Revareva Ta Haiti Amo

“Lau Moale Bada Herea”

JANUARY 12, 2010 ai, Haiti dekenai tano mareremarere ia vara murinai, lau ura lasi unai dika ena sivarai be nius ai lau itaia. Bena January 20 ai, egu turana, Carmen, ese lau ia rini henia bona ia gwau ia ura ai ruaosi be Haiti dekenai do ai lao, volantia gaukara ai karaia totona. Lagani haida gunanai, Kingdom Hall konstraksen ai, lau bona Carmen ai hedavari, unuseniai ai be volantia nesi gaukarana ai karaia. Unai nega amo, ai be gaukara ma haida ai durua bona tura namodia ai lao.

Carmen lau hamaoroa, reana tauanina eiava hemami dalanai do lau hegeregere lasi Haiti dekenai lau lao. To lau ia hadibaia, ai ruaosi be ai gaukara hebou namonamo bona ai durua heheni diba. Iena hereva ese lau ia hagoadaia, unai dainai Iehova ena Witnes taudia edia hedikwota, Brooklyn, New York ai, lau rini henia, bona United States amo heduru gaukarana ia naria tadikakana ida lau herevahereva. Ia dekenai egu ladana lau henia volantia taudia edia lista dekenai ia torea totona. Carmen ena ladana danu lau henia bona lau hamaoroa bema namo ai ruaosi do ai gaukara hebou. Lau ia hamaoroa do ia gwauhamata lasi lau eiava Carmen do idia boiria eiava ai ruaosi do ai gaukara hebou.

Unai dainai dina ta ta ai lau karaia gaukaradia lau karaia, badina lau laloa lau do idia boiria lasi. Dina foa murinai, Monday, January 25 ai, Brooklyn amo lau idia rini henia, bona idia nanadaia bema ia hegeregere murina dinana ai Haiti dekenai do lau lao! Unai lau kamonai neganai, lau hoa bada. Lau gwau unai do lau karaia toho. Matamanai, egu bosi lau nanadaia gaukara amo do lau laga-ani sisina. Unai murinai, Carmen lau rini henia, to lau davaria ia idia boiria lasi, badina ia be French gado ia diba lasi. Lau moale bada bona gari danu. January 28 ai, peleini tiketi lau abia murinai, New York amo Santo Domingo dekenai lau lao, unai be Dominican Republic ai, ia be Haiti ena boda dekenai.

Peleini gabunai, Witnes tadikaka matamata ta ese lau ia hedavari henia bona Dominican Republic ai Iehova ena Witnes taudia edia brens opesi dekenai lau ia abia lao. Unai dina ai, United States amo nesi rua danu idia ginidae, bona unai hanuaboi ai daiutu tamona dekenai ai mahuta. Murina dinana ai, Haiti ena brens opesi, Port-au-Prince dekenai ai idia abia lao, ena daudau be hora 7 mai kahana.

Boda ai hanaia bona Haiti dekenai ai ginidae neganai, ia vara dika ai itaia. Ai hoa bada, badina sekeni 35 sibona lalonai ia vara tano mareremarere ese inai gabu hairaina ia hadikaia momokani. Ena be nius ai lau itaia neganai egu lalona ia hisihisi bada, to egu matana amo lau itaia neganai, lau abia hemamina be lau gwauraia diba lasi. Ruma momo bona presiden ena ruma danu be idia dika, to ruma ma haida be idia dika momokani. Taunimanima momo be nega bada idia gaukaralaia edia ruma idia haginia totona​—⁠to madi, sekeni haida sibona lalonai unai ruma ibounai idia dika. Unai gaudia lau itaia neganai, lau laloparara iseda mauri dekenai kohu be anina bada gauna lasi.

Brens opesi dekenai ai ginidae neganai, risepsen ai ia gaukara taihu ese ai ia itaia, vadaeni ai dekenai ia heau lao bona mai moale ida ai ia rosia. Ai ia tanikiu henia badina emai gaukara bona ruma bese ai rakatania bona ai mai. Dina tubua aniani ai ania murinai, kahirakahira ia noho Assembly Hall dekenai ai lao, unai gabu be hospital ai idia halaoa. Unuseniai, idia volantia Witnes taudia ma haida lau hedavari henia, Gemany amo be headava tau bona hahine, idia ruaosi be doketa, edia durua tauna ta, bona Switzerland amo be mara hahinedia ia durua hahinena.

Unai hanuaboi ginigunana ai, egu gaukara lau hamatamaia. Assembly Hall ena foloa dekenai gorere taudia 18 be bedi latanai idia hekure, Witnes taudia bona Witnes lasi taudia. Witnes taudia edia doketa ese gorere taudia ibounai dekenai heduru tamona idia henia bona davana lasi medikol heduruna danu.

Unai hanuaboi ai, mauri lagani 80 tau burukana ta ia mase. Iena adavana be ia badinai ia helai, bona lau bona egu daiutu turana be ia ida ai helai. Unai murinai, hahine matamata ta ladana Ketly be ena hisihisi dainai ia tai matamaia. Iena imana idibana idia utua oho, badina tano mareremarere amo dika ia davaria. Ketly ena badinai Witnes hahinena ta ia helai, unai hahine be Ketly ida Baibel ia stadilaia. Assembly Hall ai, ia be hanuaboi ibounai Ketly ena bedi badinai ia hekure.

Ketly dekenai lau lao, lau ura iena hisihisi do lau hamaragia sisina, to unai hisihisi be tauanina ena hisihisi sibona lasi. Lau ia hamaoroa tano mareremarere ia vara neganai, ia be ena turana ena ruma dekenai ia noho. Idia diba lasi dahaka ia vara noho. Edia imana idia dogoatao bona ruma ena dehe dekenai idia heau lao, bena ruma ena haba be edia latanai ia moru bona idia ia koua. Iena turana ia boiria, to ia haere lasi. Ia gwau unai neganai ia diba iena turana be ia mase. Hora foa murinai heduru taudia idia ginidae neganai, idia davaria ena turana ena tauanina kahana be Ketly ena latanai ia noho. Ketly be ena imana idibana amo ela bona ena pagana ena joini ia halusia.

Lauegu hanuaboi ginigunana ai, Ketly be ia dekenai ia vara gauna ia laloa momo dainai nega momo ia mahuta haraga lasi. Mai taitai danu lau dekenai ia gwau: “Lau diba Baibel ese nega dokona bona tano mareremarere ia gwauraia. Bona lau diba vaira negai helaro namona do ita davaria. Lau diba danu lau mauri dainai do lau moale be namo. To lau dekenai ia vara gauna mani oi laloa. Matamanai gau ibounai be idia namo sibona, to karaharaga unai ibounai idia idau.” Lau diba lasi edena dala ai ia do lau durua, to ia lau rosia sibona, bona lau tai matamaia danu. Ai tai ela bona ia mahuta.

Dina ta ta ai, doketa ta bona nesi rua idia siaia medikol heduruna idia ura abia taudia idia durua totona. Lau idia siaia Petit Goave dekenai, ena daudau be hora rua bamona Port-au-Prince amo. Lau be volantia taudia rua ida lau lao​—⁠nesi ta Florida amo bona doketa ta France amo. Daba 9:30 ai ginidae, emai kohu ai kokia bona Kingdom Hall lalonai ai atodia. Taunimanima be idia diba do ai mai dainai, idia helai bona ai idia naria.

Ai ginidae neganai maoromaoro gaukara ai hamatamaia. Gabu be ia siahu bada, bona medikol heduru totona idia mai taudia edia laini danu ia lata ia lao. Adorahi 3 oklok bena do ai laga-ani. Unai dina dekenai, ai toi ese hekodo ibounai 114 ai henia, bona gorere taudia 105 ai itadia. Lau hesiku to lau moale, badina medikol dalanai gorere taudia ai durudia.

Wiki rua mai kahana lalonai, Haiti dekenai heduru henia gaukarana lau karaia. Kahirakahira hanuaboi ibounai, Assembly Hall ai hora 12 lau gaukara. Unai be gaukara badana momokani, guna unai bamona gaukara ta lau karaia lasi. To, lau dekenai unai be hahenamo ta bona lau moale unuseniai lau noho. Lau moale bada badina Haiti ai, hisihisi bada idia davaria taudia lau durudia bona hagoadadia diba.

Idia amo gau momo ai dibaia. Hegeregere, lau naria gorere merona ta, Eliser, ena mauri lagani be 15, ena aena ta idia utua oho. Lau itaia ena aniani be Jimmy ida ia haria, Jimmy be hanuaboi ibounai ena bedi badinai ia noho. Lau dekenai ia gwau Jimmy be hanuaboi ibounai ia do mai lasi neganai ia aniani lasi. Eliser ena kara amo inai lau dibaia, ena be ita ogogami eiava ita gorere, to ita dekenai idia noho gaudia be ma haida ida ita haria diba.

Unai bamona kara be lau ida idia gaukara hebou volantia taudia edia huanai lau itaia. Volantia hahinena ta be ia gorere, ma ta be ena doruna ia hisihisi. To, idia ibounai ese gorere taudia edia namo idia atoa guna. Unai ese lau ia hagoadaia egu gaukara lau karaia noho totona. Ena be nega ta ta, ai ibounai be hemami, lalona, bona tauanina dalanai ai hesiku, to ta ta ai hagoadaia bona ai gaukara noho. Unai lau laloaboio diba lasi! Lau tanikiu bada inai bamona Keristani oreana lalonai lau noho dainai, idia ese hebogahisi, lalokau, bona sibona henia karana idia hahedinaraia.

Haiti lau do rakatania lasi neganai, gorere taudia rua, edia imana idibana idia utua oho, be lau dekenai tanikiu revarevana idia torea, bona lau idia hamaoroa peleini lau guia murinai do lau duahia. Unai bamona lau karaia. Unai revareva ese egu kudouna ia hamarerea momokani, bona lau tai dikadika.

Lauegu noho gabuna dekenai lau giroa neganai, Haiti dekenai lau davaria tura matamatadia haida dekenai revareva lau torea. Hekwakwanai badadia ese hetura karana ia hagoadaia bona tohoa diba. Lau abia dae emai hetura karana be do ia goada noho, herevana vaira negai hekwakwanai badadia idia vara. Lau moale bada herea.