Dirava Kahirakahira Oi Lao
“Lau Lohiabada, Emui Dirava Lau be Helaga”
IEHOVA DIRAVA be “helaga, helaga, helaga.” (Apokalupo 4:8) Baibel be unai hereva amo ia hahedinaraia Iehova be helaga, anina be Ia be goeva momokani. Dirava be miro gaudia amo ia parara; kara dika ta be ia dekenai ia noho lasi. Unai ena anina be, ita goevadae lasi taudia be dala lasi helaga herea Diravana ita tura henia totona, a? Lasi, dala ia noho Ia ita tura henia totona! Levitiko karoa 19 ai idia noho herevadia mani ita itaia, unai ese ita do ia durua.
Iehova ese Mose ia hamaoroa: “Israela taudia ibounai do oi hamaoroa.” Bena Iehova ese ia gwauraia herevadia be Israela taudia ibounai ese idia badinaia be namo. Mose be Israela taudia dekenai dahaka do ia herevalaia? Dirava be Mose dekenai ma ia gwau: “Do oi gwau: Do umui helaga, badina be lau Lohiabada emui Dirava, lau be helaga vadaeni.” (Levitiko Karoa 19 Siri 2) Israela taudia ta ta idia helaga be namo. Inai hereva “do umui” ese ia hahedinaraia, unai be lalohadai ta lasi to hahegani ta. Dirava be taunimanima dekenai gau momo ia noia, a?
Iehova be ena helaga karana ia herevalaia neganai, anina be Ia idia tomadiho henia Israela taudia, goevadae lasi taudia unai, ia hamaorodia Ia hegeregerena do idia helaga be namo, a? Lasi, Israela taudia ese unai bamona do idia karaia be ia auka. Gau ibounai amo Iehova, “Helaga ena Dirava,” be helaga herea momokani. (Aonega Herevadia 30:3) To Iehova be helaga dainai, ia ura Ia idia tomadiho henia taudia—goevadae lasi taudia unai, idia helaga danu. Edena dala haida ai idia helaga be namo?
Iehova be helaga karana ia herevalaia murinai, Mose amo Israela taudia edia mauri lalonai do idia badinaia taravatu ma haida ia gwauraia. Idia ta ta ese do idia badinaia taravatu haida be inai: Tama sina bona buruka taudia idia matauraia (Levitiko Karoa 19 siri 3, 32); taia kudima, matakepulu bona ogogami taudia idia laloa bada (Levitiko Karoa 19 siri 9, 10, 14); mai momokani ida ma haida idia kara henia bona toana idia laloa lasi (Levitiko Karoa 19 siri 11-13, 15, 35, 36); bona edia tadikaka do idia lalokau henia, idia sibona idia lalokau henia hegeregerena. (Levitiko Karoa 19 Siri 18) Israela tauna ese unai taravatu bona taravatu ma haida ia badinaia neganai, ia be ‘ena Dirava dekenai, do ia noho helaga momokani.’—Numera 15:40.
Helaga karana ena hahegani ese ita ia durua Iehova Dirava ena lalohadai bona kara ita dibaia totona. Ita dibaia gauna ta be inai: Iehova ita tura henia namonamo totona, ita gaukara goada Iena taravatu hegeregerena ai eda kara idia helaga totona. (1 Petero 1:15, 16) Iena taravatu ita badinadia neganai, mauri namona do ita moalelaia.—Isaia 48:17.
Iehova ia gwau ita helaga be namo, unai ese ia hahedinaraia Iehova be ia idia tomadiho henia taudia ia abidadama henia danu. Iehova be ita ia doria lasi ita karaia diba lasi gaudia ita karaia totona. (Salamo 103:13, 14) Ita be Iena toana hegeregerena ia karaia dainai, ena be ita goevadae lasi, to Ia diba helaga karana ita hahedinaraia diba. (Genese 1:26) Oi ura Iehova, helaga Diravana, kahirakahira oi lao dalana dekenai diba ma haida oi abia, a?
[Picture on page 19]
Helaga karana ita hahedinaraia diba