Tama Sina E, Mai Lalokau ida Emui Natudia Umui Hadibaia
“Umui emui gaukara ibounai be lalokau dekenai do umui karaia.”—1 KORINTO 16:14.
1. Beibi ta ia vara neganai, tama sina edia hemami be edena bamona?
TAMA sina momo idia abia dae beibi ta ia vara negana be moale bada negana. Sina ta ladana Aleah ia gwau: “Egu beibi kekeni matamatana lau raraia neganai, lau moale bada herea. Lau laloa ia be hairai momokani.” Ena be idia moale, to tama sina idia lalohekwarahi danu. Aleah ena adavana ia gwau: “Lau laloa momo gauna be edena bamona egu natuna do lau durua ena mauri lalonai do idia vara hekwakwanai ia hanaia totona.” Tama sina momo be unai bamona idia laloa danu bona idia laloparara edia natudia be mai lalokau ida idia hadibadia be namo. To, mai lalokau ida edia natudia idia ura hadibaia Keristani tama sina haida be hekwakwanai idia davaria danu. Unai hekwakwanai haida be dahaka?
2. Tama sina be dahaka hekwakwanai idia davaria?
2 Hari, ita be inai nega dokona ena dina gabediai ita noho. Peroveta herevadia hegeregerena, taunimanima be lalokau idia hahedinaraia lasi. Ruma bese haida lalonai ta ta dekenai lalokau idia hahedinaraia lasi, tanikiu henia kara idia diba lasi, helaga karadia idia negea, haheauka idia hahedinaraia lasi bona idia dagedage. (2 Timoteo 3:1-5, NW ) Dina ta ta ai Keristani ruma bese taudia be unai bamona taudia idia bamoa neganai, edia kara dikadia idia tohotohoa diba. Danu, tama sina be goevadae lasi taudia dainai, nega haida hereva kereredia idia gwauraia, abia hidi kereredia idia karaia eiava idia hekwarahi bada haheauka idia hahedinaraia totona.—Roma 3:23; Iamesi 3:2, 8, 9.
3. Tama sina be dahaka idia karaia diba natudia idia moale totona?
3 Ena be hekwakwanai idia vara, to tama sina edia hekwarahi amo natudia be Dirava do idia lalokau henia bona do idia moale diba. Edena dala ai tama sina ese unai idia karaia diba? Namona be inai Baibel sisiba idia badinaia: “Umui emui gaukara ibounai be lalokau dekenai do umui karaia.” (1 Korinto 16:14) Oibe, lalokau ia noho neganai, ruma bese be do ia “noho hebou namo herea, mai laloa tamona danu.” (Kolose 3:14) Paulo ese Korinto taudia dekenai ena revareva ginigunana ia torea neganai, lalokau ena kara idauidau ia herevalaia. Namona be lalokau ena kara toi do ita tahua bona tama sina ese edena dala ai unai kara toi idia badinaia diba edia natudia idia hadibaia totona do ita herevalaia.—1 Korinto 13:4-8.
Tama Sina Idia Haheauka be Namo
4. Dahaka dainai tama sina idia haheauka be gau badana?
4 Paulo ia gwau: “Lalokau be ia haheauka.” (1 Korinto 13:4, BHğ) Greek gado herevana idia hahanaia “haheauka” ena anina be, ta ena lalohadai ia biagua bona ia badu haraga lasi. Dahaka dainai tama sina idia haheauka be namo? Tama sina be badina momo idia laloa diba, to namona be haida sibona ita herevalaia. Hegeregere, natudia be gau ta idia ura neganai, idia noinoi loulou. Ena be tama sina idia gwau ‘lasi,’ to natu be do ia noinoi noho ela bona tama sina ese ena ura gauna do idia henia. Danu, ena be tama sina idia diba edia natudia idia ura idia karaia karana amo dika idia davaria diba, to memero kekeni be idia badu bona idia gwau idia be mai edia maoro unai kara idia karaia totona, bona tama sina ese idia koua lasi be namo. (Aonega Herevadia 22:15) Danu, ita ibounai hegeregerena, natudia be kerere haida do idia karaia loulou.—Salamo 130:3.
5. Dahaka ese tama sina do ia durua idia haheauka totona?
5 Dahaka ese tama sina ia durua edia natudia dekenai idia haheauka bona idia badu haraga lasi totona? King Solomona ia gwau: “Tau ta ena aonega ese haheauka ia henia noho, vadaeni ia badu haraga lasi.” (Aonega Herevadia 19:11) Tama sina ese edia natudia edia kara idia lalopararalaia diba bema idia laloatao idia danu be idia matamata neganai, ‘mero bamona idia hereva, mero bamona idia laloa, bona mero bamona hereva ena anina idia tahua.’ (1 Korinto 13:11) Tama sina e, oi maragi neganai oi laloatao oi ura gau ta oi abia dainai, emu tama sina dekenai oi taitai, a? Oi be kekeni eiava mero badana ai oi lao neganai, oi laloa emu tama sina ese oi lalohekwarahilaia gauna idia lalopararalaia lasi, a? Bema oi be unai bamona oi karaia, vadaeni oiemu natudia edia kara oi lalopararalaia bona oi diba dahaka dainai mai haheauka ida idia do oi hadibaia loulou be namo. (Kolose 4:6) Ita laloatao Iehova be Israela tama sina ia hamaorodia iena taravatu be edia natudia dekenai do idia “hadibaia goada.” (Deuteronomi 6:6, 7) Heberu gado herevana idia hahanaia “hadibaia goada” anina be, “gwauraia loulou” bona “gwauraia goada bona goevagoeva.” Unai ese ia hahedinaraia, tama sina be nega momo natudia do idia hadibaia loulou ela bona natu be Dirava ena taravatu ia badinaia dalana do ia manadalaia. Natudia dekenai gau ma haida hadibaia totona, namona be unai dala do idia badinaia danu.
6. Dahaka dainai idia haheauka tama sina be natudia idia matahakani henidia?
6 Haheauka ia hahedinaraia tama eiava sina ena natudia be Dirava ena taravatu idia utua neganai, ia itaia sibona lasi to ia matahakani henidia. Baibel ia gwau: “Sibona ena ura ia karaia noho merona ese, iena sinana do ia hahemaraia.” Unai hekwakwanai koua totona, unai siri ma ia gwau: “Kwadia auna bona sisiba hereva ese, natuna dekenai aonega ia havaraia noho.” (Aonega Herevadia 29:15) Nega haida, natudia ese tama sina idia hamaoroa idia be maoro lasi matahakani idia henia totona. To, Keristani ruma besena lalonai, tama sina be mai edia maoro natudia idia matahakani henidia totona, bona natudia be tama sina idia biagua lasi. Badina, Iehova, ruma bese ibounai edia Kwarana, ese tama sina dekenai gwaumaoro ia henia natudia be mai lalokau ida idia hadibaia bona matahakani henidia totona. (1 Korinto 11:3; Efeso 3:15; 6:1-4, NW ) Danu, matahakani ita henia neganai, Paulo ese ia gwauraia lalokau karana ma ta ita hahedinaraia be namo.
Hebogahisi ida Matahakani Henia Dalana
7. Dahaka dainai bona edena dala ai tama sina be mai edia hebogahisi ida natudia idia matahakani henia?
7 Paulo ia gwau “lalokau be mai ena bogahisihisi.” (1 Korinto 13:4) Edia natudia idia lalokau henidia tama sina be mai hebogahisi ida natudia idia matahakani henia bona edia kara idia haidaua lasi. Unai bamona idia karaia neganai, Iehova idia tohotohoa. Paulo ia gwau: “Lohiabada ese ia ura henia tauna ia matakani henia.” Laloaboio lasi, Baibel lalonai inai hereva matahakani ena anina be panisia karana sibona lasi. To, ena anina haida be ta hadibaia eiava diba henia karana. Unai bamona matahakani karana ese dahaka ia havaraia? Paulo ia gwau: “Inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.” (Heberu 12:6, 11) Tama sina be mai hebogahisi ida Dirava ena ura hegeregerena natudia idia hadibaia neganai, idia durudia maino bona kara maoromaoro taudia ai idia lao totona. Bema natudia be “Lohiabada ena matakani” idia abia dae, idia ese aonega, diba bona laloparara—siliva bona golo idia hereaia gaudia unai—do idia abia.—Aonega Herevadia 3:11-18.
8. Tama sina be natudia idia matahakani henidia lasi neganai, dahaka ia vara?
8 To, bema tama sina ese edia natudia idia matahakani henia lasi, unai be lalokau karana lasi. Iehova be Solomona amo ia gwau: “Iena natuna ia kwadia lasi tauna ese, iena natuna ia hadikaia noho, to iena natuna ia lalokau henia tauna ese, iena natuna ia matakani henia noho.” (Aonega Herevadia 13:24) Bema tama sina ese natudia idia matahakani henidia lasi, natudia idia bada neganai, sibodia edia namo do idia tahua bona do idia moale lasi. To, bema tama sina be edia natudia idia lalokau henidia bona taravatu idia atoa, natudia be edia sikuli gaukara do idia karaia namonamo, ma haida ida idia hebamo namonamo bona do idia moale. Oibe, edia natudia idia matahakani henia tama sina ese edia natudia idia lalokau henia.
9. Keristani tama sina ese natudia dekenai dahaka idia hadibaia, bona natudia ese dahaka idia diba be namo?
9 Edena dala ai tama sina be mai lalokau bona hebogahisi ida natudia idia matahakani henia diba? Namona be tama sina ese natudia idia hadibaia edena gaudia be idia karaia diba. Hegeregere, natudia idia do maragi lalonai, Keristani tama sina ese Baibel ena taravatu idauidau bona tomadiho momokanina ena hesiai gaukara idauidau idia hadibaia edia natudia dekenai. (Esodo 20:12-17; Mataio 22:37-40; 28:19; Heberu 10:24, 25) Namona be natudia idia diba Dirava ena hesiai gaukara bona taravatu be idia haidaua diba lasi.
10, 11. Tama sina be ruma bese ena taravatu idia karaia neganai, dahaka dainai natudia edia lalohadai idia kamonai be namo?
10 Nega haida, tama sina ese ruma bese ena taravatu be natudia ida idia herevalaia hebou diba be namo. Bema, unai bamona idia karaia, natudia ese unai taravatu be mai moale ida do idia badinaia diba. Hegeregere, tama sina ese taravatu idia karaia natudia be edena hora ai ruma dekenai do idia giroa lou. Eiava, natudia idia nanadaia edena hora idia ura giroa lou bona dahaka dainai unai hora idia makaia do idia gwauraia hedinarai. Unai murinai, tama sina ese hora ta idia abia hidi bona unai hora ai do idia giroa lou ena badina do idia gwauraia hedinarai. To, bema idia lalotamona lasi, bona nega momo unai do ia vara, dahaka do idia karaia? Nega haida, bema tama sina idia itaia natudia edia ura gauna be Baibel ena hakaua herevana ta ia utua lasi, unai idia abia dae diba. Unai bamona idia karaia neganai, anina be tama sina edia siahu be maragi, a?
11 Unai henanadai haerelaia totona, mani Lota bona iena ruma bese dekenai Iehova ese ena siahu be mai lalokau ida ia hahedinaraia ena sivarai ita laloa guna. Aneru ese Lota, iena adavana bona natudia kekeni be Sodoma amo idia hakaudia lasi murinai, idia gwau: “Ororo dekenai do umui heau, umui mase garina.” To, Lota ia haere: “Lohia e, mani emui kara, inai bamona lasi.” Bena Lota be gabu idauna ta ia abia hidi, ia gwau: “Unai hanua maragina oi itaia, a? Ia be kahirakahira, bona ia dekenai lau heau diba.” Iehova be edena bamona ia haere? Ia gwau: “Oiemu noinoi dekenai lau kamonai.” (Genese 19:17-22) Iehova ese ena lalohadai ia haidaua anina be Iena siahu be maragi, a? Lasi momokani! To, Iehova ese Lota ena noinoi ia laloa bona hebogahisi ia hahedinaraia. Bema oi be tama eiava sina, nega haida ruma bese ena taravatu umui karaia neganai, natudia edia lalohadai umui kamonai, a?
12. Dahaka ese natuna ena noho do ia hanamoa?
12 Momokani, namona be tama sina ese taravatu sibona idia hadibaia lasi, to natudia ese unai taravatu idia utua neganai, dahaka panisi do idia abia idia hadibaia danu. Panisi daladia idia herevalaia bona natudia idia laloparara neganai, tama sina ese idia atoa taravatu idia badinaia diba. Bema natudia be kerere ta idia karaia bona hanaihanai tama sina idia gwau do idia panisia, to idia panisia lasi, unai be lalokau karana lasi. Baibel ia gwau: “Kara dika ena davana be idia henia haraga lasi dainai, taunimanima ese, edia kudoudia dekenai kara dika idia ura henia bada noho.” (Hadibaia Tauna 8:11) Momokani, namo lasi tama eiava sina ese taunimanima momo gabuna ai eiava natuna ena turadia vairanai ena natuna ia panisia, badina natuna do ia hahemaraia. To, bema tama sina edia “Oibe” be oibe bona edia “Lasi” be lasi bona panisia karana danu be unai bamona idia badinaia, edia natudia edia noho be do ia namo, bona edia tama sina do idia matauraia bona lalokau henidia.—Mataio 5:37.
13, 14. Tama sina be natudia idia hadibaia neganai, edena dala ai Iehova idia tohotohoa diba?
13 Tama sina ese mai lalokau ida natuna idia panisia neganai, ena mauri lagani bona ena kara do idia laloa be namo. Pam ia gwau: “Emai natudia rua ai panisia dalana be idauidau badina natu ta ai panisia dalana be ma ta dekenai do ia hegeregere lasi.” Ena adavana Larry ia gwau: “Emai natuna kekeni badana be laloauka kekenina bona panisi aukana ai henia neganai, ia kamonai. To, emai kekeni iharuana be ia kamonai haraga dainai, ai hereva auka henia eiava ai raraia auka sibona be hegeregere.” Oibe, mai edia lalokau tama sina be do idia tahua edena panisi karana be hegeregere edia natudia ta ta durua totona.
14 Iehova be haheitalai namona ia hahedinaraia tama sina dekenai, badina ia be iseda goada bona manoka gabudia ia diba. (Heberu 4:13) Danu, ena be Iehova be kara dika taudia edia kara ia haheaukalaia hanaihanai lasi, to ia hahemaoro henidia neganai, edia dika hegeregerena panisi ia henidia. Oibe, Ia ese “kota maoromaoro” dekenai iena taunimanima ia matahakani henidia. (Ieremia 30:11) Tama sina e, emui natudia edia goada bona manoka gabudia umui diba, a? Umui diba dainai, umui hadibaia neganai, dala maorona umui abia hidi, a? Bema unai umui karaia, ia hahedinaraia umui be emui natudia umui lalokau henidia.
Hereva Momokani Umui Gwauraia
15, 16. Tama sina be edena dala ai natudia idia durua edia hemami korikorina idia gwauraia hedinarai totona?
15 Lalokau karana ma ta be “taunimanima edia kara gagevagageva ia moalelaia lasi. To . . . hereva momokani ia moalelaia.” (1 Korinto 13:6) Edena dala ai tama sina ese maoro bona momokani karadia be natudia dekenai idia hadibaia bona natudia ese idia manadalaia diba? Idia karaia diba dala namona be, ena be natudia ese do idia gwauraia gauna dainai tama sina idia moale lasi, to namona be tama sina ese edia natudia do idia hagoadaia edia hemami korikorina do idia gwauraia hedinarai totona. Oibe, natudia edia lalohadai bona hemami ese ia hahedinaraia idia be kara maoromaoro idia badinaia neganai, tama sina idia moale. To nega haida, natu ta ena hereva ese do ia hahedinaraia ia be reana dala kererena dekenai ia raka lao noho. (Genese 8:21) Tama sina be dahaka idia karaia be namo? Reana, natuna ena hereva dainai, karaharaga idia ura idia botaia. To, bema tama sina be unai bamona idia karaia, natudia be hereva momokani do idia gwauraia lasi, to reana mai koikoi ida tama sina edia lalona hamoalea herevadia sibona do idia gwauraia. Momokani, bema natu be hemataurai lasi herevana ta ia gwauraia neganai, karaharaga umui hamaoromaoroa be maoro, bona unai amo umui hadibaia mai ena hemataurai ida ia hereva totona. To, namona be tama sina ese natudia idia ura herevalaia gaudia do idia koua lasi.
16 Vadaeni, tama sina ese edena dala ai natudia idia durua mai momokani ida idia herevahereva totona? Aleah ia gwau: “Ai ese dala ai hegaegaelaia emai natudia ida mai momokani danu ai herevahereva totona, bona unai ai karaia dalana be ena be emai natudia ese idia gwauraia gaudia ese ai idia habadua, to ai haheauka ela bona edia lalohadai ibounai idia gwauraia hedinarai.” Tama ta ladana Tom, ia gwau: “Ena be emai natuna kekeni ese emai lalohadai ia moalelaia lasi, to ai hamaoroa ena lalohadai do ia gwauraia hedinarai. Ai laloa, bema nega ibounai emai natuna ena ura gaudia ai koua bona taravatu ai atoa ai emai ura gaudia sibona do ia badinaia, do ia lalohisihisi bona ena lalohadai korikorina be ai dekenai do ia gwauraia hedinarai lasi. To, ai be iena hereva ai kamonai henia neganai, ia ese ai ia kamonai henia danu.” Momokani, natudia ese edia tama sina idia kamonai henidia be namo. (Aonega Herevadia 6:20) To, herevahereva namonamo karana amo tama sina be edia natudia idia durua, laloa maoromaoro karana idia manadalaia totona. Vincent, mai ena natudia foa, ia gwau: “Bema kara ta ia vara, unai kara ena namo bona dika be emai natudia ida ai kikilaia hebou, unai amo emai natudia ese kara ta ena namo idia lalopararalaia. Unai ese ia durudia laloa maoromaoro karana idia manadalaia totona.”—Aonega Herevadia 1:1-4.
17. Tama sina be dahaka idia laloatao be namo?
17 Momokani, tama sina be Baibel ena sisiba, natudia hadibaia dalana dekenai do idia badinaia goevagoeva diba lasi. To, tama sina e, inai umui laloatao be namo: Bema mai haheauka, hebogahisi bona lalokau dalanai emui natudia umui hadibaia neganai, emui natudia ese emui hekwarahi do idia laloaboio lasi. Danu, Iehova ese emui hekwarahi do ia hanamoa. (Aonega Herevadia 3:33) Tama sina idia ura bada gauna be, edia natudia ese Iehova do idia lalokau henia, idia ese Iehova idia lalokau henia hegeregerena. Tama sina ese edena bamona unai idia hagugurua diba? Stadi gabena ai dala haida do ita herevalaia.
Oi Laloatao, A?
• Laloparara karana ese edena bamona tama sina ia durua idia haheauka totona?
• Tama sina ese natudia idia matahakani henia neganai, edena dala ai lalokau idia hahedinaraia diba?
• Dahaka dainai tama sina bona natudia huanai hereva momokani idia gwauraia be mai anina bada?
[Pictures on page 24]
Tama sina e, oi maragi negana oi laloatao, a?
[Picture on page 25]
Emu natudia oi durua edia lalohadai korikorina idia gwauraia totona, a?