Haroro Gaukara Karaia Goadagoada
“Lohiabada ena gaukara do umui karaia goadagoada.”—1 KOR.15:58.
1. Iesu ese ena hahediba taudia ia boiria dahaka gaukara idia karaia totona?
LAGANI 30 C.E. ena dokona kahanai, Iesu be Samaria hanua ta ladana Sukara dekenai ia ginidae, bona ranu guri badinai ia helai ia laga-ani totona. Unuseniai ena hahediba taudia ia hamaoroa: “Emui matana umui abia isi, uma gabu umui itaia, anina be idia auka bona mage vadaeni, utua nega danu ia hegeregere.” (Ioa. 4:35) Iesu be witi korikori gogoa gaukarana ia herevalaia lasi, to ia be kudou-maoro taudia gogoa gaukarana ia herevalaia. Iena hereva amo ena hahediba taudia ia boiria haroro gaukara idia karaia totona. Unai be gaukara badana bona nega kwadogina lalonai do idia karaia!
2, 3. (a) Dahaka ese ia hamomokania ita be uiti gogoa negana ai ita noho? (b) Inai stadi lalonai dahaka do ita stadilaia?
2 Hari inai negai, Iesu ena hereva haroro gaukara totona be mai anina bada. Hari uma ena “anina be idia auka bona mage vadaeni.” Lagani ta ta ai, taunimanima milioni momo be hereva momokani idia dibaia, bona hahediba taudia matamatadia tausen momo be bapatiso idia abia. Iehova Dirava, iseda gunalaia tauna Badana, ena hakaua henunai ita be gogoa gaukara badana ita karaia bona unai be hahenamo badana. Oi be haroro gaukara oi karaia goadagoada, a?—1 Kor. 15:58.
3 Iesu be tanobada ai lagani toi mai kahana ia haroro neganai, ena hahediba taudia ia hadibaia uiti gogoa gaukara idia karaia namonamo totona. Inai stadi lalonai Iesu ese ena hahediba taudia dekenai ia hadibaia mai anina bada gaudia toi do ita stadilaia. Unai gau toi ese ita do idia durua hahediba taudia haboua gaukarana ita karaia namonamo totona. Mani unai gaudia ta ta ita herevalaia.
Manau Karana be mai Anina Bada
4. Edena dala ai Iesu ese ia hahedinaraia manau karana be mai anina bada?
4 Mani oi laloa: Iesu ena hahediba taudia be sibona edia huanai daika be bada idia hepapahuahulaia. Edia toana amo idia hahedinaraia idia badu heheni bona idia lalotamona lasi. Unai dainai, Iesu be mero maragina ta ia boiria bona edia huanai ia haginia. Unai mero maragina ia herevalaia, ia gwau: “Inai mero maragi bamona do ia manau tauna be Guba Basileia lalonai do ia bada herea.” (Mataio 18:1-4 duahia.) Ena be tanobada taudia be moni, kohu bona dagi idia laloa bada, to Iesu ena hahediba taudia idia laloparara ma haida edia matanai idia manau be gau badana. Iehova ese idia do ia abia hidi bona ia hanamoa bema manau karana idia hahedinaraia.
5, 6. Haroro gaukara oi karaia namonamo totona, dahaka dainai oi manau be gau badana? Haheitalai gwauraia.
5 Hari inai negai, tanobada taudia momo be edia mauri lalonai dagi bona kohu idia laloa bada. Unai dainai idia be nega lasi Dirava idia dibaia bona hesiai henia totona. (Mat. 13:22) To, Iehova ena taunimanima be mai manau ida ma haida hesiai henia karana idia laloa bada, unai dala amo uiti gogoa gaukara ena Biaguna, Iehova ena hahenamo bona lalonamo idia abia.—Mat. 6:24; 2 Kor. 11:7; Fili. 3:8.
6 South America ai, elda ta ladana Francisco ena haheitalai mani ita laloa. Ia matamata neganai, iunivesiti ia rakatania bona painia gaukara ia karaia. Ia gwau: “Lau maoheni murinai, lau laloa bema moni gaukara lau davaria kohu bona moni momo ai abia diba. To emai lalona ai hadaia kohu o moni momo do ai tahua lasi, bona ful-taim hesiai gaukara do ai karaia. Emai natudia idia vara neganai, maduna ma haida ia havaraia. To, Iehova ese ai ia durua ai abia hidi mauri dalana ai badinaia totona.” Francisco ma ia gwau: “Lagani 30 mai kahana lalonai, elda gaukara lau karaia bona hesiai gaukara ma haida lau moalelaia. Ena be emai mauri lalonai kohu momo ai tahua lasi, to ai lalohisihisi lasi.”
7. Roma 12:16 ai ia noho sisibana be edena dala ai oi badinaia?
7 Bema inai tanobada gaudia oi dadaraia bona ‘lalomanau ese oi ia hakaua,’ haroro gaukara ai hahenamo momo do oi moalelaia.—Roma 12:16, NW; Mat. 4:19, 20; Luka 18:28-30.
Gaukara Goada Karana ese Anina Namona Ia Havaraia
8, 9. (a) Iesu ese ia herevalaia moni ena parabole mani oi gwauraia. (b) Unai parabole ese daidia ia hagoadaia?
8 Haroro gaukara ita karaia namonamo totona, namona be ita be gaukara goada taudia. Moni ena parabole ai Iesu ese unai ia haheitalaia.a Unai parabole ai, tau ta be gabu daudau ia lao gwauraia dainai, iena hesiai taudia toi dekenai iena moni ia haria. Hesiai tauna ginigunana dekenai 5000 kina ia henia, iharuana dekenai 2000 kina ia henia, bona ihatoina dekenai 1000 kina ia henia. Edia biaguna ia lao murinai, hesiai tauna ginigunana bona iharuana be maoromaoro edia moni amo ‘bisinesi idia karaia.’ To, hesiai tauna ihatoina be “lahedo” tauna. Ia be tano ia geia bona ena moni ia guria. Edia biaguna ia giroa lou neganai, hesiai tauna ginigunana bona iharuana edia davana ia henia, bona ‘ia abidia hidi gau momo idia naria totona.’ To hesiai tauna ihatoina dekenai ia henia moni be ia amo ia kokia bona ena ruma amo ia lulua.—Mat. 25:14-30; NW.
9 Momokani, ita ura hesiai taudia rua edia kara ita tohotohoa bona hahediba taudia halaoa gaukarana lalonai ita gaukara goadagoada. To, reana badina haida dainai unai oi karaia be auka, a? Reana moni ena hekwakwanai dainai, hora momo lalonai moni gaukara oi karaia emu ruma bese oi naria totona. Eiava oi buruka dainai, emu goada be guna bamona lasi. Bema oi dekenai unai ia vara, moni ena parabole ese oi ia hagoadaia diba.
10. Edena dala ai parabole ai biaguna be laloa maoromaoro karana ia hahedinaraia, bona edena dala ai unai ese oi ia hagoadaia?
10 Laloatao, parabole ese ia herevalaia biaguna ia laloparara ena hesiai taudia ta ta edia diba be idauidau. “Ta ta edia diba hegeregerena” moni ia henidia karana amo unai ia hahedinaraia. (Mat. 25:15) Ena be hesiai tauna ginigunana ese 5000 kina ma ia abia, bona hesiai tauna iharuana ese ia abia monina ia hanaia, to biaguna ese idia ta ta edia gaukara namona ia itaia dainai, ia gwau ‘umui be hesiai taudia namodia, kara maoromaoro taudia’ bona maka tamona amo idia ruaosi ia hanamoa. Unai hegeregerena, uma Biaguna, Iehova Dirava, ia diba emu noho dalana hegeregerena ai ia oi hesiai henia diba. Mai emu kudouna ibounai ida Iehova oi hesiai henia dainai, emu hekwarahi hegeregerena oi do ia hanamoa.—Mar. 14:3-9; Luka 21:1-4 duahia.
11. Nega aukadia ai ita gaukara goadagoada karana amo dahaka hahenamo ita davaria diba? Haheitalai gwauraia.
11 Brazil ai ia noho taihu ta ladana, Selmira, ena sivarai ese ia hahedinaraia nega namodia ai sibona lasi to nega aukadia ai Dirava ita hesiai henia goadagoada be namo. Lagani 20 gunanai, Selmira ena adavana be henaohenao taudia ese idia pidia mase bona Selmira be sibona ena natudia toi ia naria. Ia be hora momo lalonai ruma hagoevaia gaukara ia karaia, bona idia honu PMV dekenai ia guia totona ia hekwarahi bada. Unai nega aukadia ai ena gaukara idauidau ia haria namonamo, unai amo regula painia gaukara ia karaia diba. Ena natudia rua be gabeai ia ida painia gaukara idia karaia hebou. Ia gwau: “Idia hanaia laganidia lalonai, taunimanima 20 mai kahana ida Baibel lau stadilaia, bona idia be egu ruma bese bamona ai idia lao. Unai nega amo ema bona hari, edia lalokau bona hebamo karana lau moalelaia. Moni amo unai ita hoia diba lasi.” Momokani, uma Biaguna ese Selmira ena hekwarahi ia hanamoa!
12. Edena dala ai iseda haroro gaukara ita hanamoa diba?
12 Bema hari gau haida ese oi idia koua dainai emu nega be bada lasi oi haroro totona, namona be oi hekwarahi emu haroro gaukara do oi hanamoa. Pura ta ta ena Hesiai Hebou amo oi dibaia haroro gaukara hanamoa daladia oi gaukaralaia diba, unai amo emu haroro dalana do oi hanamoa bona haroro dala matamatadia do oi manadalaia. (2 Tim. 2:15) Danu, bema mai dalana, anina lasi gaudia be nega ma ta ai oi karaia, unai amo emu nega bada oi gaukaralaia hanaihanai kongrigeisen ena haroro grup ida oi haroro totona.—Kol. 4:5.
13. Iehova ena hesiai gaukara ita goadalaia totona dahaka ita karaia be namo?
13 Namona be ita laloatao, eda haroro gaukara ita goadalaia ena badina badana be Dirava ita lalokau henia bona ita ura ia ita tanikiu henia. (Sal. 40:8) Iesu ena parabole ai hesiai tauna ihatoina be ena biaguna ia gari henia; ia laloa biaguna be ia dekenai gaukara momo ia henia bona ia be kara auka tauna. Unai dainai, biaguna ese ia henia moni ia habadaia lasi to tano dekenai ia guria. Unai bamona kara ita dadaraia totona, namona be uma ena Biaguna, Iehova ida eda hetura karana ita hanamoa bona hagoadaia noho. Nega oi atoa Iena kara namodia hegeregere lalokau, haheauka bona hebogahisi oi stadilaia bona laloa dobu totona. Unai amo oi be mai emu kudouna ibounai ida Iehova ena hesiai gaukara do oi karaia.—Luka 6:45; Fili. 1:9-11.
“Do Umui Helaga”
14, 15. (a) Edena dala ai Iesu ese ia hahedinaraia ta be tomadiho bona kara ai ia goeva diba? (b) Dirava ena hereva momokani ese idia ia hagoevaia karana idia dadaraia taudia dekenai dahaka do ia vara?
14 Iesu idia do hamasea lasi neganai, ia bona ena hahediba taudia be Betania amo Ierusalema dekenai idia lao, unuseniai atai daiutuna ta ai idia hebou bona Pasova ariana idia karaia. Hahediba taudia edia aena be kahu amo ia honu dainai, Iesu be edia aena ia huria bona tauele amo ia hakaukaua. Iesu be kara namo sibona ia hahedinaraia lasi, to badina ma ta dainai unai bamona ia karaia. Mani oi itaia, Petero ia ura lasi Iesu ese ena aena do ia huria neganai, Iesu ia gwau: “Bema oi lau huria lasi, oi be lau danu oi noho diba lasi.”—Ioa. 13:2-9.
15 Ranu ese miro ia hagoevaia. To, Iesu ese ena hahediba taudia edia aena ia huria ranuna be mai anina bada gauna ta ia laulaulaia. Unai be iena Tamana ena hereva momokani ia laulaulaia. Iesu ese hereva momokani ia gaukaralaia ena hahediba taudia be tomadiho koikoi amo ia hagoevaia totona, unai amo Dirava ena kara maoromaoro taravatudia idia badinaia diba. (Ioa. 15:3; 17:17; Efe. 5:25-27) Dirava ena hereva momokani ese idia ia hagoevaia karana idia dadaraia taudia be Iesu ida do idia gaukara hebou ena hahenamo idia haboioa. Unai nega ai Iesu ia gwau ena hahediba taudia haida be idia goeva lasi. (Ioa. 13:10) Ia be Iuda ia herevalaia. Iuda be hahediba taudia edia moni mauana amo ia henaohenao, bona hahelaga taudia ia hereva henia vadaeni siliva moni 30 amo iena Biaguna do ia samania. Unai dainai, Iuda be “iena dagi” ia haboioa. Oibe, ia ese kara goeva ia negea dainai, ena hetura karana Dirava ida ia haboioa!—Kara 1:20.
16. Edena dala ai tomadiho bona kara ai ita goeva diba?
16 Haroro gaukara ita karaia totona, eda mauri lalonai Dirava ese ia inai henia karadia ibounai ita dadaraia be namo. Unai hahenamo ita moalelaia noho totona, namona be tomadiho momokanina bona kara maoromaoro taravatudia ita badinaia. (1 Petero 1:14-16 duahia.) Hanaihanai eda tauanina ita hagoevaia hegeregerena, namona be Dirava ena hereva momokani amo iseda kara bona lalohadai do ita hagoevaia noho. Unai ena anina be hanaihanai Baibel ita duahia bona Keristani heboudia dekenai ita lao. Bona, danu ita hekwarahi eda mauri lalonai Dirava ena kara maoromaoro taravatudia ita badinaia noho. Unai ese ita do ia durua eda manoka gaudia ita hanaia bona tanobada ena kara mirodia amo ita gini siri totona.—Sal. 119:9; Iam. 1:21-25.
17. Edena Baibel sisiba ita badinaia be namo unai amo ita goeva diba?
17 Dirava ena hereva momokani ese oi ia hagoevaia karana be emu mauri lalonai oi abia dae, a? Emu hemami be edena bamona, inai tanobada ena moale karadia amo ita gini siri sisiba oi kamonai neganai? (Sal. 101:3) Iehova idia tomadiho henia lasi sikuli bona gaukara turadia edia hebamo karana oi dadaraia, a? (1 Kor. 15:33) Oi hekwarahi noho emu manoka gaudia oi hanaia totona unai amo Iehova ena matanai oi goeva diba, a? (Kol. 3:5) Inai tanobada ena politikol karadia bona bese abia isi spot gadara idauidau oi dadaraia, a?—Iam. 4:4.
18. Edena dala ai kara bona tomadiho dalanai ita goeva karana ese ita ia durua haroro gaukara ita karaia namonamo totona?
18 Baibel ena sisiba unai gaudia dekenai oi badinaia neganai, namo do oi davaria. Iesu ese ena horoa taudia be vine auna ena rigi ida ia hahegeregerea, ia gwau: “Lauegu rigi ibounai bema huahua idia atoa lasi, be egu Tamana ese ia kokia. Mai huahua rigi ibounai be ia ese ia utua kwadogi, do idia goeva, bona huahua momo do idia atoa totona.” (Ioa. 15:2) Baibel ena hereva momokani ena hagoevaia karana oi abia dae neganai, huahua momo do oi havaraia diba.
Hari Bona Nega Vaira Ena Hahenamo
19. Iesu ena hahediba taudia be haroro gaukara idia karaia dainai, dahaka hahenamo idia abia?
19 Iesu ena hadibaia dalana idia abia dae taudia be Pentekoste 33 C.E. ai lauma helaga ese ia horodia murinai “tanobada ena kahana ibounai” dekenai sivarai namona idia harorolaia. (Kara 1:8) Idia haida be hakaua orea taudia, haida be misinari taudia, loaloa naria taudia, bona sivarai namona be ‘tanobada ibounai dekenai idia harorolaia vadaeni.’ (Kol. 1:23) Edia gaukara amo idia bona ma haida ese hahenamo idia davaria!
20. (a) Haroro gaukara oi karaia goadagoada dainai, dahaka hahenamo oi davaria? (b) Emu lalona oi hadaia dahaka oi karaia totona?
20 Oibe, bema ita manau, eda haroro gaukara ita karaia goadagoada, bona Baibel ena kara maoromaoro taravatudia ita badinaia neganai, mai moale ida haboua gaukara badana do ita karaia noho. Ena be tanobada taudia be kohu bona moale karadia idauidau idia tahua to idia lalohisihisi noho. To, herevana ita be mai eda kohu eiava lasi to ita moale. (Sal. 126:6) Namona be Korinto Ginigunana 15:58 ena hereva ita laloatao, ia gwau: “Umui diba Lohiabada ena gaukara lalonai, emui hekwarahi be hekwarahi kava lasi momokani.” Uma Biaguna, Iehova Dirava, ita lalokau henia bona iena gaukara ita karaia dainai, ia ese iseda hekwarahi do ia laloaboio lasi, bona ita do ia hanamoa ela bona hanaihanai.—Heb. 6:10-12.
[Footnote]
a Moni ena parabole be Iesu bona horoa hahediba taudia idia gaukara hebou karana ia herevalaia, to Keristani taudia ibounai dekenai unai parabole ese ia hahedinaraia hakaua herevadia be mai anina bada.
Oi Laloatao, A?
Emu haroro gaukara oi karaia namonamo totona,
• dahaka dainai manau karana be mai anina bada?
• edena dala ai oi gaukara goadagoada?
• dahaka dainai emu kara bona tomadiho ia goeva be mai anina bada?
[Picture on page 17]
Manau karana ese ita ia durua diba eda mauri lalonai Dirava hesiai henia karana do ita atoa guna