Iehova be Hahemaoro Goeva Ia Ura Henia
“Lau Iehova ese hahemaoro goevagoeva lau ura henia.”—ISAIA 61:8, BHğ.
1, 2. “Hahemaoro goeva tauna” bona “kara gageva tauna” edia kara be edena bamona? (b) Baibel ese Iehova bona ena hahemaoro goeva karana be edena bamona ia herevalaia?
HAHEMAORO goeva tauna be ‘ta ena toana ia laloa lasi, kara maoromaoro o kara namodia sibona ia karaia.’ Kara gageva tauna be kara maoromaoro ia karaia lasi, ta ia inai henia kava, kara dikadia ia karaia, eiava haida ia hahisia kava.
2 Lagani 3,500 bamona gunanai, Mose ese Iehova, guba bona tanobada edia Lohia Badana unai, be inai bamona ia herevalaia: “Iena dala iboudiai be hahemaoro daladia. Ia be abidadama Diravana, ia kara dika lasi.” (Deuteronomi 32:4, BHğ) Lagani 700 mai kahana murinai, Isaia ia gwau: “Lau Iehova ese hahemaoro goevagoeva lau ura henia.” (Isaia 61:8, BHğ) Aposetolo edia negai, Paulo ia gwau: “Dirava ena kara be maoromaoro lasi, a? Lasi momokani.” (Roma 9:14) Danu, Petero ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35) Oibe, “Lohiabada ese, kara maoromaoro [“hahemaoro goeva,” NW ] ia ura henia noho.”—Salamo 37:28; Malaki 3:6.
Kara Gageva Ia Bada
3. Edena dala ai kara gageva be tanobada ai ia matamaia?
3 Hari, kara gageva be ia bada daekau. Iseda gaukara gabunai, sikuli gabunai, siahu taudia ida gau haida ita karaia hebou neganai, bese lalonai, eiava gabu ma haida dekenai kara gageva ita itaia. To, kara gagevadia be kara matamatadia lasi. Satani Diabolo ese Adamu bona Heva ia koia bena idia gwau-edeede bona taravatu idia utua neganai, kara gagevadia idia matamaia. Momokani, Adamu, Heva, bona Satani be Iehova ena harihari gauna hereadaena, ura kwalimu unai, idia gaukaralaia kerere. Edia kara kerere dainai, taunimanima ibounai idia hisihisi bona idia mase.—Genese 3:1-6; Roma 5:12; Heberu 2:14.
4. Kara gageva be lagani hida ia noho?
4 Eden umana dekenai gwau-edeede ia vara bona lagani 6,000 mai kahana ia hanaia vadaeni, to taunimanima be kara gageva idia karaia noho. Unai ia vara, badina Satani be inai tanobada ena dirava. (2 Korinto 4:4) Ia be koikoi tauna, koikoi ibounai edia tamana, Iehova ena ladana ia hadikaia tauna, bona Iehova ia tuari henia tauna. (Ioane 8:44) Ia be hanaihanai kara gagevadia ia karaia. Hegeregere, Noa ena negai, abata badana ia do ginidae lasi neganai, Satani be taunimanima ia hakaua kerere dainai, Iehova ia itaia “taunimanima . . . edia kara dika be bada herea gabu ibounai dekenai, bona edia laloa be nega ibounai ia dika sibona mo.” (Genese 6:5) Iesu ena negai be unai bamona danu. Iesu ia gwau: “Dina ta ena dika be unai dina sibona ena dika,” anina be dina ta ta ai be hekwakwanai badadia, hegeregere kara gageva idia vara. (Mataio 6:34, BHğ) Baibel ena hereva be momokani, ia gwau: “Dirava ese ia karadia gaudia ibounai be idia hisihisi noho . . . Oibe, idia tai noho, guna, ia mai bona harihari.”—Roma 8:22.
5. Dahaka dainai hari taunimanima be kara gageva idauidau idia karaia, guna bamona lasi?
5 Idaunega ema bona hari, gau dikadia idia vara dainai taunimanima be kara gageva idauidau idia karaia. Hari, taunimanima be kara gageva dika rohorohodia idia karaia, guna bamona lasi. Dahaka dainai? Badina inai “nega dokona” be lagani daudau ia noho vadaeni, bona “metau dikadia momo” herea idia vara. Baibel ia peroveta, hari inai negai, “taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, . . . tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani.” (2 Timoteo 3:1-5) Unai bamona kara dikadia dainai, taunimanima be kara gageva idauidau idia karaia.
6, 7. Edena kara gagevadia dainai, taunimanima edia mauri ia dika?
6 Lagani handred gunanai, kara gageva ia bada, guna bamona lasi. Badina tuari momo idia vara. Hegeregere, histori torea taudia haida idia gwau, toana be Tanobada Tuarina Iharuana ai idia mase taudia ibounai be 50 milioni ia lao 60 milioni bamona—idia momo be kerere lasi tatau, hahine, bona natudia. Gabeai idia vara tuari maragidia momo lalonai danu be taunimanima milioni momo herea—kerere lasi taudia danu—idia mase. Satani be kara gageva ia habadaia noho, badina ia diba kahirakahira Iehova be do ia kwalimu. Baibel ia peroveta: “Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”—Apokalupo 12:12.
7 Lagani ta ta ai, tanobada hegegemadai, dola trilioni (K3,000,000,000,000.00 mai kahana) idia negea, tuari kohudia idia hoia totona. Mani oi laloa: Bema unai moni amo taunimanima durua gaudia namodia idia hoia, reana taunimanima milioni momo be do idia noho namonamo. Taunimanima 1 bilioni bamona be idia hitolo, to ma haida be idia hitolo lasi. United Nations ena ripoti ta ia gwau, lagani ta ta ai natudia 5 milioni bamona be hitolo amo idia mase. Unai be dika momokani! Danu, bogana lalonai natuna hamasea karana ena namba be ia bada. Ripoti ta ia gwau, lagani ta ta ai, tanobada ibounai, natudia 40 milioni ia lao 60 milioni idia mase! Unai be kara dika rohorohona!
8. Daika sibona be kara gageva ia kokia diba?
8 Hari, gavamani be taunimanima edia hekwakwanai haorea daladia idia tahua lasi; ena be haida idia gaukara goada, to namo ta idia havaraia lasi. Baibel ia gwau, hari inai negai, “kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.” (2 Timoteo 3:13) Hanaihanai taunimanima be kara gageva idia karaia dainai, unai kara idia koua be ia auka. Hahemaoro goeva Diravana sibona be unai kara ia kokia diba. Ia sibona be hegeregere Satani, demoni, bona kara dika taudia ibounai ia kokia totona.—Ieremia 10:23, 24.
Haida Idia Daradara
9, 10. Dahaka dainai Asapa ia lalometau?
9 Gunaguna, Baibel torea taudia haida idia daradara gauna be, dahaka dainai Dirava be hekwakwanai ia kokia lasi, bona hahemaoro goeva o kara maoromaoro ia havaraia lasi. Hegeregere, Salamo 73 ena ane ia torea tauna Asapa mani ita laloa. King Davida ia lohia neganai, reana unai Levi tauna Asapa be miusiki ia gadaralaia ladana bada tauna, eiava miusiki idia gadaralaia oreana ia gunalaia. Asapa bona iena bese taudia ese idia torea ane momo be taunimanima ese dubu helaga dekenai idia gaukaralaia. To, nega ta ai, Asapa be ia lalometau. Badina ia itaia kara dika taudia be edia taga idia habadaia, bona nega momo dika idia davaria lasi to idia moale sibona.
10 Asapa ia gwau: “Lau itaia, tau dikadia ese moni bona kohu momo idia abia, bona hekokoroku taudia idia kwalimu, vadaeni lau mama henidia. Idia be mai edia hisihisi lasi, bona edia tauanina be goada, bona mai edia dika ta lasi. Idia be hisihisi lasi, haida bamona lasi, bona gorere idia davaria lasi, taunimanima haida idia davaria bamona.” (Salamo 73:2-8) Gabeai, ia laloparara unai be lalohadai kererena. (Salamo 73:15, 16) Herevana Asapa be ena lalohadai ia hamaoromaoroa, to ia daradara dahaka dainai kara dika taudia be panisi idia abia lasi, to kara namo taudia momo be hisihisi idia abia noho.
11. Asapa be dahaka ia lalopararalaia?
11 Gabeai, Asapa ia laloparara Iehova be kara dika taudia do ia panisia. (Salamo 73:17-19) Davida ia gwau: “Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.”—Salamo 37:9, 11, 34.
12. (a) Iehova ena ura kara gageva dekenai be dahaka? (b) Kara gageva do ia ore dainai, dahaka oi laloa?
12 Momokani, Iehova be ia makaia negana dekenai, tanobada amo kara gageva do ia kokia vaitani. Namona be Keristani taudia ese unai idia laloatao. Iehova be ena ura idia dadaraia taudia do ia haorea, to Iena ura idia badinaia taudia dekenai ahuna namona do ia henia. Baibel ia gwau: “Gabu ibounai dekenai idia noho taunimanima, be Lohiabada ese ia itaia noho, bona edia kara ibounai ia diba. Taunimanima namodia bona dikadia edia kara, be Dirava ese ia tahua, maka tamona dekenai. Taravatu utua taudia be, Lohiabada ese ia badu henidia noho. Kara dika taudia edia latanai, Dirava ese lahi ena gida mai hururuhururu, bona salipa danu ia siaia diho noho. Ma lai dikadia momokani dekena amo, ia matakani henidia noho. Lohiabada be mai ena kara maoromaoro, bona kara namodia ia ura henia noho.”—Salamo 11:4-7.
Kara Maoromaoro Tanobadana
13, 14. Dahaka dainai hahemaoro goeva bona kara maoromaoro be tanobada matamatana ai do ia vara?
13 Iehova ese Satani ena tanobada oromana dikana do ia kokia bona tanobada matamata do ia havaraia. Dirava ena guba Basileiana be tanobada matamata do ia naria, bona Iesu ese ena hahediba taudia ia hamaoroa unai gavamani totona idia guriguri be namo. Iehova ese kara gageva do ia kokia bona hahemaoro goeva bona kara maoromaoro ia havaraia neganai, inai guriguri be do ia momokani, ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:10.
14 Kudou-maoro taudia ese idia naria noho gavamani ena gaukara be Baibel ese ia gwauraia. Salamo 145:16 (BHğ) ia gwau: “Oi [Iehova Dirava] emu imana oi kehoa, mauri gaudia ibounai idia boga kunu noho.” Ma danu, Isaia 32:1 ia gwau: “Kamonai! Dina ta be king ta [Keriso Iesu, guba ai] ese kara maoromaoro momokani dekena amo iena taunimanima do ia gunalaia. Lohia taudia [Keriso ena gwaukau taudia, tanobada ai] danu ese taunimanima do idia kota henia mai maoromaoro danu.” Isaia 9:7 ese King Iesu Keriso be inai bamona ia perovetalaia: “Iena King siahuna, be do ia bada daekau lao, bona iena basileia be nega ibounai, mai maino danu do ia noho. Ia ese Davida ena king siahuna do ia abia, bona ia ese Davida ena basileia, do ia haginia bona naria noho, mai kota maoromaorona, bona kara momokani danu, hari ela bona hanaihanai. Inai kara be Siahu Ibounai Lohiabada ese do ia karaia momokani.” Oi be unai gavamani namona henunai oi noho, a?
15. Tanobada matamata lalonai, Iehova be dahaka do ia karaia?
15 Dirava ena tanobada matamata ai, ita be Hadibaia Tauna 4:1 ena hereva do ita gwauraia lasi: “Ma egu matana dekena amo, tanobada lalonai kota maoromaoro lasi kara lau itaia. Haida ese idia dagedage henidia taudia idia tai noho, bona tau ta ese ia durudia lasi. Io, tau ta ese unai hisihisi taudia ia durudia lasi, badina be unai dagedage taudia be mai edia siahu danu.” Momokani, ita be goevadae lasi taudia dainai, tanobada matamatana lalonai dahaka hahenamo do idia vara ita lalohadailaia be auka. To, kara dika be do ia ore vaitani, bona dina ta ta ai gau namodia momo do idia vara. Oibe, hoa dalanai Iehova be kerere gaudia ibounai do ia hamaoromaoroa. Unai dainai, Petero ena hereva be maoro, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho”!—2 Petero 3:13.
16. Edena dala ai “guba matamata” be ia gini vadaeni? Edena dala ai “tanobada matamata” be ia hegaegae vadaeni?
16 Momokani, “guba matamata,” Dirava ena guba gavamanina o Iesu ese do ia naria gavamanina unai, be ia gini vadaeni. Bona “tanobada matamata,” kara namo taudia unai, be hari inai nega dokona lalonai idia haboua vadaeni. Idia ibounai be kahirakahira 7 milioni bamona—idia be tano 235 bamona bona kongrigeisen 100,000 mai kahana ai idia noho. Unai tadikaka taihu milioni be Iehova ena dala maoromaorodia idia dibaia dainai, idia lalokau heheni bona lalotamona ai idia noho. Idaunega amo ema bona hari, tadikaka taihu be lalotamona ai idia noho, to Satani ena taunimanima be idia lalotamona lasi. Tadikaka taihu idia lalotamona bona lalokau heheni karana ese Dirava ena tanobada matamata ai do ia vara gauna ia laulaulaia—unai tanobada ai hahemaoro goeva o kara maoromaoro do idia vara.—Isaia 2:2-4; Ioane 13:34, 35; Kolose 3:14.
Satani Do Ia Kwalimu Lasi
17. Dahaka dainai Satani be Iehova ena hesiai taudia do ia halusia diba lasi?
17 Kahirakahira Satani bona ena orea be Iehova ena hesiai taudia do idia tuari henia toho. (Esekiela 38:14-23) Iesu ia gwau unai negai, “hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Satani do ia kwalimu, a? Lasi. Baibel ia gwau: “Lohiabada ese, kara maoromaoro ia ura henia noho. Iena abidadama taudia, be ia ese do ia rakatania lasi. Kara maoromaoro taudia be, Lohiabada ese do ia naridia namonamo ela bona hanaihanai, to kara dika taudia edia natudia ese, dika do idia davaria. Kara maoromaoro taudia ese, Dirava ia henidia tano dekenai do idia noho ela bona hanaihanai.”—Salamo 37:28, 29.
18. (a) Satani be Dirava ena hesiai taudia dekenai tuari ginigabena ia karaia gwauraia neganai, Dirava be dahaka do ia karaia? (b) Inai stadi ese ia hahedinaraia Iehova be hahemaoro goeva do ia karaia, to dahaka dainai unai oi diba be namo?
18 Satani bona ena orea be Iehova ena hesiai taudia dekenai tuari ginigabena do idia karaia. To Iehova be Sekaraia amo ia peroveta: “Umui ia daua toho tauna be ia [Iehova] matana nadinadina ia daua toho.” (Sekaraia 2:8, BHğ) Unai be hegeregere, tau ta ese ena imana kwakikwaki tamona be Iehova ena mata nadinadina kahirakahira ia doria lao bamona. Iehova be karaharaga Satani bona ena orea taudia do ia hamasea. Tanobada dekenai, Iehova ena hesiai taudia be lalokau, lalotamona, maino, bona taravatu idia badinaia taudia. Unai dainai, Iehova ena hesiai taudia hahisia karana be kara gageva. “Hahemaoro goevagoeva” ia ura henia Diravana be ena hesiai taudia do ia durua. Anina be Iehova be hahemaoro goeva do ia karaia, Iena hesiai taudia edia inai taudia do ia hadikaia vaitani, bona Dirava momokani tamona idia tomadiho henia taudia do ia hamauria. Unai kara ibounai be kahirakahira do idia vara!—Aonega Herevadia 2:21, 22.
Edena Bamona Do Oi Haere?
• Dahaka dainai kara gageva be ia bada?
• Edena dala ai Iehova be kara gageva do ia haorea?
• Inai stadi ese ia hahedinaraia Iehova be hahemaoro goeva do ia karaia dainai, emu hemami be edena bamona?
[Picture on page 10]
Abata ia do vara lasi neganai, dika be bada herea, hari inai negai danu be unai bamona
[Picture on page 12, 13]
Dirava ena tanobada matamata lalonai, Iehova ese kara dika do ia kokia bona hahemaoro goeva bona kara maoromaoro do ia havaraia