“Dirava Ena Laloa Dobu Gaudia” Ita Tahua
“Lauma Helaga ese gau ibounai ia tahua noho, Dirava ena laloa dobu gaudia danu.”—1 KORINTO 2:10.
1. Edena Baibel hereva momokanidia dainai, Baibel stiuden taudia matamatadia idia moale diba?
KERISTANI kongrigeisen ai, ita momo be nega ginigunana hereva momokani ita dibaia neganai ita moale. Ita diba dahaka dainai Iehova ena ladana be mai anina bada, dahaka dainai Ia be hisihisi ia koua lasi, dahaka dainai taunimanima haida be guba dekenai idia lao, bona Dirava idia abidadama henia taudia be dahaka namo do idia davaria. Reana taunimanima momo bamona, gunaguna Baibel ita duahia to ena anina be idia hunia bamona. Ita be daba momokani ia toreisi bona ia raka matamaia tauna bamona. Matamanai, gabu ia dibura sisina dainai, gau momo ia itaia namonamo lasi. Bona dina be sisina sisina ia hedinarai neganai, ia be gau ma haida ia itaia diba. To, dina be ataiai ia noho neganai, ia be gau ibounai sibona lasi to gabu daudaudia ia itaia namonamo diba. Unai hegeregerena, ta ese nega ginigunana Baibel amo ita ia stadi henia neganai, ita be “Dirava ena laloa dobu gaudia” ita lalopararalaia matamaia.—1 Korinto 2:8-10.
2. Dahaka dainai Baibel ena hahediba herevadia ita dibaia ena moale ia boio diba lasi?
2 Bema Baibel ena hereva momokani haida sibona ita diba, ita gwau diba unai be hegeregere, a? “Dirava ena laloa dobu gaudia” ena anina ta be Dirava ena aonega ita lalopararalaia be namo, unai aonega be ena lauma helaga amo Keristani taudia dekenai ia hahedinaraia to ma haida dekenai ia hunia. (1 Korinto 2:7) Iehova ena aonega be bada herea, bona Iena dala ita stadilaia karana be moale gauna! Ita be hegeregere lasi Iehova ena dala ibounai ita diba totona. To, nega ginigunana Baibel ena hadibaia herevadia ita dibaia ena moale be ia boio diba lasi, bema “Dirava ena laloa dobu gaudia” ita tahua noho.
3. Dahaka dainai ita abia dae gaudia edia badina ita lalopararalaia be namo?
3 Dahaka dainai “dobu gaudia” ita lalopararalaia be gau badana? Bema ita abia dae herevadia bona edia badina ita lalopararalaia, unai ese eda abidadama do ia hagoadaia. Baibel be ita ia hamaoroa iseda “darana” ita gaukaralaia, unai amo ‘do ita diba edena kara be namo, edena kara Dirava ia ura henia, bona edena kara be goeva momokani.” (Roma 12:1, 2; NW ) Bema Iehova ese ita ia noia ena ura hegeregerena ita noho ena badina ita lalopararalaia, unai ese ita ia hagoadaia Iehova ita badinaia totona. Unai dainai, “dobu gaudia” ita diba neganai, unai ese ita ia hagoadaia diba taravatu utua karadia ita dadaraia bona “kara namodia do ita karaia totona.”—Tito 2:14.
4. Baibel ita stadilaia ena anina be dahaka?
4 Bema dobu gaudia ita stadilaia, vadaeni edia anina do ita lalopararalaia. To, gau ta ita stadilaia be idau bona gau ta ita duahia be ma idau. Stadi ena anina be, gau ta ita tahua namonamo bona ita dibaia vadaeni gaudia ida ita hahegeregerea. (2 Timoteo 1:13) Eiava idia gwauraia herevadia edia badina ita laloa. Baibel ita stadilaia neganai, namona be ita laloa dobu bona ita itaia edena dala ai ita dibaia gaudia ita gaukaralaia abia hidi maorodia ita karaia bona ma haida ita durua totona. Danu, “Buka Helaga ena hereva ibounai be Dirava ena Lauma ese ia havaraia” bona mai ena namo dainai, “Dirava ena uduna dekena amo idia mai hereva ibounai” ita stadilaia be namo. (2 Timoteo 3:16, 17; Mataio 4:4) Baibel ita stadilaia be mai ena hekwarahi! To unai kara ita moalelaia diba, bona “Dirava ena laloa dobu gaudia” ita lalopararalaia be auka lasi.
Iehova be Manau Taudia Ia Durua Idia Laloparara Totona
5. Daika be “Dirava ena laloa dobu gaudia” ia lalopararalaia diba?
5 Ena be sikuli dekenai maka badadia oi abia lasi o stadi karana oi manadalaia lasi, to “Dirava ena laloa dobu gaudia” oi lalopararalaia diba. Iesu be tanobada dekenai ia noho neganai, Iehova ese ena ura be aonega taudia bona diba momo taudia dekenai ia hunia, to sikuli bada lasi bona aonega bada lasi taudia dekenai ia hahedinaraia. Unai bamona manau taudia be Dirava ena hesiai taudia edia hadibaia herevadia idia kamonai. Sikuli bada taudia dekenai, unai manau taudia edia diba be beibi edia diba bamona. (Mataio 11:25; Kara 4:13) Aposetolo Paulo be ena tadikaka ia tore henidia neganai, ia gwau gau haida be “ ‘Dirava ese ia abia hegaegae, ia idia lalokau henia taudia edia.’ Inai gaudia be hunia dekenai idia noho, to Dirava ese iena Lauma dekena amo ita dekenai ia hedinaraia. Oibe, Lauma Helaga ese gau ibounai ia tahua noho, Dirava ena laloa dobu gaudia danu.”—1 Korinto 2:9, 10.
6. Korinto Ginigunana 2:10 ena anina be dahaka?
6 Edena dala ai Dirava ena lauma helaga be “gau ibounai ia tahua noho, Dirava ena laloa dobu gaudia danu?” Iehova be Keristani taudia ta ta dekenai Iena hunia gaudia ta ta ia hahedinaraia lasi, to Iena lauma helaga amo ena orea ia hakaua dainai, unai orea be Dirava ena lalotamona taudia ia durua Baibel ena hereva idia lalopararalaia totona. (Kara 20:28; Efeso 4:3-6) Tanobada hegegemadai, kongrigeisen iboudiai be Baibel stadilaia program tamona idia badinaia. Bona idia be Baibel ia hadibaia gaudia momo idia stadilaia vadaeni. Kongrigeisen dekenai, lauma helaga ese taunimanima ia durua lalohadai maorona idia abia, “Dirava ena laloa dobu gaudia” idia lalopararalaia totona.—Kara 5:32.
“Dirava Ena Laloa Dobu Gaudia” Haida be Dahaka?
7. Dahaka dainai momo be “Dirava ena laloa dobu gaudia” idia lalopararalaia lasi?
7 “Dirava ena laloa dobu gaudia” edia anina be ita lalopararalaia diba. To, momo be unai gaudia idia lalopararalaia lasi badina Satani ese ia koidia Iehova ena orea ena heduru idia dadaraia totona.—2 Korinto 4:3, 4.
8. Edena dobu gaudia be Paulo ese Efeso karoa 3 ai ia herevalaia?
8 Efeso karoa 3 ai, Paulo ese ia hahedinaraia “Dirava ena laloa dobu gaudia” o hereva momokani momo be Iehova ena taunimanima ese idia lalopararalaia, hegeregere gwauhamata Garana be Iesu, Dirava be tanobada amo haida ia abia hidi guba dekenai idia lohia totona, bona Mesia Basileiana. Paulo ia gwau: “Nega gunadia lalonai Dirava ese taunimanima dekenai inai hunia hereva ia hadibaia lasi. To harihari Dirava ese iena Lauma Helaga dekena amo, iena aposetolo bona peroveta helaga taudia dekenai inai hunia hereva ia hedinaraia vadaeni. Inai hunia hereva ena anina be inai: . . . Iuda lasi taudia bona Iuda taudia ese Dirava ena hanamoa tamona do idia abia. Inai orea ruaosi edia tauanina be tamona, bona idia ruaosi Dirava ena gwauhamata, Keriso Iesu dekena amo ia gwauraia gauna do idia abia hebou.” Ma ia gwau: “Dirava ese . . . gunaguna iena palani, iena kara ibounai dohore ia karaia laloa gauna ia hunia, taunimanima dekena amo. Inai palani be gunaguna ia mai bona harihari ia hunia noho. To hari Dirava ese lau ia abia hidi, inai palani do lau gwauraia hedinarai totona.”—Efeso 3:5-9.
9. Dahaka dainai “Dirava ena laloa dobu gaudia” ita lalopararalaia be hahenamo badana?
9 Paulo ma ia gwau: “Hari Dirava ese gaukara badana ekalesia dekenai ia henia. Inai gaukara be, ekalesia ese Dirava ena aonega idauidau, be guba . . . taudia dekenai do ia hedinaraia.” (Efeso 3:10) Aneru be Iehova ese Keristani kongrigeisen dekenai ia karaia gaudia idia itaia bona lalopararalaia neganai, namo idia abia. Aneru idia ura idia diba gaudia edia anina ita lalopararalaia be hahenamo badana! (1 Petero 1:10-12) Gabeai, Paulo ia gwau: “Umui, bona Dirava ena taudia ibounai, ese emui goada bona aonega dekena amo, Keriso ena lalokau [eiava Keristani abidadama] ena lababa, bona ena lata, bona ena ataiai, bona ena dobu, do umui diba momokani.” (Efeso 3:11, 18) Namona be hari dobu gaudia haida, ita do diba lasi gaudia haida ita itaia.
Dobu Gaudia Rua
10, 11. Baibel ena hereva hegeregerena, edena negai Iesu be Iehova ena “hahine” ena “garana” ai ia lao?
10 Ita diba Genese 3:15 (BHğ) ese ia gwauraia “garana” ena anina be Iesu, bona “hahine” ena anina be Dirava ena guba oreana. To ita sibona ita nanadaia: ‘Edena negai Iesu be gwauhamata Garana ai ia lao? Guba dekenai ia noho neganai, o Maria ese ia havaraia neganai, o bapatiso ia abia neganai, eiava mase amo ia toreisi lou neganai, a?’
11 Dirava ia gwau guba oreana o “hahine” be garana ta do ia havaraia, unai garana be gaigai o Satani ena kwarana do ia moia. To lagani tausen momo idia ore vadaeni, Satani bona ena kara do ia haorea garana be hahine ese ia do havaraia lasi. Unai dainai, peroveta tauna Isaia ia gwau, ia be “natuna ia havaraia diba lasi hahine” bona “ia lalohisihisi bada.” (Isaia 54:1, 5, 6) Gabeai, Iesu be Betelehema dekenai ia vara. To ia bapatiso neganai, lauma helaga amo ia abia hidi bona Dirava ena natuna hereadaena ai ia lao, badina Iehova ia gwau: “Inai be lauegu Natuna.” (Mataio 3:17; Ioane 3:3) Hahine ena “garana” ia hedinarai unai. Gabeai, Iesu ena hahediba taudia danu be lauma helaga ese ia horodia. Vadaeni, Iehova ena “hahine,” lagani momo lalonai “natuna ia havaraia diba lasi hahine” unai, be ‘mai moale bada danu do ia boiboi diba.’—Isaia 54:1; Galatia 3:29.
12, 13. Edena siri ese idia hahedinaraia tanobada ai idia noho horoa Keristani taudia be “hesiai tauna mai ena kamonai, bona mai ena kara maoromaoro”?
12 Dobu gauna iharuana be inai: Dirava ia ura taunimanima 144,000 be tanobada amo do ia abia hidi. (Apokalupo 14:1, 4) Ita laloparara bona abia dae hadibaia herevana be inai: Herevana horoa taudia be edena negai tanobada ai idia noho, to idia ibounai be “hesiai tauna mai ena kamonai, bona mai ena kara maoromaoro” oreana, bona unai orea amo Iesu ese nega korikori ai ena natuna dekenai lauma “aniani” idia henia. (Mataio 24:45) Edena Baibel siridia ese unai hadibaia herevana idia hamomokania? Keristani ta ta be lauma aniani amo ena tadikaka ia ubua dainai, Iesu be idia ta ta ia herevalaia eiava?
13 Dirava be Israela taudia dekenai ia gwau: “Umui be egu hereva umui hamomokania taudia. Umui be egu hesiai, umui lau abia hidi vadaeni.” (Isaia 43:10, BHğ) Nisan 11, 33 C.E. ai, Iesu be Israela gunalaia taudia ia hamaoroa, Dirava be Israela taudia ia dadaraia vadaeni. Ia gwau: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” Iesu be hutuma ia hamaoroa: “Inai, umui emui ruma be do ia noho kava anina lasi.” (Mataio 21:43; 23:38) Israela taudia be Iehova ena hesiai taudia, to idia be Iehova idia kamonai henia lasi bona kara maoromaoro idia karaia lasi. (Isaia 29:13, 14) Unai dina tamona ai, Iesu ia henanadai: “Hesiai tauna mai ena kamonai, bona mai ena kara maoromaoro . . . be daika?” Iesu ena henanadai anina be, ‘Edena kara maoromaoro besena be Israela besena ena gabu do ia abia bona mai kamonai ida Dirava do ia hesiai henia?’ Aposetolo Petero be horoa Keristani kongrigeisen taudia ia hereva henia lalonai, unai henanadai ia haerelaia: “Dirava ese umui ia abia hidi vadaeni, umui be iena . . . bese helagana, bona Dirava ena orea korikori taudia.” (1 Petero 1:4; 2:9) Unai horoa besena, “Dirava ena Israela” matamatana unai, be Iehova ena hesiai taudia matamatadia ai idia lao. (Galatia 6:16) Idaunegai Israela besena be “hesiai” tauna ta bamona dainai, hari inai negai herevana horoa taudia be edena negai tanobada ai idia noho, to idia ibounai be “hesiai tauna mai ena kamonai, bona mai ena kara maoromaoro.” Ita moale badina Dirava ena hesiai tauna amo lauma “aniani” ita abia!
Sibona Eda Stadi Ita Moalelaia Diba
14. Dahaka dainai Baibel ita duahia bona stadilaia be mai ena moale?
14 Baibel amo lalohadai matamata ta ita diba neganai, ita moale badina unai ese eda abidadama ia hagoadaia, ani? Momokani, Baibel ita duahia bona stadilaia be mai ena moale. Unai dainai, iseda buka bona magasin oi duahia neganai, oi sibona dekenai henanadai haida oi henia be namo. Hegeregere: ‘Guna inai hereva ena anina idia herevalaia dalana bona hari idia herevalaia dalana be hegeregere, a? Edena Baibel siri haida eiava hereva haida amo egu hereva lau hamomokania diba?’ Bema hereva ma haida oi tahua be namo, vadaeni henanadai oi torea, bena gabeai, unai oi stadilaia diba.
15. Edena bamona gaudia oi stadilaia bona oi moalelaia be namo? Bona edia namo be dahaka?
15 Edena bamona gaudia oi stadilaia bona oi moalelaia be namo? Idia ta be Dirava ena gwauhamata idauidau, Dirava ese ia gaukaralaia ena taunimanima ia durua totona. Eiava Iesu idia perovetalaia herevadia o Baibel ena peroveta bukadia edia siri ta ta oi stadilaia be namo, unai be emu abidadama ia hagoadaia diba. Bema Jehovah’s Witnesses—Proclaimers of God’s Kingdoma bukana be emu gado ai idia hahanaia, unuseniai Iehova ena Witnes taudia edia sivarai oi stadilaia, unai ese emu abidadama do idia hagoadaia danu. Gima Kohorona lalonai idia halasia “Duahia Taudia Edia Henanadai” gunadia danu be oi idia durua siri haida edia anina oi lalopararalaia namonamo totona. Unai dainai, haere maorona idia davaria dalana oi laloa. Unai be oi ia durua emu “lalona” oi hadibaia bona emu laloparara oi habadaia totona. (Heberu 5:14) Oi stadi neganai, emu Baibel lalonai o noutbuk dekenai hereva haida oi torea, unai amo gabeai oi itadia lou diba bona do oi durua taudia dekenai heduru oi henia diba.
Natudia Durua Stadi Idia Moalelaia Totona
16. Edena dala ai matamata taudia oi durua Baibel stadilaia karana idia moalelaia totona?
16 Tama sina be edia natudia idia durua diba Dirava idia tura henia karana idia ura henia totona. Namo lasi oi gwau, matamata taudia be dobu gaudia do idia lalopararalaia lasi. Bema ruma bese ena stadi totona umui hegaegae, matamata taudia dekenai hereva ta oi henia idia tahua totona, bena gabeai, idia oi henanadai henia. Danu, ruma bese ena stadi lalonai, natudia ida haheitalai haida umui karaia hebou, unai amo idia abia dae herevadia be ma haida dekenai idia herevalaia diba, bona danu, idia itaia edia tama sina amo idia dibaia gaudia be hereva momokani. Wiki ta ta ena Baibel duahiduahi umui karaia neganai, namona be “See the Good Land”b buklet oi gaukaralaia Baibel tanodia oi hahedinaraia totona.
17. Dahaka dainai Baibel stadilaia karana ita laloa maoromaoro be gau badana?
17 Baibel ita stadilaia be mai ena namo bona eda abidadama ia hagoadaia diba, to namo lasi unai kara dekenai nega bada ita haorea dainai, nega be lasi kongrigeisen ena hebou kahadia ita hegaegaelaia totona. Kongrigeisen heboudia be Iehova ese “hesiai tauna mai ena kamonai, bona mai ena kara maoromaoro” oreana amo ita ia hadibaia dalana ta. To, tahua karana be mai ena namo badina ita ia durua Kongrigeisen Buka Stadi o Tiokratik Haroro Sikuli ena Baibel hereva badadia ai haere namodia ita henia totona.
18. Dahaka dainai “Dirava ena laloa dobu gaudia” ita stadilaia be mai ena namo?
18 Dirava ena Hereva ita stadilaia karana ese ita ia durua diba Iehova kahirakahira ita lao totona. Unai bamona stadi ena namo be Baibel ese inai bamona ia gwauraia: “Aonega ese oi ia gimaia noho diba, moni ese oi ia gimaia noho diba hegeregerena. To aonega ese moni ia hereaia noho, badina aonega ese aonega tauna ia hamauria noho.” (Hadibaia Tauna 7:12) Unai dainai, bema ita gaukara goada, ita be Dirava ena dobu gaudia do ita lalopararalaia. Baibel idia tahua noho taudia be Dirava ese inai bamona ia gwauhamata henia: “Dirava do oi diba.”—Aonega Herevadia 2:4, 5.
[Footnotes]
a Iehova ena Witnes taudia ese idia karaia.
b Iehova ena Witnes taudia ese idia karaia.
Anina Oi Gwauraia Diba, A?
• “Dirava ena laloa dobu gaudia” haida be dahaka?
• Dahaka dainai dobu gaudia ita stadilaia karana ita hadokoa lasi?
• Dahaka dainai Keristani taudia ibounai be “Dirava ena laloa dobu gaudia” idia lalopararalaia bona idia moalelaia?
• Edena dala ai “Dirava ena laloa dobu gaudia” amo namo bada oi abia diba?
[Picture on page 28]
Edena negai Iesu be gwauhamata Garana ai ia lao?
[Picture on page 31]
Tama sina be ruma bese ena stadi totona idia hegaegae neganai, namona be natudia dekenai hereva ta idia henia idia tahua totona