Iehova Ena Hereva be Ia Mauri Noho
Salamo Bukana Ena Kahana Ginigunana Ena Hereva Badadia
ISEDA Havaraia Tauna, Iehova Dirava, idia hanamoa anedia ena buka dekenai edena ladana ita atoa be maoro? Ladana maorona be Salamo eiava Hanamoa Anedia. Baibel lalonai Salamo bukana ena karoa be momo herea. Unai buka ese Dirava ena kara namodia, siahu karadia bona peroveta herevadia momo ia gwauraia. Unai ane momo lalonai torea taudia be hekwakwanai idia davaria negadia ai edia lalohisihisi herevadia idia gwauraia. Unai ane momo lalodiai be lagani 1,000 lalonai idia vara gaudia ia sivarailaia—unai be peroveta tauna Mose ena nega amo ela bona Babulonia idia rakatania murinai. Mose, King Davida bona ma haida ese unai ane idia torea. Hahelaga tauna Esera ese unai toretore ibounai ia atoa hebou.
Idaunega amo, Salamo bukana be kahana 5 dekenai idia haria: (1) Salamo 1-41; (2) Salamo 42-72; (3) Salamo 73-89; (4) Salamo 90-106; bona (5) Salamo 107-150. Inai hereva lalonai ita ese kahana ginigunana do ita laloa. Inai kahana ena ane ibounai be Israela besena ena King Davida ese ia torea, to ane toi sibona, Salamo 1, 10, bona 33 be idia diba lasi daika ese ia toredia.
“DIRAVA BE EGU KOHORO”
Salamo karoa ginigunana ese Iehova ena taravatu ia duahia tauna be do ia moale ia herevalaia murinai, karoa iharuana ese maoromaoro Dirava ena Basileia ia herevalaia.a Inai salamo ena kahana dekenai Dirava amo heduru totona idia noinoi anedia momo idia torea. Hegeregere, Salamo 3-5, 7, 12, 13, bona 17 anedia be torea taudia ese Dirava idia noia edia inai taudia amo do ia hamauridia totona. Salamo 8 ese ia hahedinaraia Iehova ena siahu be bada bona taunimanima edia siahu be maragi.
Davida ena ane ta lalonai ia gwau Iehova be ena taunimanima ia Gimaia Tauna: “Egu Dirava be egu kohoro, lau heau mauri gabuna. Ia ese lau ia gimaia noho.” (Salamo 18:2) Salamo 19 ai Iehova be Havaraia Tauna bona Taravatu Henia Tauna bamona, Salamo 20 ai ia be Hamauria Tauna bamona, bona Salamo 21 ai ia be horoa Pavapavana ena Hahemauri Tauna bamona idia hanamoa. Salamo 23 ia hahedinaraia Iehova be Mamoe Naria Tauna Badana bamona, bona Salamo 24 dekenai ia be King ena dagi ia abia idia anelaia.
Baibel Henanadaidia Edia Haere:
2:1, 2—Dahaka dainai taunimanima edia “laloa be kavakava” sibona? Badina taunimanima edia gavamani ese hanaihanai edia siahu idia laloa bada, to unai be lalohadai kavakavana badina idia ura karaia gaudia be do idia guguru lasi. Tanobada besedia be “Lohiabada bona ia ese ia Abia Hidi Tauna” idia dagedage henia neganai, idia kwalimu diba, a?
2:7—“Lohiabada ena hereva” be dahaka? Ia be Iehova ese iena natuna lalokauna Iesu Keriso ida ia karaia Basileia gwauhamatana.—Luka 22:28, 29.
2:12—Edena dala ai tanobada ena lohia taudia ese Dirava ena Natuna do idia “kisi henia”? Baibel negadia ai, ta kisi henia karana ese hetura eiava badinaia karana ia haheitalaia. Vadivadi taudia idia abia dae neganai, unai bamona idia kara henidia. Inai siri ese tanobada ena lohia taudia ia oda henia Dirava ena Natuna do idia kisi henia, anina be do idia abia dae ia be Mesia Pavapavana.
3:2 —“Selah,” (BHğ) ena anina be dahaka? Momo idia laloa inai hereva ena anina be, nega sisina lalonai ane eiava miusiki idia hadokoa bona idia laloa dobu. Unai kara amo ane abia taudia ese idia anelaia herevana ena anina idia laloa bada. To, Salamo bukana ita duahia badabada neganai, unai hereva ita gwauraia lasi.
5:hereva kwarana maragina—Salamo bukana lalonai dahaka dainai karoa haida edia ataiai hereva kwarana maragidia idia hedinarai? Nega haida unai hereva ese ane ia torea tauna ena ladana eiava dahaka hekwakwanai ia vara idia hahedinaraia, Salamo 5 dekenai bamona. Hereva kwarana ese ane ena badina eiava gaukaralaia dalana ia hahedinaraia (Salamo 6 bona 7).
11:3—Mauri ena “badina ia makohia” ena anina be dahaka? Unai badina be taunimanima sibodia ese idia haginia taravatu, oda herevadia bona kara maorodia. Unai gaudia be taunimanima ese idia badinaia lasi neganai, heiriheiri ia vara bona kara maoromaoro be lasi. Unai bamona negadia ai, “kara maoromaoro taudia” ese Dirava dekenai idia tabekau momokani be gau badana.—Salamo 11:4-7.
21:3—“Kwarana dekenai korona, golo gauna” ena anina be dahaka? Baibel ia hereva lasi unai korona be gau korikorina eiava Davida ese ia kwalimulaia tuari ia laulaulaidia. To, unai siri be lagani 1914 ai Iesu ese Iehova amo pavapava ena dagi ia abia karana ia perovetalaia. Unai korona be golo amo idia karaia ena anina be, Iesu ena lohia dalana be hereadae.
22:1, 2—Dahaka dainai Davida ia mamia Iehova ese ia rakatania? Davida ena inai taudia ese idia dagedage henia bada dainai, ‘iena kudouna be kandolo bamona ena kemena dekenai ia veve ore.’ (Salamo 22:14) Davida ia laloa Iehova ese ia rakatania. Iesu idia hasatauroa neganai, ia be unai bamona ia mamia danu. (Mataio 27:46) Davida ena hereva ese ena lalohisihisi mamina ia hahedinaraia. To, Salamo 22:16-21 ai ia torea gurigurina ese ia hamomokania, Davida ena abidadama Dirava dekenai ia manoka lasi.
Ita Dibaia Gaudia:
1:1. Iehova idia lalokau henia lasi taudia do ita bamodia lasi.—1 Korinto 15:33.
1:2. Namo lasi dina ta ita reaia, to dina ta ta ibounai lauma gaudia ita laloa be namo.—Mataio 4:4.
4:4. Bema ita badu neganai, aonega dalana be do ita hereva lasi, unai amo gabeai do ita lalohisihisi lasi.—Efeso 4:26.
4:5, (BHğ). Lauma dalanai ita henia boubou gaudia be mai momokani ida ita karaia bona iseda kara be Iehova ena taravatu hegeregerena neganai, idia be “kara maoromaoro bouboudia.”
6:5. Ita mauri noho ena badina namona be ita ura Iehova ita hanamoa noho.—Salamo 115:17.
9:12. Iehova ese ma haida idia alaia taudia edia davana do ia henia, bona haida ese idia dagedage henia taudia edia “taitai” ia laloaboio lasi.
15:2, 3; 24:3-5. Tomadiho momokani taudia ese hereva momokanidia do idia gwauraia bona gwauhamata koikoidia do idia karaia lasi bona ma haida edia ladana namona do idia hadikaia lasi.
15:4. Bema gwauhamata ta ita karaia, bona ita badinaia totona be auka herea, to ita laloparara ia be Baibel ena taravatu ia utua lasi, gau badana be unai gwauhamata ita hagugurua be namo.
15:5. Ita be Iehova ita tomadiho henia dainai, namona be dala maorona ai moni ita gaukaralaia.
17:14, 15. Tanobada taudia be mauri namona, ruma bese idia naria bona edia natudia dekenai ahuna namona do idia henia totona idia gaukara goadagoada. Davida ese ia laloa bada gauna be Dirava vairanai ladana namona do ia abia. Davida be Iehova ena gwauhamata bona heduru dekenai ia “noga” anina be, Davida ese ‘Iehova ena toana ia itaia dainai ia moale’ eiava ia moale badina Iehova be ia ida ia noho. Davida bamona, mai iseda kudouna ibounai ida lauma gaudia ita laloa be namo, ani?
19:1-6. Dirava ese ia havaraia gaudia—idia hereva diba lasi bona idia lalohadai diba lasi—be Iehova idia hanamoa. Unai dainai, namona be ita taunimanima, ita lalohadai diba, hereva diba bona tomadiho karana ita karaia diba taudia ese Iehova ita hanamoa bada be namo.—Apokalupo 4:11.
19:7-11. Iehova ena taravatu ibounai be ita dekenai namo bada idia havaraia!
19:12, 13. Namona be kara kerere bona hekokoroku karadia ita dadaraia.
19:14. Iseda kara sibona lasi, to dahaka ita laloa bona herevalaia gaudia danu ita naria namonamo be gau badana.
‘KARA MAOROMAORO LAU KARAIA NOHO DAINAI, OIEMU VAIRANA DEKENAI DO LAU GINI’
Davida be Salamo bukana ena kahana ginigunadia rua dekenai ia hahedinaraia, mai kudouna ibounai bona mai goada ida Dirava ia badinaia! Inai ane ia abia: “Lau be kara maoromaoro lau karaia noho.” (Salamo 26:11) Ena kara dika gwauatao totona ia guriguri neganai, ia gwau: “Egu kara dika lau gwauraia hedinarai lasi neganai, lauegu tauanina ia maragi lao, dina ibounai lau taitai dainai.” (Salamo 32:3) Iehova idia badinaia taudia dekenai, Davida ese inai hagoadaia herevana ia gwauraia: “Lohiabada ese kara maoromaoro taudia ia naria noho. Edia taitai be ia ese ia kamonai henia noho.”—Salamo 34:15.
Salamo 37 ena sisiba be mai anina bada Israela taudia bona ita dekenai, badina ita be “nega ena dokona” ai ita noho. (2 Timoteo 3:1-5) Salamo 40:7, 8 ese Iesu Keriso ia perovetalaia, ia gwau: “Lohiabada e, oi itaia, lau mai inai. Oiemu Buka ese lau ia hadibaia dahaka do lau karaia. Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” Salamo bukana ena kahana ginigunana ena dokona ai, Davida ese Iehova ia noia Bataseba ida ia kerere murinai idia vara hekwakwanai lalodiai ia durua totona. Ia gwau: “Oi ese lau do oi durua, badina be lau ese kara maoromaoro lau karaia noho.”—Salamo 41:12.
Baibel Henanadaidia Edia Haere:
26:6—Davida bamona, edena dala ai Iehova ena boubou patana ita raka hagegea noho? Unai boubou patana be Iehova ese Iesu Keriso ena mauri davalaia boubouna ia abia dae karana ia laulaulaia. (Heberu 8:5; 10:5-10) Boubou patana ita raka hagegea karana ena anina be, Iesu ena boubou gauna ita abidadama henia.
29:3-9—Iehova ena gadona be gari ia havaraia guba ena boiboi bamona ita gwauraia, ena anina be dahaka? Ia hahedinaraia gauna be: Iehova be siahu bada Diravana!
31:23—Edena dala ai Iehova ese hekokoroku tauna ena kerere davana ia henia? Ena davana be panisi ia abia. Kara maoromaoro tauna be ia manoka dainai, kara dika ta ia karaia neganai, Iehova ese ia matahakani henia. To hekokoroku tauna be ena kara dika amo ia helalo-kerehai lasi dainai, dika bada do ia davaria.—Aonega Herevadia 11:31; 1 Petero 4:18.
33:6—Lohiabada ena “hereva” be dahaka? Ia be Dirava ena lauma helaga, eiava ena gaukara siahuna, guba gaudia ia havaraia totona. (Genese 1:1, 2) Baibel ia gwau ia be Iehova ena uduna ena “hereva” badina Iehova ia hereva neganai, ia gwauraia gaudia idia vara.
Ita Dibaia Gaudia:
26:4. Kompiuta “chat rooms” ai edia kara momokani idia hunia taudia, sikuli eiava gaukara gabudia ai mai koikoi ida idia ura ita idia tura henia taudia, ita idia koia aposteit taudia bona mauri dala rua idia badinaia taudia ita bamodia lasi, be aonega dalana.
26:7, 12; 35:18; 40:9. Keristani heboudia ai ibounai vairanai Iehova ita hanamoa be namo.
26:8; 27:4. Keristani heboudia lao henia karana ita ura henia bada, a?
26:11, (NW ). Ena be Davida ia gwau kara maoromaoro do ia karaia, to danu ena kara dika dainai gwauatao totona ia noinoi. Oibe, ia hahedinaraia ena be ita be goevadae lasi taudia, to Dirava ita badinaia noho diba.
29:10. Iehova ese “ranu dobu abata badana” ia biagua noho, anina be Iehova ese iena siahu ia biagua diba.
30:5. Iehova ena kara badana be badu lasi, to lalokau.
32:9. Iehova ia ura lasi ita be hosi eiava doniki bamona, unai animal ia kamonai totona uduna dekenai auri idia atoa eiava idia kwadia. To, namona be ita ese Iehova ena ura ita lalopararalaia dainai, mai iseda ura ibounai ida Ia ita kamonai henia.
33:17-19. Taunimanima ese idia haginia oreana ta be ia goada lasi hahemauri ia mailaia totona. Namona be Iehova bona iena Basileia dekenai ita tabekau.
34:10. Edia mauri lalonai Basileia gaudia idia tahua guna taudia dekenai, inai be hagoadaia hereva namona!
39:1, 2. Dagedage taudia ese iseda tadikaka idia hadikaia totona, ita amo hereva ta idia ura abia neganai, aonega karana be ‘hereva ta do ita gwauraia lasi.’
40:1, 2. Ita lalohisihisi neganai Iehova dekenai ita tabekau karana ese ita do ia durua, ita haheauka bona “guri dikana” eiava “kopukopu gabuna” amo ita do ia veria mauri.
40:5, 12. Herevana ita davaria dika eiava iseda manoka gaudia be momo, to Iehova ese ita dekenai ia henia hahenamo momo ita laloa neganai, do ita daradoko lasi.
“Iehova Do Ita Hanamoa”
Inai kahana ginigunana lalonai idia noho ane 41 ese ita idia hagoadaia bona durua bada! Ena be hahetoho ita davaria eiava iseda lalomamina ia dika dainai ita lalohisihisi, to Dirava ena Hereva siahuna—inai Salamo bukana ena kahana ginigunana—ese ita ia durua bona hagoadaia. (Heberu 4:12) Iseda mauri durua totona inai ane ibounai be sisiba namodia idia henia. Ita idia hadibaia loulou, herevana dahaka hekwakwanai ita davaria, Iehova be ita do ia rakatania lasi.
Salamo bukana ena kahana ginigunana be inai hereva amo ia doko: “Israela edia Dirava Iehova hanamoa. Gunaguna negana amo ema, ela bona hanaihanai. Amen bona Amen.” (Salamo 41:13, NW ) Unai ane ibounai ita duahia murinai ita ura Iehova ita hanamoa, ani?
[Footnote]
[Blurb on page 25]
Bema idia hereva bona lalohadai diba lasi gaudia ese Iehova idia hanamoa diba, ita ese unai ita karaia momo be namo!
[Picture on page 23]
Salamo ena ane ginigunadia 41 lalonai, Davida be ane momo ia torea
[Picture on page 24]
Oi diba edena salamo anena ia hahedinaraia Iehova be Mamoe Naria Tauna Badana bamona, a?
[Picture on page 26]
Namo lasi dina ta ita reaia, to dina ta ta ibounai lauma gaudia ita laloa be namo
[Picture Credit Line on page 23]
Stars: Courtesy United States Naval Observatory
[Picture Credit Line on page 25]
Stars, pages 24 and 25: Courtesy United States Naval Observatory
[Picture Credit Line on page 26]
Stars: Courtesy United States Naval Observatory