Iehova ese Hisihisi Tauna Ia Durua
“Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do ia ore.”—SALAMO 34:19.
1, 2. Keiko be dahaka hekwakwanai ia davaria? Dahaka dainai ita lalometau?
LAGANI 20 mai kahana lalonai, Keikoa be Iehova ena Witnes hahinena ta. Ia be regula painia ta, eiava nega ibounai Basileia ia harorolaia. Unai gaukara ia lalokau henia bada. To vanegai, Keiko be ia lalometau bada. Ia gwau: “Lau tai momo.” Keiko ese unai lalometau ia hanaia totona, nega bada ia atoa ia stadi totona. Ia gwau: “To, unai ese lau ia durua lasi bona egu laloa dalana lau haidaua lasi. Lau lalometau bada dainai, lau ura lau mase.”
2 Nega haida, oi danu oi lalometau, a? Bema oi be Iehova ena Witnes tauna ta, namona be oi moale badina Dirava badinaia karana “be mai ena gwauhamata, inai mauri bona mauri gabena dekenai.” (1 Timoteo 4:8, BHğ) Hari, oi be paradaiso bamona gabuna ta ai oi noho! To, unai ena anina be hisihisi ta do oi davaria lasi, a? Lasi, hisihisi be do oi davaria! Baibel ia gwau: “Kara maoromaoro tauna ena hisihisi be momo.” (Salamo 34:19) Unai ita hoalaia lasi badina Satani Diabolo be “tanobada taudia ibounai ia gunalaia noho.” (1 Ioane 5:19) Unai dainai, ita ibounai be hisihisi ita davaria.—Efeso 6:12.
Hisihisi Dainai Idia Vara Gaudia
3. Idia lalometau bada Dirava ena hesiai taudia haida edia haheitalai oi gwauraia.
3 Bema nega daudau lalonai ita lalometau, unai ese eda tauanina bona lalona ia hadikaia diba. (Aonega Herevadia 15:15) Kara maoromaoro tauna Iobu mani oi laloa. Hisihisi bada herea ia abia neganai, Iobu ia gwau: “Ita ibounai, hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea.” (Iobu 14:1) Iobu ena moale karana ia ore vaitani. Nega ta danu, ia laloa Iehova be ia ia rakatania vadaeni. (Iobu 29:1-5) Iobu sibona lasi, to Dirava ena hesiai taudia haida danu be hisihisi bada idia abia. Baibel be ita ia hamaoroa, “Hana ena lalona ia hisihisi bada,” badina ia be natuna lasi. (1 Samuela 1:9-11) Rebeka be ruma bese lalonai ia vara hekwakwanai ta ia lalohisihisilaia dainai, ia gwau: “Lau hesiku vadaeni.” (Genese 27:46) Davida be ena kerere ia laloa neganai, ia gwau: “Dina ena hora ibounai lalonai lau tai noho, tai noho.” (Salamo 38:6) Unai haheitalai ese idia hahedinaraia goevagoeva, Dirava idia gari henia tatau bona hahine ginigunadia haida be hisihisi bada negana idia haheaukalaia.
4. Dahaka dainai hari Keristani taudia huanai “lalometau taudia” idia noho?
4 Keristani taudia be edena bamona? Aposetolo Paulo be Tesalonika taudia ia hamaoroa, “lalometau taudia” idia hagoadaia be namo. (1 Tesalonika 5:14, NW ) Buka ta ia gwau, Greek herevana idia hahanaia “lalometau taudia” ena anina be inai: “Mauri ai idia vara gaudia dainai, nega sisina lalonai idia lalohisihisi taudia.” Paulo ena hereva ese ia hahedinaraia, Tesalonika kongrigeisen ena Keristani horoa taudia haida be idia lalomanoka. Hari inai negai danu, Keristani taudia haida be idia lalometau. To dahaka dainai? Namona be dala badadia toi ita herevalaia.
Ita Goevadae Lasi Dainai Ita Lalometau Diba
5, 6. Roma 7:22-25 amo dahaka heduru ita abia diba?
5 Kara gageva taudia be edia kara dainai idia “hemarai lasi,” to Keristani taudia momokanidia be edia kara dika dainai idia lalohisihisi. (Efeso 4:19) Reana edia hemami be Paulo ena bamona, ia gwau: “Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.” Bena ia gwau: “Lau madi o! Lau be dika momokani inai!”—Roma 7:22-24.
6 Nega haida oiemu hemami be Paulo ena bamona, a? Oiemu kerere oi laloa bada be maoro, badina unai ese oi do ia durua kara dika ena metau oi diba bona oi ia hagoadaia diba kara dika oi dadaraia totona. To emu kara kerere dainai oi lalohisihisi hanaihanai be maoro lasi. Paulo be Roma 7:22-24 ena hereva ia gwauraia murinai, ia gwau: “Dirava lau tanikiu henia, ia ese lau ia hamauria, Iesu Keriso dekena amo.” (Roma 7:25) Oibe, Paulo ia diba momokani, Iesu ena rara ese ena kara dika ia gwauatao diba.—Roma 5:18.
7. Dahaka ese ta ia durua diba ena kara dika ia lalohisihisilaia lasi totona?
7 Bema emu kara dika ta dainai oi lalohisihisi, namona be aposetolo Ioane ena hereva oi laloa, ia gwau: “To tau ta bema ia kara dika, ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna. Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.” (1 Ioane 2:1, 2) Bema emu kara dika ta dainai oi lalohisihisi, namona be nega ibounai oi laloatao: Iesu be kara dika taudia dainai ia mase, goevadae taudia dainai lasi. Momokani, “ita ibounai ita kara dika vadaeni, bona Dirava ena hairaina . . . ita abia be hegeregere lasi.”—Roma 3:23.
8, 9. Dahaka dainai lalohadai kereredia ita dadaraia be namo?
8 To bema guna oi be kara dika badana ta oi karaia be edena bamona? Reana oi be Iehova dekenai unai gauna oi gurigurilaia loulou. Keristani elda taudia edia heduru oi abia. (Iamesi 5:14, 15) Bona oi helalo-kerehai momokani dainai, kongrigeisen amo oi idia atoa siri lasi. Eiava reana Dirava ena orea oi rakatania, to gabeai, oi helalo-kerehai bona Dirava ena vairanai oi goeva lou. Herevana unai bamona oi karaia, to reana emu kara dika gunana oi laloa lou bona oi lalohisihisi. Bema unai bamona, laloaboio lasi Iehova be idia helalo-kerehai momokani taudia edia dika ia gwauatao “momokani.” (Isaia 55:7) Ma danu, Iehova ia ura lasi oi lalomanoka. To Satani ia ura oi lalomanoka. (2 Korinto 2:7, 10, 11) Diabolo be ena kara dika dainai davana dikana do ia abia, to Diabolo ia ura oi abia dae oi danu be emu dika davana do oi abia. (Apokalupo 20:10) Namo lasi Satani ena lalohadai koikoina oi abia dae, badina unai ese emu abidadama do ia hadikaia. (Efeso 6:11) To, ‘oi gini goada’ bona Satani ena koikoi karadia oi dadaraia.—1 Petero 5:9.
9 Apokalupo 12:10 ia gwau, Satani be “iseda varavara [horoa Keristani taudia] ia samania” tauna. “Dina bona hanuaboi” ai, ia ese Dirava ena vairanai idia ia samania. Unai siri oi laloa dobu neganai do oi davaria, koikoi tauna Satani ia moale bema oi be sibona oi samania bona hadikaia; to Iehova be Satani bamona lasi. (1 Ioane 3:19-22) Vadaeni dahaka dainai emu kerere oi laloa momo bona oi ura Iehova oi rakatania? Namona be Satani ese emu hetura karana Iehova ida ia hadikaia lasi. Namona be oi abia dae Iehova be ‘bogahisihisi bona hariharibada Diravana. Ia be badu dekenai ia haraga lasi, to bogahisihisi bona lalokau dekenai ia be haraga,’ bona Satani ena koikoi herevana oi abia dae lasi.—Esodo 34:6.
Iseda Goada be Hegeregere Lasi Neganai, Ita Lalometau Diba
10. Dahaka dainai gorere eiava unai bamona gaudia ma haida ese lalometau idia havaraia diba?
10 Keristani taudia haida idia lalometau badina be edia goada be hegeregere lasi Dirava idia hesiai henia totona. Oi lalometau ena badina be unai, a? Reana gorere badana, buruka, bona hekwakwanai ma haida dainai, haroro gaukara oi karaia momo lasi, guna oi karaia bamona. Momokani, Baibel be Keristani taudia ia hagoadaia, nega idia hoia Dirava idia hesiai henia totona. (Efeso 5:15, 16, NW ) Bema emu goada be hegeregere lasi dainai oi haroro momo lasi bona unai oi lalohisihisilaia be edena bamona?
11. Galatia 6:4 ena sisiba be edena bamona ita ia durua diba?
11 Baibel be ita ia hagoadaia: “Umui lahedo lasi. To abidadama bona haheauka taudia edia kara bamona do umui karaia. Vadaeni Dirava ia gwauhamatalaia davana namona, iena natuna taudia do idia abia gauna, be umui ese do umui abia.” (Heberu 6:12) Unai bamona ita karaia diba bema abidadama bona haheauka taudia edia kara namodia ita laloa bona ita ura edia abidadama ita tohotohoa. To, bema eda goada be ma haida edia goada ida ita hahegeregerea bona ita laloa ita karaia gaukaradia be anina lasi, namo ta do ita davaria lasi. Unai dainai, namona be Paulo ena sisiba ita badinaia, ia gwau: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.”—Galatia 6:4.
12. Dahaka dainai Iehova ena hesiai gaukara lalonai ita moale diba?
12 Keristani taudia idia moale be maoro, herevana idia gorere dainai edia goada be hegeregere lasi. Baibel ia gwau: “Dirava ena kara be gagevagageva lasi . . . Unai dainai ia ese emui kara namodia [“bona emui lalokau ia ladana dainai umui hahedinaraia,” BHğ] do ia laloaboio lasi.” (Heberu 6:10) Reana emu goada be hegeregere lasi dainai, guna Iehova ena hesiai gaukara lalonai oi karaia gaukaradia be hari oi karaia diba lasi. To, Iehova be oi ia durua diba haroro daladia ma haida, hegeregere telefon haroro bona leta torea karana oi karaia totona. Namona be oi diba momokani, emu kudouna ibounai ida oi haroro bona Iehova Dirava bona ma haida oi lalokau henia dainai, Iehova be oi do ia hanamoa.—Mataio 22:36-40.
“Metau Dikadia” Dainai Ita Lalometau Diba
13, 14. (a) Inai “metau dikadia momo” negana lalonai, ita lalohisihisilaia gaudia haida be dahaka? (b) Edena bamona ita diba taunimanima be hari idia lalokau heheni lasi?
13 Ena be Dirava ena tanobada matamatana ita naria noho, to hari inai negai, ita be “metau dikadia momo” negana lalonai ita noho. (2 Timoteo 3:1) Ita moale badina hari idia vara lalohisihisi gaudia amo ita diba, eda hahemauri negana be ia kahirakahira vadaeni. To, hekwakwanai momo be ita mamia danu. Hegeregere, bema moni gaukara oi karaia lasi be edena bamona? Reana gaukara davaria totona be auka, bona hua momo idia hanaia murinai, oi henanadai, Iehova be emu hekwakwanai ia itaia eiava lasi, bona emu guriguri ia kamonai eiava lasi. Eiava reana haida ese oi idia dadaraia kava eiava kara dika henia. Danu, niuspepa ena hereva kwaradia be emu hemami ia hadikaia diba, lebulebu taudia edia kara dainai Lota ena “lalona be ia metau” hegeregerena.—2 Petero 2:7.
14 Danu, nega dokona lalonai ia vara noho kara badana ta mani ita laloa. Baibel ia peroveta, momo be “lalokau do idia diba lasi.” (2 Timoteo 3:3) Ruma bese taudia momo be do idia lalokau heheni lasi. Buka ta (Family Violence) ia gwau, “gau momo ese idia hamomokania taunimanima alaia mase karana, botaia karana, edia lalona hahisia karana eiava sihari henia karana be ruma bese taudia haida ese do idia karaia badabada . . . Ruma bese idia lalokau heheni bona noho namonamo be namo, to taunimanima badadia bona natudia haida idia gwau ruma bese dekenai idia be dika bada idia davaria.” Ruma bese taudia ese idia hahisia o hadikaia taudia be lagani haida murinai idia lalometau bada. Bema unai bamona hekwakwanai dainai oi lalometau be edena bamona?
15. Edena dala ai Iehova ena lalokau be taunimanima edia lalokau ia hereaia?
15 Salamo torea tauna Davida ia gwau: “Egu tamana bona sinana, ese lau idia rakatania, to Lohiabada ese lau do ia abia dae.” (Salamo 27:10) Hagoadaia gauna be, ita diba Iehova ena lalokau be tama sina ibounai edia lalokau ia hereaia! Ena be tama sina ese oi idia ura henia lasi, kara dika henia, bona rakatania dainai oi lalohisihisi, to oi laloaboio lasi, Iehova be oi ia lalokau henia. (Roma 8:38, 39) Danu, Dirava be ia lalokau henia taudia ia veria mai. (Ioane 3:16; 6:44) Herevana taunimanima be oi idia hadikaia, to emu guba Tamana be oi ia lalokau henia!
Lalometau Kokia Daladia
16, 17. Ta ia lalometau neganai, edena bamona ia goada lou diba?
16 Lalometau kokia daladia haida oi badinaia be namo. Hegeregere, Dirava ena hesiai gaukara oi habadaia. Baibel ena hereva oi laloa dobu, lalometau ia bada negadia ai danu. Salamo torea tauna be ane ia abia: “Lau gwau, ‘Lau be lau moru noho.’ Unai neganai Lohiabada e, oiemu lalokau bada ese lau ia abia isi lou. Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.” (Salamo 94:18, 19) Baibel duahia hanaihanai karana ese oi do ia durua, emu lalona be hagoadaia hereva namodia amo oi hahonua totona.
17 Guriguri danu be gau badana. Ena be emu hemami ibounai oi gwauraia hedinarai be auka, to Iehova be oi ura gwauraia gaudia ia diba. (Roma 8:26, 27) Salamo torea tauna ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.”—Salamo 55:22.
18. Ta ese lalometau be edena bamona ia kokia diba?
18 Taunimanima haida be lalometau gorerena ta (clinical depression) idia abia.b Bema oi be unai gorere oi abia, namona be Dirava ena tanobada matamatana oi laloa, bona unai negai “ta ese do ia gwau lasi, ‘Lau be gorere.’ ” (Isaia 33:24) Bema oi lalometau bada herea, doketa edia heduru oi tahua be namo. (Mataio 9:12) Danu, gau badana be emu tauanina oi naria namonamo. Emu rara ia durua aniani namodia oi ania bona oi eksasais be namo. Oi mahuta namonamo. Televisen oi itaia ela bona hanuaboi momokani be namo lasi, bona tauanina o lalona ia hadikaia gadara idauidau oi dadaraia. Gau bada hereana be inai: nega ibounai Dirava ia hamoalea gaukaradia oi karaia! Ena be Iehova ese taunimanima edia matana ranu dahua negana be ia do ginidae lasi, to Ia ese oi do ia durua oi haheauka totona.—Apokalupo 21:4; 1 Korinto 10:13.
“Dirava Ena Imana Goadana Henunai” Ita Noho
19. Iehova be hisihisi taudia dekenai dahaka ia gwauhamatalaia?
19 Baibel ia gwauhamata, ena be kara maoromaoro tauna ena hisihisi be momo, “to Lohiabada ese unai tau do ia durua, vadaeni unai hisihisi do ia ore.” (Salamo 34:19) Dirava be edena bamona unai do ia karaia? Aposetolo Paulo be Iehova ia noia loulou ena tauanina amo “ginigini ta” ia kokia totona neganai, Iehova ia gwau: “Lauegu siahu be manokamanoka tauna lalonai ia hedinarai momokani.” (2 Korinto 12:7-9) Iehova ena gwauhamata ena anina Paulo bona oi dekenai be dahaka? Iehova ia gwau lasi maoromaoro hisihisi do ia kokia, to ia gwau, siahu do ia henia hisihisi ita haheaukalaia totona.
20. Herevana hisihisi ita davaria, to 1 Petero 5:6, 7 be dahaka ia gwau?
20 Aposetolo Petero ia gwau: “Dirava ena imana goadana henunai do umui manau, vadaeni iena nega namona lalonai ia ese umui do ia abia isi. Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.” (1 Petero 5:6, 7) Iehova oi lalokau henia dainai, Ia ese oi do ia rakatania lasi. Ena be hisihisi oi davaria, to Iehova be oi do ia durua. Laloaboio lasi, kamonai Keristani taudia be “Dirava ena imana goadana henunai” idia noho. Unai dainai Iehova ita hesiai henia noho neganai, Ia be ita do ia hagoadaia ita haheauka totona. Bema Iehova ita kamonai henia noho, gau ta be eda hetura karana Iehova ida do ia hadikaia lasi. Unai dainai, Iehova ita badinaia noho be namo, unai amo Iehova ese ia gwauhamatalaia tanobada matamatana lalonai mauri hanaihanai do ita moalelaia diba, bona Iehova ese hisihisi taudia ia hamauria dinana be do ita itaia momokani!
[Footnotes]
a Ladana ai haidaua.
b Clinical depression be lalometau gorerena ta, bona unai gorere ia abia tauna be ia daradoko bada herea noho. Hereva ma haida be The Watchtower, October 15, 1988, rau 25-9; November 15, 1988, rau 21-4; bona Gima Kohorona, September 1, 1996, rau 30-1 oi itaia.
Oi Laloatao, A?
• Dahaka dainai Iehova ena hesiai taudia danu be hisihisi idia davaria?
• Dirava ena taunimanima idia lalometau ena badina haida be dahaka?
• Iehova be edena bamona ita ia durua ita lalometau lasi totona?
• Edena dala ai ita be “Dirava ena imana goadana henunai” ita noho?
[Pictures on page 18]
Hahetoho lalonai, Iehova ena taunimanima idia moale be maoro
[Picture on page 21]
Telefon haroro be dala namona ta Iehova ita hesiai henia totona