Lalokau Dainai Idia Lalogoada
“Dirava ese gari laumana ita dekenai ia henia lasi, to siahu bona lalokau bona aonega Laumana ita dekenai ia henia vadaeni.”—2 TIMOTEO 1:7.
1, 2. (a) Lalokau ese ta ia doria diba dahaka ia karaia totona? (b) Dahaka dainai Iesu ese ia hahedinaraia lalogoada karana be idau?
AUSTRALIA ena kone ta dekenai, headava matamata taudia rua be davara lalonai idia nahu. Bena idia be kone dekenai idia nahu lao noho lalonai, kwalaha ta ia hedinarai bona ia ura hahine ia koria neganai, karaharaga ena tau be ena hahine ia doria siri. To unai kwalaha ese ena tau ia ania. Fineral negana ai hahine ia gwau: “Lau dainai egu tau be ena mauri ia haboioa.”
2 Lalokau ese ta ena lalona ia veria diba mai lalogoada ida kara ta ia karaia totona. Iesu Keriso ia gwau: “Lalokau namo herea momokani be inai, tau ta ese ena mauri do ia atoa diho, iena turana totona.” (Ioane 15:13) Iesu be unai hereva ia gwauraia bona hora haida murinai, ena mauri ia henia, tau tamona sibona totona lasi, to taunimanima ibounai totona. (Mataio 20:28) To, Iesu be ena mauri do ia atoa diho karana be nega kwadogina lalonai ia lalohadailaia gauna lasi. Ia diba taunimanima ese ia do idia kirikirilaia, dagedage henia, samania koikoi bona au dekenai do idia hasatauroa. Do idia vara gaudia dainai iena hahediba taudia ia hamaoroa: “Ita lao Ierusalema, unuseni tau ta ese Taunimanima ena Natuna do ia henia dubu biagudia bona taravatu hadibaia taudia dekenai. Do idia gwau ia be do ia mase, bona do idia henia idau bese taudia dekenai, alaia mase gwauraia. Do idia hevaseha ia dekenai, do idia dadabaia, do idia kanudi henia, bona do idia alaia mase.”—Mareko 10:33, 34.
3. Edena kara haida ese Iesu ia durua ia lalogoada totona?
3 Edena kara haida ese Iesu idia durua ia lalogoada totona? Abidadama bona Dirava gari henia karana ese ia durua bada. (Heberu 5:7, BHğ; 12:2) Iesu ia lalogoada totona, ia ia durua kara hereadaena be Dirava bona taunimanima dekenai ia hahedinaraia lalokauna. (1 Ioane 3:16) Bema Keriso bamona, lalokau, abidadama bona Dirava gari henia karana ita hahedinaraia, do ita lalogoada diba. (Efeso 5:2) Edena dala ai unai lalokau ita hahedinaraia diba? Namona be ita diba daika be lalokau ena Badina.
“Lalokau be Dirava Dekena Amo”
4. Dahaka dainai ita gwau diba Iehova be lalokau ena Badina?
4 Iehova be lalokau Diravana bona lalokau ena Badina. Aposetolo Ioane ia gwau: “Lauegu lalokau taudia e, ita ta ta dekenai ita lalokau henia be namo. Badina lalokau be Dirava dekena amo. Mai ena lalokau tauna be Dirava ena natuna ta, bona ia diba Dirava. To mai ena lalokau lasi tauna ese Dirava ia diba lasi, badina Dirava be lalokau.” (1 Ioane 4:7, 8) Unai dainai, bema ta ia ura Dirava kahirakahira ia lao, namona be diba maoromaoro ia abia bona mai kudouna ibounai ida ia badinaia, unai amo Dirava ena lalokau ia hahedinaraia diba.—Filipi 1:9, NW; Iamesi 4:8; 1 Ioane 5:3.
5, 6. Dahaka ese Keristani taudia ginigunadia ia durua Keriso ena lalokau idia hahedinaraia totona?
5 Iesu be ena aposetolo taudia 11 ida guriguri ginigabena ia gwauraia murinai, Dirava dibaia karana bona lalokau idia hegeregere dalana ia gwauraia, ia gwau: “Oiemu ladana danu lau hadibaia vadaeni idia dekenai, bona do lau hadibaia noho, vadaeni lau dekenai oi henia lalokau badana, be idia edia lalona dekenai do ia noho. Bona lau danu idia edia lalona dekenai do lau noho.” (Ioane 17:26) Iesu ese ena hahediba taudia ia durua ia bona ena Tamana huanai ia noho lalokauna idia hahedinaraia totona. Iesu ena kara bona haheitalai amo Dirava ena ladana ena anina—Dirava ena kara namodia unai—ia hahedinaraia. Unai dainai, Iesu ia gwau diba: “Lau ia itaia tauna ese egu Tamana danu ia itaia.”—Ioane 14:9, 10; 17:8.
6 Keriso ese ia hahedinaraia lalokauna be Dirava ena lauma helaga ena huahua ta. (Galatia 5:22) Pentekoste 33 C.E. ai, Keristani taudia ginigunadia ese lauma helaga idia abia neganai, Iesu ese idia dekenai ia hadibaia gaudia idia laloatao lou bona Buka Helaga ena hereva ena anina idia lalopararalaia. Unai diba bada idia abia dainai, edia lalokau Dirava dekenai ia habadaia. (Ioane 14:26; 15:26) Unai dainai dahaka ia vara? Ena be edia mauri idia haboioa diba, to mai gari lasi bona goada ida sivarai namona idia harorolaia.—Kara 5:28, 29.
Lalogoada Bona Lalokau Idia Hahedinaraia
7. Paulo bona Banaba edia misinari laolao lalonai, dahaka hahetoho idia haheaukalaia?
7 Aposetolo Paulo ia gwau: “Dirava ese gari laumana ita dekenai ia henia lasi, to siahu bona lalokau bona aonega Laumana ita dekenai ia henia vadaeni.” (2 Timoteo 1:7) Paulo be sibona ena mauri lalonai ia davaria gaudia ia herevalaia. Ia bona Banaba edia misinari laolao lalonai ia vara gauna mani ita laloa. Idia be hanua badadia momo dekenai idia haroro, hegeregere Antioka, Ikonio, bona Lusitera. Hanua ta ta ai, haida be hahediba taudia ai idia lao, to ma haida be idia dagedage. (Kara 13:2, 14, 45, 50; 14:1, 5) Lusitera hanua taudia ese Paulo be nadi amo idia hodoa, bona idia rakatania ia mase totona! “To Iesu idia abidadama henia taudia be Paulo dekenai idia gini hagegea, vadaeni ia toreisi, hanua dekenai ia vareai lou. Kerukeru dabai ia bona Banaba be Derebe hanua dekenai idia lao.”—Kara 14:6, 19, 20.
8. Edena dala ai Paulo bona Banaba edia lalogoada karana ese ia hahedinaraia taunimanima idia lalokau henia?
8 Unai hahetoho dainai, Paulo bona Banaba idia gari bona edia gaukara idia rakatania, a? Lasi! Derebe dekenai, idia ruaosi ese “hanua taudia momo be Iesu ena diba tahua taudia” ai idia halaoa murinai, “Lusitera bona Ikonio bona Antioka dekenai idia giroa lou.” Dahaka dainai? Idia ura kamonai matamata taudia edia abidadama idia hagoadaia. Paulo bona Banaba idia gwau: “Hisihisi momo lalonai Dirava ena Basileia do ita raka vareai.” Ia hedinarai goevagoeva, Keriso ena “mamoe” idia lalokau henia dainai, lalogoada idia hahedinaraia. (Kara 14:21-23; Ioane 21:15-17) Paulo bona Banaba be kongrigeisen matamata dekenai elda taudia idia abia hidi murinai, idia ruaosi idia guriguri bona “Lohiabada ena imana dekenai idia atoa, ia dekenai idia abidadama henia dainai.”
9. Paulo ese Efeso ena elda taudia ia lalokau henia dainai, idia be edena bamona idia kara?
9 Paulo be hebogahisi bona lalogoada tauna, unai dainai Keristani taudia ginigunadia ese ia idia lalokau henia bada. Paulo be Efeso dekenai lagani toi ia noho bona dagedage bada ia davaria, to unai hanua ena elda taudia ida ia hebou neganai ia vara gauna mani oi laloa. (Kara 20:17-31) Paulo be idia ia hagoadaia Dirava ena mamoe oreana idia naria totona murinai, Paulo ia tui diho bona idia guriguri hebou. Bena, “idia ibounai idia tai dikadika, bona Paulo idia rosia bona idia kisi henia. Edia lalona be hisihisi bada iena hereva dainai, badina be ia gwau, ‘Lauegu vairana be do umui itaia lou lasi.’ ” Unai tadikaka ese Paulo idia lalokau henia bada! Momokani, Paulo bona ia danu idia loaloa taudia be bamahuta idia gwauraia neganai, unai elda taudia idia ura lasi Paulo bona ena bamodia do idia lao.—Kara 20:36–21:1.
10. Hari inai negai, edena dala ai Iehova ena Witnes taudia be ta ta dekenai lalokau idia hahedinaraia?
10 Hari inai negai, Iehova ena taunimanima ese loaloa naria taudia, elda taudia, bona ma haida idia lalokau henidia bada, badina idia be mai lalogoada ida Iena mamoe idia naridia. Hegeregere, tuari eiava iseda haroro gaukara idia koua tanodia dekenai, ena be loaloa naria taudia bona edia adavadia be edia mauri idia haboioa diba, to kongrigeisen idia vadivadi henidia noho. Unai hegeregerena, Witnes taudia momo be dagedage lohia taudia bona edia gaukara taudia ese idia dagedage henidia, badina tadikaka edia ladadia idia henia lasi eiava orea ena buka bona magasin idia abia dalana idia gwauraia hedinarai lasi. Ma tausen haida danu be idia dagedage henidia, idia hahisidia, bona idia hamasedia, badina sivarai namona harorolaia gaukara bona Keristani heboudia dekenai tadikaka ida hebamo karana idia hadokoa lasi. (Kara 5:28, 29; Heberu 10:24, 25) Unai bamona tadikaka bona taihu ese lalogoada karana idia hahedinaraia dainai, edia lalokau bona abidadama ita tohotohoa be namo!—1 Tesalonika 1:6.
Namo Lasi Emu Lalokau Ia Keru
11. Satani ese dahaka ia gaukaralaia Iehova ena hesiai taudia ia tuari henia totona, unai dainai dahaka idia karaia be namo?
11 Satani be tanobada dekenai idia negea diho neganai, Iehova ena hesiai taudia dekenai ia badu dikadika, badina “idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai.” (Apokalupo 12:9, 17) Satani ese dagedage karadia ia gaukaralaia Iehova ena hesiai taudia edia abidadama ia hamanokaia totona. To, nega momo unai ese Dirava ena taunimanima edia lalokau bona edia ura ia habadaia Dirava idia hesiai henia noho totona. Satani ese ia gaukaralaia gauna ma ta be kara dika karaia urana. Unai dainai ita lalogoada be namo, badina iseda kudouna ia ‘koikoi bona ia be dika rohoroho.’—Ieremia 17:9; Iamesi 1:14, 15.
12. Edena dala ai Satani ese “tanobada ena lauma” ia gaukaralaia iseda lalokau Iehova dekenai ia hamanokaia totona?
12 Satani ese ia gaukaralaia gauna badana ta be “tanobada ena lauma.” Unai ese taunimanima edia lalona ia biagua dainai, Dirava ena lauma helaga idia dadaraia. (1 Korinto 2:12) Inai tanobada ena lauma ese mataganigani bona kohu ura henia dikadika karadia—matana ena ura gaudia unai—ia havaraia. (1 Ioane 2:16; 1 Timoteo 6:9, 10) Ena be kohu bona moni be dika lasi, to bema unai gaudia ita ura henia bada bona Iehova ita lalokau henia maragi, Satani be ia kwalimu unai. Inai tanobada ena lauma eiava “biaguna” be mai ena siahu eda lalona ia veria kara dikadia ita karaia totona, bona ia be hodahoda bamona gabu ibounai dekenai. Namo lasi tanobada ena lauma ese emu kudouna ia hadikaia!—Efeso 2:2, 3; NW; Aonega Herevadia 4:23.
13. Dahaka ese iseda lalogoada karana ia tohoa diba?
13 Tanobada ena lauma dikana ita dadaraia totona, mai lalogoada ida iseda kara ita biagua be gau badana. Hegeregere, matabodaga laulau idia hahedinaraia muvini piksa itaia rumana ita rakatania eiava kompiuta bona TV ita koua totona, lalogoada karana ita hahedinaraia be namo. Danu lalogoada dainai, eda turadia edia laloani karadia eiava hebamo dikana ita dadaraia diba. Unai hegeregerena, sikuli turadia, gaukara taudia, dekena taudia, eiava varavara ese ita idia hevasehalaia neganai, mai lalogoada ida Dirava ena taravatu bona hakaua herevadia ita badinaia.—1 Korinto 15:33; 1 Ioane 5:19.
14. Bema tanobada ena lauma ese iseda lalona ia veria, dahaka ita karaia be namo?
14 Mai anina bada gauna be, Dirava bona eda tadikaka bona taihu dekenai eda lalokau ita habadaia! Nega oi atoa emu tahua gaudia bona mauri dalana oi lalohadailaia totona, unai amo do oi diba emu lalona be tanobada ena lauma ese ia veria vadaeni eiava lasi. To bema lalona ia veria vadaeni—ena be sisina sibona—vadaeni Iehova ita noia diba lalogoada ia henia unai lalohadai ita kokia bona negea momokani totona. Iehova ese unai noinoi do ia dadaraia lasi. (Salamo 51:17) Danu, Iena lauma ena siahu be bada herea, tanobada ena ia hereaia.—1 Ioane 4:4.
Mai Lalogoada ida Sibona Iseda Hekwakwanai Ita Hanaia
15, 16. Edena dala ai Keriso ena lalokau ese ita ia durua diba sibona iseda hekwakwanai ita haheaukalaia totona? Haheitalai ta oi gwauraia.
15 Iehova ena hesiai taudia ese idia davaria hekwakwanai haida be goevadae lasi bona buruka dainai idia davaria hisihisi, hegeregere gorere, tauanina ena kahana ta ia dika, lalohekwarahi, bona hekwakwanai ma haida. (Roma 8:22) Keriso ena lalokau ese ita ia durua diba unai hahetoho ita haheaukalaia totona. Mani Namangolwa ena haheitalai ita laloa, ia be Zambia dekenai ia noho. Bona Keristani ruma bese ta lalonai ia tubu daekau. Namangolwa ena mauri lagani be rua neganai, iena tauanina ena kahana haida idia dika. Ia gwau: “Lau hemarai badina egu tauanina ena toana dainai taunimanima be do idia hoa bada. To tadikaka bona taihu ese lau idia durua unai bamona lau laloa lasi totona. Edia heduru dainai, egu hemarai karana lau hanaia bona bapatiso lau abia.”
16 Ena be Namangolwa be mai ena wilisea, to nega momo kolta lasi daladia eiava dala maragidia dekenai ena imana bona tuina dekenai ia raka. To, lagani ta ta ai, hua rua ia be heduru painia ia karaia. Namangolwa ese hahine ta ia haroro henia neganai, unai hahine ia tai. Dahaka dainai? Badina iseda taihu ena abidadama bona lalogoada ese unai hahine ena kudouna ia hamarerea. Iehova ese Namangolwa ia hanamoa, badina iena Baibel stadi taudia faiv idia bapatiso vadaeni, bona ta be kongrigeisen elda tauna. Ia gwau: “Nega momo lauegu aena idia hisihisi bada, to unai ese lau ia koua lasi.” Unai taihu sibona lasi, to tanobada hegegemadai, edia tauanina kahana idia dika Witnes taudia momo, ese haroro gaukara idia goadalaia noho, badina Dirava bona edia dekena taudia idia lalokau henia. Unai bamona taudia be Iehova ena matana ai kohu namodia bamona!—Hagai 2:7.
17, 18. Dahaka ese momo ia durua gorere eiava hahetoho ma haida idia haheaukalaia totona? Emui gabu ena haheitalai haida oi gwauraia.
17 Nega daudau ia gorere tauna be ia lalohisihisi bada diba. Kongrigeisen elda ta ia gwau: “Lauegu buka stadi grup dekenai, taihu ta be mai ena suga gorere bona kidney gorere, ma ta be mai ena kensa, rua be roki gorerena idia abia, bona ta ena gorere be lupus bona fibromyalgia, tauanina idia hisihisi bada gorerena. Unai dainai nega haida idia lalometau. To, idia gorere dikadika eiava hospital dekenai idia noho negadia sibona ai, hebou idia reaia. Bona idia ibounai be hanaihanai idia haroro. Edia haheitalai amo Paulo ena hereva lau laloatao, ia gwau: ‘Lau manoka neganai, goada lau abia.’ Edia lalokau bona lalogoada karana lau laloa bada. Reana edia noho dalana dainai idia ese mauri bona mai anina bada gaudia idia laloa bada.”—2 Korinto 12:10.
18 Bema gorere eiava hekwakwanai haida dainai oi lalohekwarahi, namona be heduru totona ‘nega ibounai oi guriguri,’ unai amo do oi lalomanoka lasi. (1 Tesalonika 5:14, 17) Oibe, nega haida oi moale bona nega haida oi lalohisihisi diba, to namona be gau namodia oi laloa toho, hegeregere Basileia ena helaro namona. Taihu ta ia gwau: “Lau dekenai haroro gaukara be muramura ta bamona.” Sivarai namona be ma haida ida ia herevalaia neganai, unai ese ia durua lalohadai namona ia abia totona.
Lalokau Dainai Kerere Taudia be Iehova Dekenai Idia Giroa
19, 20. (a) Dahaka ese kara dika idia karaia taudia ia durua diba Iehova dekenai idia giroa lou totona? (b) Stadi gabena ai dahaka do ita herevalaia?
19 Lauma dalanai idia manoka taudia eiava kara dika ta idia karaia taudia momo be Iehova dekenai idia giroa lou totona be auka. To bema idia helalo-kerehai momokani bona Dirava idia lalokau henia lou, goada do idia abia. Mani Marioa oi laloa, ia be United States dekenai ia noho. Mario be Keristani kongrigeisen ia rakatania, ia inuinu kekero momo, drag ia ania, bona lagani 20 murinai dibura ruma dekenai ia lao. Mario ia gwau: “Vaira negana lau laloa matamaia bona Baibel lau duahia matamaia lou. Unai neganai Iehova ena kara lau laloa matamaia, hegeregere ena hebogahisi, badina nega momo lau guriguri lau ia hebogahisi henia totona. Dibura ruma amo lau idia ruhaia murinai, egu tura gunadia lau dadaraia, Keristani heboudia dekenai lau lao, bona kongrigeisen dekenai lau idia abia vareai lou. Ena be guna lau karaia karadia dainai gorere haida lau davaria, to lau moale badina lau be mai egu helaro namona. Iehova ena hebogahisi bona dika gwauatao karana dainai, ia lau tanikiu henia bada.”—Salamo 103:9-13; 130:3, 4; Galatia 6:7, 8.
20 Mario bamona taudia be Iehova dekenai idia giroa lou totona, idia hekwarahi be namo. Baibel idia stadilaia, idia guriguri, bona idia laloa dobu dainai lalokau idia hahedinaraia, unai ese idia dekenai goada ia henia. Mario be Basileia ena helaro ese ia hagoadaia danu. Oibe, lalokau, abidadama, Dirava gari henia karana, bona helaro dainai iseda mauri lalonai lalogoada ita abia diba. Stadi gabena ai, ita ese unai harihari gauna, helaro, do ita herevalaia.
[Footnote]
a Ladana ai haidaua.
Oi Haere Diba, A?
• Edena dala ai lalokau ese Iesu ia durua ia lalogoada totona?
• Paulo bona Banaba ese tadikaka idia lalokau henia dainai, edena dala ai lalogoada karana idia hahedinaraia?
• Edena dala ai Satani ese Keristani lalokau ia hadikaia diba?
• Iehova ita lalokau henia dainai, lalogoada ita abia diba edena hahetoho ita haheaukalaia totona?
[Picture on page 25]
Paulo be taunimanima ia lalokau henia dainai, mai lalogoada ida ia haheauka
[Picture on page 26]
Lalogoada karana dainai Dirava ena taravatu ita badinaia diba
[Picture on page 26]
Namangolwa Sututu