Emu Ahuna Oi Laloa Noho
“Heau helulu ena dokona gabuna dekenai maoromaoro lau heau henia, kwalimu ahuna do lau abia totona.”—FILI. 3:14.
1. Paulo ese dahaka kwalimu ahuna ia naria?
APOSETOLO Paulo, eiava Taso tauna Saulo, be ladana bada ruma besena amo ia mai. Ia be Taravatu hadibaia tauna badana Gamaliela amo ena sene taudia edia tomadiho ena hadibaia herevadia ia dibaia. (Kara 22:3) Paulo be ladana bada tauna ai ia lao diba, to ia ese ena tomadiho ia rakatania bona Keristani tauna ta ai ia lao. Bena inai kwalimu ahuna ia naria: Dirava ena guba Basileia lalonai do ia mauri hanaihanai, bona king bona hahelaga gaukarana do ia karaia. Bona unai Basileia ese tanobada paradaisona do ia lohiaia.—Mat. 6:10; Apok. 7:4; 20:6.
2, 3. Paulo ese guba maurina ena ahuna be edena bamona ia laloa?
2 Paulo be unai ahuna ia laloa bada dainai, ia gwau: “Inai guna lau idia hanamoa gaudia, be harihari Keriso dainai, lau gwau idia be dika. Oibe, inai gaudia sibona lasi, to gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani. Ia dainai gau ibounai lau negea vadaeni. Lau laloa idia be momoru.” (Fili. 3:7, 8) Taunimanima be dagi bada, taga, moni gaukara namona, bona ladana bada idia tahua. To Paulo ia gwau unai gaudia be momoru bamona, badina ia diba Iehova be taunimanima totona gau namodia do ia karaia.
3 Unai nega amo, Paulo dekenai Iehova bona Keriso ia dibaia karana be mai anina bada. Iesu ese Dirava ia guriguri henia neganai unai diba ia herevalaia danu, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioa. 17:3) Paulo be ia ura dikadika mauri hanaihanai ia abia dainai, Filipi 3:14 ai ia gwau: “Heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.” Oibe, Paulo ese ia laloa noho ahuna be inai: Guba lalonai do ia mauri hanaihanai bona Dirava ena Basileia lalonai do ia lohia.
Tanobada Dekenai Mauri Hanaihanai Do Ita Abia
4, 5. Hari Dirava ena ura idia karaia taudia milioni momo be dahaka kwalimu ahuna do idia abia?
4 Dirava ena ura idia karaia taudia momo be idia gaukara goada, badina idia ura tanobada matamata dekenai mauri hanaihanai ahuna idia abia. (Sal. 37:11, 29) Iesu ese ia hamomokania unai helaro be do ia vara momokani. Ia gwau: “Dagedage lasi taudia be idia namo, badina tanobada do idia abia.” (Mat. 5:5) Salamo 2:8 ese ia hahedinaraia, Iesu be iseda tanobada ena King badana ai do ia lao, bona 144,000 be ia ida guba dekenai do idia lohia hebou. (Dan. 7:13, 14, 22, 27) To tanobada do idia “abia” mamoe idaudia be Basileia henunai do idia noho—unai Basileia be ‘tanobada ena matamana amo idia totona idia hegaegaelaia.’ (Mat. 25:34, 46, NW ) Bona ita diba unai be do idia guguru, badina unai ia gwauhamatalaia Diravana be ia “koikoi diba lasi.” (Tito 1:2) Namona be Iosua ena kara ita tohotohoa, badina ia abia dae Dirava be ena gwauhamata do ia hagugurudia dainai, Israela taudia ia hamaoroa: “Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.”—Ios. 23:14.
5 Hari inai negai ita lalometau bona lalohisihisi, to Dirava ena tanobada matamata lalonai be unai bamona lasi. Unai nega lalonai tuari, raskol karadia, hitolo, koikoi karadia, gorere, bona mase be do idia ore. Danu, taunimanima edia tauanina be do idia goevadae bona tanobada paradaisona ai do idia noho. Unai negai mauri be do ia namo herea. Oibe, dina ta ta ai do ita helai namonamo, mai moale danu. Unai be ahuna namo hereana, ani?
6, 7. (a) Dirava ena tanobada matamata lalonai do ia vara gaudia be Iesu ese edena bamona ia hahedinaraia? (b) Edena dala ai mase taudia edia mauri do ia matamaia?
6 Iesu be tanobada ai ia noho neganai, ia be Dirava ena lauma helaga ena siahu amo gau namodia momo ia karaia. Unai ese ia hahedinaraia tanobada matamata ai Iesu be unai bamona do ia karaia. Hegeregere, Iesu ese lagani 38 lalonai ia raka diba lasi tauna ta ia hamaoroa: “Oi raka.” Baibel ia gwau unai tau be ia namo bona ia raka. (Ioane 5:5-9 duahia.) Ma nega ta ai, Iesu ese matakepulu tauna ta ia davaria, bona ia hanamoa. Gabeai, Farisea taudia ese matakepulu tauna idia nanadaia daika ese ia hanamoa, bona matakepu tauna ena haere be inai: “Tanobada ia hamatamaia dekena amo, tau ta ese mai matakepulu danu ia vara tauna ta ena matana ia kehoa ena sivarai, be ta ita do kamonaia lasi. Inai tau be Dirava dekena amo bema ia mai lasi, be ia ese gau ta do ia karaia diba lasi.” (Ioa. 9:1, 6, 7, 32, 33) Iesu be Dirava ese ia hasiahua dainai, unai bamona hoa karadia ia karaia diba. Iesu ia lao gabudia ibounai dekenai, ia be “gorere taudia ia hanamodia.”—Luka 9:11, NW.
7 Iesu ese gorere bona aena dika taudia sibona ia hanamoa lasi, to ia ese mase taudia ia hatorea isi lou danu. Hegeregere, mauri lagani 12 kekenina ia mase neganai, ena tama sina idia lalohisihisi bada. To, Iesu ia gwau: “Kekeni e, oi toreisi.” Bona kekeni be ia toreisi! Kekeni ena tama sina bona ma haida be unai hoa karana idia itaia neganai, edia hemami be edena bamona? (Mareko 5:38-42 duahia.) Dirava ena tanobada matamata ai, taunimanima do idia “hoa dikadika” badina mase taudia bilioni momo “dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15; Ioa. 5:28, 29) Unai negai edia mauri do ia matamaia bona do idia mauri hanaihanai.
8, 9. (a) Keriso ena Lagani 1,000 Lohia Negana lalonai, Adamu amo ita abia hanai kara dika dekenai dahaka do ia vara? (b) Dahaka dainai mase amo idia toreisi lou taudia haida be Dirava ese do ia kota henidia?
8 Mase amo do idia toreisi lou taudia be mai edia dala mauri idia abia totona. Idia toreisi lou neganai, edia kara dika gunadia dainai Dirava ese do ia kota henidia lasi. (Roma 6:7) Keriso ena Lagani 1,000 Lohia Negana lalonai, Iesu ena mauri davalaia boubouna dainai Basileia idia badinaia taudia be do idia goevadae, bona Adamu amo idia abia hanai kara dikana do ia boio momokani. (Roma 8:21) Iehova ese “mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.” (Isa. 25:8) Danu Baibel ia gwau, “Dirava ese buka haida [do] ia kehoa,” unai ese ia hahedinaraia unai negai do idia noho taudia be taravatu eiava gau matamatadia do idia dibaia. (Apok. 20:12) Tanobada be paradaiso ai ia lao neganai, “tanobada idia noholaia taudia ese kara maoromaoro do idia dibaia.”—Isa. 26:9, BHğ.
9 Toreisi lou taudia be Adamu amo idia abia hanai kara dika dainai Dirava ese do ia kota henidia, a? Lasi, to idia sibona idia abia hidi gaudia dainai Dirava ese do ia kota henidia. Apokalupo 20:12 ia gwau: “Mase taudia be Dirava ese ia kota henia, edia kara buka lalonai ia torea hegeregerena,” anina be idia toreisi lou murinai idia karaia karadia dainai Dirava ese do ia kota henidia. Iehova be hahemaoro goeva, hebogahisi, bona lalokau karana ia hahedinaraia goevagoeva, ani? Ma danu, toreisi lou taudia ese inai tanobada gunana ai idia karaia “kara gunadia be do idia laloa lou lasi, do idia laloaboio momokani.” (Isa. 65:17) Oibe, idia be hagoadaia hereva matamatadia momo do idia abia bona mauri be gau namodia amo do ia honu dainai, do idia lalohisihisi lasi. Edia lalona dekenai kara gunadia do idia laloaboio momokani. (Apok. 21:4) Aramagedono amo do idia roho mauri “hutuma bada” taudia dekenai danu be unai bamona do ia vara.—Apok. 7:9, 10, 14; NW.
10. (a) Tanobada matamata lalonai mauri be edena bamona? (b) Dahaka ese oi do ia durua emu ahuna oi laloa noho totona?
10 Dirava ena tanobada matamata lalonai, taunimanima be do idia gorere lasi bona mase lasi. Baibel ia gwau: “Siona dekenai idia noho taudia ta ese do ia gwau lasi, ‘Lau be gorere.’ ” (Isa. 33:24) Tanobada matamata ai idia noho taudia be daba ta ta ai do idia noga neganai edia tauanina be do ia goada loulou, unai dainai do idia ura dikadika kerukeru ia mai haraga. Idia be gaukara namona do idia karaia, bona taunimanima namodia sibona do idia bamoa. Momokani, unai be ahuna hereadaena, ani? Namona be nega oi atoa Isaia 33:24 bona Isaia 35:5-7 ena peroveta herevadia oi duahia bona laloa dobu totona. Bona emu lalona matana amo oi duahia gaudia oi itaia bamona. Unai ese oi do ia durua emu ahuna namona oi laloa noho totona.
Kwalimu Ahuna Idia Laloaboio Taudia
11. Solomona ia lohia namonamo negana mani oi gwauraia.
11 Namona be ita gaukara goada ita dibaia kwalimu ahuna ita laloa noho totona, bema lasi, unai ahuna ita laloaboio diba. Haheitalai be inai: Idaunegai Solomona be Israela ena king ai ia lao neganai, mai manau ida Dirava ia noia aonega bona diba ia henia, unai amo Iehova ena taunimanima ia kota henia namonamo diba. (1 King Taudia 3:6-12 duahia.) Unai dainai, Baibel ia gwau, “Dirava ese aonega bona diba bada herea Solomona dekenai ia henia.” Momokani, “Solomona ena aonega ese dina daekau kahana taudia ibounai edia aonega bona Aigupito ena aonega ibounai ia hereaia.”—1 Kin. 4:29-32.
12. Israela edia king taudia dekenai Iehova be dahaka sisiba ia henia?
12 To, matamanai Dirava ena sisiba king taudia dekenai be inai: “Emui king ese hosi momo do ia abia lasi, bona ia ese . . . adavana momo do ia abia lasi, idia ese Lohiabada dekena amo iena lalona do idia veria garina.” (Deu. 17:14-17) Bema king ta ese ena hosi momo ia abia, anina be king ese ena bese hamauria totona Iehova, Gimaia Tauna, dekenai ia tabekau lasi, to tuari gaudia dekenai ia tabekau. Bona king ta ese adavana momo ia abia be dika, badina reana idia haida be tomadiho koikoi karadia idia karaia hahinedia bona idia ese king be Iehova tomadiho henia karana amo idia veria siri diba.
13. Solomona be edena dala ai Iehova ese ia henia sisibana ia badinaia lasi?
13 Solomona be unai sisiba ia badinaia, a? Lasi, ia be Iehova ese king dekenai ia henia taravatudia ia utua. Ia ese hosi bona hosi guia taudia tausen momo ia haboudia. (1 Kin. 4:26) Danu, ia ese adavana 700 ia abia bona hesiai hahinedia 300 ia adavaia, bona idia momo be edia badibadinai idia noho dirava koikoi idia tomadiho henia hahinedia. Baibel ia gwau: “Iena adavana ese iena lalona idia veria, dirava idaudia dekenai, bona ia ese Lohiabada, iena Dirava, ia badinaia momokani lasi.” Solomona be ena adavana ese idia tomadiho henia dirava koikoidia ia tomadiho henia. Unai dainai, Iehova ese Solomona ia hamaoroa ‘basileia be ia dekena amo do ia kokia.’—1 Kin. 11:1-6, 11.
14. Solomona bona Israela besena edia gwau-edeede karana dainai dahaka ia vara?
14 Solomona ia laloaboio gauna be inai: Dirava momokanina ena gaukara ia karaia be hahenamo hereadaena. King Solomona be tomadiho koikoi lalonai ia vareai. Unai nega ai, Israela besena be aposteit karadia idia karaia dainai, lagani 607 B.C.E. ai Babulonia ese idia hadikaia ore. Ena be Iuda taudia ese tomadiho momokani idia haginia lou, to lagani handred murinai, Iesu ia gwau: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” Unai hereva anina be ia vara momokani. Iesu ia gwau: “Inai, umui emui ruma be do ia noho kava anina lasi.” (Mat. 21:43; 23:37, 38) Iuda besena be Iesu idia gwau-edeede henia dainai, Dirava momokani idia hesiai henia karana ena hahenamo idia haboioa. Lagani 70 C.E. ai, Roma tuari taudia ese Ierusalema bona ena dubu helaga idia hadikaia, bona Iuda taudia momo be hesiai taudia ai idia lao.
15. Mai anina bada gauna idia laloaboio taudia haida edia haheitalai mani oi gwauraia.
15 Iuda Iskariote be Iesu ena aposetolo tauna ta. Iuda be Iesu ena hahediba hereva namodia ia kamonai bona Dirava ena lauma helaga amo Iesu ese ia karaia hoa karadia momo ia itaia. To, Iuda be ena kudouna ia naria namonamo lasi. Ia be Iesu bona aposetolo taudia 12 edia moni mauana ia naria. To “ia be henaoa tauna, ia be moni ena maua ia naria, bona idia udaia moni be ia ese ia henaoa.” (Ioa. 12:6) Iuda ia mataganigani dainai, dubu gunalaia taudia koikoidia amo siliva moni 30 ia abia bona Iesu ena mase dalana ia karaia. (Mat. 26:14-16) Haheitalai dikana ia hahedinaraia tauna ma ta be Dema, ia be aposetolo Paulo ia bamoa tauna ta. Dema be ena kudouna ia naria namonamo lasi. Paulo ia gwau: “Dema ese lau ia rakatania, inai tanobada ena mauri ia ura henia bada dainai.”—2 Tim. 4:10; Aonega Herevadia 4:23 duahia.
Ita Ta Ta ese Ita Dibaia Gaudia
16, 17. (a) Ita davaria hahetoho be edena bamona? (b) Dahaka ese ita do ia durua Satani amo idia mai hahetoho ita koua o haheaukalaia totona?
16 Dirava ena hesiai taudia ibounai ese Baibel ai idia noho haheitalai idia laloa namonamo be gau badana, badina Baibel ia gwau: “Iseda sene taudia dekenai unai bamona kara idia vara, be ita dekenai toa bamona, do ita itaia mai gari danu. Edia sivarai danu Buka Helaga lalonai idia torea vadaeni, idia ese ita do idia sisiba henia totona. Badina be tanobada ena dokona be kahirakahira negana ita noho inai.” (1 Kor. 10:11) Hari, ita be inai tanobada dikana ena dokona negana lalonai ita noho.—2 Tim. 3:1, 13.
17 Satani Diabolo, “inai tanobada ena dirava” “ia diba iena nega be ia kwadogi sibona.” (2 Kor. 4:4; Apok. 12:12) Ia be dala idauidau do ia gaukaralaia Iehova ena hesiai taudia edia abidadama ia hadikaia totona. Satani be inai tanobada bona ena hahediba hereva koikoi idia halasia gaudia ia biagua. To, Iehova ena taunimanima ese “siahu badana be Dirava sibona dekena amo” idia abia. (2 Kor. 4:7) Ita be Dirava amo ia mai siahuna dekenai ita tabekau diba, unai ese ita do ia durua Satani ese ia havaraia hahetoho ita koua o haheaukalaia totona. Unai dainai, gau badana be ita guriguri hanaihanai, bona ita diba momokani Iehova ese “Lauma Helaga be idia noinoi taudia dekenai do ia henidia.”—Luka 11:13.
18. Inai tanobada dikana lalonai dahaka ita karaia be gau badana?
18 Danu ita diba momokani Satani ena tanobada dikana be kahirakahira do idia ore, to Keristani momokani taudia be mauri do idia davaria. Baibel ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioa. 2:17) Unai dainai, bema Dirava ena hesiai tauna ta ia laloa inai tanobada gaudia be mai anina bada, to Iehova tura henia karana ia laloa maragi, unai be lalohadai kavakavana! Satani ese ia gunalaia tanobadana be kahirakahira do ia ore, to Iehova ena Keristani kongrigeisen ese Iena kamonai hesiai taudia do ia gimaia. Tanobada matamata idia lao henia noho lalonai, idia diba inai gwauhamata ena anina be do ia guguru: “Kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu.” (Sal. 37:9) Unai dainai, unai kwalimu ahuna oi laloa noho be namo.
Oi Laloatao, A?
• Paulo ese ena ahuna be edena bamona ia laloa?
• Dahaka dainai Dirava ese tanobada matamata ai mauri hanaihanai do idia abia taudia haida do ia kota henidia?
• Hari, edena aonega dalana oi abia hidi be namo?
[Picture on page 12, 13]
Baibel oi duahia neganai, emu lalona ai emu ahuna abia dalana be oi itaia bamona, a?