Kohu Naria Tauna mai Ena Kamonai Bona Hakaua Oreana
“Kohu naria tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona aniani neganai, iena hesiai taudia edia aniani do ia henia, tauna be daika?”—LUKA 12:42.
1, 2. Iesu be nega dokona ena toana ia herevalaia neganai, edena mai anina bada henanadai ia henia?
IESU be nega dokona ena toana ia herevalaia neganai, inai henanadai ia henia: “Hesiai tauna mai ena kamonai bona mai ena kara maoromaoro, ena biaguna ese ia abia hidi ena hesiai taudia do ia naria, bona nega korikori ai edia aniani do ia henia tauna be daika?” Bena Iesu ia gwau, hesiai tauna be ia kamonai bona ena biaguna ena kohu ia naria namonamo dainai, ia be davana namona do ia abia.—Mat. 24:45-47, NW.
2 Au Raurau Ruma Maragidia Aria idia karaia neganai danu, Iesu be unai bamona henanadai ta ia henia. (Luka 12:42-44 duahia.) To, ia ese hesiai tauna ia gwauraia “kohu naria tauna.” Kohu naria tauna be ruma o hesiai taudia ia naria tauna. To, ia danu be hesiai tauna. Vadaeni hesiai tauna o kohu naria tauna be daika, bona edena dala ai ‘nega korikori ai aniani ia henia’? Ita ibounai ese unai ita lalopararalaia be mai anina bada, badina lauma aniani be unai dala amo ita abia.
3. (a) Kerisendom ena Baibel herevalaia taudia ese “hesiai tauna” be edena bamona idia herevalaia? (b) “Kohu naria tauna” o “hesiai tauna” be daika, bona “hesiai taudia” be daidia?
3 Nega momo Kerisendom idia herevalaia taudia idia gwau, Iesu be sibona idia gwauraia Keristani taudia edia gunalaia taudia edia maduna ia herevalaia. To, Iesu be Kerisendom ena orea idauidau lalonai idia noho taudia ibounai ia gwauraia hesiai taudia, a? Lasi, Iesu be “kohu naria tauna” o “hesiai tauna” tamona ia gwauraia, bona unai hesiai tauna ese ena biaguna ena kohu ibounai do ia naria. Unai dainai, nega momo Gima Kohorona ese ia hahedinaraia, kohu naria tauna be “orea maragi” taudia ia laulaulaia. Luka ena Evanelia Bukana lalonai, Iesu be unai taudia ia herevalaia. (Luka 12:32) “Hesiai taudia” be unai orea maragi taudia ia herevalaia, bona ia hahedinaraia idia ta ta be mai edia maduna. Bona henanadai ta be inai: Hesiai tauna o orea maragi taudia ta ta be nega korikori ai lauma aniani idia henia noho, a? Baibel ena hereva ita stadilaia namonamo neganai, unai henanadai ena haere do ita diba.
Idaunegai Iehova Ena Hesiai Tauna
4. Iehova ese idaunegai Israela be edena bamona ia herevalaia, bona unai bese amo dahaka mai anina bada gauna ita dibaia?
4 Iehova be ena Israela besena ia herevalaia, ia gwau: “Umui be lauegu hereva hamomokania taudia. Lau ese umui [“oi,” NW ] lau abia hidi, egu hesiai gaukara do umui karaia totona [“umui be egu hesiai tauna,” NW ].” (Isa. 43:10) Unai bese taudia ibounai be hesiai tauna oreana taudia. To, laloatao hahelagaia taudia bona hahelagaia lasi Levi taudia sibona be bese taudia hadibaia ena maduna idia huaia.—2 Siv. 35:3; Mal. 2:7.
5. Iesu ena hereva ese ia hahedinaraia, dahaka do ia vara?
5 Israela besena be Iesu ese ia gwauraia hesiai tauna, a? Lasi. Unai ita diba badina Iesu be Iuda taudia dekenai ia gwau: “Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” (Mat. 21:43) Ia hedinarai goevagoeva unai bese ena gabu be ma ta ese do ia abia. Iehova be bese matamatana ta do ia gaukaralaia. Iesu ese ena haheitalai ai ia gwauraia “hesiai tauna” ese Dirava ena hakaua herevadia be taunimanima dekenai ia henia, unai be idaunegai Israela taudia idia karaia bamona.
Hesiai Tauna mai Ena Kamonai Ia Hedinarai
6. Pentekoste 33 C.E. ai, edena bese matamatana ia vara, bona daidia be unai bese taudia ai idia lao?
6 Bese matamatana, “Dirava ena Israela” be lauma Israela taudia. (Gal. 6:16; Roma 2:28, 29; 9:6) Pentekoste 33 C.E. ai, Dirava ese ena lauma helaga ia bubua neganai, unai bese matamatana ia vara. Unai murinai, horoa Keristani taudia ibounai be unai bese matamatana lalonai idia vareai, unai bese be Biaguna, Iesu Keriso ese ia makaia hesiai tauna oreana. Iesu ese unai bese matamatana taudia ta ta dekenai sivarai namona harorolaia bona hahediba taudia halaoa gaukarana ia henidia. (Mat. 28:19, 20) To unai bese taudia ta ta be nega korikori ai lauma aniani henia gaukarana do idia durua, a? Baibel ese unai henanadai ia haerelaia dalana mani ita itaia.
7. Matamanai, aposetolo taudia edia gaukara badana be dahaka, bona edena dala ai gabeai ia bada ia lao?
7 Iesu be ena aposetolo taudia 12 ia abia hidi neganai, edia gaukara badana be ma haida dekenai sivarai namona do idia harorolaia. (Mareko 3:13-15 duahia.) Unai gaukara be inai Greek herevana apostolos—anina be “siaia”—ida ia hegeregere. To, gabeai Keristani kongrigeisen idia haginia gwauraia neganai, aposetolo ena maduna be “dagi” ta ai ia lao.—Kara 1:20-26.
8, 9. (a) Aposetolo taudia 12 idia laloa bada gauna be dahaka? (b) Daidia be maduna ma haida idia abia, bona hakaua oreana ese ia hamomokania?
8 Aposetolo taudia 12 be dahaka idia laloa bada? Haere be Pentekoste dinana murinai ia vara gauna amo ita itaia diba. Vabu dekenai hanaihanai aniani idia haria karana dainai hepapahuahu ia vara neganai, aposetolo taudia 12 ese hahediba taudia idia haboua bona idia gwau: “Ia namo lasi Dirava ena hereva haroro gaukara ita hadokoa, aniani haria gaukara karaia totona.” (Kara 6:1-6 duahia.) Aposetolo taudia ese lo taudia ma haida idia abia hidi “inai gaukara” idia karaia totona, unai amo aposetolo taudia be “haroro” gaukara do idia karaia noho. Iehova ese unai dala ia hanamoa dainai, “Dirava ena hereva ia bada daekau, bona diba tahua taudia idia momo daekau Ierusalema dekenai.” (Kara 6:7) Unai dainai, lauma aniani henia gaukarana be aposetolo taudia ese idia karaia maduna badana.—Kara 2:42.
9 Gabeai aposetolo taudia be ma haida dekenai maduna badadia idia henia. Lauma helaga ena hakaua hegeregerena, Paulo bona Banaba be Antioka kongrigeisen dekenai idia lao. Ena be idia be Iesu ese ia abia hidi aposetolo taudia 12 huanai idia noho lasi, to gabeai idia be aposetolo taudia ai idia lao. (Kara 13:1-3; 14:14; Gal. 1:19) Gabeai, edia abia hidi karana be Ierusalema ai ia noho hakaua oreana ese ia hamomokania. (Gal. 2:7-10) Unai murinai, Paulo be lauma aniani henia ena maduna ia huaia danu. Ia be lauma helaga ena siahu amo ena revareva ginigunana ia torea.
10. Aposetolo taudia edia negai, horoa Keristani taudia ibounai be lauma aniani idia hegaegaelaia, a? Gwauraia hedinarai.
10 To, horoa Keristani taudia ibounai be haroro gaukara idia gunalaia bona lauma aniani idia hegaegaelaia, a? Lasi. Aposetolo Paulo ia gwau: “Ibounai be aposetolo taudia, a? Ibounai be peroveta taudia, a? Ibounai be hereva hadibaia taudia, a? Ibounai be hoa kara idia karaia taudia, a?” Anina be iena henanadai ena haere be, ‘lasi.’ (1 Kor. 12:29) Ena be horoa Keristani taudia ibounai be haroro gaukara idia karaia, to idia 8 sibona be Keristani Greek Revarevadia 27 idia torea.
Hari Inai Negai Hesiai Tauna mai Ena Kamonai
11. Hesiai tauna be dahaka “kohu” ia naria?
11 Iesu ena hereva, Mataio 24:45 ai ese ia hahedinaraia, nega dokona ai hesiai tauna mai ena kamonai bona mai ena kara maoromaoro oreana be tanobada ai do ia noho. Apokalupo 12:17 ese unai taudia ia gwauraia “hahine ena natuna oredia” o garana. Unai orena taudia be Keriso ena kohu tanobada ai idia naria. Kohu naria tauna be ena biaguna ena “kohu” tanobada dekenai ia naria, unai kohu haida be Basileia henunai do idia noho tanobada taudia bona sivarai namona harorolaia gaukarana durua totona idia gaukaralaia gaudia.
12, 13. Edena dala amo Keristani tauna do ia diba ia be guba helarona ia abia?
12 Edena dala ai Keristani tauna ta ia diba ia be guba helarona ia abia bona ia be lauma Israela tauna ta? Haere be Paulo ese ia henia. Guba helarona do idia abia taudia dekenai ia gwau: “Dirava ena Lauma ese ia hakaua taudia be Dirava ena natuna. Badina be Dirava ese umui ia henia Laumana ese hesiai taudia mai gari danu umui ia halaoa lasi. Lasi, to Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava dekenai ita hereva henia neganai, ‘Tamagu e, lauegu Tamana lalokau e!’ ita gwauraia diba. Dirava ena Lauma, bona iseda lauma danu idia hereva hebou, idia gwauraia, ita be Dirava ena natuna. Bema ita be Dirava ena natuna neganai, ita ese Dirava ena bese taudia do idia abia hanamoa gaudia be ita danu do ita abia, bona Dirava ese Keriso ia henia hanamoa gaudia do ita abia danu. Badina bema Keriso danu ita hisihisi nega tamona, be ia danu iena hairaina do ita abia nega tamona.”—Roma 8:14-17.
13 Ita gwau diba, idia be lauma helaga ese ia horodia bona guba amo ia mai boiboina ta idia abia dae. (Heb. 3:1, NW ) Dirava be idia ia boiria unai. Unai dainai, maoromaoro idia be unai boiboi idia abia dae, bona idia daradara lasi bona gari lasi, to idia abia dae idia be Dirava ena natudia. (1 Ioane 2:20, 21 duahia.) Unai dainai, idia sibona ese guba helarona idia abia hidi lasi, to Iehova ese ena lauma helaga amo idia ia abia hidi.—2 Kor. 1:21, 22; 1 Pet. 1:3, 4.
Lalohadai Maorona
14. Horoa taudia be Dirava ena boiboi idia laloa bada, a?
14 Horoa taudia be edia guba helarona idia naria noho lalonai, dahaka lalohadai maorona idia abia be namo? Idia diba Dirava ese idia ia boiria be hahenamo badana, to kara haida idia karaia be namo. Hegeregere, unai davana namona idia abia totona, namona be Dirava idia badinaia noho ela bona idia mase. Mai manau ida Paulo ena hereva idia badinaia, ia gwau: “Lauegu varavara taudia e, lau laloa lasi, inai kwalimu ahuna lau abia vadaeni. To kara tamona lau goadalaia noho, lauegu kara gunadia lau laloaboio, bona vaira neganai gaudia do lau goadalaia. Unai dainai heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.” (Fili. 3:13, 14) Namona be horoa orena taudia be “mai gari bona mai heudeheude danu” Dirava ena ‘boiboi hegeregerena do idia noho, do idia noho maoromaoro. Nega ibounai do idia manau.’ —Efe. 4:1, 2; Fili. 2:12; 1 Tes. 2:12.
15. Keristani taudia ese Memorial ai paraoa idia ania bona uaina idia inua taudia be edena bamona idia lalodia be namo? Horoa taudia ese dahaka lalohadai maorona idia abia be namo?
15 Bema ta ia gwau ia be horoa tauna bona Memorial dekenai uaina ia inua bona paraoa ia ania matamaia, tadikaka bona taihu ma haida ese unai tau be edena bamona idia laloa be namo? Namona be ia idia hahemaoro henia lasi. Unai be ia bona Iehova huanai. (Roma 14:12) To, horoa taudia idia gwau diba taunimanima ese idia do idia laloa bada be namo, a? Lasi, to idia gwau diba horoa taudia edia diba bona “hutuma bada” taudia edia diba be hegeregere. (Apok. 7:9, NW ) Eiava idia gwau diba idia abia lauma helaga ena siahu bona “mamoe idaudia” idia abia siahuna be hegeregere. (Ioa. 10:16) Momokani, ma haida ese idia lalodia bada be anina lasi; danu, ena be Memorial ai paraoa idia ania bona uaina idia inua, to kongrigeisen elda taudia idia matauraia be namo.
16-18. (a) Horoa taudia ibounai be Baibel ena hereva momokani matamatadia halasia gaukarana idia karaia, a? Haheitalai ta gwauraia. (b) Dahaka dainai Hakaua Oreana taudia be abia hidi idia karaia gwauraia neganai, horoa taudia ibounai idia nanadaia lasi?
16 Tanobada hegegemadai, horoa taudia ibounai be hereva momokani matamatadia halasia gaukarana idia karaia, a? Lasi. Ena be idia ibounai be hesiai tauna bona lauma aniani idia henia be maoro, to haida sibona be unai maduna idia abia. (1 Korinto 12:14-18 duahia.) Ataiai ita herevalaia hegeregerena, aposetolo edia negai idia ibounai be haroro gaukara idia karaia. To, haida sibona be Baibel idia torea bona Keristani kongrigeisen idia naria.
17 Haheitalai ta be inai: Nega haida Baibel ia gwau, “kongrigeisen” ese hahemaoro komiti gaudia ia hamaoromaoroa be namo. (Mat. 18:17, NW ) To, unai hereva “kongrigeisen” be elda taudia ia herevalaia, idia be kongrigeisen ena ladanai hahemaoro komiti gaudia idia karaia. Elda taudia be abia hidi ta idia do karaia lasi neganai, idia be kongrigeisen taudia ibounai edia lalohadai idia tahua guna, a? Lasi. Tiokratik dalanai, idia be unai maduna idia huaia; idia be kongrigeisen ena ladanai idia gaukara.
18 Unai hegeregerena, hari inai negai horoa taudia haida sibona be hesiai tauna oreana ena ladanai idia gaukara. Unai horoa taudia be Iehova ena Witnes taudia edia Hakaua Oreana. Unai horoa tatau ese Basileia ena gaukara bona lauma aniani halasia gaukarana idia gunalaia. Aposetolo edia negai bamona, Hakaua Oreana be abia hidi haida ia karaia gwauraia neganai, ia be horoa taudia ibounai ia nanadaia lasi. (Kara 16:4, 5 duahia.) To, horoa taudia ibounai be hari ita karaia haroro gaukara idia karaia goadagoada noho. “Hesiai tauna mai ena kamonai, bona mai ena kara maoromaoro” be orea ta, to idia ta ta be mai edia gaukara ta ta danu.—1 Kor. 12:19-26.
19, 20. Hutuma bada taudia be “hesiai tauna mai ena kamonai, bona mai ena kara maoromaoro” bona Hakaua Oreana dekenai dahaka lalohadai maorona idia abia?
19 Unai ese edena dala ai tanobada ai do idia mauri hanaihanai hutuma bada taudia ia durua be namo? Idia be King ena kohu bona mai moale ida Hakaua Oreana ena dala ibounai idia badinaia, badina unai orea be “hesiai tauna mai ena kamonai, bona mai ena kara maoromaoro” ena ladanai ia gaukara. Hakaua Oreana ese idia halasia lauma aniani be hutuma bada taudia ese idia moalelaia. Danu, ena be idia ese hesiai tauna oreana idia matauraia bada, to horoa tauna ta ena ladana idia abia isi lasi. Lauma helaga ese ia horoa Keristani tauna ia ura lasi unai bamona hanamoa ia abia.—Kara 10:25, 26; 14:14, 15.
20 Ena be ita be horoa orena taudia o hutuma bada taudia, to namona be iseda lalona ita hadaia kohu naria tauna mai ena kamonai bona Hakaua Oreana ida ita gaukara hebou totona. Namona be ita ta ta ‘ita gima noho’ bona Iehova ita badinaia noho ela bona dokona.—Mat. 24:13, 42, NW.
Oi Laloatao, A?
• Daika be “hesiai tauna mai ena kamonai, bona mai ena kara maoromaoro,” bona daidia be hesiai taudia?
• Edena bamona ta ia diba ia be Dirava ese ia boiria?
• Lauma aniani matamatadia hegaegaelaia gaukarana be daika ena maduna?
• Horoa taudia ese dahaka lalohadai maorona idia abia be namo?
[Picture on page 23]
Hari inai negai, Hakaua Oreana be hesiai tauna mai ena kamonai bona mai ena kara maoromaoro ena ladanai ia gaukara. Aposetolo edia negai danu be unai bamona dala idia badinaia