Keriso Murinai Oi Raka Noho, A?
“Umui ai hadibaia vadaeni edena bamona do umui raka, . . . Umui ai noia bona hagoadaia, unai kara do umui habadaia noho.”—1 TES. 4:1, NW.
1, 2. (a) Iesu ena nega ai idia noho taudia momo be dahaka hoa karadia idia itaia? (b) Dahaka dainai ita noho negana be mai anina bada?
REANA oi be nega ta oi laloa: “Iesu be tanobada ai ia noho neganai, bema lau noho be namo.” Reana, badina haida dainai, unai bamona oi hereva. Reana, oi laloa nega daudau lalonai oi abia gorerena amo Iesu ese oi ia hanamoa diba. Eiava oi ura Iesu oi itaia bona ena hereva namodia oi kamonai bona ia amo gau momo oi dibaia, bona ia karaia hoa karadia oi itaia danu. (Mar. 4:1, 2; Luka 5:3-9; 9:11) Unai be hahenamo badana, bema Iesu ese ia karaia hoa karadia idauidau oi itaia diba! (Luka 19:37) To, unai nega amo ema bona hari, Iesu ese ia karaia gaudia be uru ma ta ese ia itaia lasi, bona “ia sibona ena mauri, be boubou gauna Dirava dekenai ia henia” be nega ma ta do ia karaia lou lasi.—Heb. 9:26; Ioa. 14:19.
2 To, hari danu ita be mai anina bada negana ai ita noho. Edena dala ai? Ita be Baibel ese ia perovetalaia “dokona negana” ai ita noho. (Dan. 12:1-4, 9; 2 Tim. 3:1) Inai nega lalonai, Satani be guba amo idia negea diho. Kahirakahira, ia be auri seini amo do idia guia bona “guri dobu masemase” lalonai do idia negea diho. (Apok. 12:7-9, 12; 20:1-3) Hari inai negai danu, ita be hahenamo badana ta ita abia, badina tanobada hegegemadai Basileia ena sivarai namona ita harorolaia bona taunimanima ita hadibaia nega vaira ai Paradaiso do ia mai. Unai gaukara be nega gabeai do ita karaia lou lasi.—Mat. 24:14.
3. Iesu ese ena hahediba taudia dekenai dahaka oda herevana ia gwauraia?
3 Iesu be kahirakahira guba dekenai do ia daekau neganai, iena hahediba taudia ia hamaorodia: “Lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:8) Unai gaukara be tanobada hegegemadai ita karaia hahediba gaukarana. Iseda tahua gauna be dahaka? Ita ura dokona ia do mai lasi neganai, taunimanima ma haida be Keriso ena hahediba taudia ai ita halaodia. (Mat. 28:19, 20) Vadaeni, Iesu ena oda herevana ita hagugurua totona, dahaka ita karaia be namo?
4. (a) Petero Iharuana 3:11, 12 ese ita ia hagoadaia dahaka ita karaia totona? (b) Dahaka gaudia dainai do ita naria namonamo?
4 Mani Petero ena hereva ita itaia: “Vadaeni, umui laloa: Bema inai gau ibounai unai bamona do idia boio ore, umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, bona do ia ginidae haraga totona do umui gaukara goada noho.” (2 Pet. 3:11, 12) Petero ia hahedinaraia ita be nega dokona ai ita noho dainai, namona be iseda mauri lalonai Dirava badinaia karadia ita karaia be gau badana. Unai ita karaia dalana ta be sivarai namona ita harorolaia. Ita moale bada, badina ita itaia, iseda tadikaka tanobada hegegemadai be mai goada ida Keriso ese ia henia haroro gaukarana idia karaia noho! To danu ita naria namonamo, badina ita diba dina ta ta ai Satani ena tanobada amo idia mai hahetoho bona tauanina ena ura idauidau ese iseda hesiai gaukara idia hadikaia diba. Unai dainai, hari do ita tahua edena dala ai Keriso ena murinai ita raka noho diba.
Mai Moale ida Dirava Ena Hesiai Gaukara Ita Karaia
5, 6. (a) Paulo ese Ierusalema tadikaka dekenai dahaka hanamoa herevana ia gwauraia, bona dahaka sisiba ia henia danu? (b) Dahaka dainai iseda Keristani maduna ita laloa bada be namo?
5 Paulo be Ierusalema ai idia noho tadikaka ia tore henidia neganai, ia hanamodia badina dagedage negana ai idia haheauka. Ia gwau: “Nega gunana do umui laloa lou be namo. Dirava ena diari umui davaria murinai, hisihisi momo umui abia, to umui gini goada.” Oibe, Iehova ese edia abidadama karana ia laloatao. (Heb. 6:10; 10:32-34) Paulo ena hanamoa herevadia ese unai Heberu Keristani taudia ia hagoadaia bada. To, unai revareva tamona lalonai, Paulo ese taunimanima edia kara ta ia herevalaia, bona ia gwau bema idia naria namonamo lasi unai kara dainai, Dirava ena hesiai gaukara karaia goadagoada karana idia rakatania diba. Ia gwau Keristani taudia do idia naria namonamo, Dirava ena taravatu badinaia karana idia “negea” garina.—Heb. 12:25.
6 Dirava ena hesiai gaukara do ita “negea” garina ena sisiba be hari inai negai idia noho Keristani taudia totona danu. Namona be iseda Keristani maduna idauidau ita laloa bada bona Dirava ena hesiai gaukara ita karaia goadagoada karana ita “negea” lasi. (Heb. 10:39) Oibe, bema Dirava ena hesiai gaukara ita karaia, mauri do ita abia; to bema ita “negea,” iseda mauri ita haboioa diba.—1 Tim. 4:16.
7, 8. (a) Dahaka ese ita do ia durua mai goada ida Dirava ena hesiai gaukara ita karaia noho totona? (b) Bema Dirava hesiai henia urana be ia boio ia lao, dahaka ita laloatao be namo?
7 Dahaka ese ita do ia durua iseda hesiai gaukara ita “negea” lasi totona? Dala namona ta be nega iboudiai iseda gwauhamata ena anina do ita laloa dobu. Mai anina bada gauna be inai: Ita be gwauhamata ita karaia vadaeni eda mauri lalonai Iehova ena ura do ita karaia guna, bona ita ura unai gwauhamata ita hamomokania. (Mataio 16:24 duahia.) Unai dainai, sibona do ita nanadaia: ‘Lau bapatiso dinana amo ema bona hari, Dirava hesiai henia urana be ia do goada noho, a? Eiava ia boio ia lao vadaeni?’
8 Bema ita davaria Dirava hesiai henia urana be ia boio, namona be peroveta tauna Sepanaia ena hagoadaia herevana ita laloa. Ia gwau: “Emui imadia do umui ha-aukaia, do umui manoka lasi. Lohiabada, emui Dirava be umui dekenai ia noho, bona iena siahu ese kwalimu umui dekenai ia henia noho. Lohiabada ese umui do ia moalelaia bada, bona iena lalokau dekena amo, mauri matamata umui dekenai do ia henia.” (Sep. 3:16, 17) Guna Israela taudia be Babulonia ena igui amo idia ruhaia bona Ierusalema dekenai idia giroa lou neganai, unai hereva ese idia ia hagoadaia bada. To, unai hereva ese inai negai idia noho Dirava ena taunimanima ia hagoadaia danu. Namona be ita laloatao, ita be Iehova ena gaukara ita karaia dainai, Ia bona Iesu be ita dekenai goada do idia henia, eda Keristani maduna idauidau ita huaia totona. (Mat. 28:20; Fili. 4:13) Bema mai iseda goada ibounai ida Dirava ena hesiai gaukara ita karaia noho, ia ese ita do ia hanamoa bona ita do ia durua eda abidadama dekenai ita gini goada totona.
Mai Goada ida Basileia Tahua Guna
9, 10. Iesu ese ia gwauraia aria badana ena haheitalai anina be dahaka? Bona unai haheitalai amo dahaka ita dibaia?
9 Iesu be Farisea lohia tauna ta ena ruma ai ia aniani lalonai, aria badana ena haheitalai ta ia gwauraia. Unai haheitalai ese taunimanima idauidau be guba Basileia lalonai idia vareai diba dalana ia hahedinaraia. Bona ia ese unai hereva “negea” ena anina ia hahedinaraia danu. (Luka 14:16-21 duahia.) Unai haheitalai ese aria dekenai idia lao lasi taudia edia ekskius herevadia ia hahedinaraia. Ta ia gwau ia hoia vadaeni tanona ia itaia namonamo totona, aria dekenai do ia lao lasi. Ta ia gwau boromakau haida ia hoia vadaeni bona ia itaia namonamo totona, aria dekenai do ia lao lasi. Ma ta danu ia gwau: ‘Do lau mai lasi, badina hari sibona lau headava.’ Unai bamona ekskius herevadia be namo lasi. Ta be tano eiava animal ta ia do hoia lasi neganai, ita diba ia sekea namonamo guna, unai dainai ia hoia murinai ia sekea lou be anina lasi. Bona ena be ta be vanegai sibona ia headava, to dahaka dainai unai ese mai anina bada ariana ia lao henia dalana ia koua? Edia ekskius herevadia dainai aria ena biaguna be ia badu dikadika!
10 Dirava ena taunimanima ibounai be Iesu ena haheitalai amo gau ta idia dibaia diba. Unai be dahaka? Namo lasi, ita be Iesu ena haheitalai lalonai ia gwauraia tauanina ena ura gaudia ita atoa guna, badina unai bamona ita karaia neganai, Dirava hesiai henia urana be metairametaira ia boio diba. (Luka 8:14 duahia.) Unai ia vara lasi totona, namona be Iesu ena sisiba ita badinaia: “Dirava ena Basileia bona iena kara maoromaoro do umui tahua guna.” (Mat. 6:33) Dirava ena hesiai taudia—buruka bona matamata danu—be unai sisiba idia badinaia noho bona edia haheitalai ese ita ia durua bada! Oibe, momo be kohu momo mauri dalana idia rakatania, unai amo edia nega bada idia gaukaralaia haroro gaukara idia karaia totona. Idia be ‘Basileia idia tahua guna’ dainai, moale korikorina idia davaria.
11. Edena Baibel sivarai ese ia hahedinaraia mai iseda kudouna ibounai ida Dirava ena hesiai gaukara ita karaia be mai anina bada?
11 Dirava ena hesiai gaukara ita karaia goadagoada be mai anina bada. Unai ita lalopararalaia totona, mani King Iehoasa ena mauri lalonai ia vara gauna ta ita itaia. Iehoasa ia laloa Suria taudia ese Israela taudia do idia hadikaia ore dainai, mai taitai ida peroveta tauna Elisaia dekenai ia lao. Elisaia ese ia hamaoroa, Suria ia vaira henia uindo amo diba ta do ia pidia lao, unai ese do ia hahedinaraia Iehova ese idia do ia durua Suria idia halusia totona. Ena be king ese unai ia karaia, to ia be Iehova dekenai ia tabekau momokani lasi. Ma Elisaia ese Iehoasa ia hamaoroa iena diba do ia abia bona tano do ia pidia. To, Iehoasa be nega toi sibona tano ia pidia. Elisaia ia badu, badina bema nega 5 o 6 ia karaia, ‘Suria taudia do idia halusia momokani.’ To, Iehoasa be nega toi sibona Suria taudia ia halusidia, badina ia be mai ena lalona ibounai ida diba momo amo tano ia pidia lasi. (2 Kin. 13:14-19) Unai sivarai amo dahaka ita dibaia? Iehova ese ita do ia hanamoa bema iena ura be mai iseda kudouna ibounai ida ita karaia goadagoada.
12. (a) Hekwakwanai negadiai dahaka ese ita do ia durua Dirava ita hesiai henia totona? (b) Haroro gaukara oi karaia goadagoada dainai, oi abia hahenamo haida mani oi herevalaia.
12 Mauri ena hekwakwanai idauidau ese eda Dirava hesiai henia goadagoada urana idia hadikaia diba. Tadikaka bona taihu momo be moni ena hekwakwanai idia davaria. Haida idia lalohisihisi badina idia gorere bada dainai, Iehova idia hesiai henia namonamo diba lasi. To, ita ta ta ese gau haida ita karaia diba, unai amo Dirava ena hesiai gaukara ita karaia goadagoada bona Keriso murinai do ita raka noho diba. Mani “Keriso Murinai Oi Raka Noho Dalana” ena maua ai idia noho hereva bona siri haida oi itaia. Unai point idauidau oi badinaia diba daladia oi laloa be namo. Unai oi karaia neganai, hahenamo momo do oi davaria. Haroro gaukara ita karaia hanaihanai neganai, iseda mauri ita moalelaia bona maino ita davaria. (1 Kor. 15:58) Bona danu, mai iseda kudouna ibounai ida Dirava ita hesiai henia karana ese ita ia durua “Dirava ena Dina do [ita] naria noho” totona.—2 Pet. 3:12.
Sibona Emu Mauri Dalana Oi Laloa Namonamo
13. Edena bamona do ita diba ita be mai iseda kudouna bona goada ibounai ida Dirava ita hesiai henia o lasi?
13 Namona be ita laloatao: Ena be hora momo lalonai haroro gaukara ita karaia, to unai ese ia hamomokania lasi ita be mai iseda kudouna bona goada ibounai ida Dirava ita hesiai henia. Ita ta ta eda mauri dalana be idauidau. Bema tadikaka ta be iena gorere dainai, hua ta ta lalonai hora tamona o rua sibona ia haroro, Iehova ese unai ia moalelaia bada. (Mareko 12:41-44 hahegeregerea.) Unai dainai, bema ita ura diba ita be mai iseda kudouna bona goada ibounai ida Dirava ita hesiai henia o lasi, namona be sibona eda goada bona mauri dalana do ita laloa namonamo. Ita be Keriso ena murinai ita raka taudia dainai, iseda lalohadai be Iesu ena lalohadai ida ia hegeregere be namo. (1 Korinto 2:16 duahia.) Iesu ena mauri lalonai dahaka ia atoa guna? Kaperanauma dekenai ia haroro henia taudia ia hamaoroa: “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.” (Luka 4:43; Ioa. 18:37) Iesu be mai goada ida ena haroro gaukara ia karaia oi laloa, bona oi sibona emu mauri dalana oi laloa murinai—oi hegeregere emu haroro gaukara oi habadaia totona, a?—1 Kor. 11:1.
14. Edena dala ai iseda haroro gaukara ita habadaia diba?
14 Iseda mauri dalana ita tahua namonamo murinai, reana do ita davaria ita hegeregere iseda haroro gaukara horadia ita habadaia totona. (Mat. 9:37, 38) Hegeregere, vanegai sibona sikuli idia haorea matamata taudia tausen momo be edia haroro gaukara idia habadaia bona painia gaukara idia moalelaia noho. Oi ura unai bamona moale oi davaria danu, a? Tadikaka bona taihu haida be edia mauri dalana idia laloa namonamo murinai, abia hidi idia karaia haroro taudia be momo lasi gabuna ta eiava tano ma ta dekenai idia lao totona. Ma haida be gado idauna ta idia dibaia unai amo tano ma ta amo idia mai taudia idia haroro henidia diba. Ena be ita hekwarahi bada iseda haroro gaukara ita habadaia totona, to hahenamo momo do ita davaria, badina taunimanima momo ita durua diba “hereva momokani do idia diba” totona.—1 Tim. 2:3, 4; 2 Kor. 9:6.
Baibel ese Ia Sivarailaia Taudia Edia Haheitalai Tohotohoa
15, 16. Daidia edia haheitalai namona ita tohotohoa diba?
15 Iesu be ena aposetolo taudia ia boiridia neganai, edena bamona idia haere? Mataio be inai bamona ia karaia: “Vadaeni iena gau ibounai ia rakatania, ia toreisi, Iesu ena murinai ia raka.” (Luka 5:27, 28) Petero bona Andrea be idia haoda noho, to Baibel ia gwau: “Nega tamona idia ese edia reke idia rakatania, iena murinai idia raka.” Gabeai Iesu be Iamesi bona Ioane ia itaia, idia be edia tamana ida reke idia hanamoa noho, to Iesu ese ia boiridia neganai, dahaka idia karaia? “Nega tamona idia ese vanagi bona edia tamana idia rakatania, iena murina dekenai idia raka.”—Mat. 4:18-22.
16 Haheitalai namona ta be Saulo, gabeai ia be aposetolo Paulo ai ia lao. Ena be ia ese Keriso ena murinai idia raka taudia ia dagedage henidia, to ena kara ia haidaua bona Iesu ese ia “abia hidi” iena ladana ia harorolaia totona. “Nega tamona, dubu lalonai ia ese Iesu ia harorolaia, ia gwau Iesu be Dirava ena Natuna.” (Kara 9:3-22) Bona ena be nega dikadia bona dagedage bada ia davaria, to Paulo be ena hesiai gaukara ia karaia goadagoada.—2 Kor. 11:23-29; 12:15.
17. (a) Oi ura Keriso ena murinai oi raka, a? (b) Mai iseda kudouna bona goada ibounai ida Iehova ena ura ita karaia neganai, dahaka hahenamo ita abia?
17 Ita ura unai haheitalai namodia ita tohotohoa bona Iesu ia boiboi neganai, mai iseda ura bada ida ia murinai do ita raka. (Heb. 6:11, 12) Keriso ita badinaia noho karana amo dahaka hahenamo do ita davaria? Oibe, Dirava ena ura ita karaia bona kongrigeisen lalonai maduna ma haida ita abia dae dainai, moale korikorina ita davaria. (Sal. 40:8; 1 Tesalonika 4:1 duahia.) Momokani, Keriso murinai ita raka totona ita gaukara goadagoada neganai, lalomaino, moale bona Dirava ena lalonamo ita abia, bona vaira negana ai mauri hanaihanai do ita abia.—1 Tim. 4:10.
Oi Laloatao, A?
• Iesu ese ita dekenai dahaka mai anina bada gaukarana ia henia bona unai gaukara be edena bamona do ita laloa?
• Edena kara ta dainai do ita naria namonamo?
• Edena dala ai ita sibona eda mauri dalana ita laloa namonamo?
• Dahaka ese ita do ia durua Keriso murinai ita raka noho totona?
[Box/Picture on page 27]
Keriso Murinai Oi Raka Noho Dalana
▪ Dina ta ta ai Dirava ena Hereva oi duahia bona laloa dobu.—Sal. 1:1-3; 1 Tim. 4:15.
▪ Dirava ena lauma helaga bona hakaua totona oi guriguri hanaihanai.—Sek. 4:6; Luka 11:9, 13.
▪ Haroro gaukara ai idia gaukara goadagoada taudia oi bamoa.—Aon. 13:20; Heb. 10:24, 25.
▪ Namona be ita laloatao ita be nega dokona ai ita noho.—Efe. 5:15, 16.
▪ Dirava ena hesiai gaukara “negea” karana dainai idia vara diba dika gaudia oi laloa.—Luka 9:59-62.
▪ Hanaihanai emu gwauhamata do oi laloa bona mai emu ura ida Iehova oi hesiai henia, bona Keriso ena murinai oi raka noho karana edia hahenamo oi laloa dobu.—Sal. 116:12-14; 133:3; Aon. 10:22.