Emu Abidadama Karana ese Iehova Ia Hamoalea
“Egu natuna e, do oi aonega, egu lalona do oi hamoalea, lau ia gwau henia tauna lau haere henia totona.”—AON. 27:11, BHğ.
1, 2. (a) Iobu bukana dekenai, Satani be dahaka hereva ia halasia? (b) Iobu ia mase murinai, dahaka ese ia hahedinaraia Satani be Iehova ia gwau henia noho?
IEHOVA be dala ia kehoa, Satani ese Iobu ena abidadama ia tohoa totona. Unai dainai, Iobu ena animal idia boio, ena natuna idia mase, bona gorere dikana ta ia abia. To Satani be Iobu bona ma haida edia abidadama ia herevalaia. Ia gwau: “Kopina ena davana be kopina. Tau ta ese iena gau ibounai do ia negea, iena mauri do ia dogoatao totona.” Momokani, Satani be taunimanima ibounai ia herevalaia. Unai dainai, ena be Iobu ia mase vadaeni, to Satani be taunimanima ta ta edia abidadama ia tohoa noho.—Iobu 2:4.
2 Iobu ia mase bena lagani 600 murinai, Iehova be Solomona amo ia gwau: “Egu natuna e, do oi aonega, egu lalona do oi hamoalea, lau ia gwau henia tauna lau haere henia totona.” (Aon. 27:11, BHğ) Unai siri ese ia hahedinaraia, unai nega lalonai danu Satani be Iehova ia gwau henia. Ma danu, aposetolo Ioane ena matahanai hegeregerena, lagani 1914 ai, Dirava ena Basileia ia gini bona Satani be guba amo idia negea diho murinai, Satani be Dirava ena hesiai taudia ia samania. Momokani, hari nega dokona lalonai, Satani be Dirava ena hesiai taudia edia abidadama ia tohoa noho.—Apok. 12:10.
3. Iobu bukana amo dahaka gau badadia toi ita dibaia?
3 Iobu bukana lalonai ita dibaia gau badadia toi mani ita laloa. Ginigunana: Iobu ena hahetoho ese idia hahedinaraia, Dirava ena taunimanima bona ma haida edia inai tauna badana be Satani Diabolo. Iharuana: Hahetoho lalonai, Dirava kahirakahira ita noho karana ese ita do ia durua Iehova abidadama henia karana ita hagoadaia totona. Ihatoina: Hahetoho lalonai, Dirava be ita ia durua, Iobu dekenai ia karaia bamona. Hari inai negai, Iehova be Baibel, Iena orea, bona lauma helaga amo ita ia durua.
Hanaihanai Ita Laloatao Satani Diabolo be Eda Inai Tauna Badana
4. Daika ese tanobada ai dika bada ia havaraia noho?
4 Momo idia gwau Satani be ia noho lasi. Unai dainai, ena be reana tanobada ai idia vara gaudia idia laloa momo, to idia laloparara lasi gauna be inai: Satani Diabolo be dika ibounai ena badina. Momokani, taunimanima be kerere momo idia havaraia. Adamu bona Heva be edia Havaraia Tauna idia dadaraia. Unai nega amo ema bona hari, taunimanima be kara dikadia momo idia karaia. To namona be ita diba, Diabolo ena hereva dainai Heva be Dirava ia gwau-edeede henia. Hari inai negai, ia be taunimanima momo herea ia koia bona biagua noho. Ia be “inai tanobada ena dirava” dainai, ena hekokoroku, mataganigani, mama, koikoi, bona gwau-edeede be taunimanima ese idia tohotohoa. (2 Kor. 4:4; 1 Tim. 2:14; 3:6; Iamesi 3:14, 15 duahia.) Momokani, gavamani taudia bona tomadiho taudia idia heai, badu heheni, henaohenao, bona mataganigani dainai, taunimanima edia noho dalana ia dika ia lao.
5. Diba maorona ita abia dainai, ita ura dahaka ita karaia?
5 Ita be Iehova ena hesiai taudia dainai, diba maorona ita abia be gau badana. Oibe, ita diba Satani ena kerere dainai tanobada ai metau o hekwakwanai momo idia vara. Unai dainai, ita ura dikadika haroro gaukara ita karaia bona taunimanima ita hadibaia daika be kerere ia havaraia tauna badana. Danu, ita moale badina Dirava momokanina Iehova ena kahanai ita gini, bona haida ita hadibaia edena dala ai Iehova be Satani bona taunimanima edia hekwakwanai idauidau do ia haorea vaitani.
6, 7. (a) Daika be Dirava ena hesiai taudia ia dagedage henia? (b) Edena dala ai Elihu ena haheitalai ita tohotohoa diba?
6 Satani be tanobada taudia momo edia mauri ia hadikaia sibona lasi, to Dirava ena hesiai taudia ia dagedage henia danu. Ia ura bada ita ia tohoa. Iesu Keriso ese Petero ia hamaoroa: “Simona e, Simona e, itaia! Satani ia gwau ia ura umui ia abia bona witi bamona umui do ia hapararaia.” (Luka 22:31, NW ) Iesu ena murinai idia raka taudia ibounai be dika idauidau do idia davaria. Petero ia gwau Diabolo “be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” Danu, Paulo ia gwau: “Dirava badinaia idia ura taudia ibounai ese dagedage ena hisihisi do idia abia.”—1 Pet. 5:8; 2 Tim. 3:12.
7 Eda tadikaka ta dekenai dika badana ta ia vara neganai, edena dala ai ita hahedinaraia diba unai dika ia havaraia tauna ita diba? Namona be eda tadikaka amo ita daudau lasi to ita durua—Elihu be ena turana namona Iobu ia durua hegeregerena. Eda tadikaka ida iseda inai tauna badana Satani ita tuari henia. (Aon. 3:27; 1 Tes. 5:25) Gau badana be inai: Iseda tadikaka ita durua Iehova ia abidadama henia bona hamoalea totona.
8. Satani be Iobu ia koua Iehova ia tomadiho henia lasi totona, to dahaka dainai ia kwalimu lasi?
8 Satani be Iobu ena animal ibounai ia haboioa guna. Iobu dekenai unai animal be mai anina bada, badina reana unai amo moni ia davaria diba. To danu, tomadiho karadia lalonai, Iobu be animal ia gaukaralaia. Iobu ena natuna idia kerere negadiai, Baibel ia gwau: “Iobu ese nega ibounai dabai ia toreisi, Lohiabada dekenai boubou ia henia, iena natuna ibounai edia miro kara do ia hagoevaia totona. Inai bamona ia karaia nega ibounai, badina be inai bamona ia laloa, ‘Sedira lauegu natuna be idia kara dika, sedira Lohiabada ena ladana idia hadikaia kava.’ ” (Iobu 1:4, 5) Unai dainai, Iobu be hanaihanai Iehova dekenai animal ia bouboulaidia. To hahetoho idia vara matamaia neganai, Iobu ese unai boubou karadia ia karaia be auka. Ia dekenai be “kohu” o gau namona ta ia noho lasi, Iehova ia hanamoa totona. (Aon. 3:9, BHğ) To, iena uduna ia gaukaralaia diba Iehova ia hanamoa totona!
Iehova Tura Henia Karana Oi Hagoadaia
9. Iseda mauri lalonai, dahaka be gau badana?
9 Herevana ita taga o ogogami, ita matamata o buruka, ita gorere eiava lasi, to Iehova tura henia karana ita hagoadaia be gau badana. Unai ese ita do ia durua hahetoho lalonai Iehova ita abidadama henia bona hamoalea totona. Haida be hereva momokani haida sibona idia diba, to mai gari lasi ida Iehova idia abidadama henia noho.
10, 11. (a) Hahetoho lalonai taihu ta be dahaka ia karaia? (b) Taihu ese ia hahedinaraia Satani be edena bamona tauna?
10 Russia taihu ta ladana, Valentina Garnovskaya ena ekspiriens mani ita laloa. Iobu bona Russia Witnes taudia momo bamona, Valentina be hahetoho lalonai Iehova ia abidadama henia. Lagani 1945 ai, Valentina ena mauri lagani be 20 neganai, tadikaka ta ese ia haroro henia. Unai tadikaka be nega rua Valentina ia vadivadi henia, Baibel idia herevalaia totona, to gabeai, Valentina be tadikaka ia itaia lou lasi. Ena be hereva momokani haida sibona ia diba, to ia be ena dekena taudia ia haroro henia matamaia. Unai dainai, pulisi ese idia abia bona lagani 8 lalonai dibura kamepa ai ia noho. Lagani 1953 ai, dibura ruma ia rakatania neganai, ia be maoromaoro haroro gaukara ia hamatamaia lou. Unai dainai, pulisi ese idia abia lou bona lagani 10 lalonai dibura kamepa ai ia noho. Lagani momo kamepa idauidau ai ia noho murinai, taihu haida idia noho kamepa dekenai idia siaia lao. Unai taihu edia Baibel be tamona. Dina ta ai, taihu ta ese unai Baibel be Valentina dekenai ia hahedinaraia. Unai be nega iharuana Baibel ta ia itaia dainai ia moale bada! Baibel ta ia itaia negana ginigunana be, lagani 1945 dekenai—unai be nega ginigunana tadikaka ese Valentina ia haroro henia!
11 Lagani 1967 ai, Valentina be dibura ruma ia rakatania bona ranu bapatiso amo ena gwauhamata Iehova dekenai ia hamomokania. Unai murinai, haroro gaukara ia karaia ela bona lagani 1969. Unai lagani lalonai, pulisi ese idia abia lou bona lagani toi lalonai dibura rumana dekenai ia noho. To, Valentina be haroro gaukara ia hadokoa lasi. Ia be lagani 2001 ai ia mase, bona kamonai taudia 44 ia durua hereva momokani idia dibaia. Dibura rumadia bona kamepa ai ia noho lagani ibounai be 21. Taihu be Iehova ia abidadama henia dainai, dibura ruma ai ia noho bona ena gau ibounai ia halusia. Ena mase negana ia kahirakahira neganai, Valentina ia gwau: “Lau be mai egu ruma ta lasi. Egu kohu ibounai be sutkeisi tamona lalonai lau udaia, to Iehova ena hesiai gaukara lau moalelaia sibona.” Valentina ese ia hahedinaraia Satani be koikoi tauna, badina Satani ia gwau hisihisi lalonai taunimanima be Dirava do idia rakatania! (Iobu 1:9-11) Oibe, Valentina be Iehova ena lalona ia hamoalea, bona vaira negana ai Iehova ese Valentina bona abidadama taudia ma haida be mase amo do ia hamauridia lou.—Iobu 14:15.
12. Edena dala ai lalokau karana ese ita ia durua Iehova ita tura henia totona?
12 Iehova ita tura henia badina Ia ita lalokau henia. Iena kara namodia ita moalelaia bona dala idauidau ai ita hekwarahi Iena ura hegeregerena ita noho totona. Herevana Satani be ita ia samania koikoi, to dala idauidau ai ita hahedinaraia Iehova ita lalokau henia bada. Unai lalokau be ita ia hagoadaia, hahetoho lalonai Iehova ita abidadama henia noho totona. To, Iehova be dahaka do ia karaia? Baibel ia gwau Iehova be ena “helaga momokani taudia edia dala, be ia naria namonamo noho.”—Aon. 2:8; Sal. 97:10.
13. Iehova be edena dala ai iseda kara ia tahua?
13 Lalokau ese ita ia durua Iehova ena ladana ita matauraia totona, herevana ita laloa gaukara momo ita karaia diba lasi. Iehova be eda ura namodia ia itaia dainai, herevana ita ura karaia gaudia haida sibona ita karaia, to Iehova be ita do ia kota henia lasi. Ia be ita karaia gaudia sibona lasi to edia badina ia laloa danu. Ena be Iobu ia lalometau bona hekwakwanai momo ia davaria, to Elipasa, Biledada, bona Sopara dekenai ia hahedinaraia ia be Iehova ena dala ia ura henia. (Iobu 10:12; 28:28 duahia.) Iobu bukana ena karoa ginigabedia ese idia hahedinaraia, Dirava be Elipasa, Biledada bona Sopara dekenai ia badu, badina idia be hereva momokani idia gwauraia lasi. To Iehova be Iobu dekenai ia moale dainai, Ia ese Iobu ia gwauraia “lauegu hesiai tauna,” bona Ia ese Iobu ia hamaoroa unai koikoi taudia toi ia durua totona. (Iobu 42:7-9) Momokani, Iobu bamona ita karaia neganai, Iehova ese ita do ia lalonamo henia.
Iehova be Ena Abidadama Hesiai Taudia Ia Durua
14. Edena dala ai Iehova ese Iobu ia durua ena lalohadai ia hamaoromaoroa totona?
14 Goevadae lasi tauna, Iobu, ena abidadama Iehova dekenai be ia goada. To nega haida hekwakwanai lalonai, Iobu be lalohadai kererena ia abia. Hegeregere, Iehova ia hamaoroa: “Dirava e, lau ese oi dekenai lau boiboi, to lau dekenai oi haere lasi. . . . Oiemu siahu dekena amo lau oi hisihisi henia noho.” Ma nega haida ai, Iobu be ena namo ia laloa dainai, ia gwau: “Lau be kerere lasi,” bona “lau ese dagedage karana ta lau karaia lasi, bona egu guriguri be ia goevagoeva.” (Iobu 10:7; 16:17; 30:20, 21) To, Iehova be mai anina bada henanadai haida ia henia, unai amo Iobu ia durua sibona ena namo ia laloa lasi totona. Danu, unai henanadai amo Iobu ia diba Iehova be atai momokani Diravana, taunimanima ia hereaia. Iobu be unai sisiba ia abia dae bona ena lalohadai ia hamaoromaoroa.—Iobu 40:8; 42:2, 6 duahia.
15, 16. Hari inai negai, Iehova be edena dala haida ai ena hesiai taudia ia durua?
15 Hari danu, Iehova be ena hesiai taudia ia hakaua bona sisiba henia. Ma danu, dala badadia haida amo ita ia durua. Hegeregere, Iesu Keriso be mauri davalaia boubouna ia henia, unai amo eda kara dika ia gwauatao. Unai mauri davalaia boubouna dainai, Dirava ida ita hetura diba, herevana ita be goevadae lasi. (Iam. 4:8; 1 Ioa. 2:1) Hahetoho lalonai Dirava ita guriguri henia neganai, Iehova be lauma helaga amo ita ia durua bona hagoadaia. Ma danu, Baibel ita duahia bona laloa dobu neganai, ita hegaegae iseda abidadama ia tohoa gaudia ita hanaia totona. Stadi karana amo ita diba Iehova be guba bona tanobada edia lohia badana, bona Ia ita abidadama henia noho be namo.
16 Danu, ita moale badina tanobada ibounai tadikaka oreana lalonai ita noho, bona Iehova ese “hesiai tauna mai ena kamonai, bona mai ena kara maoromaoro” oreana amo ita ia ubua. (Mat. 24:45-47) Kongrigeisen 100,000 lalonai idia karaia heboudia be ita idia hadibaia bona hagoadaia eda abidadama idia tohoa gaudia ita haheaukalaia totona. Germany taihu ladana, Sheila—ena mauri lagani be 15—ena ekspiriens be unai ia hamomokania.
17. Sheila be hanaihanai kongrigeisen heboudia ia lao henia dainai, dahaka namo ia davaria?
17 Dina ta ai, sikuli dekenai, tisa ta be klas dekenai ia noho lasi dainai, Sheila ena turadia idia ura babalau taudia edia gau ta (Ouija board) idia gadaralaia. Unai dainai, karaharaga Sheila be klas ia rakatania. To ia moale unai bamona ia karaia, badina gabeai ia kamonai, unai gadara lalonai stiuden haida idia mamia demoni be idia kahirakahira idia noho dainai, idia gari bona heau kava heau kava. To dahaka ese Sheila ia durua klas ia rakatania haraga totona? Ia gwau: “Unai dika ia do vara lasi neganai, Kingdom Hall ai tadikaka ta be unai gauna (Ouija board) ena dika ia kikilaia. Unai dainai, lau diba dahaka lau karaia be maoro. Lau ura Iehova lau hamoalea, Aonega Herevadia 27:11 be unai bamona ia hereva.” Sheila be hebou ia reaia lasi bona program dekenai ia kamonai namonamo dainai, namo ia davaria!
18. Ita ibounai ese dahaka ita karaia be namo?
18 Namona be ita ibounai ese Dirava ena orea ena hakaua dalana ita badinaia. Nega ibounai hebou ita lao, Baibel ita duahia, iseda buka bona magasin ita stadilaia, ita guriguri, bona lo tadikaka taihu ita bamodia, unai amo heduru namona do ita abia. Iehova ia ura ia ita abidadama henia noho. Ita moale badina Iehova ena ladana helagana ita hanamoa, ita abidadama henia noho, bona ena lalona ita hamoalea!
Oi Laloatao, A?
• Satani be dahaka dika bona hahetoho ia havaraia noho?
• Dahaka be iseda kohu hereadaena?
• Dahaka dainai Iehova ita tura henia?
• Hari inai negai, Iehova be edena dala haida ai ita ia durua?
[Picture on page 8]
Oi ura oi diba gaudia be ma haida dekenai oi hadibaia, a?
[Picture on page 9]
Eda tadikaka ita durua Iehova idia abidadama henia noho totona
[Picture on page 10]
Valentina be Iehova ia abidadama henia dainai, dibura ruma ai ia noho bona ena gau ibounai ia halusia