Iehova Tomadiho Henia Karana Laloa Bada
“Inai gaudia do umui laloa noho: . . . mai anina bada gaudia.”—FILI. 4:8.
1, 2. Dahaka dainai taunimanima be moale karadia sibona idia tahua? Edena henanadai haida ita laloa be namo?
HARI taunimanima be hekwakwanai momo idia davaria bona idia lalohisihisi. Iehova idia diba lasi taudia be inai ‘nega aukadia’ ai idia davaria hekwakwanai idia hanaia diba lasi. (2 Tim. 3:1-5) Sibona edia goada dekenai idia tabekau dainai, edia hekwakwanai idia hamaoromaoroa diba lasi. Idia ura lasi edia hekwakwanai idia laloa momo dainai, moale karadia sibona idia tahua.
2 Taunimanima be edia lalohekwarahi gaudia idia haheaukalaia totona, nega ibounai moale karadia idia karaia. Bema ita naria namonamo lasi, ita danu be unai bamona do ita karaia. Vadaeni, edena dala ai unai kara ita dadaraia diba? To, anina be moale karadia ibounai do ita dadaraia, a? Edena dala ai iseda nega ita gaukaralaia namonamo, unai amo moale karadia bona eda maduna idauidau ita huaia totona? Edena hakaua herevadia ese ita do idia durua, unai amo iseda hekwakwanai sibona ita laloa momo lasi, to moale karadia haida ita karaia diba danu?
Mai Anina Bada Gaudia Atoa Guna
3, 4. Edena dala ai Baibel ese ita ia durua mai anina bada gaudia ita atoa guna totona?
3 Tanobada taudia be ‘moale karadia idia ura henia bada.’ (2 Tim. 3:4) Moale karadia ura henia bada karana ese iseda hetura karana Iehova ida ia hadikaia diba. (Aon. 21:17) Unai dainai, aposetolo Paulo ese Timoteo bona Tito ia tore henidia neganai, ia sisiba henidia mai anina bada gaudia idia laloa totona. Unai sisiba ita badinaia neganai, tanobada taudia edia kara do ita tohotohoa lasi.—1 Timoteo 2:1, 2; Tito 2:2-8 duahia.
4 King Solomona ia gwau, nega haida moale karadia haida do ita dadaraia, unai amo mai anina bada gaudia do ita atoa guna. (Had. 3:4; 7:2-4) Momokani iseda mauri be kwadogi, unai dainai mauri hanaihanai ita abia totona ‘ita hekwarahi bada’ be namo. (Luka 13:24) Unai ita karaia totona, namona be “mai anina bada gaudia” ita atoa guna. (Fili. 4:8, 9) Anina be iseda mauri lalonai ita karaia gaudia ibounai do ita laloa namonamo be gau badana.
5. Ita laloa bada gauna ta be dahaka?
5 Keristani taudia be Iehova bona Iesu edia kara idia tohotohoa dainai, edia moni gaukara gabudiai idia gaukara goadagoada. (Ioa. 5:17) Nega momo edia gaukara idia karaia namonamo dainai, edia bosi ese ia hanamodia. Ruma bese kwaradia idia gaukara goada badina idia ura edia ruma bese idia naria. Badina, bema edia ruma bese idia naria lasi, unai be hegeregere ‘edia abidadama idia negea vadaeni’!—1 Tim. 5:8.
Tomadiho—Mai Anina Bada Bona Ita Moalelaia
6. Dahaka dainai ita diba Iehova ia ura dala maorona ai ia do ita tomadiho henia?
6 Iehova ia ura taunimanima be dala maorona ai ia do idia tomadiho henia. Hegeregere, Mose ena negai, Israela taudia ese Iehova idia rakatania neganai, dika bada idia davaria. (Ios. 23:12, 13) Aposetolo taudia edia negai, Keriso murinai idia raka taudia idia gaukara goada tomadiho momokani be hahediba hereva koikoidia bona lalohadai kereredia amo idia gimaia totona. (2 Ioa. 7-11; Apok. 2:14-16) Hari iseda negai danu, Keristani taudia momokanidia be Iehova tomadiho henia karana idia laloa bada.—1 Tim. 6:20.
7. Haroro gaukara totona Paulo be edena bamona ia hegaegae?
7 Iseda haroro gaukara be moale gauna. To, haroro gaukara ita moalelaia noho totona, ita hegaegae guna be namo. Paulo ese ia haroro henia taudia ia laloa bada karana ia herevalaia, ia gwau: “Gau ibounai lau karaia vadaeni taunimanima idauidau ibounai lau durua totona, unai amo dala idauidau ibounai amo haida lau hamauria diba. Sivarai namona totona gau ibounai lau karaia, unai amo ma haida dekenai sivarai namona lau harorolaia diba.” (1 Kor. 9:22, 23) Paulo ia moale badina taunimanima ia durua diba Iehova idia dibaia totona, bona idia ia durua totona ena hereva ia laloa namonamo. Unai amo kamonai taudia ia hagoadaia diba Iehova idia tomadiho henia totona.
8. (a) Ita hadibaia taudia be edena bamona ita lalodia be namo? (b) Edena dala ai ta ita stadi henia karana amo moale ita davaria diba?
8 Paulo be ena haroro gaukara ia laloa bada, a? Oibe, ia be hesiai tauna ta bamona mai ena ura ida Iehova ena ura ia karaia, bona hereva momokani idia ura kamonai taudia ia durua. (Roma 12:11; 1 Kor. 9:19) Ma haida ita stadi henia, Keristani hebou dekenai tok ita henia, o Ruma Bese Ena Tomadiho ita karaia neganai, ita hadibaia taudia ita laloa bada, a? Reana ita laloa wiki ta ta ai ma haida be Baibel amo ita stadi henia karana be mai ena hekwarahi. Momokani, ma haida ita durua totona sibona eda ura gaudia do ita dadaraia. To, unai be Iesu ena hereva hegeregerena, ia gwau: “Henia kara ena moale be bada, to abia kara ena moale be maragi.” (Kara 20:35) Oibe, ita moale badina ma haida dekenai mauri hanaihanai abia dalana ita hadibaia, bona unai gaukara ese gaukara ibounai ia hereaia.
9, 10. (a) Mai anina bada gaudia sibona ita laloa dainai, do ita moale o kiri lasi, a? (b) Edena dala ai elda tauna ese ma haida ia durua diba, bona ia do idia gari henia lasi?
9 Namo lasi ita laloa mai anina bada gaudia sibona ita laloa dainai, ma haida ida do ita moale o kiri hebou lasi. Iesu be haheitalai namona, badina taunimanima ia hadibaia sibona lasi, to nega ia atoa ma haida edia hebamo karana ia moalelaia totona. (Luka 5:27-29; Ioa. 12:1, 2) Danu, namo lasi mai anina bada gaudia sibona ita laloa dainai, iseda vairana be hanaihanai ia auka. Bema Iesu be unai bamona tauna, taunimanima be ia do idia gari henia. To, momo be Iesu idia tura henia diba, bona natudia danu be ia dekenai idia lao. (Mar. 10:13-16) Edena dala ai Iesu ena kara ita tohotohoa diba?
10 Tadikaka ta ese elda ta ia herevalaia neganai, ia gwau: “Unai elda be gaukara momo ia karaia tauna, to ia be ma haida ia doria lasi unai bamona idia karaia totona.” Oi be unai bamona tauna, a? Oibe, ita laloparara, ta ta be edia goada bona diba hegeregerena ai gaukara ta idia karaia diba. Hegeregere, bema tama sina ese natu edia mauri lagani bona diba hegeregerena tahua gaudia idia atoa bona durua, natu ese unai idia hagugurua diba. Unai hegeregerena, elda taudia ese kongrigeisen lalonai pablisa taudia ta ta idia hagoadaia bona idia durua Dirava tura henia karana idia hagoadaia totona. Danu, bema elda tauna be laloa maoromaoro tauna, ia ese tadikaka taihu do ia hagoadaia bona ia do idia gari henia lasi. (Roma 12:3) Taihu ta ia gwau: “Lau ura lasi elda tauna be gau ibounai dekenai ia kiri sibona. To danu bema ena vairana be nega ibounai ia auka, do lau gari ia lau hereva henia totona.” Taihu ma ta ia gwau: “Elda taudia haida be idia hevaseha diba lasi dainai, lau gari idia lau hereva henia totona.” Namona be elda taudia ese Iehova idia tohotohoa, badina ia be “moale Diravana,” bona ia ura ia idia tomadiho henia taudia do idia moale.—1 Tim. 1:11.
Kongrigeisen Lalonai Maduna Huaia
11. Bema tadikaka “ta ia ura” kongrigeisen lalonai maduna ia huaia, dahaka ia karaia be namo?
11 Paulo ese tadikaka ia hagoadaia namona be idia gaukara goada kongrigeisen lalonai maduna idauidau idia huaia totona, to ia ura lasi idia sibona edia ladana idia abia isi. Ia gwau: “Bema ta ia ura naria tauna ena maduna ia abia, ia be gaukara namona ia ura henia unai.” (1 Tim. 3:1, 4) Bema Keristani tauna “ta ia ura” kongrigeisen lalonai maduna ia huaia, namona be ia gaukara goada Keristani kara namodia ia hahedinaraia totona, unai amo ena tadikaka taihu ia hesiai henia diba. Bema tadikaka ta ia bapatiso vadaeni bona lagani ta ia hanaia, bona 1 Timoteo 3:8-13 ena sisiba ia badinaia, ia be hesiai tauna ai idia halaoa diba. To, mani siri 8 ita laloa, ia gwau: “Namona be hesiai taudia danu be do idia laloa namonamo.”
12, 13. Kongrigeisen lalonai matamata tadikakadia be dahaka gaukara idauidau idia karaia diba?
12 Oi be bapatiso matamata tadikaka ta bona Iehova tomadiho henia karana oi laloa bada, a? Gau haida oi karaia diba, bona dala ta be emu haroro dalana do oi hanamoa. Haroro negadiai mauri lagani idauidau tadikaka ida oi gaukara hebou, a? Oi gaukara goada stadi matamata haida oi davaria totona, a? Ta oi stadi henia neganai, hebou ai oi dibaia gaudia oi badinaia karana ese emu hadibaia dalana do ia hanamoa. Ma danu, ia ura Iehova ena kara ia dibaia tauna be mai laloparara bona hebogahisi ida oi durua diba. Emu Baibel stiuden be ia ura ena mauri lalonai gau haida ia haidaua neganai, mai haheauka bona aonega ida oi durua Baibel ena hakaua herevadia ia badinaia totona.
13 Umui matamata tadikaka e, kongrigeisen lalonai idia noho buruka taudia be dala idauidau ai umui durua diba. Danu, namona be Kingdom Hall ena toana oi laloa bada bona hagoevaia bona hanamoa gaukarana oi durua. Dala idauidau ai oi ura ma haida oi durua neganai, unai ese ia hahedinaraia emu hesiai gaukara oi laloa bada. Oibe, Timoteo bamona, kongrigeisen ena gaukara idauidau do oi karaia namonamo diba.—Filipi 2:19-22 duahia.
14. Elda taudia e, edena dala ai matamata tadikakadia “umui tohoa” diba?
14 Elda taudia e, bema umui itaia matamata tadikakadia be “matamata taudia ese vaia idia abia ura idauidau amo [idia] heau siri,” bona “kara maoromaoro, abidadama, lalokau, bona maino” idia hahedinaraia, namona be idia dekenai gaukara ma haida umui henia. (2 Tim. 2:22) Kongrigeisen lalonai gaukara idauidau umui henia neganai, idia “umui tohoa” bema idia be hegeregere maduna ma haida idia huaia totona, bona ‘taunimanima ibounai do idia itaia idia be idia goada idia lao noho.’—1 Tim. 3:10; 4:15.
Kongrigeisen Bona Ruma Bese Ena Maduna Laloa Bada
15. Timoteo Ginigunana 5:1, 2 ena sisiba be edena dala ai ita badinaia diba?
15 Mai anina bada gaudia ita laloa bada karana ta be, iseda tadikaka taihu ita matauraia. Paulo ese Timoteo ia sisiba henia ma haida do ia matauraia totona. (1 Timoteo 5:1, 2 duahia.) Paulo ena sisiba be mai anina bada headava lasi Keristani tauna o hahinena dekenai; namo lasi iena kara amo ma ta ia hauraia kava, to ia adavaia lasi. Iobu be hahine ia matauraia tauna ta, bona ena kara ita tohotohoa be namo. Hegeregere ena adavana ia matauraia bona taravatu ia atoa hegahusi dalanai hahine ma ta do ia raraia lasi. (Iobu 31:1) Bema iseda tadikaka bona taihu ita matauraia, hegahusi dalana ai ma ta do ita hauraia kava lasi, eiava kara ta amo do ita hahemaraia lasi. Bema mero bona kekeni idia hetura bona idia ura headava, ta ta idia matauraia be mai anina bada. Oibe, mai anina bada gaudia ia laloa Keristani merona o kekenina be ta ta do idia koia lasi.—Aon. 12:22.
16. Tanobada taudia ese tau bona tama ena maduna be edena bamona idia laloa, to Baibel be dahaka ia gwau?
16 Dirava ese tama bona sina dekenai ia henia maduna ita laloa namonamo be gau badana. Tanobada taudia be tau o tama ena maduna idia kirikirilaia. Televisen, muvi bona miusiki ese ruma bese kwarana edia maduna idia kirikirilaia bona matauraia lasi. To, Baibel ese ia hahedinaraia tau ena maduna be mai anina bada, bona ia be “hahine ena kwarana.”—Efe. 5:23; 1 Kor. 11:3.
17. Edena dala ai tama ese ia hahedinaraia Ruma Bese Ena Tomadiho ia laloa bada?
17 Tau ese tauanina dalanai ena ruma bese ia naria be namo. To, bema Iehova ena hakaua herevadia be ena ruma bese dekenai ia hadibaia lasi, unai ese ia hahedinaraia ia be aonega lasi tauna. (Deu. 6:6, 7) Bema oi be ruma bese ena kwarana bona kongrigeisen ai oi ura maduna oi huaia, namona be 1 Timoteo 3:4 ena sisiba oi badinaia, ia gwau: “Iena ruma bese ia naria, bona iena natudia be mai laloa namonamo ida iena henunai idia noho.” Sibona oi nanadaia: ‘Hanaihanai nega lau atoa egu ruma bese ena tomadiho lau hakaua totona, a?’ Keristani tatau haida be unai idia karaia lasi dainai, edia adavadia ese idia noia loulou ruma bese stadi idia karaia totona. Namona be tama ese edia maduna idia laloa bada. Momokani, Keristani hahine ese ena adavana do ia durua danu Ruma Bese Ena Tomadiho idia karaia namonamo totona.
18. Edena dala ai natudia be mai anina bada gaudia idia laloa diba?
18 Namona be natudia ese edia mauri lalonai idia karaia gaudia idia laloa namonamo danu. (Had. 12:1) Natudia danu be gaukara goadagoada karana idia dibaia be namo, bona edia mauri lagani bona diba hegeregerena ruma gaukara haida idia karaia diba. (Lal. 3:27) King Davida be do mero maragi neganai, mamoe naria namonamo tauna ai ia lao. Danu, miusiki gadaralaia bona ane torea karana ia dibaia, bona gabeai Israela ena King totona miusiki ia gadaralaia. (1 Sam. 16:11, 12, 18-21) Oibe, Davida be matamata taudia ma haida ida ia gadara, to gaukara karaia daladia ia dibaia danu, bona gabeai unai diba ia gaukaralaia Iehova ia hanamoa totona. Mamoe naria gaukara amo haheauka karana ia dibaia, bona unai ese ia durua Israela taudia ia lohiaia totona. Umui matamata taudia e, dahaka gaukara idauidau umui dibaia noho? Umui dibaia gaudia ese umui do idia durua emui Havaraia Tauna umui hesiai henia, bona nega vaira ai maduna haida umui huaia totona, a?
Umui Laloa Maoromaoro Noho
19, 20. Emu lalona oi hadaia dahaka oi karaia noho totona?
19 Namona be mai laloa maoromaoro ida gau ibounai ita karaia, ma haida ita bamoa bona moale karadia ita karaia danu. Namo lasi ita be mai anina bada gaudia sibona ita laloa bona ita kiri diba lasi. (Had. 7:16) Iseda ruma dekenai, gaukara gabudiai, o iseda tadikaka taihu ida ita noho hebou neganai, ita kiri bona gadara hebou, unai ese badu karana ia koua diba. Namo lasi iseda ruma bese taudia ita hereva auka henidia, badina unai ese maino ia hadikaia diba. Kongrigeisen lalonai namona be tadikaka taihu ese moale karadia idia karaia hebou, edia hereva amo ta ta idia hagoadaia, bona mai moale ida ma haida dekenai Baibel idia hadibaia.—2 Kor. 13:10; Efe. 4:29.
20 Tanobada taudia be Iehova bona ena taravatu idia laloa bada lasi. To, Iehova ena taunimanima be iena hereva bona ena taravatu idia laloa bada. Ita moale badina ita be tanobada hegegemadai tadikaka oreana lalonai ita noho bona Iehova ita tomadiho henia! Unai dainai, namona be iseda mauri lalonai ita karaia gaudia ita laloa namonamo bona Iehova tomadiho henia karana ita laloa bada.
Edena Bamona Do Oi Haere?
• Dahaka dainai tanobada taudia edia lalohadai moale karadia dekenai ita dadaraia be namo?
• Edena dala ai iseda haroro gaukara ita karaia namonamo bona ita moalelaia diba?
• Kongrigeisen lalonai maduna idauidau ita huaia karana ese dahaka ia hahedinaraia?
• Dahaka dainai iseda tadikaka taihu bona ruma bese taudia ita matauraia be mai anina bada?
[Pictures on page 12]
Namona be tau ese tauanina dalanai ena ruma bese ia naria bona edia abidadama ia hagoadaia