“Idia ese Mamoe Ena Natuna Murinai Idia Raka” Noho
“Idia ese Mamoe ena Natuna murinai idia raka [“idia raka noho,” NW ], iena loaloa gabudia ibounai.”—APOK. 14:4.
1. Hahediba taudia momokanidia ese Iesu murinai idia raka karana be edena bamona idia laloa?
LAGANI rua mai kahana idia ore vadaeni, Iesu be “Kaperanauma ai, taunimanima idia haboua bona ia hadibaia noho.” Iesu ena diba tahua taudia momo be iena hereva idia kamonai neganai, idia moale lasi bona “Iesu idia rakatania, bona ia danu idia raka hebou lou lasi.” Iesu be iena aposetolo taudia 12 ia nanadaia: “Umui danu do umui raka siri, a?” Simona Petero ia haere: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho. Ai be ai abidadama henia, bona ai diba vadaeni, oi be Dirava ena Helaga Tauna.” (Ioa. 6:48, 59, 60, 66-69) Iesu ena diba tahua taudia momokanidia be Iesu idia rakatania lasi. Lauma helaga idia abia murinai, Iesu ena hakaua dalana idia badinaia noho.—Kara 16:7-10.
2. (a) “Hesiai tauna mai ena kamonai, bona mai ena kara maoromaoro,” o “kohu naria tauna mai ena kamonai” be daika? (b) Edena dala ai horoa Keristani taudia idia hahedinaraia idia be “Mamoe ena Natuna murinai idia raka”?
2 Hari inai negai horoa Keristani taudia be edena bamona? Iesu be ‘ena mai bona tanobada dokona’ ia perovetalaia neganai, ia gwau tanobada ai iena murinai idia raka horoa taudia be “hesiai tauna mai ena kamonai, bona mai ena kara maoromaoro,” o “kohu naria tauna mai ena kamonai.” (Mat. 24:3, 45; Luka 12:42) Hesiai tauna oreana be nega ibounai ‘Mamoe ena Natuna murinai ia raka, iena loaloa gabudia ibounai.’ (Apokalupo 14:4, 5 duahia.) Unai orea taudia ese“Babulonia badana,”—tanobada ena tomadiho koikoi ibounai—ena hahediba koikoi bona kara mirodia idia dadaraia. (Apok. 17:5) Bona hahediba koikoi herevadia be “nega ta idia gwauraia lasi,” bona Satani ena tanobada idia dadaraia noho. (Ioa. 15:19) Vaira negana ai, tanobada ai idia noho horoa orena taudia be Mamoe ena Natuna “murinai idia raka” ela bona guba dekenai idia lao.—Ioa. 13:36.
3. Dahaka dainai hesiai tauna oreana ita abidadama henia be mai anina bada?
3 Iesu ese hesiai tauna mai ena kamonai bona mai ena kara maoromaoro oreana ia abia hidi “ruma do ia naria,” anina be unai orea lalonai idia noho taudia ta ta dekenai, nega korikori ai “edia aniani do ia henia.” Iesu ese danu unai hesiai tauna ia abia hidi ena kohu “ibounai naria tauna” ai ia lao totona. (Mat. 24:45-47) Unai “kohu” ena kahana ta be “mamoe idaudia” eiava “hutuma bada” taudia. (Apok. 7:9; Ioa. 10:16) Horoa taudia ta ta bona “hutuma bada” taudia ta ta be Dirava ese ia abia hidi hesiai tauna oreana idia abidadama henia be namo, ani? Hesiai tauna oreana ita abidadama henia ena badina badadia rua be inai: (1) Iehova be hesiai tauna oreana ia abidadama henia. (2) Iesu danu be hesiai tauna oreana ia abidadama henia. Iehova Dirava bona Iesu Keriso ese hesiai tauna mai ena kamonai bona mai ena kara maoromaoro idia abidadama henia daladia haida mani ita itaia.
Iehova be Hesiai Tauna Ia Abidadama Henia
4. Dahaka dainai hesiai tauna ese nega korikori ai ia henia hakaua herevadia ita badinaia?
4 Dahaka dainai hesiai tauna mai ena kamonai bona mai ena kara maoromaoro ese nega korikori ai hakaua herevadia ia henia diba? Iehova ia gwau: “Lau ese oiemu raka dalana oi dekenai do lau hadibaia.” Ma ia gwau: “Lau ese oi do lau hakaua, bona sisiba oi dekenai do lau henia.” (Sal. 32:8) Oibe, Iehova be hesiai tauna dekenai hakaua herevadia ia henia. Unai dainai, unai hesiai tauna ese gau haida ia hamaoromaoroa eiava hakaua herevadia ia henia neganai, namona be ita badinaia.
5. Dahaka ese ia hahedinaraia Dirava ena lauma helaga be hesiai tauna oreana ia hasiahua?
5 Danu, Iehova ese ena lauma helaga amo hesiai tauna oreana ia hanamoa. Ena be lauma helaga be ita itaia lasi, to hesiai tauna ena gaukara amo ita diba lauma helaga be idia latanai ia gaukara noho. Mani oi laloa: Hesiai tauna mai ena kamonai bona mai ena kara maoromaoro ese tanobada hegegemadai Iehova Dirava, ena Natuna, bona Basileia ia harorolaia. Iehova idia tomadiho henia taudia ese Basileia ena sivarai be tano bona motumotu 230 mai kahana ai idia harorolaia noho. Unai ese ia hahedinaraia Dirava ena lauma helaga be hesiai tauna ena gaukara ia hasiahua noho, ani? (Kara 1:8 duahia.) Hesiai tauna oreana be nega korikori ai tanobada hegegemadai Iehova ena taunimanima dekenai hakaua herevadia ia henia totona, abia hidi badadia ia karaia be namo. Hesiai tauna be unai abia hidi ia karaia bona badinaia neganai, lalokau, manau, bona lauma helaga ena huahua ma haida ia hahedinaraia danu.—Gal. 5:22, 23.
6, 7. Dahaka ese ia hahedinaraia Iehova be hesiai tauna mai ena kamonai oreana ia abidadama henia?
6 Iehova ese hesiai tauna ia abidadama henia karana oi lalopararalaia totona, namona be unai orea dekenai ia gwauhamatalaia herevadia oi laloa. Aposetolo Paulo ia gwau: “Kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau. Badina be do ia bodaga diba gauna ese bodaga diba lasi gauna bamona do ia halaoa. Bona do ia mase diba gauna ese mase diba lasi gauna do ia halaoa.” (1 Kor. 15:52, 53) Keriso ena murinai idia raka horoa taudia be mai edia abidadama ida Dirava idia hesiai henia ela bona idia mase. To idia toreisi lou, lauma taudia ai idia lao bona idia mauri hanaihanai. Ma danu, edia lauma tauanina be ia bodaga diba lasi. Apokalupo 4:4 ia gwau, unai toreisi lou taudia be terona dekenai idia helai bona edia kwarana ai be golo kwara gaudia idia noho. Horoa Keristani taudia be lohia dagi do idia abia. To unai sibona lasi.
7 Apokalupo 19:7, 8 ia gwau: “Mamoe ena Natuna ena headava negana, be ia ginidae vadaeni, bona iena adavana be headava totona ia hegaegae vadaeni. Davana bada dabua kurokuro, namo herea momokani ia karaia vadaeni, Dirava ese ia henia gauna. Inai dabua be goevagoeva bona ia diaridiari. Unai be Dirava ena helaga taudia edia kara namodia ena toana.” Iehova ese horoa Keristani taudia ia abia hidi, vaira negana ai Iena Natuna ida idia lohia hebou totona. Unai harihari gau namodia ese idia hahedinaraia Iehova be horoa taudia ia abidadama henia, badina “Mamoe ena Natuna murinai idia raka, iena loaloa gabudia ibounai” dekenai.
Iesu be Hesiai Tauna Ia Abidadama Henia
8. Iesu be edena dala ai ia hahedinaraia horoa Keristani taudia ia abidadama henia?
8 Dahaka ese ia hamomokania Iesu be iena murinai idia raka horoa taudia ia abidadama henia momokani? Iesu be tanobada ai do ia mase hanuaboina ai, iena kamonai aposetolo taudia 11 ia hamaoroa. “Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi. Unai dainai, egu Tamana ese Basileia ta ia henia lau dekenai hegeregerena, lau danu Basileia ta lau henia inai, umui dekenai. Vadaeni lauegu Basileia lalonai, egu pata dekenai do umui aniani, bona do umui inuinu, bona terona ena latanai do umui helai, vadaeni Israela iduhu 12 dekenai do umui kota henia.” (Luka 22:28-30) Unai negai Iesu be aposetolo taudia 11 dekenai gwauhamata ia karaia, bona horoa Keristani taudia 144,000 danu be unai gwauhamata lalonai idia noho. (Luka 12:32; Apok. 5:9, 10; 14:1) Bema Iesu be idia ia abidadama henia lasi, oi laloa Iesu do ia gwauhamata Basileia idia lohiaia hebou totona, a?
9. Keriso ena “kohu ibounai” be dahaka?
9 Danu, Iesu Keriso ese hesiai tauna mai ena kamonai bona mai ena kara maoromaoro ia abia hidi “iena kohu ibounai naria tauna” ai ia lao totona—unai kohu be tanobada ai idia noho Basileia ena gau ibounai. (Mat. 24:47) Unai gau haida be Iehova ena Witnes taudia edia hedikwota, tano idauidau ai idia noho brens opesi, tanobada hegegemadai idia noho Assembly Hall bona Kingdom Hall. Bona Basileia harorolaia bona hahediba taudia halaoa gaukaradia. Bema Iesu be hesiai tauna oreana ia abidadama henia lasi, oi laloa unai orea dekenai iena kohu do ia henia ia naria totona, a?
10. Dahaka ese ia hahedinaraia Iesu Keriso be ena murinai idia raka horoa taudia ida ia noho?
10 Iesu be ia toreisi lou bona guba dekenai ia do lao lasi neganai, iena kamonai hahediba taudia dekenai ia hedinarai, bona idia dekenai ia gwauhamata: “Do umui kamonai bona laloa noho, lau be hanaihanai umui danu ita noho ela bona tanobada dokona.” (Mat. 28:20) Iesu be unai gwauhamata ia hamomokania, a? Idia ore lagani 15 lalonai, tanobada hegegemadai, Iehova ena Witnes taudia edia kongrigeisen ena namba be 70,000 mai kahana amo ia bada daekau 100,000—unai be 40 pesen mai kahana amo ia bada daekau. Bona hahediba taudia matamatadia edia namba be edena bamona? Idia ore lagani 15 lalonai, kahirakahira hahediba taudia 4.5 milioni be bapatiso idia abia—unai be hegeregere dina ta ta ai kamonai taudia 800 mai kahana be idia bapatiso. Unai namba ia bada daekau ese ia hahedinaraia goevagoeva, horoa taudia edia kongrigeisen heboudia be Keriso ia hakaua bona edia hahediba taudia halaoa gaukarana ia durua noho.
Hesiai Tauna be mai Ena Kamonai Bona mai Ena Kara Maoromaoro
11, 12. Edena dala ai hesiai tauna ia hahedinaraia ia be mai ena kamonai bona ia kara maoromaoro?
11 Iehova Dirava bona Iesu Keriso be hesiai tauna mai ena kamonai bona mai ena kara maoromaoro idia abidadama henia dainai, ita danu be unai bamona ita karaia be namo. Hesiai tauna danu be Iehova bona Iesu ese idia henia gaukarana ia karaia guguru noho. Hegeregere, Gima Kohorona magasin be lagani 130 bamona lalonai idia halasia vadaeni. Bona Iehova ena Witnes taudia edia hebou badadia bona maragidia amo iseda abidadama ia hagoadaia.
12 Hesiai tauna mai ena kamonai be ia kara maoromaoro danu, badina sibona ena ura herevadia ia gwauraia lasi o ia haragaharaga lasi, to Iehova ena hakaua herevadia sibona ia badinaia. Hegeregere, tomadiho koikoi ena gunalaia taudia be taunimanima edia kara dika bona ura dikadia idia gwauraia dika lasi, to hesiai tauna be ita ia sisiba henia Satani ena tanobada dikana ita dadaraia totona. Hesiai tauna be nega korikori ai sisiba namodia ia henia diba, badina Iehova Dirava bona Iesu Keriso be ena gaukara idia hanamoa noho. Unai dainai, hesiai tauna ita abidadama henia be namo. To, edena dala ai ita hahedinaraia diba ita be hesiai tauna mai ena kamonai bona mai ena kara maoromaoro ita abidadama henia?
Horoa Taudia Danu Mamoe Ena Natuna Ita Badinaia Noho
13. Sekaraia ena peroveta hereva hegeregerena, edena dala ai ita hahedinaraia hesiai tauna mai ena kamonai bona mai ena kara maoromaoro ita abidadama henia?
13 Baibel bukana Sekaraia ia gwau, “tau ibounai 10” be “Iuda tauna ta” dekenai idia mai bona idia gwau: “Oi danu do ita lao.” (Sekaraia 8:23 duahia.) Unai “Iuda tauna” be taunimanima edia grup ta ia laulaulaia. Iseda nega ai, ia be horoa orena taudia ia laulaulaia—idia be “Dirava ena Israela” ena kahana taudia. (Gal. 6:16) “Tau ibounai 10, gado idauidau ibounai besedia dekena amo” be hutuma bada taudia ia laulaulaia. Horoa taudia hegeregerena, hutuma bada taudia be hesiai tauna mai ena kamonai bona mai ena kara maoromaoro ena murinai idia raka. Hutuma bada taudia idia hemarai lasi be namo, to idia hahedinaraia idia be “guba maurina totona ia boiria taudia” ida idia gaukara hebou. (Heb. 3:1, NW ) Iesu be mai hemarai lasi ida ia gwau, horoa taudia be iena “tadina.”—Heb. 2:11.
14. Edena dala ai Keriso ena tadikaka ita durua diba?
14 Iesu Keriso ia gwau bema iena tadikaka ita durua, anina be Iesu ita durua danu. (Mataio 25:40 duahia.) Edena dala ai tanobada helarona idia abia taudia ese Keriso ena horoa tadikaka idia durua diba? Dala badana be, Basileia harorolaia gaukarana amo. (Mat. 24:14; Ioa. 14:12) Idia hanaia lagani momo lalonai, horoa taudia edia namba be ia maragi ia lao, to mamoe idaudia edia namba be ia bada ia lao. Tanobada helarona idia abia taudia be haroro gaukara, hegeregere painia gaukarana idia karaia neganai, idia hahedinaraia horoa taudia idia durua edia hahediba taudia halaoa gaukarana idia hagugurua totona. (Mat. 28:19, 20) Ma danu, unai gaukara ita durua dalana ma ta be iseda kontribusen monidia amo.
15. Hesiai tauna ese hakaua herevadia ia henia bona orea lalonai gau haida ia haidaua neganai, Keristani taudia ta ta ese dahaka idia karaia be namo?
15 Keristani taudia ta ta be hesiai tauna ese buka, magasin bona Keristani heboudia amo ia henia hakaua herevadia be edena bamona idia laloa? Unai gaudia ita duahia bona kamonai gaudia ita badinaia, a? Hesiai tauna ese orea lalonai gau haida ia haidaua karana be edena bamona ita laloa? Mai iseda ura bada ida unai hesiai tauna ena hakaua herevadia ita badinaia neganai, ita hahedinaraia Iehova ena dala ita abidadama henia.—Iam. 3:17.
16. Dahaka dainai Keristani taudia ibounai be Keriso ena tadikaka idia kamonai henia be namo?
16 Iesu ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka.” (Ioa. 10:27) Horoa Keristani taudia be unai bamona idia karaia. To, idia ‘danu idia lao taudia’ be edena bamona? Unai taudia ese Iesu idia kamonai henia be namo. Danu, Iesu ena tadikaka, hesiai tauna unai, ita kamonai henia be namo, badina Iesu ese unai orea dekenai maduna ia henia Dirava ena taunimanima do ia naria bona hakaua totona. Keriso ena tadikaka ita kamonai henia ena anina be dahaka?
17. Hesiai tauna oreana ita kamonai henia ena anina haida be dahaka?
17 Hakaua Oreana be hesiai tauna mai ena kamonai bona mai ena kara maoromaoro ladanai ia gaukara, bona ia be tanobada hegegemadai ena haroro gaukara ia gunalaia. Hakaua Oreana lalonai idia gaukara taudia be lo taudia, bona lauma helaga ese ia horoa elda taudia. Baibel ia gwau, idia be ita idia “hakaua taudia.” (Heb. 13:7) Inai horoa tadikakadia be tanobada hegegemadai kongrigeisen 100,000 mai kahana bona Basileia idia harorolaia taudia 7,000,000 mai kahana idia naria, bona ‘nega ibounai Lohiabada ena gaukara idia karaia goadagoada.’ (1 Kor. 15:58) Hakaua Oreana ida ita gaukara hebou neganai, ita be hesiai tauna oreana ita kamonai henia.
Hesiai Tauna Idia Kamonai Henia Taudia be Hahenamo Idia Abia
18, 19. (a) Edena dala ai hesiai tauna mai ena kamonai bona mai ena kara maoromaoro idia kamonai henia taudia be hahenamo idia abia? (b) Namona be iseda lalona ita hadaia dahaka ita karaia totona?
18 Iesu ese hesiai tauna mai ena kamonai bona mai ena kara maoromaoro ia abia hidi negana amo ema bona hari, unai hesiai tauna ese ‘dala maoromaoro be taunimanima momo dekenai ia hadibaia.’ (Dan. 12:3) Ia hadibaia taudia momo be inai tanobada dikana ena dokona ai do idia roho mauri. Dirava vairanai kara maoromaoro ita karaia be hahenamo badana!
19 Vaira negana ai, ‘Hanua Helagana, Ierusalema matamatana [idia ibounai be 144,000] guba amo ia diho mai noho, Dirava amo. Inai Hanua Helagana be headava kekeni matamata bamona, ia herahera namo herea, dabua namona ia karaia iena adavana totona, ia hegaegae’ neganai, hesiai tauna idia kamonai henia taudia be dahaka hahenamo do idia abia? Baibel ia gwau: “Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apok. 21:2-4) Vadaeni, namona be Keriso bona iena horoa tadikakadia ita abidadama henia.
Dahaka Oi Dibaia?
• Dahaka ese ia hamomokania Iehova be hesiai tauna mai ena kamonai bona mai ena kara maoromaoro ia abidadama henia?
• Dahaka ese ia hahedinaraia Iesu Keriso be hesiai tauna oreana ia abidadama henia?
• Dahaka dainai hesiai tauna mai ena kamonai ita abidadama henia be mai anina bada?
• Edena dala ai ita hahedinaraia hesiai tauna ita abidadama henia?
[Picture on page 25]
Oi diba Iehova ese daika ia abia hidi vaira negana ai iena Natuna ida idia lohia hebou totona, a?
[Pictures on page 26]
Iesu Keriso ese hesiai tauna mai ena kamonai bona mai ena kara maoromaoro dekenai ena kohu ia henia ia naria totona
[Picture on page 27]
Haroro gaukara ita karaia neganai, ita be lauma helaga ese ia horoa taudia ita durua noho