Inai “Sivarai Namona Dinana” ai, Lalona Veria Gaudia Dadaraia

LEPERA taudia hani be do idia karaia gaudia idia lalohadailaia. Hanua ena geiti dekenai tau ta ese idia dekenai aniani ia henia lasi. Suria tuari oreana be Samaria hanua idia hagegea dainai, hanua lalonai hitolo bada ia vara. Hanua lalonai aniani ena davana be bada herea, bona hanua dekenai idia vareai be anina lasi. Danu, hanua lalonai haida be edia natudia idia ania.​​—⁠2 Kin. 6:​24-⁠29.

Lepera taudia idia gwau: ‘Suria taudia edia kamepa dekenai ita lao. Reana, ita do idia alaia mase, to unai be herevana! Badina bema iniseniai ita noho, do ita hitolo mase!’ Vadaeni, hanuaboi ena dibura ai unai lepera taudia hani be Suria taudia edia kamepa dekenai idia lao. Idia ginidae neganai, regerege ta be lasi. Gadi taudia idia noho lasi. Hosi bona doniki be idia kwatua gabudiai idia gini, to tuari taudia be idia noho lasi. Lepera taudia be palai rumana ta ena lalona idia itaia. Tau ta ia noho lasi, to aniani bona inuinu gaudia be momo herea. Idia vareai, aniani idia ania bona idia inuinu. Golo, siliva, dabua bona dava bada gaudia idauidau idia itaia danu. Edia ura gaudia idia gogoa, idia abia lao gabu ta dekenai idia hunia bena idia giroa mai ma haida idia abia totona. Suria taudia ibounai be edia kamepa idia rakatania. Iehova ese tuari orea badana ena regena ia havaraia, bena Suria taudia idia laloa tuari taudia idia heau mai noho idia tuari henidia totona. Unai dainai, idia heau boio bona edia kohu ibounai idia rakatania taunimanima ese idia abia totona!

Lepera taudia be dava bada gaudia idia abia bona idia hunia noho lalonai, idia laloatao Samaria dekenai momo be idia hitolo bada, unai ese edia lalomamina ia hadikaia. Idia ta ta dekenai idia gwau: “Ita ese inai bamona ita karaia be dika. Inai dina be sivarai namona dinana.” Vadaeni, lepera taudia be Samaria dekenai idia heau lao bona idia davaria gaudia ena sivarai namona be gima taudia dekenai idia gwauraia.​​—⁠2 Kin. 7:​1-​11.

Ita danu be “sivarai namona dinana” ai ita noho. Iesu be ‘tanobada dokona ena toana’ ia herevalaia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mat. 24:​3, 14) Unai siri ena hereva dainai, dahaka ita karaia be namo?

Lalometau Gaudia ese Ita Idia Guia Diba

Lepera taudia be idia davaria gaudia idia moalelaia bada dainai, Samaria idia laloaboio. Idia be unai nega ai idia ura abia gaudia sibona idia laloa bada. Ita dekenai unai bamona ia vara diba, a? Tanobada dokona ena ore negana ena toana ta be “hitolo bada.” (Luka 21:​7, 11) Iesu ese iena hahediba taudia ia sisiba henia, ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina.” (Luka 21:34) Ita be Keristani taudia dainai ita naria namonamo be gau badana, namo lasi dina ta ta ena mauri gaudia abia totona ita lalometau, bena do ita laloaboio ita be “sivarai namona dinana” ai ita noho.

Keristani taihu ta ladana Blessing be sibona ena ura gaudia ese idia guia lasi. Tisa edia kosi ta ia karaia noho lalonai ia be painia gaukara ia karaia danu, bena gabeai Betele tadikaka ta ia adavaia bona Benin Betele opesi ese idia boiria unuseniai ia gaukara totona. Ia gwau: “Lau be ruma hagoevaia gaukarana lau karaia, bona unai gaukara lau moalelaia bada.” Blessing be idia hanaia lagani 12 lalonai ia karaia ful-taim hesiai gaukara ia laloa neganai, ia moale bada badina ia ese hari ita noho “sivarai namona dinana” ia laloa bada.

Nega Bada Idia Haorea Gaudia Dekenai Naria Namonamo

Iesu be hahediba taudia 70 ia siaia neganai, ia gwau: “Uiti anina be ia momo herea vadaeni, to utua taudia be momo lasi. Unai dainai uma biaguna dekenai do umui noinoi, ia ese utua taudia haida do ia siaia, iena uiti do idia utua.” (Luka 10:⁠2) Uiti be nega korikori ai idia gogoa lasi neganai, uiti ena anina namodia idia dika diba. Unai hegeregerena, bema hahediba taudia be edia haroro gaukara idia karaia lasi neganai, taunimanima be edia mauri idia haboioa diba. Unai dainai Iesu ma ia gwau: “Dala dekenai nega umui halusia lasi ta umui hedavari henia totona.” (Luka 10:​4, NW ) Greek gado herevana idia hanaia “hedavari henia,” anina be dala dekenai turana ta ita davaria neganai, “daba namona” sibona ita gwauraia lasi, to ita rosia bona ita herevahereva. Unai dainai, Iesu ese ena hahediba taudia ia hadibaia nega haorea kava karadia idia dadaraia totona, bona edia nega be mai anina bada gaudia dekenai do idia gaukaralaia. Oibe, idia harorolaia sivaraina be mai anina bada.

Nega bada ita haorea kava karadia mani ita laloa. Lagani momo lalodiai, tano momo dekenai televisen raraia karana ese nega bada ia haorea. To, mobael fon bona kompiuta be edena bamona? Britain dekenai tahua gaukarana idia karaia neganai, idia davaria taunimanima 1,000 ese “dina tamona lalonai miniti 88 be telefon dekenai idia herevahereva, miniti 62 be mobael fon ai idia herevahereva, miniti 53 be e-mail dekenai idia haorea, bona miniti 22 be teks mesij siaia karana dekenai idia haorea.” Unai miniti ibounai ita haboua neganai, ita davaria dina ta ta lalonai heduru painia taudia ese haroro gaukara ai idia gaukaralaia horadia be nega rua amo idia hanaia! Telefon, mobael fon, e-mail bona teks mesij gaukaralaia karana dekenai oi be miniti o hora hida oi gaukaralaia?

Ernst bona Hildegard Seliger be edia nega gaukaralaia karana idia naria namonamo. Idia ruaosi be Nazi kamepa bona Komiunis dibura rumadia dekenai idia noho laganidia idia haboua neganai, unai be lagani 40 mai kahana bamona. Dibura kamepa amo idia ruhadia neganai, painia gaukara idia karaia ela bona edia guba ahuna idia abia.

Ernst bona Hildegard edia turadia ese idia dekenai revareva momo idia torea. Idia be hora momo idia haorea diba, unai revareva idia duahia bona idia torea totona. To, idia ruaosi edia mauri lalonai Iehova tomadiho henia karana idia atoa guna.

Oibe, telefon dekenai iseda lalokau taudia ida ita herevahereva, o idia siaia revareva ita duahia neganai, ita moale bada bona unai be kerere lasi. Dina ta ta ai iseda nega ita gaukaralaia gau idauna ma ta ita karaia totona be mai ena namo. To, namona be ita naria namonamo, namo lasi unai gauna dekenai iseda nega ita haorea kava bona sivarai namona harorolaia gaukarana ita laloaboio.

Sivarai Namona Harorolaia Namonamo

Hari ita be “sivarai namona dinana” ai ita noho bona unai be hahenamo ta. Namo lasi gau idauidau ese iseda lalona idia veria, paragraf ginigunana ai ita herevalaia lepera taudia hani bamona. Edia hereva ita laloatao, idia gwau: “Ita ese inai bamona ita karaia be dika.” Unai hegeregerena, namo lasi sibona iseda ura eiava nega bada idia haorea gaudia dekenai iseda nega ita haorea bona haroro gaukara ita karaia lasi.

Ita be aposetolo Paulo ena haheitalai namona ita tohotohoa diba. Ia be lagani 20 gunanai ia karaia haroro gaukarana ia laloa lou neganai, ia gwau: “Keriso ena Sivarai Namona lau harorolaia haorea momokani vadaeni.” (Roma 15:19) Gau ta ese Paulo ena haroro gaukara urana ia hadikaia lasi. Namona be ia bamona ita karaia bona inai “sivarai namona dinana” ai Basileia ena sivarai namona do ita harorolaia goadagoada.

[Picture on page 28]

Blessing ia ura lasi sibona ena ura gaudia ese ena ful-taim hesiai gaukara ia hadikaia

[Picture on page 29]

Ernst bona Hildegard be edia nega idia gaukaralaia namonamo