Tadikaka E—Lauma Helaga Badinaia Bona Maduna Ma Haida Huaia!
“Dirava ena lauma hegeregerena ia hadoa tauna be Dirava ena lauma amo, mauri hanaihanai do ia abia.”—GAL. 6:8, NW.
1, 2. Edena dala ai Mataio 9:37, 38 ena hereva ia guguru noho? Bona kongrigeisen ai daidia ese maduna idia huaia be namo?
HARI umui be tanobada ai idia vara mai anina bada gaudia umui itaia noho! Iesu Keriso ese ia perovetalaia gaukarana be hari tanobada hegegemadai idia karaia noho. Iesu ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mat. 9:37, 38) Iehova Dirava be dala badana ai unai bamona guriguri ia haerelaia. Lagani 2009 ena hesiai laganina ai, Iehova ena Witnes taudia edia kongrigeisen matamatadia 2,031 idia hamatamaia, unai amo tanobada hegegemadai kongrigeisen ibounai edia namba be 105,298 ia abia. Anina be dina ta ta taunimanima 757 be bapatiso idia abia!
2 Iseda orea be ia bada ia lao haraga dainai, ita ura bada gauna be tadikaka goadadia ese kongrigeisen lalonai hahediba bona mamoe naria gaukarana do idia karaia. (Efe. 4:11) Lagani momo idia hanaia vadaeni, Iehova ese tadikaka goadadia ia abia hidi iena mamoe naria gaukarana idia karaia totona, bona ita diba hari unai bamona do ia karaia danu. Mika 5:5 ai ia noho peroveta herevana be ita ia hagoadaia badina ia gwau dina gabediai, Iehova ena taunimanima be mai edia “mamoe naria taudia 7” bona “taunimanima gunalaia taudia 8.” Unai ese gaukara do idia gunalaia tadikaka goadadia momo ia laulaulaia.
3. ‘Dirava ena lauma hegeregerena do oi hadoa’ ena anina be dahaka?
3 Bema oi be oi bapatiso vadaeni Iehova ena Witnes tauna ta, dahaka ese oi ia durua diba hesiai gaukara ena maduna idauidau do oi huaia totona? Oi do ia durua bada gauna ta be inai: ‘Dirava ena lauma hegeregerena do oi hadoa.’ (Gal. 6:8, NW ) Unai hereva ena anina be emu mauri dalana ibounai lalonai Dirava ena lauma helaga ese oi ia hakaua be namo. Namona be emu lalona oi hadaia, ‘tauanina ena ura dikadia hegeregerena do oi hadoa’ lasi. Namo lasi oi hesiku, oi ura oi laga-ani sibona bona moale karadia oi ura henia bada dainai, Dirava hesiai henia urana oi laloa bada lasi. Namona be Keristani taudia ibounai ese ‘Dirava ena lauma hegeregerena do idia hadoa,’ unai amo tadikaka be do idia hegeregere kongrigeisen ai maduna idia huaia totona. Hari inai negai, ita ura kongrigeisen lalonai hesiai taudia bona elda taudia momo idia noho be namo. Unai dainai, Keristani tadikaka e, inai stadi herevana be mai anina bada umui totona. Umui ai hagoadaia inai stadi herevana umui laloa dobu bona gurigurilaia totona.
Oi Hekwarahi Maduna Namona Oi Abia Totona
4, 5. Idia bapatiso vadaeni tadikaka be kongrigeisen lalonai dahaka maduna idia abia diba, bona edena dala ai unai do idia karaia?
4 Keristani tadikaka ta be maduna ta do ia abia kava lasi. Gau badana be do ia hekwarahi unai “dagi namona” ia abia totona. (1 Tim. 3:1) Oi hekwarahi ena anina be mai ura ida emu tadikaka taihu edia dabu gaudia dekenai heduru do oi henia. (Isaia 32:1, 2 duahia.) Unai bamona ia karaia tauna be sibona ena ladana ia abia isi lasi. To, ia ura bada ma haida ia durua.
5 Bema tadikaka ta ia ura hesiai tauna bona elda ena maduna ia abia, namona be ia hekwarahi Baibel lalonai idia noho taravatu ia badinaia totona. (1 Tim. 3:1-10, 12, 13; Tito 1:5-9) Bema oi be bapatiso tadikaka ta, namona be sibona oi nanadaia: ‘Lau be haroro gaukara lau karaia goadagoada, bona ma haida lau durua unai bamona idia karaia totona, a? Lau be egu tadikaka bona taihu edia namo lau laloa bada dainai, idia lau hagoadaia bona durua, a? Momo idia diba lau be Baibel lau stadilaia namonamo tauna, a? Hebou dekenai egu haere karana lau hanamoa noho, a? Elda taudia ese lau dekenai idia henia gaukara be mai moale ida lau karaia namonamo, a?’ (2 Tim. 4:5) Unai henanadai oi lalodia namonamo be namo.
6. Kongrigeisen lalonai oi hegeregere maduna oi abia diba dalana ma ta be dahaka?
6 Kongrigeisen ai maduna oi abia diba dalana ma ta be inai: Dirava ena ‘Lauma Helaga ena siahu do oi abia bona emu lalona bona kudouna do ia hagoadaia.’ (Efe. 3:16) Keristani kongrigeisen lalonai hesiai tauna o elda tauna ai oi lao neganai, namo lasi oi laloa tadikaka ese oi idia voutia unai dagi oi abia totona. Lasi, to unai maduna oi abia badina emu hetura karana Dirava ida be ia goada. Vadaeni, edena dala ai emu hetura karana Dirava ida ia goada diba? Dala ta be ‘lauma helaga ena dala hegeregerena oi raka noho’ bona ena huahua oi havaraia be namo. (Gal. 5:16, 22, 23, NW ) Kongrigeisen lalonai oi hegeregere maduna oi huaia totona, namona be lauma helaga ena huahua oi hahedinaraia bona elda taudia edia sisiba oi badinaia. Unai amo, “taunimanima ibounai ese oiemu goada do idia itaia, ia bada ia lao noho.”—1 Tim. 4:15.
Sibona Emu Ura Do Oi Dadaraia
7. Ma haida oi hesiai henia totona, edena kara be mai anina bada?
7 Ma haida hesiai henia gaukarana be maduna metauna, bona ita abia dae totona sibona iseda ura ita dadaraia karana do ita hahedinaraia be namo. Laulau dalanai, Keristani elda taudia be mamoe naria taudia dainai, mamoe oreana ena namo idia laloa bada. Aposetolo Paulo be mai ena lalona ibounai ida mamoe oreana naria gaukarana ia laloa bada. Korinto tadikaka ia hamaoroa, ia gwau: “Umui dekenai unai revareva lau torea neganai, egu lalona ia hisihisi bona metau danu. Mai tai danu unai revareva lau torea, hisihisi do umui abia totona lasi, to lauegu lalokau badana umui dekenai do umui diba totona.” (2 Kor. 2:4) Oibe, ia hedinarai goevagoeva, Paulo be mai ena goada bona lalona ibounai ida ena maduna ia huaia.
8, 9. Baibel lalonai hesiai taudia haida be edena dala ai sibona edia ura idia dadaraia?
8 Idaunega amo ema bona hari, Iehova ena taunimanima huanai hesiai gaukara idia karaia tatau be sibona edia ura dadaraia karana idia hahedinaraia. Hegeregere, Noa be iena ruma bese dekenai ia gwau lasi: ‘Lagatoi haginia gaukarana umui haorea murinai, lau umui hadibaia bena do lau mai.’ Aigupito ai Mose be Israela taudia dekenai ia gwau lasi: ‘Davara Kakakakana ai umui do lau naria. Umui sibona dala umui tahua bona umui mai.’ Iosua be ia gwau lasi: ‘Ieriko hanua ena magu ia moru murinai, lau umui hadibaia.’ Bona Isaia be ma tau ta ia poinia bona ia gwau lasi: ‘Unai tauna do oi siaia!’ Ita diba idia ta be unai bamona hereva ta ia gwauraia lasi.—Isa. 6:8.
9 Dirava ena lauma helaga ena hakaua dalana ia abia dae tauna namona be Iesu Keriso. Ia be mai ena ura ida taunimanima hamauria tauna ai ia lao. (Ioa. 3:16) Iesu be sibona ena ura ia dadaraia haheitalaina ese ita ia hagoadaia unai bamona ita karaia totona, ani? Lagani momo lalonai elda gaukara ia karaia tadikaka ta be kongrigeisen taudia ia herevalaia neganai, ia gwau: “Iesu ena hereva Petero dekenai—lauegu mamoe oi naria—ese lau ia durua bada. Lagani momo lalonai unai gaukara lau karaia dainai, lau laloparara hanamoa herevana ta o hebogahisi karana ta ese tadikaka taihu ia hagoadaia diba. Lau be mamoe vadivadi henia gaukarana lau ura henia bada.”—Ioa. 21:16.
10. Dahaka ese Keristani tadikaka ia durua diba Iesu ena haheitalai idia tohotohoa totona?
10 Kongrigeisen lalonai Dirava ena mamoe oreana idia naria taudia ese Iesu ena lalohadai idia abia be namo, ia gwau: “Lau ese laga-ani do lau henia umui dekenai.” (Mat. 11:28) Dirava idia abidadama henia bona kongrigeisen taudia idia lalokau henia dainai, idia ura unai gaukara namona idia karaia. Idia laloa lasi unai be gaukara aukana, eiava edia nega bada bona goada do idia haorea kava. To edena bamona, bema tadikaka ta ia ura lasi unai hesiai maduna ta ia abia? Edena dala ai ena ura ia habadaia diba?
Ma Haida Hesiai Henia Urana Habadaia
11. Edena dala ai tadikaka ta be ma haida hesiai henia urana ia abia diba?
11 Bema oi laloa oi hegeregere lasi maduna ta oi abia totona, namona be lauma helaga ena heduru totona oi guriguri. (Luka 11:13) Iehova ena lauma helaga ese oi do ia durua unai bamona lalohadai oi dadaraia totona. Ma haida hesiai henia urana be Dirava ese ia havaraia, badina Iehova ena lauma helaga ese tadikaka dekenai goada ia henia unai hesiai gaukara idia karaia totona. (Fili. 2:13; 4:13) Unai dainai, namona be Iehova oi noia ma haida hesiai henia urana be emu lalona dekenai ia havaraia totona.—Salamo 25:4, 5 duahia.
12. Edena dala ai tadikaka ta be aonega ia abia diba, ia abia maduna ia huaia totona?
12 Reana tadikaka ta ia itaia mamoe durua maduna be mai ena hekwarahi bona metau dainai, ia ura lasi unai maduna ia huaia. Eiava, ia laloa iena diba be hegeregere lasi unai maduna ia huaia totona. Bema ia be unai bamona ia laloa, namona be Dirava ena Hereva bona Baibel bukadia ma haida do ia stadilaia goadagoada, unai amo aonega ia abia diba. Sibona do ia nanadaia, ‘Nega lau atoa Dirava ena Hereva lau stadilaia bona aonega abia totona lau guriguri, a?’ Hahediba tauna Iamesi ia gwau: “Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi.” (Iam. 1:5) Unai hereva oi abia dae, a? Dirava ese Solomona ena guriguri ia haerelaia bona “aonega bona diba bada” ia henia, unai amo hahemaoro ia karaia neganai, kerere bona maoro edia toana ia diba. (1 Kin. 3:7-14) Momokani, Solomona ena sivarai be idau herea. To, ita diba momokani Dirava ese kongrigeisen lalonai maduna idia huaia tadikaka dekenai aonega do ia henia, unai amo iena mamoe oreana do idia naria namonamo.—Aon. 2:6.
13, 14. (a) “Keriso ena lalokau” ese Paulo ena kara ibounai ia biagua dalana mani oi gwauraia. (b) Edena dala ai “Keriso ena lalokau” ese iseda kara ia biagua be namo?
13 Ma haida hesiai henia urana ita abia totona, namona be Iehova bona iena Natuna ese ita totona idia karaia gaudia ibounai do ita laloa dobu. Hegeregere, mani 2 Korinto 5:14, 15 (duahia) ena hereva ita laloa. Edena dala ai ‘Keriso ena lalokau ese ita ia biagua noho’? Dirava ena ura hegeregerena, Keriso be ita ia lalokau henia bada dainai, sibona ena mauri ia henia karana ita lalopararalaia neganai, unai ese ita ia hagoadaia bada. Keriso ena lalokau ese Paulo ena kara ibounai ia biagua. Unai lalokau dainai, Paulo be sibona ena ura ia dadaraia, bona mai ena ura bada ida Dirava ia hesiai henia bona kongrigeisen tadikaka taihu bona murimuri taudia ia durua.
14 Keriso ese taunimanima ia lalokau henia karana ita laloa dobu neganai, ita ura ia dekenai eda tanikiu karana ita hahedinaraia. Ita laloparara ‘tauanina ena ura ita hadoa’ bona sibona iseda ura gaudia ita tahua guna be namo lasi. To, iseda mauri ita haidaua bona Dirava ena hesiai gaukara ita karaia guna. Lalokau dainai ita ura iseda tadikaka ta ta ita durua. (Galatia 5:13 duahia.) Bema ita manau bona Iehova ena taunimanima ita hesiai henidia, mai hemataurai ida idia do ita kara henia. Oibe, ita ura lasi Satani ena samania koikoi karadia ita tohotohoa.—Apok. 12:10.
Ruma Bese Do Idia Gaukara Hebou
15, 16. Bema tadikaka ta ia ura hesiai tauna o elda maduna ia abia, iena ruma bese taudia be edena bamona ia idia durua diba?
15 Bema tadikaka ta be headava tauna bona mai ena natudia, elda oreana ese iena ruma bese maurina do idia laloa guna, bena gabeai abia hidi idia karaia bema ia be hegeregere hesiai tauna o elda tauna ena maduna ia abia totona. Oibe, tadikaka ena ruma bese edia kara bona edia hetura karana Dirava ida be mai anina bada. Unai dainai, bema headava tadikaka o tama ta be ia ura kongrigeisen lalonai hesiai tauna o elda tauna ena maduna ia abia, iena adavana o ruma bese taudia ese ia do idia durua be gau badana.—1 Timoteo 3:4, 5, 12 duahia.
16 Keristani ruma bese taudia ta ta be mai lalotamona ida idia gaukara hebou neganai, Iehova ia moale. (Efe. 3:14, 15) Ruma bese kwarana ese kongrigeisen ena maduna bona iena ruma bese ia “biagua namonamo” totona, namona be ena nega do ia haria namonamo. Unai dainai, elda o hesiai tauna be pura ta ta ai iena adavana bona natudia ida Ruma Bese Ena Tomadiho do ia karaia be gau badana. Bona hanaihanai haroro gaukara ai idia gaukara hebou be namo. Unai ibounai ia karaia namonamo totona, ruma bese taudia be edia ruma bese kwarana ida idia gaukara hebou be mai anina bada.
Oi Ura Hesiai Gaukara Oi Karaia Lou, A?
17, 18. (a) Bema tadikaka ta be iena maduna ia haboioa, dahaka ia karaia be namo? (b) Guna elda o hesiai tauna ena maduna ia huaia tadikaka be dahaka lalohadai maorona ia abia be namo?
17 Reana guna oi be elda o hesiai tauna ta, to hari unai maduna oi huaia lasi. Oi be Iehova oi lalokau henia dainai, Ia be oi ia laloa bada. (1 Pet. 5:6, 7) Elda taudia ese oi idia sisiba henia emu mauri lalonai gau haida oi hanamoa totona, a? Namona be mai manau ida emu manoka gauna oi gwauraia hedinarai, bona Dirava ena heduru amo emu kara oi haidaua. Namo lasi edia sisiba dainai oi badu o lalohisihisi. To, namona be oi aonega bona lalohadai maorona oi abia. Lagani momo lalonai elda gaukara ia karaia, to iena maduna ia haboioa tadikaka ta, ia gwau: “Egu lalona lau hadaia guna elda maduna lau huaia neganai lau karaia gaudia do lau rakatania lasi. Unai gaudia be: Hebou dekenai lau lao, haroro gaukara lau karaia bona Baibel lau duahia. Bona lau moale badina unai gaudia ibounai lau karaia. Unai nega ai, lau ese haheauka karana lau manadalaia badina lau laloa lagani tamona o rua lalonai egu maduna do lau abia lou, to lagani seven idia ore murinai lau be egu elda maduna lau abia lou. Unai nega lalonai haheauka noho ena sisiba herevana ese lau ia durua bada.”
18 Bema oi be ataiai ai herevalaia tadikaka bamona, oi lalomanoka lasi. Iehova ese oiemu haroro gaukara bona oiemu ruma bese ia hanamoa daladia oi laloa bada be namo. Emu ruma bese taudia oi durua edia abidadama ia goada totona, gorere tadikaka taihu oi vadivadi henidia, bona lalomanoka taudia oi hagoadaia. Namona be oi moale, badina oi be Iehova ena Witnes tauna ta, Dirava ena ladana oi abia isi bona Basileia ena sivarai namona oi harorolaia noho.a—Sal. 145:1, 2; Isa. 43:10-12.
Emu Mauri Dalana Oi Laloa Namonamo
19, 20. (a) Idia bapatiso vadaeni tadikaka ibounai ese dahaka idia karaia be namo? (b) Stadi gabena ese dahaka do ia herevalaia?
19 Hari inai negai, kongrigeisen momo dekenai hesiai taudia bona elda taudia be momo lasi. Unai dainai, idia bapatiso vadaeni tadikaka ibounai ai hagoadaia edia mauri dalana do idia laloa namonamo bona sibona idia nanadaia, ‘Bema lau be hesiai tauna o elda tauna ena maduna lau do abia lasi, dahaka ese lau ia koua?’ Namona be Dirava ena lauma helaga ese oi ia durua lalohadai maorona oi abia totona.
20 Sibona edia ura idia dadaraia bona Dirava idia hesiai henia taudia edia gaukara ese kongrigeisen taudia ta ta ia durua bona hanamoa bada. Ma haida ita laloa bada bona mai hebogahisi ida ita kara henidia neganai, ita moale badina ita be lauma helaga ena ura hegeregerena ita kara unai. To, stadi gabena ese do ia hahedinaraia hegeregerena, namona be Dirava ena lauma helaga ita hahisia lasi. Edena dala ai unai bamona kara ita dadaraia diba?
[Footnote]
Edena Bamona Do Oi Haere?
• Mika 5:5 ena peroveta herevana be edena dala ai ita ia durua?
• Ma haida ita hesiai henia totona, sibona iseda ura ita dadaraia karana ena anina be dahaka?
• Edena dala ai tadikaka ta be ma haida hesiai henia urana ia abia diba?
• Bema tadikaka ta ia ura maduna ta ia huaia, dahaka dainai iena ruma bese idia gaukara hebou be mai anina bada?
[Pictures on page 25]
Dahaka oi karaia diba maduna ta oi huaia totona?