Keriso Ena Lalokau Dainai Lalokau Ita Hahedinaraia
“Inai tanobada dekenai, sibona ena lalokau taudia dekenai ia lalokau henidia, ia lao bona dokona.”—IOA. 13:1.
1, 2. (a) Edena dala ai Iesu be lalokau karana ia hahedinaraia namo herea? (b) Inai stadi lalonai dahaka do ita herevalaia?
IESU be lalokau karana ia hahedinaraia namo herea. Unai be iena hereva, kara, hadibaia dalana, bona ena mauri ia bouboulaia karana amo ia hahedinaraia. Iesu ena tanobada maurina ibounai lalonai, ia idia hedavari henia taudia bona ena hahediba taudia dekenai lalokau ia hahedinaraia.
2 Iesu ese ena lalokau bada ia hahedinaraia dainai, ia murinai idia raka taudia be Dirava ena taravatu idia badinaia be namo. Danu, unai ese ita ia hagoadaia iseda tadikaka taihu bona ma haida dekenai lalokau ita hahedinaraia totona. Inai stadi lalonai, do ita itaia kongrigeisen elda taudia ese kara dika o kerere badana ia karaia tauna idia sisiba henia neganai, edena dala ai Iesu ena lalokau idia hahedinaraia diba. Danu, do ita itaia edena dala ai Keristani taudia be nega aukadia, lai gubana bamona negadiai, bona gorere negadiai, Keriso ena lalokau idia hahedinaraia diba.
3. Ena be Petero ese kerere badana ia karaia, to Iesu be ia dekenai dahaka ia laloa?
3 Iesu ena hanuaboi ginigabena ai, aposetolo Petero ese nega toi Iesu ia gorea. (Mar. 14:66-72) To Iesu ena hereva hegeregerena Petero ia giroa mai neganai, Iesu ese ena kerere ia gwauatao. Iesu ese Petero dekenai maduna badana ia henia. (Luka 22:32; Kara 2:14; 8:14-17; 10:44, 45) Iesu ese kara dika idia karaia taudia ia kara henia dalana amo dahaka ita dibaia?
Kerere Taudia Dekenai Keriso Ena Laloa Dalana Hahedinaraia
4. Edena bamona negadiai Keriso ese ia hahedinaraia lalokauna ita hahedinaraia?
4 Kara dika badana ia karaia tauna—ena be ia be iseda ruma bese tauna ta eiava kongrigeisen tauna ta—ita kara henia neganai, namona be Keriso ena laloa dalana ita hahedinaraia. Satani ena tanobada dikana ena dokona ia mai kahirakahira dainai, tanobada ena lauma ese ia havaraia kara dikadia be idia bada idia lao. Ena be ita be matamata eiava buruka taudia, to tanobada taudia ese idia karaia karadia ese iseda lalona idia veria diba kara dikadia ita karaia totona. Aposetolo edia negai, haida be Keristani kongrigeisen amo idia atoa siri, bona haida be sisiba aukana idia abia. Hari inai negai danu be unai bamona. (1 Kor. 5:11-13; 1 Tim. 5:20) To, elda taudia be Keriso ese ia hahedinaraia lalokauna idia hahedinaraia neganai, kara dika ia karaia tauna idia durua diba ia helalo-kerehai totona.
5. Edena dala ai elda taudia be kerere tauna dekenai Keriso ena laloa idia hahedinaraia diba?
5 Iesu bamona, elda taudia be nega ibounai Iehova ena taravatu idia badinaia be namo. Unai bamona idia karaia neganai, idia be Iehova ena manau, hebogahisi, bona lalokau idia hahedinaraia. Bema ta be ia helalo-kerehai momokani, bona ena kerere dainai ia “lalohisihisi,” elda taudia ese unai tau idia “hakaua lou, mai manau ida” be ia auka lasi. (Sal. 34:18; Gal. 6:1) To bema ta ia gwau-edeede bona ia sori lasi, vadaeni elda taudia ese edena bamona ia do idia kara henia?
6. Elda taudia be kerere taudia idia sisiba henia neganai, dahaka idia karaia lasi be namo, bona dahaka dainai?
6 Kerere ia karaia tauna be Baibel ena sisiba ia dadaraia eiava kerere be ma haida dekenai ia atoa neganai, reana elda taudia bona ma haida do idia badu. Elda taudia ese unai tau ia karaia karana idia diba vadaeni dainai, reana mai badu ida unai tauna ena kara dekenai edia lalohadai do idia gwauraia. To, badu karana ese namo ta ia havaraia lasi bona badu tauna be “Keriso ena laloa” dalana ia hahedinaraia lasi. (1 Kor. 2:16; Iamesi 1:19, 20 duahia.) Iesu ese ena negai idia noho taudia haida ia sisiba henidia danu, to nega ta ai ia be ta ia inai henia herevana eiava ta ia hahisia herevana ia gwauraia lasi. (1 Pet. 2:23) Momokani, Iesu ese dala ia kehoa kara dika tauna ia helalo-kerehai bona Iehova ena lalonamo ia abia lou totona. Oibe, Iesu be tanobada dekenai ia mai ena badina badana ta be, “kara dika taudia hamauria totona.”—1 Tim. 1:15.
7, 8. Elda taudia be ta idia hahemaoro henia neganai, dahaka idia laloa be namo?
7 Edena dala ai Iesu ena haheitalai ese ita ia durua kongrigeisen ese ia matahakani henia taudia ita kara henia totona? Laloatao: Unai hahemaoro karana be Baibel ese ia gwauraia, bona unai ese kongrigeisen ia gimaia bona reana sisiba ia abia kara dika tauna ia durua ia helalo-kerehai totona. (2 Kor. 2:6-8) Ena be haida be idia helalo-kerehai lasi bona kongrigeisen amo idia atoa siri, to moale gauna be momo be gabeai Iehova bona iena kongrigeisen dekenai idia giroa lou. Elda taudia be Keriso ena kara idia hahedinaraia neganai, idia ese kara dika ia karaia tauna idia durua ia helalo-kerehai bona kongrigeisen dekenai ia giroa lou totona. Kara dika idia karaia taudia haida be elda taudia ese idia henia sisiba ibounai do idia laloatao lasi, to idia be elda taudia ese idia dekenai idia hahedinaraia hemataurai karana bona lalokau do idia laloatao.
8 Unai dainai herevana dahaka ia vara, to elda taudia be lauma helaga ena huahua—mai anina bada gauna be Keriso ese ia hahedinaraia lalokauna—idia hahedinaraia be namo. (Gal. 5:22, 23) Namo lasi elda taudia ese karaharaga kara dika ia karaia tauna be kongrigeisen amo idia atoa siri. To namona be idia hahedinaraia idia ura kerere ia karaia tauna be Iehova dekenai ia giroa. Unai dainai, kara dika ia karaia tauna be gabeai ia helalo-kerehai neganai, ia be Iehova sibona lasi to “harihari gaudia,” elda taudia unai, do ia tanikiu henia, badina idia be ia idia durua kongrigeisen dekenai ia giroa lou totona.—Efe. 4:8, 11, 12.
Nega Dokonai Keriso Ena Laloa Dalana Hahedinaraia
9. Iesu be edena dala ai ena hahediba taudia dekenai lalokau ia hahedinaraia?
9 Luka be Iesu ese ia hahedinaraia lalokauna ia herevalaia namo herea. Iesu ia diba gabeai Roma ena tuari taudia ese Ierusalema do idia hagegea neganai, heau mauri dalana be lasi. Unai dainai Iesu be mai lalokau ida ena hahediba taudia ia sisiba henia: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni.” Dahaka do idia karaia? Iesu ese idia ia hadibaia namonamo, ia gwau: “Unai neganai Iudea dekenai idia noho taudia be ororo dekenai do idia heau lao, bona hanua lalonai idia noho taudia be do idia heau murimuri dekenai, bona gunika dekenai idia noho taudia be hanua dekenai do idia raka vareai lasi. Badina be davana karaia negana be unai. Ia torea guna herevadia hamomokania dinana be unai.” (Luka 21:20-22) Lagani 66 C.E. ai, Roma ena tuari taudia ese Ierusalema idia koua hagegea murinai, kamonai taudia be unai sisiba idia badinaia.
10, 11. Ierusalema amo idia heau mauri Keristani taudia ginigunadia edia sivarai ita stadilaia neganai, edena dala ai unai ese ita do ia durua “hisihisi badana” totona ita hegaegae?
10 Keristani taudia be Ierusalema amo idia heau mauri neganai, Keriso ese idia dekenai ia hahedinaraia lalokauna be ma haida dekenai idia hahedinaraia be namo. Edia aniani bona kohu amo ma haida idia durua be namo. To Iesu be unai idaunegai hanuana sibona ia perovetalaia lasi. Ia gwau: “Hisihisi badana do ia vara, tanobada ia matamaia negana amo ema bona hari, unai bamona hisihisi ta ia vara lasi, eiava gabeai danu do ia vara lasi.” (Mat. 24:17, 18, 21, NW ) “Hisihisi badana” vairanai bona murinai, ita danu be metau gaudia idauidau do ita davaria. Keriso ena laloa dalana ita abia neganai, unai ese ita do ia durua unai metau negana ita haheaukalaia totona.
11 Unai nega lalonai, Iesu ena haheitalai ita tohotohoa be namo, bona sibona eda namo tahua lasi lalokauna ita hahedinaraia. Unai dainai Paulo ia gwau: “Ita ibounai ta ta ese iseda badibadinai ia noho tauna do ita hamoalea, iena namo bona iena goada havaraia totona, bona iena abidadama do ia goada totona. Badina be Keriso ese sibona ena namo ia tahua lasi . . . Dirava, haheauka bona goada ia henia Diravana ese umui emui lalona do ia hatamonaia, Iesu Keriso ena kara umui karaia noho dainai.”—Roma 15:2, 3, 5.
12. Edena bamona lalokau be hari ita hahedinaraia be namo, bona dahaka dainai?
12 Petero, Iesu ese ia lalokau henia tauna ta, ese Keristani taudia ia hagoadaia ‘mai momokani ida tadikaka lalokau henia karana’ idia hahedinaraia bona ‘hereva momokani idia badinaia.’ Namona be ‘mai edia kudouna ibounai ida ta ta idia lalokau henia.’ (1 Pet. 1:22, NW ) Hari inai negai, Keriso ena kara ita hahedinaraia be gau badana. Dirava ena taunimanima ese idia davaria hekwakwanai be idia bada idia lao noho. Hegeregere, tanobada ibounai lalonai ia vara moni ena hekwakwanai ese ia hahedinaraia, inai tanobada gaudia dekenai ita tabekau lasi. (1 Ioane 2:15-17 duahia.) Inai tanobada ena dokona ia mai kahirakahira noho dainai, namona be Iehova kahirakahira ita lao bona kongrigeisen lalonai ta ta ita tura henia namonamo. Paulo ese inai sisiba ia henia: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.” (Roma 12:10) Bona Petero be unai ia gwauraia lou, ia gwau: “Gau badana be ta ta do umui lalokau henia momokani, badina lalokau ese kara dika momo ia koua.”—1 Pet. 4:8, NW.
13-15. Lai gubana ia vara murinai, tadikaka haida be edena dala ai edia lalokau idia hahedinaraia?
13 Tanobada hegegemadai, taunimanima idia diba Iehova ena Witnes taudia be Keriso ena lalokau idia hahedinaraia. Lagani 2005 ai, United States ena saut kahana dekenai lai gubana ese gau momo ia hadikaia, Witnes taudia momo be unai gabu dekenai idia lao heduru totona. Iesu ena haheitalai ese volantia taudia 20,000 mai kahana edia lalona ia veria dainai, idia momo be edia ruma namodia bona moni gaukara idia rakatania bona idia lao edia tadikaka idia durua totona.
14 Tano ta dekenai, davara ena ranu be tano kaukauna kilomita 80 bamona ia koua, bona iena dobu be mita 10 bamona. Davara ia diho neganai, ruma maragidia bona badadia momo ia hadikaia. Tano haida amo volantia tadikaka taihu haida be ruma haginia gaukara idia diba, tulu bona ruma haginia kohudia danu idia abia lao bona idia ura dikadika gaukara ma haida idia karaia. Boga tamona taihu rua be vabu, to edia kohu be edia motuka dekenai idia udaia bona kilomita 3,000 bamona idia heau lao, heduru idia henia totona. Idia ta be unai gabu dekenai ia do noho, bona unuseniai heduru ia do henia noho komiti ia durua noho bona regula painia gaukara ia karaia.
15 Unai gabu dekenai Witnes taudia edia ruma 5,600 mai kahana idia haginia lou o idia hanamoa vadaeni. Unai lalokau karana dainai, unai gabu dekenai idia noho Witnes taudia be dahaka idia laloa? Taihu ta be iena ruma ia dika dainai, motuka ese ia veria loaloa rumana ta ai ia noho. To unai ruma ena guhi ai be matu momo idia noho bona ena stouv ia dika danu. Tadikaka ese ena ruma namona ta idia haginia. Unai taihu be iena ruma vairanai ia gini bona Iehova bona ena tadikaka ia tanikiu henidia. Edia ruma idia dika Witnes taudia ma haida be ruma ma ta dekenai idia lao, unuseniai lagani ta idia noho eiava idia noho ela bona edia ruma be volantia taudia ese idia haginia. Dahaka dainai edia ruma dekenai idia giroa lou haraga lasi? Badina volantia taudia be edia ruma dekenai idia noho diba edia gaukara idia karaia totona. Keriso ena laloa dalana idia hahedinaraia unai!
Gorere Taudia Dekenai Keriso Ena Laloa Dalana Hahedinaraia
16, 17. Edena dala ai Keriso ena laloa dalana be gorere taudia dekenai ita hahedinaraia diba?
16 To ita haida be unai bamona dika badadia ita davaria lasi. To ibounai—ita sibona o iseda ruma bese tauna ta—be gorere do ita davaria. Iesu be gorere taudia ita kara henia dalana dekenai haheitalai namona ia hahedinaraia. Idia ia lalokau henia dainai, ia hebogahisi henidia. Hutuma be gorere taudia idia abia lao neganai, ia ese “gorere taudia idauidau ibounai ia hanamoa.”—Mat. 8:16; 14:14.
17 Hari inai negai, Keristani taudia be Iesu ese ia karaia hoa karadia idia karaia diba lasi, to gorere taudia dekenai Iesu ena hebogahisi karana idia hahedinaraia diba. Edena dala ai unai idia hahedinaraia? Elda taudia ese Keriso ena laloa dalana idia hahedinaraia dalana ta be inai: Palani idia karaia o idia gunalaia kongrigeisen ai gorere taudia idia durudia totona, unai be Mataio 25:39, 40 ena hereva hegeregerena.a (Duahia.)
18. Edena dala ai taihu rua be ma haida dekenai edia lalokau idia hahedinaraia, bona dahaka ia vara?
18 Oibe, elda taudia sibona lasi, to ita ibounai ese kara namodia ita hahedinaraia be namo. Mani inai sivarai oi laloa: Charlene, ena mauri lagani be 44, be kensa gorere ia abia bona doketa idia gwau ia be dina 10 sibona do ia mauri. Ena adavana be ia hekwarahi bada Charlene ia naria totona. Taihu rua, Sharon bona Nicolette be unai hekwakwanai idia itaia dainai, edia goada bona nega idia henia Charlene idia naria totona. Ena be Charlene be ia do mauri noho ela bona wiki toi, to unai taihu rua be mai edia lalokau ida taihu idia naria ela bona ia mase. Sharon ia gwau: “Ia be auka bema oi diba ta be ena gorere amo do ia namo lou lasi. To, Iehova ese ai dekenai goada ia henia. Unai ese ai ia durua Iehova bona ta ta kahirakahira ai lao totona.” Charlene ena adavana ia gwau: “Unai taihu rua edia hebogahisi karadia bona heduru do lau laloaboio diba lasi. Edia kara namona dainai egu lalokau adavana Charlene ia durua ena hahetoho ginigabena ia hanaia, bona lau idia durua dainai egu tauanina bona mamina ia namo. Idia dekenai do lau moale. Sibona edia ura gaudia idia dadaraia dainai, unai ese lau ia hagoadaia Iehova dekenai lau tabekau bona iseda tadikaka taihu lau lalokau henia totona.”
19, 20. (a) Inai stadi toi lalonai dahaka ita herevalaia? (b) Emu lalona oi hadaia dahaka oi karaia totona?
19 Inai stadi toi lalonai, ita be Iesu ena laloa daladia faiv ita herevalaia, bona ena laloa dalana bona kara ita hahedinaraia diba dalana ita herevalaia danu. Namona be Iesu bamona, “manau bona lalomanada” ita hahedinaraia. (Mat. 11:29, NW ) Namona be ma haida dekenai hebogahisi ita hahedinaraia danu, ena be edia kerere eiava manoka gaudia ita itaia. Herevana dagedage ita davaria, to mai gari lasi ida Iehova ena taravatu ibounai ita badinaia be namo.
20 Namona be iseda tadikaka taihu ibounai dekenai Keriso ese ia hahedinaraia lalokauna ita hahedinaraia, Keriso be ena tadikaka ia lalokau henidia ela bona dokona hegeregerena. Lalokau ita hahedinaraia neganai, ia hahedinaraia ita be Iesu ena hahediba taudia. (Ioa. 13:1, 34, 35) Oibe, “nega ibounai emui Keristani varavara taudia do umui lalokau henidia.” (Heb. 13:1) Oi gari lasi! Emu mauri oi gaukaralaia Iehova oi hanamoa bona ma haida oi durua totona! Iehova be emu hekwarahi do ia hanamoa.
[Footnote]
a Kahana ta ladana “Do More Than Say: ‘Keep Warm and Well Fed’ ” October 15, 1986, Watchtower itaia.
Anina Oi Gwauraia Diba, A?
• Edena dala ai elda taudia be kerere taudia dekenai Keriso ena laloa dalana idia hahedinaraia diba?
• Dahaka dainai hari inai nega dokona lalonai Keriso ena lalokau ita tohotohoa be mai anina bada?
• Edena dala ai gorere taudia dekenai Keriso ena laloa dalana ita hahedinaraia diba?
[Picture on page 17]
Elda taudia idia ura kerere taudia be Iehova dekenai idia giroa lou
[Picture on page 18]
Edena dala ai Ierusalema ai idia noho Keristani taudia be Keriso ena laloa dalana idia hahedinaraia?
[Picture on page 19]
Taunimanima idia diba Iehova ena Witnes taudia be Keriso ena lalokau idia hahedinaraia