Keristani Ruma Bese E, Umui “Noga Noho”

“Ita noga noho bona iseda laloa maoromaoro karana ita dogoatao noho.”​—⁠1 TES. 5:⁠6.

1, 2. Ruma bese idia noga noho totona dahaka idia karaia be namo?

APOSETOLO Paulo ese Iehova ena dina badana mai garina ia herevalaia neganai, Tesalonika Keristani taudia dekenai ia gwau: “Tadikaka e, umui be dibura lalonai umui noho lasi, unai dainai unai dina dekenai do umui hoa lasi, henaohenao tauna be dina ena diari dekenai ia hoa bamona, badina umui ibounai be diari ena natudia bona dina ena natudia. Ita be hanuaboi taudia eiava dibura taudia lasi. Unai dainai, namo lasi ita mahuta noho, haida idia mahuta bamona, to namona be ita noga noho bona iseda laloa maoromaoro karana ita dogoatao noho.”​—⁠Ioe. 2:31; 1 Tes. 5:​4-6.

² “Dokona negana” ai idia noho Keristani taudia dekenai Paulo ena sisiba be mai anina bada. (Dan. 12:⁠4) Inai nega dikana ena dokona ia kahirakahira lalonai, Satani ia ura dikadika Dirava idia tomadiho henia taudia momo edia hesiai gaukara do ia hadikaia. Unai dainai, aonega karana be Paulo ena sisiba hegeregerena ita noga noho be gau badana. Keristani ruma bese ta ia noga noho totona, gau badana be Baibel ese idia ta ta dekenai ia henia maduna idia huaia. Vadaeni, tau, hahine bona natudia ese edena dala ai edia ruma bese idia durua diba idia “noga noho” totona?

Tau E, “Mamoe Naria Tauna Namona” Tohotohoa

3. Timoteo Ginigunana 5:8 ena hereva bamona, tau ena maduna be dahaka?

³ Baibel ia gwau, “Hahine ena kwarana be tau.” (1 Kor. 11:⁠3) Tau be ruma bese kwarana dainai iena maduna be dahaka? Baibel ese tau ena kwara dagina ia herevalaia neganai ia gwau: “Momokani, bema tau ta be iena henari henunai idia noho taudia ia naridia lasi, bona gau badana be bema iena ruma bese taudia ia naridia lasi, ia ese ena abidadama ia negea vadaeni bona iena dika ese abidadama lasi tauna ena dika ia hereaia.” (1 Tim. 5:⁠8) Oibe, tau ese tauanina dalanai ena ruma bese ia naria be namo. To, unai sibona be hegeregere lasi. Namona be ia gaukara goada ena ruma bese taudia ibounai ia durua edia abidadama ia goada totona. (Aon. 24:​3, 4) Edena dala ai unai ia karaia diba?

4. Tau ese ena ruma bese edia abidadama ia hagoadaia totona, dahaka ia karaia be namo?

⁴ Baibel ia gwau, “Tau be ena hahine ena kwarana, Keriso be kongrigeisen ena kwarana hegeregerena.” Unai dainai tau ese Keriso ena kara ia stadilaia bona tohotohoa be namo. (Efe. 5:23) Iesu ia hahedinaraia ia be ena hahediba taudia ia diba namonamo. (Ioane 10:​14, 15 duahia.) Tau ese ena ruma bese taudia edia abidadama ia hagoadaia totona, dahaka ia karaia be namo? Ia ese Iesu, “mamoe naria tauna namona,” ena kara bona hereva ia stadilaia bona ‘iena aena gabudia ai ia raka’ be namo.​—⁠1 Pet. 2:⁠21.

5. Edena dala ai Mamoe Naria Tauna Namona be kongrigeisen taudia ia diba namonamo?

⁵ Mamoe naria tauna be iena mamoe edia toana bona kara ia diba namonamo, bona ena mamoe be ia idia abidadama henia, danu iena gadona idia diba bona idia kamonai. Unai hegeregerena, laulau dalanai Iesu ia gwau: “Egu mamoe lau diba bona egu mamoe be lau idia diba.” Oibe, ia be kongrigeisen ena ladana ia diba sibona lasi. Greek gado herevana idia hahanaia “diba” anina be “ta ta edia ladana, edia hemami bona noho daladia ia diba.” Oibe, Mamoe Naria Tauna Namona be ena mamoe ta ta ia diba namonamo, hegeregere edia dabu gaudia, manoka gaudia bona edia goada ia diba. Danu, ena mamoe dekenai idia vara gaudia ibounai ia diba. Bona mamoe be edia naria tauna idia diba namonamo bona ena henari karana idia abidadama henia.

6. Edena dala ai tau ese Mamoe Naria Tauna Namona ia tohotohoa diba?

⁶ Tau be Keriso ena kara ia tohotohoa neganai, namona be ia laloa ia be mamoe naria tauna bona iena ruma bese taudia be iena mamoe. Iena ruma bese taudia ta ta ia diba namonamo be gau badana. Edena dala ai unai ia karaia diba? Namona be iena ruma bese taudia ta ta ida ia herevahereva, edia lalohadai ia kamonai, ruma bese ena tomadiho, hebou, haroro bona moale karadia dekenai abia hidi maorodia ia karaia bona ia gunalaia. Keristani tau be Baibel ena hereva hegeregerena ena maduna ia huaia bona iena ruma bese taudia ia diba namonamo neganai, idia ese iena kwara dagina do idia matauraia bona ena henari karana idia abidadama henia diba. Unai amo do ia moale, badina idia ibounai be mai lalotamona ida Iehova idia tomadiho henia.

7, 8. Edena dala ai tau be Mamoe Naria Tauna Namona ia tohotohoa bona ruma bese taudia ia lalokau henidia?

⁷ Mamoe naria tauna namona be iena mamoe ia lalokau henidia danu. Evanelia bukadia ai Iesu ena mauri bona haroro gaukara edia sivarai ita stadilaia neganai, Iesu ese iena hahediba taudia ia lalokau henia karana ese iseda kudouna ia hamarerea. Oibe, idia dainai sibona ena mauri ia henia. Unai hegeregerena, tatau ese Iesu idia tohotohoa bona edia ruma bese idia lalokau henidia be namo. Dirava ena lalonamo ia ura abia tauna be mai dagedage ida ena adavana do ia biagua auka lasi. To, “Keriso ese kongrigeisen ia lalokau henia” hegeregerena, ena adavana ia lalokau henia be namo. (Efe. 5:25) Danu, mai hebogahisi bona hemataurai ida ena adavana ia hereva henia, badina Iehova ese idia ia laloa bada.​—⁠1 Pet. 3:⁠7.

⁸ Tama ese ena natudia ia hadibaia neganai, namona be Dirava ena hakaua herevadia ia badinaia. To, gau badana be lalokau ia hahedinaraia danu be namo. Natudia idia kerere neganai, mai lalokau ida ia matahakani henidia be namo. To, nega haida natudia be matahakani ena anina idia lalopararalaia haraga lasi. Unai dainai tama ia haheauka noho be gau badana. Hanaihanai Keristani tatau ese Iesu ena kara idia tohotohoa neganai, ruma bese maurina do ia namo bona do idia moale. Salamo torea tauna ena hereva hegeregerena, edia hetura karana Dirava ida be do ia goada.​—⁠Salamo 23:​1-6 duahia.

9. Noa bamona, Keristani tatau edia maduna be dahaka, bona dahaka ese idia ia durua diba?

⁹ Noa be Keristani tatau ese idia tohotohoa diba haheitalai namona ta. Noa ena nega ai Iehova ese kara dika taudia ia hadikaia ore. To, Iehova ese ia “idia badinaia lasi taudia latanai abata badana ia mailaia neganai, ia ese . . . Noa, bona ma taunimanima 7 ia hamauria.” (2 Pet. 2:⁠5) Noa ese ena ruma bese ia durua Abata amo idia roho mauri totona. Inai nega dokona ai idia noho Keristani tama edia maduna be Noa bamona. (Mat. 24:37) Unai dainai, gau badana be idia ese “mamoe naria tauna namona” ena kara idia stadilaia bona idia hekwarahi ia idia tohotohoa totona!

Hahine E, Emu Ruma Bese Oi Durua

10. Hahine be tau henunai ia noho anina be dahaka?

¹⁰ Aposetolo Paulo ia gwau: “Hahine be edia tatau henunai idia noho be namo, Lohiabada henunai idia noho hegeregerena.” (Efe. 5:22) Unai hereva be hahine ia hadikadia lasi. Bona Dirava be hahine ginigunana Heva ia do karaia lasi neganai, ia gwau: “Unai tau sibona ia noho be ia namo lasi, lau ese durua tauna ia bamona do lau karaia.” (Gen. 2:18) Hahine ena maduna be ena tau do ia “durua” ruma bese ia naria totona, bona unai be hahenamo ta.

11. Edena dala ai hahine namona ese iena ruma bese ia durua?

¹¹ Hahine namona be iena ruma bese naria totona ia gaukara goadagoada. (Aonega Herevadia 14:1 duahia.) Kavakava hahinena be iena tau ena kwara dagina ia matauraia lasi, to aonega hahine ese ena tau ia matauraia. Ia ese tanobada taudia edia kamonai lasi karana ia dadaraia bona iena tau henunai ia noho. (Efe. 2:⁠2) Kavakava hahine be iena tau ena ladana ia hadikaia, to aonega hahine ese edia natudia bona haida vairadiai, ena tau ia hanamoa. Bona ia ura lasi tau ia gwau henia eiava ia badu henia, badina unai be hemataurai karana lasi. Danu, ia ese moni ia gaukaralaia namonamo. Kavakava hahine ese ena adavana ena pei be anina lasi gaudia dekenai ia haorea kava. To, adavana ia durua hahinena be unai bamona lasi. Ena tau ia doria lasi ovataim gaukara ia karaia totona. To, ia karaia gaudia ia laloa namonamo, moni gaukaralaia dalana be ena tau ida ia herevalaia, bona aonega dalanai moni ia gaukaralaia.

12. Edena dala ai hahine namona ese ena ruma bese ia durua idia “noga noho” totona?

¹² Hahine namona be ena tau ia durua edia natudia be Baibel amo ia hadibaia, unai amo ruma bese be idia “noga noho.” (Aon. 1:⁠8) Ia ese ena tau ia durua Ruma Bese Ena Tomadiho idia karaia totona. Danu, tau ese natudia ia sisiba henia bona matahakani henidia neganai, ia ese tau ia durua. Kavakava hahine be unai bamona lasi. Iena kara dainai, ena natudia be Dirava do idia rakatania!

13. Bema tau be mai ena maduna idauidau dahaka dainai hahine ese ia durua be namo?

¹³ Ena tau ia durua namonamo hahinena ia itaia iena tau be kongrigeisen lalonai maduna ia huaia neganai, ena hemami be edena bamona? Ia moale bada! Herevana tau be hesiai tauna, elda, o reana Hospital Liesen Komiti eiava Regional Building Committee ena memba ta, unai hahenamo dainai ena hahine ia moale. Ena be gau haida do ia reaia, to ena kara bona hereva amo ena tau ia durua. Badina ia diba ena tau be kongrigeisen bona Iehova ena orea ia durua neganai, unai ese edia ruma bese ia durua idia noga noho totona.

14. (a) Hahine namona ese nega haida dahaka hekwakwanai ia davaria, bona edena dala ai unai ia hanaia diba? (b) Edena dala ai hahine ese ruma bese maurina ia hanamoa diba?

¹⁴ Nega haida hahine namona ese tau ena abia hidi ia badinaia be auka. Unai ia vara neganai, namona be ia badu lasi, to mai manau ida ena adavana ena abia hidi ia abia dae. (1 Pet. 3:⁠4) Danu, hahine namona be Baibel ese ia herevalaia abidadama hahine haida hegeregere Sara, Ruta, Abigaila, bona Iesu ena sinana Maria, edia kara ia tohotohoa. (1 Pet. 3:​5, 6) Danu, iseda negai idia noho “mai hemataurai ida idia kara” hahine badadia edia kara ia tohotohoa. (Tito 2:​3, 4) Hahine namona be ena tau ia lalokau henia bona matauraia dainai, edia headava maurina ia namo bona idia moale. Unai sibona lasi to edia ruma lalonai maino ia noho. Keristani tauna goadana dekenai unai bamona hahine be dava bada gauna ta!​—⁠Aon. 18:⁠22.

Matamata Taudia E, ‘Matana amo Ita Itaia Lasi Gaudia Raraia Noho’

15. Edena dala ai matamata taudia ese edia tama sina idia durua diba?

¹⁵ Edena dala ai umui matamata taudia ese emui tama sina umui durua diba emui ruma bese ia “noga noho” totona? Iehova ese oi dekenai ia henia ahuna namona mani oi laloa. Reana oi maragi negana amo emu tama sina be oi dekenai Paradaiso ena laulau idia hahedinaraia. To oi bada neganai, idia ese Baibel bona buka ma haida amo oi idia durua tanobada matamatana ai mauri hanaihanai oi laloa totona. Emu mauri lalonai Iehova hesiai henia gaukarana oi atoa guna neganai, unai ese oi do ia durua oi “noga noho” totona.

16, 17. Matamata taudia be mauri ena heau helulu lalonai idia kwalimu totona, dahaka idia karaia diba?

¹⁶ Korinto Ginigunana 9:24 duahia. Namona be aposetolo Paulo ena sisiba ita laloatao. Paulo ia gwau Iehova hesiai henia karana be heau helulu bamona bona mauri hanaihanai be kwalimu ahuna bamona. To, momo be kohu tahua guna karana ese edia lalona ia veria dainai, edia ahuna idia raraia noho lasi. Unai be aonega karana lasi! Moale korikorina do oi davaria lasi bema oi hekwarahi moni bona kohu momo oi haboua totona. Badina moni ese ia hoia diba kohu be do idia noho hanaihanai lasi. To, namona be matana amo oi “itaia lasi gaudia” oi raraia noho. Dahaka dainai? Badina “ita itaia lasi gaudia be idia noho hanaihanai.”​—⁠2 Kor. 4:⁠18.

¹⁷ “Ita itaia lasi gaudia” be Basileia ena hahenamo idauidau. Nega vaira ai unai gaudia oi moalelaia totona, namona be emu mauri oi gaukaralaia namonamo. Iehova hesiai henia karana amo moale korikorina oi davaria diba. Danu, unai ese oi do ia durua nega kwadogi lalonai eiava gabeai oi hagugurua diba tahua gaudia oi atoa totona.a Oi hagugurua diba tahua gaudia ese oi do idia durua Dirava oi hesiai henia bona emu ahuna, mauri hanaihanai oi laloa noho totona.​—⁠1 Ioa. 2:⁠17.

18, 19. Edena dala ai matamata tauna do ia diba ia be Iehova ena turana momokani?

¹⁸ Matamata taudia e, mauri hanaihanai ena dala dekenai oi raka totona, gau ginigunana be Iehova oi tura henia. Unai oi karaia vadaeni, a? Sibona oi nanadaia: ‘Lau sibona be Dirava lau tura henia eiava egu tama sina dainai Dirava lau hesiai henia noho, a? Lau be Dirava ese ia moalelaia karadia lau manadalaia, a? Lau gaukara goada Iehova tomadiho henia karadia, hegeregere guriguri, stadi, haroro bona hebou lao karana lau karaia noho totona, a? Egu hetura karana Dirava ida lau naria namonamo, a?’​—⁠Iam. 4:⁠8.

¹⁹ Namona be Mose ena haheitalai ita laloa dobu. Ena be Aigupito taudia edia mauri dalana ia manadalaia, to ia ura taunimanima do idia gwau ia be Iehova ia tomadiho henia tauna, ia ura lasi idia gwau ia be Farao ena tubuna. (Heberu 11:​24-27 duahia.) Keristani matamata taudia e, umui danu emui lalona umui hadaia Iehova do umui abidadama henia bona hesiai henia noho. Unai umui karaia neganai, hari mauri namona do umui moalelaia bona nega vaira ai “mauri korikorina” do umui abia.​—⁠1 Tim. 6:⁠19.

20. Mauri ena heau helulu ai daika ese ahuna do ia abia?

²⁰ Heau helulu lalonai, tau tamona sibona ese kwalimu ahuna ia abia. To, mauri ena heau helulu be unai bamona lasi. Dirava ena ura be “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:​3, 4) Momo be edia heau idia hagugurua vadaeni, to ma haida be oi danu idia heau noho. (Heb. 12:​1, 2) Mai haheauka ida idia heau ela bona dokona taudia ibounai ese kwalimu ahuna do idia abia. Unai dainai, emu lalona oi hadaia oi heau goadagoada noho totona!

21. Pura vaira ena stadi ai dahaka do ita herevalaia?

²¹ Iehova ena dina badana mai garina be do ia vara momokani. (Mal. 4:⁠5) Unai dina ia mai neganai, Keristani ruma bese idia hoa lasi be namo. Unai dainai, ruma bese taudia ta ta ese edia maduna idia huaia be gau badana. Dahaka gau ma haida oi karaia diba oi noga noho bona emu hetura karana Dirava ida ia goada totona? Pura vaira ena stadi ai ruma bese do idia noga noho daladia toi do ita herevalaia.

[Footnote]

Dahaka Oi Dibaia?

• Dahaka dainai Keristani ruma bese idia “noga noho” be gau badana?

• Edena dala ai tau be Mamoe Naria Tauna Namona ena haheitalai ia tohotohoa diba?

• Hahine namona be ena tau ia durua totona dahaka ia karaia diba?

• Edena dala ai matamata taudia ese edia ruma bese idia durua idia noga noho totona?

[Picture on page 9]

Keristani tauna dekenai hahine namona be dava bada gauna ta