“Emui Ura Gauna be Dirava Oi Hamaorolaia”
“Gau iboudiai guriguri ai, noinoi ai, mai tanikiu danu, emui ura gauna be Dirava oi hamaorolaia.”—FILIPI 4:6, BHğ.
1. Daika ita hereva henia be hahenamo badana, bona dahaka dainai unai be idau momokani?
BEMA oi ura emu tano ena praiminista oi hereva henia, dahaka haere do oi abia? Reana ena opesi taudia amo haere do oi abia, to praiminista do oi hereva henia be auka. To, Praiminista badana Iehova Dirava, guba bona tanobada edia Lohia Badana unai, be idau. Ia be nega bona gabu idauidau ai ita guriguri henia diba. Hanaihanai Dirava be guriguri maorodia do ia kamonai henia. (Aonega Herevadia 15:29) Unai be namo herea! Namona be unai ese eda lalona ia veria, “guriguri kamonai henia Diravana” ita guriguri henia hanaihanai totona, ani?—Salamo 65:2, BHğ.
2. Dirava ese guriguri ia abia dae totona, dahaka kara be mai anina bada?
2 To, reana haida idia henanadai, ‘Edena bamona guriguri be Dirava ese ia kamonai henia?’ Dirava ese ta ena guriguri ia abia dae totona, Baibel be mai anina bada karana ta ia gwauraia: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:6) Oibe, wiki gunana ena stadi ese ia hahedinaraia bamona, Dirava ita guriguri henia totona, abidadama be gau badana. Bema tau ta be mai ena abidadama, mai momokani, bona mai ena kudou maorona ida Dirava ia guriguri henia, Dirava be mai ena ura ida unai guriguri do ia abia dae.
3. (a) Kamonai hesiai taudia ginigunadia ese edia guriguri lalonai, dahaka gaudia idia gurigurilaia? (b) Guriguri daladia idauidau be dahaka?
3 Aposetolo Paulo be iena nega ai idia noho Keristani taudia ia hagoadaia: “Gau ta umui lalohekwarahilaia lasi; to gau iboudiai guriguri ai, noinoi ai, mai tanikiu danu, emui ura gauna be Dirava oi hamaorolaia.” (Filipi 4:6, 7, BHğ) Baibel ia gwauraia taudia momo ese idia lalohekwarahilaia gaudia be Dirava dekenai idia gurigurilaia. Idia haida be Hana, Elia, Hesekaia, bona Daniela. (1 Samuela 2:1-10; 1 King Taudia 18:36, 37; 2 King Taudia 19:15-19; Daniela 9:3-21) Edia haheitalai ita tohotohoa be namo. To danu, Paulo ena hereva, Filipi 4:6, 7 ai, be guriguri daladia idauidau ia gwauraia. Paulo ia gwau Dirava ita tanikiu henia be namo, badina Dirava ese gau momo ia karaia ita totona. Danu, Dirava ena ladana ita abia isi. Noinoi gurigurina ena anina be, mai manau ida Dirava dekenai heduru ita noia. Bona eda guriguri lalonai iseda ura gauna ita gwauraia hedinarai diba. (Luka 11:2, 3) Unai guriguri idauidau amo eda guba Tamana ita hereva henia neganai, Iehova be mai moale ida do ia kamonai.
4. Herevana Iehova be eda ura gaudia ia diba vadaeni, to dahaka dainai Ia dekenai ita gwauraia lou be namo?
4 Reana haida idia henanadai, ‘Iehova be eda ura gaudia ibounai ia diba vadaeni, a?’ Oibe. (Mataio 6:8, 32) To, dahaka dainai Iehova ia ura eda ura gaudia be Ia dekenai ita gwauraia hedinarai lou? Inai haheitalai mani oi laloa: Sitoa ena biaguna ta be ia ura harihari gauna ta be ena kastoma taudia haida dekenai ia henia. To, kastoma taudia ese unai harihari gauna idia abia totona, sitoa ena biaguna dekenai idia mai bona unai harihari gauna idia noia be namo. Haida be unai bamona idia karaia lasi dainai, idia hahedinaraia idia be sitoa biaguna ena harihari gauna idia laloa bada lasi. Unai hegeregerena, bema guriguri lalonai iseda ura gauna ita gwauraia hedinarai lasi, anina be Iehova ese ia henia gaudia be ita laloa bada lasi. Iesu ia gwau: “Do umui noinoi, bona do umui abia.” (Ioane 16:24) Unai bamona ita karaia neganai, anina be Dirava ita abidadama henia momokani.
Edena Dala ai Dirava Ita Guriguri Henia be Namo?
5. Dahaka dainai Iesu ena ladana ai ita guriguri be maoro?
5 Iehova be ia ita guriguri henia dalana dekenai, taravatu aukadia momo ia atoa lasi. To, namona be Baibel dekenai Dirava guriguri henia dalana maorona ita dibaia. Hegeregere, Iesu be ena murinai idia raka taudia ia hadibaia: “Bema gau ta do umui noinoi egu Tamana dekenai, ia ese do ia henia, bema egu ladana umui gwauraia neganai.” (Ioane 16:23) Baibel be ita ia hamaoroa, Iesu ena ladana ai ita guriguri be maoro, badina ita diba Iesu sibona dainai Dirava be taunimanima ibounai ia hanamoa bada.
6. Ita guriguri neganai ita gini, helai, tui diho, o kara ma ta ita karaia be namo, a?
6 Ita guriguri neganai ita gini, helai, tui diho, eiava kara ma ta ita karaia be namo, a? Baibel ia gwau lasi iseda guriguri lalonai bema ita gini, helai, tui diho, eiava kara ma ta ita karaia, Dirava be do ia kamonai. (1 King Taudia 8:22; Nehemia 8:6; Mareko 11:25; Luka 22:41) Lasi. To, gau badana be inai: mai eda kudou maorona ida Dirava ita guriguri henia be namo.—Ioela 2:12, 13.
7. (a) “Amen” ena anina be dahaka? (b) Edena dala ai guriguri lalonai “Amen” ita gaukaralaia namonamo diba?
7 Dahaka dainai guriguri dokonai “amen” ita gwauraia be namo? Baibel ese ia hahedinaraia, eda guriguri dokonai bona taunimanima vairanai ita gwauraia gurigurina ena dokonai, “Amen” ita gwauraia be maoro. (Salamo 72:19; 89:52) Heberu gado herevana ʼa·menʹ ena anina be “momokani.” Buka ta (McClintock bona Strong edia Cyclopedia) ia gwau, guriguri dokonai “Amen” ita gwauraia ena anina be, “ita abia dae unai hereva be momokani, bona ita noinoi unai hereva idia guguru totona.” Unai dainai, bema ta ese guriguri dokonai “Amen” ia gwauraia, anina be ia gwauraia herevadia ia laloa bada. Kongrigeisen ai, bema tadikaka ta be guriguri dokonai “Amen” ia gwauraia, bona kamonai taudia be mai gado regena badana eiava maragina amo “Amen” idia gwauraia neganai, anina be idia abia dae tadikaka ena guriguri herevadia be momokani.—1 Korinto 14:16.
8. Edena dala ai eda guriguri haida be Iakobo o Aberahamo edia bamona, bona unai amo dahaka ita hahedinaraia?
8 Nega haida, Dirava be dala ia kehoa ita laloa bada gaudia ita gurigurilaia totona. Reana ita be Iakobo bamona do ita karaia, hanuaboi ta lalonai aneru ta ida ia heatu, ena ahuna ia abia totona. (Genese 32:24-26) Eiava nega haida Aberahamo bamona do ita karaia, Iehova ia noia loulou Lota bona reana Sodoma dekenai idia noho kara maoromaoro taudia ma haida ia hamauria totona. (Genese 18:22-33) Unai hegeregerena, ita laloa bada gaudia be Iehova dekenai ita noia goadagoada badina Ia be hahemaoro goeva bona lalokau bona hebogahisi Diravana.
Dahaka Gaudia Ita Gurigurilaia Diba?
9. Ita guriguri neganai, dahaka ita laloa bada be namo?
9 Laloaboio lasi, Paulo ia gwau: “Gau iboudiai . . . emui ura gauna be Dirava oi hamaorolaia.” (Filipo 4:6, BHğ) Unai dainai, eda mauri lalonai ita laloa bada gaudia idauidau totona ita guriguri be namo. To, Iehova ese ia moalelaia gaudia ita gurigurilaia guna be namo. Daniela be haheitalai namona. Israela taudia be edia kerere dainai panisia idia abia neganai, Daniela ese Iehova ia noia hebogahisi ia hahedinaraia totona, ia gwau: “Egu Dirava e, oi naria daudau lasi, oi sibona dainai, badina be emu hanua bona emu bese be oi emu ladana idia abia.” (Daniela 9:15-19, BHğ) Eda guriguri amo ita hahedinaraia, ita be Iehova ena ladana hahelagaia bona ena ura hagugurua karana ita laloa bada danu, a?
10. Edena bamona ita diba iseda ura gaudia totona ita guriguri be maoro?
10 To, iseda ura gaudia totona ita guriguri danu be maoro. Hegeregere, salamo torea tauna bamona, Dirava ita noia ena dobu gaudia ita lalopararalaia totona. Ia guriguri: “Egu lalona do oi kehoa, bona lau ese oiemu taravatu do lau badinaia. Lau ese mai egu kudouna ibounai danu, oiemu taravatu do lau naria.” (Salamo 119:33, 34; Kolose 1:9, 10) Iesu be “Dirava ia guriguri henia, mai taitai bona mai matana ranu danu. Ia noinoi, badina ia diba Dirava ese mase dekena amo ia hamauria lou diba.” (Heberu 5:7) Iesu be unai dala amo ia hahedinaraia, hisihisi eiava hahetoho ia davaria tauna ese heduru ia tahua be namo. Iesu ese ena diba tahua taudia dekenai guriguri dalana ia hadibaia neganai, ia gwau gau ma haida—hegeregere ta ena dika gwauatao bona dina ta ta ena aniani—totona idia guriguri diba.
11. Guriguri karana ese edena bamona ita ia durua, hedibagani lalonai ita moru lasi totona?
11 Iesu ese ia hadibaia gurigurina lalonai, inai noinoi ia noho danu: “Dibagani dika gabuna dekenai ai do oi hakaua vareai lasi, to Satani ena imana dekena amo do oi hamauria ai.” (Mataio 6:9-13) Gabeai, Iesu be inai sisiba ia henia: “Umui gima, umui guriguri, hedibagani ai umui vareai garina.” (Mataio 26:41, BHğ) Hedibagani ta ita davaria neganai, ita guriguri be gau badana. Reana sikuli o gaukara gabuna ai hedibagani ita davaria neganai, unai ese ita ia doria Baibel ena hakaua herevadia ita dadaraia totona. Reana Witnes lasi taudia ese ita do idia boiria, Baibel ena taravatu utua karana ta ita karaia totona. Reana ita idia noia kara ta ita karaia, hakaua hereva maoromaorodia ia utua karana unai. Unai bamona negadia lalonai, namona be Iesu ena sisiba ita badinaia, ita guriguri—hedibagani ia do vara lasi neganai eiava ia vara lalonai—Dirava ita noia hedibagani lalonai ita moru lasi totona.
12. Dahaka dainai ita guriguri be namo, bona ita diba Iehova be dahaka do ia karaia?
12 Hari, Dirava ena hesiai taudia be lalometau bona lalohekwarahi idauidau idia davaria. Momo be gorere bona lalohisihisi dainai idia lalohekwarahi. Dagedage karadia be gabu ibounai dekenai idia vara dainai ita gari. Moni ena hekwakwanai dainai, mauri ia auka. To, ita moale badina ita diba Iehova ena hesiai taudia ese unai lalohekwarahi bona lalometau be Iehova dekenai idia gurigurilaia neganai, Iehova be ia kamonai! Salamo 102:17 ese Iehova be inai bamona ia herevalaia: “Ia ese iena bese ena ogogami taudia edia guriguri, be do ia kamonai, bona edia noinoi do ia laloa.”
13. (a) Dahaka gaudia totona ita guriguri danu be maoro? (b) Unai bamona ia guriguri hahinena ta ena ekspiriens mani oi gwauraia.
13 To, bema gau ta ese Iehova ita hesiai henia eiava ita hetura henia karana ia koua, vadaeni ita guriguri be maoro. (1 Ioane 5:14) Bema oi ura oi headava, moni gaukara oi tahua, eiava emu haroro gaukara oi habadaia, namona be mai gari lasi ida Dirava dekenai unai gaudia bona Iena heduru oi noia. Hegeregere, Philippines ai, taihu ta ia ura painia gaukara ia karaia. To, moni gaukara ia karaia lasi dainai, sibona ia durua totona be auka. Ia gwau: “Saturday ta ai, Iehova lau noia painia gaukara lau karaia totona. Unai dina tamona ai, haroro gaukara ai sikuli kekeni ta dekenai buka ta lau henia. Lau hoa badina kekeni ia gwau: ‘Namona be Monday dabai, egu sikuli gabuna dekenai oi mai.’ Lau henanadai, ‘Dahaka dainai?’ Kekeni ia gwau, sikuli ena opesi taudia be gaukara tauna ta idia ura henia haraga. Bona lau lao neganai, maoromaoro lau idia abia hidi lau gaukara totona. Unai ibounai be nega tamona idia vara haraga.” Tanobada hegegemadai, Witnes taudia momo be unai bamona ekspiriens idia davaria. Unai dainai, Dirava ita guriguri henia neganai, mai eda kudouna ibounai ida iseda ura gauna ita gwauraia be namo!
Bema Kerere Ita Karaia be Edena Bamona?
14, 15. (a) Herevana ta be kerere ia karaia, to dahaka dainai ia guriguri be namo? (b) Kerere tauna ena guriguri sibona lasi, to dahaka danu ese ia durua Dirava ia tura henia lou totona?
14 Edena dala ai kerere tauna be guriguri karana amo heduru ia abia diba? Haida be edia kerere idia hemarailaia dainai, Dirava idia guriguri henia lasi. To, unai be aonega karana lasi. Haheitalai be inai: Peleini taria taudia idia diba bema idia boio, peleini hakaua herevadia idia henia taudia edia heduru idia abia diba. To, bema peleini taria tauna be ia boio dainai ia hemarai bona heduru idia henia taudia ia hadibaia lasi, dahaka do ia vara? Dika bada ia vara diba! Unai hegeregerena, bema tau ta be ena kerere dainai ia hemarai bona Dirava ia guriguri henia lasi, dika ma haida ia davaria diba. Kerere hemarailaia karana ese Iehova guriguri henia karana ia koua be namo lasi. Momokani, Dirava ia ura kara dika badana idia karaia taudia idia guriguri be namo. Peroveta tauna Isaia be ena negai idia noho kerere taudia ia hamaoroa idia guriguri be namo, badina Iehova be “dika do ia gwauatao momokani.” (Isaia 55:6, 7) Oibe, bema ta ia “manau,” kara dika ena dala ia rakatania, bona ia helalo-kerehai momokani, vadaeni Iehova be do ia “manau” danu.—Salamo 119:58, NW; Daniela 9:13, NW.
15 Bema tau ta ia kara dika, guriguri be gau badana bona mai ena badina ma ta. Iamesi ese heduru ia ura abia tauna be inai bamona ia herevalaia: “Ia ese ekalesia gunalaia taudia do ia boiria be namo. Idia ese ia dainai do idia guriguri . . . Lohiabada ese iena mauri do ia hanamoa.” (Iamesi 5:14, 15) Oibe, kerere tauna ese guriguri amo Iehova dekenai ena dika ia gwauraia hedinarai sibona lasi, to danu elda taudia ia noia ia totona idia guriguri be namo. Unai ese kerere tauna do ia durua, Dirava ia tura henia lou totona.
Guriguri Edia Haere
16, 17. (a) Iehova ese guriguri be edena dala ai ia haerelaia? (b) Daidia edia ekspiriens ese idia hahedinaraia, haroro gaukara lalonai guriguri be mai anina bada?
16 Dirava ese eda guriguri be edena bamona ia haerelaia? Guriguri haida edia haere be ita abia haraga bona ita laloparara guriguri ena haere be unai. (2 King Taudia 20:1-6) To, guriguri haida edia haere be gabeai ita abia, bona Dirava ese unai guriguri ia haerelaia dalana be ita daradaralaia. To Iesu ena haheitalai ta dekenai, vabu ta be kota biaguna dekenai ia mai loulou hegeregerena, Dirava ita guriguri henia loulou be namo. (Luka 18:1-8) Bona ita diba Dirava ena ura hegeregerena ita guriguri neganai, Iehova be do ia gwau lasi: “Oi hekwarahi henia lasi lau.”—Luka 11:5-9.
17 Nega momo Iehova ena taunimanima idia itaia, Iehova be edia guriguri ia haerelaia. Bona unai be eda haroro gaukara ai ita itaia. Hegeregere, Philippines dekenai, Witnes taihu rua be gabu daudauna ta ai magasin gaukara idia karaia. Idia ese pepapepa ta be hahine ta dekenai idia henia neganai, unai hahine ia tai. Ia gwau: “Hanuaboi ai, lau guriguri Dirava ese ta do ia siaia lau dekenai Baibel ia hadibaia totona, bona lau laloa Dirava ese egu guriguri ia haerelaia inai.” Gabeai, unai hahine be Kingdom Hall dekenai hebou ibounai ia lao henia. Sautist Asia ena kahana ma ta ai, Witnes tadikaka ta be ia gari sekuriti ese idia gimaia ruma badana ta dekenai ia haroro totona. To, Iehova ia guriguri henia, ena lalona ia hagoadaia, bona unai ruma badana dekenai ia lao. Tadikaka be daiutu ta ena iduara ai ia pidipidi neganai, kekeni ta be iduara ia kehoa. Tadikaka ese ena vadivadi ena badina ia herevalaia neganai, unai kekeni ia tai. Ia gwau ia be Iehova ena Witnes taudia ia tahua noho, bona ia guriguri Witnes taudia ia davaria totona. Tadikaka be mai moale ida kekeni ia durua Iehova ena Witnes taudia edia kongrigeisen amo heduru ia abia totona.
18. (a) Dirava ese iseda guriguri ia haerelaia neganai, dahaka ita karaia be namo? (b) Bema hanaihanai Dirava ita guriguri henia, dahaka ita diba?
18 Momokani, guriguri karana be hahenamo hereadaena. Iehova ia ura eda guriguri ia kamonai bona ia haerelaia. (Isaia 30:18, 19) To, Iehova ese iseda guriguri ia haerelaia dalana ita diba be namo. Nega momo, iseda guriguri ena haere be iseda ura hegeregerena do ita abia lasi. To, bema ita diba Iehova be ita ia hakaua, vadaeni do ita laloatao Iehova ita tanikiu henia bona ita hanamoa be namo. (1 Tesalonika 5:18) Ma danu, nega ibounai aposetolo Paulo ena sisiba do ita laloatao, ia gwau: “Gau iboudiai guriguri ai, noinoi ai, mai tanikiu danu, emui ura gauna be Dirava oi hamaorolaia.” Oibe, hanaihanai Dirava oi hereva henia be namo. Unai amo do oi diba Paulo ena hereva—Dirava ese edia guriguri ia haerelaia taudia totona ia gwauraia herevana—be ia momokani, ia gwau: “Dirava ena maino ese . . . emui laloa gaudia, bona emui kudouna idia mamia gaudia ibounai do ia gimaia namonamo.”—Filipo 4:6, 7; BHğ.
Oi Haere Diba, A?
• Guriguri daladia idauidau be dahaka?
• Edena dala ai Dirava ita guriguri henia be namo?
• Dahaka gaudia ita gurigurilaia diba?
• Tau ta ia kara dika neganai, guriguri ena namo be dahaka?
[Pictures on page 29]
Eda kudouna ibounai ida ita guriguri karana ese ita ia durua hedibagani lalonai ita moru lasi totona
[Pictures on page 31]
Eda tanikiu herevadia, ita laloa bada gaudia, bona ita ura gaudia be Dirava dekenai ita gurigurilaia