Kongrigeisen Taudia Hagoadaia
“Ekalesia orea [“kongrigeisen,” NW ] ibounai ese maino idia abia vadaeni, bona idia goada daekau.”—KARA 9:31.
1. “Dirava ena ekalesia” dainai edena henanadai idia vara?
PENTEKOSTE 33 C.E. ai, Iehova ese Keriso ena hahediba taudia be “Dirava ena Israela” besena ai ia halaodia. (Galatia 6:16) Unai horoa Keristani taudia be Baibel ese ia gwauraia “Dirava ena ekalesia” taudia. (1 Korinto 11:22) Unai ena anina be dahaka? Dirava ena taunimanima be tano idauidau ai idia noho dainai, edena bamona “Dirava ena ekalesia” do idia naria bona hakaua? Bona iseda mauri lalonai kongrigeisen ese edena bamona ita ia durua diba?
2, 3. Iesu ese edena bamona ia hahedinaraia kongrigeisen be mai edia hakaua taudia bona idia ta ta be mai edia gaukara?
2 Stadi ginigunana dekenai ita itaia bamona, Iesu ia peroveta ia gwau ia murinai idia raka horoa taudia be kongrigeisen ta do idia haginia, aposetolo Petero ia hamaoroa: “Inai nadi [Iesu Keriso] latanai lauegu ekalesia [“kongrigeisen,” NW ] do lau haginia, bona hel ena siahu danu ese ekalesia do ia halusia diba lasi.” (Mataio 16:18) Danu, Iesu be aposetolo taudia ida ia do noho neganai, ia ese unai kongrigeisen ena gaukara bona heau dalana ia herevalaia.
3 Iesu ena hereva bona kara amo ia hahedinaraia kongrigeisen lalonai idia noho taudia haida ese unai gaukara do idia gunalaia. Idia ese edia kongrigeisen taudia do idia hesiai henia. Keriso ia gwau: “Umui diba, idau bese taudia edia lohia taudia ese hesiai gaukara idia karaia lasi, to idia hereva sibona, bona edia hereva gauna be edia hesiai taudia idia kamonai, bona karaia. To umui be unai kara bamona do umui karaia lasi, umui ta ia ura be tau bada herea gwauraia, be hesiai gaukara do ia karaia umui dekenai. Umui ta, ia ura be lohia tauna gwauraia, ia be umui ibounai dekenai hesiai gaukara do ia karaia.” (Mareko 10:42-44) Unai ese ia hahedinaraia, “Dirava ena ekalesia” taudia be sibodia idia noho lasi to idia be orea ta bona idia be mai edia hakaua taudia. Bona ibounai be idia gaukara bona herevahereva hebou, unai amo gaukara ibounai idia karaia namonamo diba.
4, 5. Edena bamona ita diba haida ese kongrigeisen do idia hadibaia bona naria?
4 “Dirava ena ekalesia” ena Kwarana ai do ia lao Tauna ia gwau, iena aposetolo taudia bona ia amo diba idia abia taudia ma haida be mai edia maduna kongrigeisen lalonai. Dahaka do idia karaia? Edia maduna badana be kongrigeisen taudia dekenai Iehova ena kara do idia hadibaia. Iesu ia toreisi lou murinai, ia ese aposetolo taudia ma haida vairanai Petero ia hamaoroa: “Simona, Iona ena natuna e, . . . oi ese lau oi lalokau henia bada, a?” Petero ia haere: “Oibe, Lohiabada e, oi diba lau ura henia oi dekenai.” Iesu ese ia hamaoroa: “Lauegu mamoe do oi ubua. . . . Lauegu mamoe do oi naria. . . . Egu mamoe do oi ubua.” (Ioane 21:15-17) Unai maduna be mai anina bada!
5 Iesu ese kongrigeisen lalonai idia haboua taudia be mamoe serina ida ia hahegeregerea. Unai mamoe—Keristani tau, hahine, bona natudia—be ta ese idia dekenai Iehova ena ura be Baibel amo do ia hadibaia bona ia naridia namonamo be namo. Danu, Iesu ese ena murinai idia raka taudia ia hagania ma haida do idia hadibaia bona hahediba taudia ai idia halaodia. Namona be ena mamoe ai idia lao taudia ibounai be Dirava ese ia henia gaukara karaia dalana do idia dibaia.—Mataio 28:19, 20.
6. “Dirava ena ekalesia” matamatana lalonai dahaka gaukara idia karaia?
6 “Dirava ena ekalesia” idia hamatamaia neganai, taunimanima be hanaihanai hadibaia hereva idia abia totona idia haboua bona ta ta idia hagoadaia. Baibel ia gwau: “Nega ibounai idia haboua noho, aposetolo edia hadibaia herevadia idia kamonai totona, bona turana idia karaia, aniani idia ania hebou, bona idia guriguri danu.” (Kara 2:42, 46, 47) Baibel ese ia gwauraia mai anina bada gauna ta be, kongrigeisen lalonai maduna idia huaia diba tatau haida idia abia hidi, dala idauidau ai kongrigeisen taudia idia durua totona. Unai tatau be sikuli bada dekenai idia lao eiava gaukara idauidau idia karaia diba dainai idia abia hidi lasi. Unai tatau be “Lauma Helaga bona aonega dekenai idia honu.” Idia ta be Stefano, bona Baibel ia gwau ia be “abidadama bada bona Lauma Helaga dekenai ia honu tauna.” Idia be kongrigeisen lalonai idia noho dainai, “Dirava ena hereva ia bada daekau, bona diba tahua taudia idia momo daekau Ierusalema dekenai.”—Kara 6:1-7.
Dirava ese Ia Gaukaralaidia Tatau
7, 8. (a) Keristani taudia ginigunadia edia negai, Ierusalema ai idia noho aposetolo bona kwarana taudia be dahaka maduna idia huaia? (b) Tadikaka bona taihu be kongrigeisen dekenai idia siaia revareva idia abia murinai, dahaka ia vara?
7 Kongrigeisen ia do matamata neganai, aposetolo taudia ese idia gunalaia, to idia sibona ese unai maduna idia huaia lasi. Nega ta, Paulo bona ena bamodia be Siria bona Antioka dekenai idia giroa lou. Kara 14:27 ia gwau: “Idia ginidae neganai ekalesia taudia idia haboua. Bona idia amo Dirava ese ia karaia gaudia ibounai ena sivarai idia gwauraia.” Idia be unai kongrigeisen ida idia do noho neganai, abidadama idau bese taudia edia kopina utua karana dekenai henanadai ta ia vara. Unai hekwakwanai hamaoromaoroa totona, Paulo bona Banaba be Ierusalema ai idia noho “aposetolo bona kwarana taudia,” hakaua oreana taudia unai, dekenai idia siaidia.—Kara 15:1-3.
8 “Aposetolo bona kwarana taudia idia hebou, inai gau idia herevalaia totona,” unai neganai Keristani elda tauna Iamesi, Iesu ena tadina, to ia be aposetolo tauna lasi, ese unai hebou ia naria. (Kara 15:6) Unai hekwakwanai idia herevalaia murinai, bona lauma helaga ena heduru amo idia ese Baibel ena hereva hegeregerena unai hekwakwanai idia hamaoromaoroa. Bena idia karaia abia hidi be revareva ta dekenai idia torea bona kongrigeisen ta ta dekenai idia siaia. (Kara 15:22-32) Unai revareva idia abia taudia ese unai hereva idia abia dae bona idia badinaia. Unai ese dahaka namo ia havaraia? Unai ese tadikaka bona taihu ibounai ia hagoadaia. Baibel ia gwau: “Vadaeni, ekalesia taudia edia abidadama ena goada ia bada daekau, bona dina ibounai edia hutuma be ia bada daekau lao.”—Kara 16:5.
9. Baibel ese Keristani tatau edia maduna be edena bamona ia gwauraia?
9 To dina ta ta ai kongrigeisen ena gaukara be edena bamona idia karaia? Hegeregere, Kerete motumotu dekenai idia noho kongrigeisen mani ita laloa. Ena be unuseniai idia noho taudia momo edia kara be dika, to idia haida ese edia kara idia haidaua bona Keristani taudia momokanidia ai idia lao. (Tito 1:10-12; 2:2, 3) Idia ibounai be siti idauidau dekenai idia noho, bona Ierusalema dekenai ia noho hakaua oreana amo idia daudau. To unai be hekwakwanai badana lasi, badina Kerete ena kongrigeisen ibounai lalonai “ekalesia gunalaia taudia” idia abia hidi, gabu ma haida ai idia karaia bamona. Unai tatau be Baibel ena taravatu hegeregerena unai maduna idia huaia diba. Idia abia hidi elda taudia ai idia lao totona, unai amo ‘haida do idia hagoadaia, hadibaia hereva namodia dekena amo. Bona . . . hereva momokani idia negea taudia do idia hamaoromaoroa.’ (Tito 1:5-9; 1 Timoteo 3:1-7) Kongrigeisen idia naria tatau goadadia ma haida idia abia hidi hesiai taudia eiava diakono ai idia lao totona.—1 Timoteo 3:8-10, 12, 13.
10. Mataio 18:15-17 hegeregerena, hekwakwanai badadia be edena bamona idia hamaoromaoroa?
10 Iesu ia gwau tatau haida ese kongrigeisen do idia naria. Mataio 18:15-17 ena hereva mani oi laloa, unuseniai Iesu ia gwau nega haida Dirava ena hesiai taudia rua huanai hekwakwanai ia vara diba, reana ma ta ese ta ia kara dika henia. Unai neganai, namona be kerere lasi tauna do ia lao ia kerere tauna dekenai “iena kerere do [ia] hedinaraia.” Idia sibodia idia noho neganai, unai ia karaia diba. Bema unai idia karaia to hekwakwanai idia hamaoromaoroa lasi, vadaeni, unai hekwakwanai idia diba taudia ta eiava rua do ia boiria unai hamaoromaoroa totona. To, bema idia hamaoromaoroa lasi be edena bamona? Iesu ia gwau: “Umui rua o umui toi emui hereva bema ia kamonai lasi neganai, ekalesia ena hebou dekenai do umui hamaoroa. Ekalesia hebou danu ena hereva bema ia kamonai lasi, oi dekenai idau bese tauna o takisi gogoa tauna hegeregerena do oi halaoa.” Iesu be unai hereva ia gwauraia neganai, Iuda taudia be “Dirava ena ekalesia” lalonai idia do noho, unai dainai iena hereva be idia dekenai ia gwauraia.a To, Keristani kongrigeisen ia haginia murinai, Iesu ena hereva be Keristani kongrigeisen taudia dekenai ia gwauraia. Unai ese ia hahedinaraia Dirava ena taunimanima edia kongrigeisen lalonai tatau haida idia abia hidi Keristani taudia ta ta idia hagoadaia bona hakaua totona.
11. Hekwakwanai ta hamaoromaoroa totona elda taudia edia maduna be dahaka?
11 Kwarana taudia eiava elda taudia, be kongrigeisen ena gwaukau taudia bamona, hekwakwanai idia hamaoromaoroa eiava kerere idia karaia taudia idia durua. Unai tadikaka ese Tito 1:9 ena hereva idia badinaia. Kongrigeisen elda taudia be idia goevadae lasi, Tito danu be unai bamona, to Paulo ese ia siaia lao kongrigeisen dekenai “idia do maoro lasi gaudia do [ia] hamaoromaoroa totona.” (Tito 1:4, 5) Hari inai negai, bema tadikaka ta idia ura abia hidi elda gaukara totona, namona be unai tauna be nega daudau lalonai abidadama bona Dirava badinaia karana ia hahedinaraia. Unai dainai kongrigeisen lalonai idia noho taudia ma haida ese edia hakaua bona gunalaia dalana idia badinaia diba.
12. Kongrigeisen lalonai elda taudia edia maduna be dahaka?
12 Paulo be Efeso kongrigeisen ena elda taudia ia hamaorodia: “Umui sibona do umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana dekena amo ia hoia orea taudia, do umui ubua.” (Kara 20:28) Hari danu, kongrigeisen elda taudia idia abia hidi ‘mamoe orea idia naria namonamo’ totona. Unai maduna be mai lalokau ida do idia karaia, bona mai hekokoroku danu do idia karaia lasi. (1 Petero 5:2, 3) Namona be elda taudia idia hekwarahi “mamoe orea ibounai” idia hagoadaia bona durua totona.
Kongrigeisen ida Oi Noho
13. Nega haida, kongrigeisen lalonai dahaka ia vara diba, bona dahaka dainai?
13 Elda taudia bona kongrigeisen lalonai idia noho taudia ibounai be idia goevadae lasi, unai dainai nega haida laloa kerere eiava hekwakwanai idia vara, aposetolo edia negai ia vara bamona. (Filipi 4:2, 3) Reana, elda tauna eiava ma ta be mai badu ida ia hereva auka, eiava ia momokani lasi sivaraina ta ia gwauraia diba. Eiava, ita laloa Baibel ena taravatu ia utua karana ta ia vara noho, bona toana be elda taudia be idia diba, to idia hamaoromaoroa lasi. To, reana elda taudia be gau haida idia diba bona Baibel amo unai hekwakwanai idia hamaoromaoroa vadaeni eiava idia hamaoromaoroa noho, to unai ita diba lasi. Ena be unai ia vara, to mani inai ita laloa: Ena be Korinto kongrigeisen be Iehova ese ia laloa bada, to unai kongrigeisen lalonai kerere badana ta ia vara, bona toana be nega sisina daudau lalonai idia hamaoromaoroa lasi. Gabeai, Ia ese dala ia karaia bona kongrigeisen ese dala maorona ai unai hekwakwanai idia hamaoromaoroa. (1 Korinto 5:1, 5, 9-11) Reana sibona ita nanadaia, ‘Bema unai nega ai lau be Korinto dekenai lau noho, edena bamona do lau kara?’
14, 15. Dahaka dainai haida ese Iesu idia bamoa lou lasi, bona unai amo dahaka ita dibaia?
14 Kongrigeisen lalonai ia vara diba gauna ma ta mani ita laloa. Reana, ta be Baibel ena hereva ta ia lalopararalaia lasi bona ia abia dae be auka. Reana, ia ese Baibel bona kongrigeisen amo ia abia Baibel bukadia dekenai tahua karana ia karaia bona lo Keristani taudia, bona elda taudia amo heduru ia abia. To, ia ese unai hereva ia do lalopararalaia lasi bona ia abia dae lasi. Unai neganai dahaka do ia karaia? Iesu dekenai unai bamona ia vara danu. Ia gwau, ia be “mauri ena aniani” bona tau ta be mauri hanaihanai ia abia totona, namona be ia ese ‘taunimanima ena Natuna ena tauanina ia ania, bona ena rarana danu ia inua.’ Unai hereva dainai iena hahediba taudia haida idia badu. Hahediba taudia momo be unai hereva ena badina idia tahua lasi, eiava idia laloa lasi Iehova be ena nega korikori ai unai hereva ena anina do ia hahedinaraia, to idia be Iesu “danu idia raka hebou lou lasi.” (Ioane 6:35, 41-66) Vadaeni, bema ita be unai nega dekenai ita noho, dahaka do ita karaia?
15 Hari inai negai, haida be kongrigeisen idia rakatania, idia laloa idia sibona ese Dirava do idia hesiai henia. Reana, idia gwau ta ese edia lalona ia hahisia, eiava idia laloa kongrigeisen ese kerere ta idia hamaoromaoroa lasi, eiava Baibel ena hereva ta idia abia dae lasi. Unai be aonega karana, a? Momokani, Keristani taudia ta ta be Dirava idia tura henia be maoro, to namona be ita abia dae Dirava be tanobada hegegemadai ai kongrigeisen ia gaukaralaia noho, aposetolo edia negai ia karaia bamona. Danu, aposetolo edia negai, Iehova ese kongrigeisen ia gaukaralaia bona hanamoa. Dala ia karaia elda taudia bona hesiai taudia ese kongrigeisen idia naria totona. Hari inai negai unai bamona ia karaia danu.
16. Bema ta ia ura kongrigeisen ia rakatania, dahaka ia laloa guna be namo?
16 Bema Keristani tauna ta ia laloa ia sibona ese Dirava ia tura henia diba, ia be Dirava ese ia hegaegaelaia dalana—tanobada hegegemadai kongrigeisen bona Dirava ena taunimanima idia noho gabudia edia kongrigeisen ta ta—ia dadaraia unai. Reana, unai tauna be sibona ia noho bona Dirava ia tomadiho henia eiava haida sibona ia bamoa, to kongrigeisen elda bona hesiai taudia be idia noho lasi. Paulo ese Kolose kongrigeisen taudia ia tore henia, bona ia hamaorodia unai revareva be Laodikea kongrigeisen dekenai do idia duahia danu. Idia ia hagoadaia do idia “gini goada noho, Keriso dainai.” Unai kongrigeisen idia bamoa taudia sibona be unai revareva amo heduru bada idia abia.—Kolose 2:6, 7; 4:16.
Hereva Momokani Ena Du Bona Magu
17. Timoteo Ginigunana 3:15 ese kongrigeisen be edena bamona ia herevalaia?
17 Aposetolo Paulo ese Keristani elda tauna Timoteo dekenai ia torea revareva ginigunana lalonai, ia ese elda bona hesiai taudia edia taravatu ia herevalaia. Unai murinai, Paulo ia gwau, “mauri Diravana ena ekalesia” be “hereva momokani ena du, bona hereva momokani ia gimaia maguna.” (1 Timoteo 3:15) Aposetolo taudia edia negai, horoa Keristani kongrigeisen be unai du aukana. Bona ita diba momokani, Keristani taudia ta ta ese edia gabu dekenai idia noho kongrigeisen sibona amo hereva momokani idia kamonai diba. Unai gabu sibona dekenai goada idia abia diba.
18. Dahaka dainai kongrigeisen heboudia be mai anina bada?
18 Unai hegeregerena, tanobada hegegemadai Keristani kongrigeisen be Dirava ena ruma bese, bona “hereva momokani ena du, bona hereva momokani ia gimaia maguna.” Nega ibounai kongrigeisen heboudia dekenai ita lao, bona hebou lalonai ita haere karana ese ita do ia durua, iseda hetura karana Dirava ida ia hagoadaia bona do ita hegeregere Dirava ena ura ita karaia totona. Paulo be Korinto kongrigeisen ia tore henia neganai, unai hebou dekenai do idia herevalaia gaudia ia gwauraia. Ia gwau, ia ura edia hebou dekenai idia henia tok be kamonai taudia ese idia lalopararalaia, unai amo hebou taudia ia “durua” eiava hagoadaia diba. (1 Korinto 14:12, 17-19) Hari inai negai ita danu be goada ita abia diba, bema ita abia dae Iehova Dirava ese kongrigeisen ia gaukaralaia bona ia durua noho.
19. Dahaka dainai emu kongrigeisen oi moalelaia?
19 Oibe, bema ita ura Keristani tauna goadana ai ita lao, namona be kongrigeisen ita bamoa. Nega daudau lalonai hahediba hereva koikoidia amo ita ia gimaia bona Dirava ese ia gaukaralaia iena Mesia Basileiana ena sivarai namona be tanobada hegegemadai idia gwauraia totona. Oibe, Dirava ese kongrigeisen amo gaukara badadia momo ia hagugurua vadaeni.—Efeso 3: 9, 10.
[Footnote]
a Baibel ia diba momo tauna Albert Barnes ia gwau, Iesu ena hereva, “ekalesia ena hebou dekenai do umui hamaoroa,” be “unai hekwakwanai idia hamaoromaoroa diba taudia ia herevalaia—idia be dubu ena gwaukau taudia. Iuda taudia edia dubu ai elda taudia haida idia noho, bona taunimanima ese edia hekwakwanai be idia dekenai idia laohaia bona idia ese idia hamaoromaoroa.”
Oi Laloatao Diba, A?
• Dahaka dainai ita gwau diba Dirava ese tanobada dekenai idia noho kongrigeisen ia gaukaralaia?
• Ena be elda taudia be idia goevadae lasi, to kongrigeisen lalonai dahaka maduna idia huaia?
• Oiemu kongrigeisen ese edena bamona oi ia hagoadaia?
[Picture on page 10]
Ierusalema dekenai idia noho aposetolo taudia bona kwarana taudia ese hakaua oreana ena gaukara idia karaia
[Picture on page 12]
Elda bona hesiai taudia ese hadibaia herevadia idia abia, unai amo kongrigeisen lalonai edia maduna idia huaia diba