu gwauhamatana ese Israela taudia ia hakaua lao Mesia dekenai, unai amo Iehova ese iena ura ena kahana ma haida ia hahedinaraia. (Galatia 3:19, 24) Peroveta herevana hegeregerena, garana ida idia hakapua tamona taudia be ‘helaga taudia ai do idia lao.’ Bona “taravatu matamata” lalonai idia vareai dainai, idia be “Israela” bese matamatana—lauma Israela unai.—Ieremia 31:31-34; Heberu 8:7-9.b

10, 11. (a) Iehova ese edena dala ai ia gwauhamatalaia Garana ia hahedinaraia? (b) Dahaka dainai Dirava ena Natuna tamona sibona be tanobada dekenai ia mai?

¹⁰ Dirava ena ura ia hagugurua totona, ia gwauhamatalaia Garana be tanobada dekenai ia mai be namo. Iehova ese aneru Gabriela ia siaia bena Maria ia hamaoroa, ia be natuna mero ta do ia havaraia bona iena ladana do idia hatoa Iesu. Aneru ese ia hamaoroa, ia gwau, Iesu “be do ia tau bada herea momokani, ia be Dirava Ataiai Momokani ena Natuna do idia gwauraia. Lohiabada Dirava ese iena tamana Davida ena King dagina do ia henia. Bona ia be Iakobo ena bese edia King do ia lao, ela bona hanaihanai. Iena basileia be do ia doko lasi.” (Luka 1:32, 33) Unai negai, ia hedinarai unai gwauhamata Garana be Iesu.—Galatia 3:16; 4:4.

¹¹ Iehova ena Natuna be tanobada dekenai do ia diho bona hetoho bada do ia davaria. Iesu ena mauri dalana amo Satani ena hereva do ia hakoikoia. Iena Tamana do ia abidadama henia noho eiava? Unai be hehuni herevana. Aposetolo Paulo ese gabeai Iesu do ia karaia gaukarana ia herevalaia, ia gwau: “Dirava ena dala ita badinaia, be hunia gauna badana, ani? Bona Dirava ese inai hereva ena anina be ita dekenai ia hedinarai, inai bamona: ‘Taunimanima edia tauanina dekenai Keriso ia hedinarai, Lauma Helaga ese iena kara maoromaoro momokani ia gwauraia. Aneru ese ia idia itaia. Bese ibounai edia huanai ia idia harorolaia. Tanobada taudia ese ia idia hamomokania, bona idia ese ia idia abidadama henia. Guba dekenai Dirava ese ia abia daekau, bona ia ese ladana bada momokani ia abia.’ ” (1 Timoteo 3:16) Oibe, Iesu ese Dirava ia badinaia ela bona ia mase, unai amo ia ese Satani ena hepapahuahu herevana ia haerelaia. To unai hunia hereva ena kahana haida be idia do guguru lasi.

‘Dirava Ena Basileia Ena Hunia Herevana’

12, 13. (a) ‘Dirava ena Basileia ena hunia herevana’ ena kahana ta be dahaka? (b) Haida be guba dekenai idia lao totona, idia dekenai dahaka ia vara guna be namo?

¹² Iesu be Galilea dekenai ia haroro neganai, ia hahedinaraia Mesia Basileia be unai hunia herevana ena kahana ta. Iena hahediba taudia ia hamaoroa: “Guba Basileia [“Dirava ena Basileia,” Mareko 4:11] ena hunia hereva umui dekenai be idia hedinarai.” (Mataio 13:11) Unai hunia hereva ena kahana ta be, Iehova ese 144,000 edia “orea maragi” be tanobada amo ia abia hidi, bona Iena Natuna ida guba dekenai do idia lohia hebou.—Luka 12:32; Apokalupo 14:1, 4.

¹³ Iehova be taunimanima ia karaia tanobada dekenai do idia noho. Unai dainai haida be guba dekenai do idia lao totona, mauri matamata idia abia be namo. (2 Korinto 5:17) Unai guba helarona ia abia tauna, aposetolo Petero, ese unai ia herevalaia, ia gwau: “Dirava, iseda Lohiabada Iesu Keriso ena Tamana do ita hanamoa bada. Iena bogahisihisi ia bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. Vadaeni mauri korikori ena ura namona laloa ese iseda lalona ia hahonua. Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi.”—1 Petero 1:3, 4.

14. (a) Edena dala ai Iuda lasi taudia be ‘Dirava ena Basileia ena hunia herevana’ ena kahana ta? (b) Dahaka dainai ‘Dirava ena dobu gaudia’ ita lalopararalaia diba?

¹⁴ Unai hehuni herevana ena kahana ta be inai: Dirava ese Iuda lasi taudia haida ia abia hidi Keriso ida guba Basileia lalonai idia lohia hebou totona. Paulo ese Iehova ena palani ia herevalaia neganai, ia gwau: “Nega gunadia lalonai Dirava ese taunimanima dekenai inai hunia hereva ia hadibaia lasi. To harihari Dirava ese iena Lauma Helaga dekena amo, iena aposetolo bona peroveta helaga taudia dekenai inai hunia hereva ia hedinaraia vadaeni. Inai hunia hereva ena anina be inai: Sivarai Namona dekena amo, Iuda lasi taudia bona Iuda taudia ese Dirava ena hanamoa tamona do idia abia. Inai orea ruaosi edia tauanina be tamona, bona idia ruaosi Dirava ena gwauhamata, Keriso Iesu dekena amo ia gwauraia gauna do idia abia hebou.” (Efeso 3:5, 6) Unai hunia herevana be ‘aposetolo helagadia’ dekenai idia hahedinaraia. Unai hegeregerena, hari inai nega lalonai, bema lauma helaga ena heduru ita abia lasi, ‘Dirava ena dobu gaudia’ do ita lalopararalaia lasi.—1 Korinto 2:10; 4:1; Kolose 1:26, 27.

15, 16. Dahaka dainai Iehova ese Keriso ida do idia lohia taudia be tanobada amo ia abia hidi?

¹⁵ “Mamoe ena Natuna” ida Siona Ororona ai idia gini “144,000” taudia be Dirava ese “taunimanima ibounai edia huanai dekena amo . . . idia ia hoia vadaeni. Bona idia be taunimanima ginigunadia Dirava bona Mamoe ena Natuna [Keriso Iesu] ese idia abia, edia.” (Apokalupo 14:1-4) Iehova ese Eden umana lalonai garana ta ia gwauhamatalaia, bona ena guba natuna ginigunana ia abia hidi unai garana ai ia lao totona. To, dahaka dainai Keriso ida do idia lohia taudia be tanobada amo ia abia hidi? Aposetolo Paulo ia hahedinaraia, Iehova be iena “ura” hegeregerena taunimanima haida sibona ‘ia abia hidi iena ura idia karaia totona.’—Roma 8:17, 28-30; Efeso 1:5, 11; 2 Timoteo 1:9.

¹⁶ Iehova ena ura be iena ladana badana bona helagana do ia hahelagaia bona ena lohia siahuna do ia hamomokania. Iehova ena “palani” hereadaena eiava gaukara haheaua dalana hegeregerena, Ia ese ena vara guna Natuna be tanobada dekenai ia siaia, bona tanobada ai hahetoho bada ia davaria. Danu, Iehova ia ura ena lohia siahuna idia badinaia ela bona idia mase tanobada taudia haida, be ena Natuna ida Mesia gavamanina lalonai do idia lohia hebou.—Efeso 1:8-12; Apokalupo 2:10, 11.

17. Dahaka dainai ita moale badina Keriso bona ia ida do idia lohia hebou taudia be guna tanobada dekenai idia noho?

¹⁷ Iehova ese Adamu ena tubudia dekenai lalokau bada ia hahedinaraia, badina iena Natuna be tanobada dekenai ia siaia bona tanobada amo haida ia abia hidi Basileia gavamanina lalonai ena Natuna ida do idia lohia totona. To, Abela ena nega amo ema bona hari, abidadama idia hahedinaraia taudia be edena bamona unai dala amo hahenamo do idia davaria? Idia be mai edia kara dika ida idia vara dainai idia goevadae lasi, unai dainai lauma bona tauanina dalanai idia goevadae be gau badana. (Roma 5:12) Tanobada ai mauri hanaihanai do idia abia taudia idia diba edia King ese idia do ia lalokau bona hebogahisi henia, guna tanobada ai ena hahediba taudia ia kara henidia hegeregerena. (Mataio 11:28, 29; Heberu 2:17, 18; 4:15; 7:25, 26) Keriso ida do idia lohia king bona hahelaga gaukara do idia karaia tatau bona hahine, be guna ita bamona, idia be mai edia manoka gaudia bona mauri ena hekwakwanai idauidau idia davaria danu!—Roma 7:21-25.

Iehova Ena Ura be Do Ia Guguru Momokani

18, 19. Dahaka dainai Paulo ena hereva Efeso 1:8-11 dekenai ita lalopararalaia, bona stadi hereva gabena ai dahaka do ita herevalaia?

¹⁸ Paulo ese Efeso 1:8-11 ai, horoa Keristani taudia dekenai ia gwauraia hereva edia anina be hari ita lalopararalaia namonamo diba. Badina Paulo ia gwau Iehova ese idia dekenai hunia herevana ia hahedinaraia, bona idia be Keriso ida idia hakapua bona Iehova ese idia ia abia hidi, unai be “Dirava ena palani tanobada ia karaia hamatamaia neganai ia laloa gauna.” Unai dala amo Iehova ese ena ura inai tanobada totona do ia hagugurua. Danu, Lohiabada Ena Anibou dekenai Keristani taudia haida sibona ese paraoa bona uaina idia abia ena badina ita lalopararalaia.

¹⁹ Stadi hereva gabena ai, Keriso ena mase ena anina be dahaka guba helarona idia abia taudia dekenai do ita herevalaia. Bona danu, tanobada ai mauri hanaihanai do idia abia taudia milioni momo ese Memorial idia laloa bada ena badina, do ita tahua.

[Footnotes]

Riviu

• Dahaka dainai Iehova ese tanobada bona taunimanima ia karaia?

• Dahaka dainai Iehova ena Natuna tamona sibona be tanobada dekenai ia diho bona hahetoho ia davaria?

• Dahaka dainai Iehova ese Keriso ida do idia lohia hebou taudia be tanobada amo ia abia hidi?