‘Umui Huanai Idia Gaukara Goada Taudia Do Umui Matauraia’

“Umui huanai idia gaukara goada bona Lohiabada ena gaukara lalonai umui idia naria bona umui idia sisiba henia noho taudia, do umui matauraia.”​—⁠1 TES. 5:⁠12.

1, 2. (a) Paulo be Tesalonika kongrigeisen dekenai ena revareva ginigunana ia torea neganai, edia noho be edena bamona? (b) Paulo ese Tesalonika taudia ia hagoadaia, dahaka idia karaia totona?

MANI oi laloa, oi be aposetolo edia negai Tesalonika kongrigeisen dekenai oi noho. Unai kongrigeisen be Europe dekenai idia hamatamaia kongrigeisen ginigunana ta. Aposetolo Paulo be nega bada ia gaukaralaia unai tadikaka ia hagoadadia totona. Kongrigeisen ma haida dekenai ia karaia bamona, Paulo ese tau badadia ia abia hidi unai kongrigeisen tadikaka taihu idia gunalaia totona. (Kara 14:23) To unai kongrigeisen idia hamatamaia murinai, Iuda taudia be dala idia tahua Paulo bona Sila be unai gabu amo idia lulua. Unuseni idia noho Keristani taudia be reana idia mamia ta ese do ia durua lasi, bona reana idia gari danu.

² Momokani, Tesalonika idia rakatania murinai, Paulo be unai kongrigeisen matamatana ia laloa momo. Ia ura Tesalonika dekenai ia giroa lou, ‘to Satani ese iena dala ia koua.’ Unai dainai Timoteo ia siaia unai kongrigeisen ia hagoadaia totona. (1 Tes. 2:18; 3:⁠2) Timoteo ese unai kongrigeisen ena sivarai namona be Paulo dekenai ia abia mai neganai, Paulo ia ura Tesalonika taudia dekenai revareva ta ia torea. Danu, Paulo ese idia ia hagoadaia, ia gwau: “Umui idia naria . . . noho taudia, do umui matauraia.”​—⁠1 Tesalonika 5:​12, 13 duahia.

3. Dahaka dainai Tesalonika tadikaka taihu ese kongrigeisen idia naria tau badadia idia lalodia bada be namo?

³ Tesalonika Keristani taudia idia naria tadikakadia be hakaua taudia matamatadia dainai, edia diba be Paulo bona ia idia bamoa taudia bamona lasi. Danu, unai hakaua taudia be Ierusalema elda taudia bamona lasi, badina idia be hereva momokani lalonai nega daudau idia noho lasi. Oibe, Tesalonika kongrigeisen be hua haida sibona ia noho! To, kongrigeisen tadikaka taihu ese unai tau badadia idia laloa bada be namo, badina idia “gaukara goada,” kongrigeisen “idia naria” bona tadikaka taihu “idia sisiba henia.” Oibe, unai badina dainai, tadikaka taihu ese unai “[elda taudia] idia lalokau henia bona idia lalodia bada.” Paulo ese unai hereva ia gwauraia murinai, idia ia sisiba henia, ‘ta ta ida maino ai do idia noho hebou’ totona. Bema oi be Tesalonika dekenai oi noho, elda taudia edia gaukara namona do oi laloa bada, a? Emu kongrigeisen ai, Dirava ese Keriso amo “harihari gaudia bamona” ia henia taudia be edena bamona oi lalodia?​—⁠Efe. 4:⁠8.

“Gaukara Goada”

4, 5. Dahaka dainai Tesalonika kongrigeisen idia naria tau badadia idia gaukara goada tadikaka taihu idia hadibaia totona? Bona dahaka dainai hari danu be unai bamona?

⁴ Paulo bona Sila be Berea dekenai idia lao murinai, Tesalonika kongrigeisen ena tau badadia be edena dala ai idia “gaukara goada”? Paulo bamona, idia be Baibel idia gaukaralaia kongrigeisen taudia idia hadibaia totona. Reana do oi laloa, ‘Tesalonika tadikaka taihu be Dirava ena Hereva idia laloa bada, a?’ Badina Baibel ia gwau: “Berea dekenai idia noho Iuda taudia be laloa namonamo taudia, Tesalonika taudia bamona lasi, badina . . . dina ta ta ai Toretore Helagadia idia tahua namonamo.” (Kara 17:11) Unai siri ese Tesalonika ai idia noho Iuda taudia ibounai ia herevalaia, to unuseniai idia noho Keristani taudia ia herevalaia lasi. Badina idia ese ‘Dirava ena hereva idia abia dae, ia be taunimanima edia hereva lasi, to ia be Dirava ena hereva.’ (1 Tes. 2:13) Unai kongrigeisen idia naria tau badadia be idia gaukara goada tadikaka taihu idia hadibaia totona.

⁵ Hari inai negai, igui hesiai tauna oreana ese Baibel idia herevalaia buka bona magasin be “nega korikori ai” Dirava ena mamoe dekenai ia henia. (Mat. 24:45) Igui hesiai tauna ena hakaua henunai, elda taudia idia gaukara goada edia tadikaka taihu dekenai Dirava ena hereva idia hadibaia totona. Kongrigeisen ai idia noho taudia dekenai Baibel bukadia momo idia noho, bona gado haida ai, tulu namodia hegeregere, Watch Tower Publications Indeks bona Watchtower Library CD-ROM idia noho. Elda taudia ese kongrigeisen idia hadibaia totona, hora momo lalonai hebou ena kahana idauidau idia hegaegaelaia, unai amo do idia henia kahana ese edia tadikaka taihu ia durua bada. Elda taudia be nega bada idia haorea hebou badadia bona maragidia edia kahana idauidau idia hegaegaelaia totona. Idia haorea nega ena bada oi laloa danu, a?

6, 7. (a) Dahaka dainai Tesalonika kongrigeisen ena tau badadia ese Paulo idia tohotohoa be namo? (b) Dahaka dainai hari elda taudia ese Paulo idia tohotohoa be auka?

⁶ Tesalonika kongrigeisen ena tau badadia be Paulo ese ena haheitalai namona idia laloatao, ia ese mamoe oreana ia naria. Paulo be mamoe oreana naria gaukarana ia karaia kava lasi, to lalokau dainai ia karaia. Stadi gunanai ita herevalaia bamona, ia “kara auka lasi,” to ‘natudia ia ubua bona naria sinana ta bamona ia kara.’ (1 Tesalonika 2:​7, 8 duahia.) Ia ura dikadika ‘ena mauri danu ia henia idia ia durua totona’! Unai dainai tau badadia ese mamoe naria gaukarana dekenai, Paulo idia tohotohoa.

⁷ Hari inai negai, elda taudia be mamoe oreana idia laloa bada karana amo Paulo idia tohotohoa. Tadikaka taihu haida edia kara dainai, idia oi tura henia be auka. To, laloparara elda taudia be unai bamona tadikaka taihu “idia matauraia.” (Aon 13:15) Momokani, elda tauna be goevadae lasi dainai, reana ia auka ta ta edia kara namona ia itaia totona. To, ia hekwarahi ibounai ia kara auka henia lasi dainai, ia be Keriso henunai mamoe naria tauna namona. Bona ena kara dainai ita hanamoa be namo, ani?

8, 9. Edena dala haida ai, hari elda taudia be ‘ita idia naria’?

⁸ Badina namona dainai, ita ibounai be elda taudia edia ‘henunai do ita noho.’ Paulo ia gwau, ‘idia ese ita idia naria.’ (Heb. 13:17) Unai hereva amo mamoe naria tauna korikorina ena gaukara ita laloa, ia be ena mamoe gimaia totona ia mahuta lasi. Unai hegeregerena, hari elda taudia ese lauma bona tauanina dalanai idia gorere taudia eiava hekwakwanai ma haida idia abia taudia durua totona idia mahuta lasi. Hegeregere, Hospital Liaison Committee tadikakadia be hanuaboi ai idia mahuta namonamo lasi, badina tadikaka taihu ese idia noidia heduru idia henia totona. To, unai bamona nega aukadiai ita idia durua dainai, edia heduru ita laloa bada!

⁹ Regional Building Committee bona heduru henia komiti be idia gaukara goada tadikaka taihu idia durua totona. Mai kudouna ibounai ida edia gaukara ita durua be gau badana! Lagani 2008 ai, Saiklon Nargis ese Myanmar ia hadikaia murinai, tadikaka edia heduru mani ita laloa. Gabu ta ladana Irrawaddy Delta ai, Bothingone Kongrigeisen ia noho, bona tadikaka be unai gabu dekenai idia lao totona, mase tauanidia momo idia noho gabuna idia hanaia. Unai gabu ai idia ginidae neganai, tadikaka taihu ese heduru henia tadikakadia bona guna ia sekit tauna idia itaia, vadaeni mai tai danu idia boiboi, idia gwau: “Itaia! Inai be iseda sekit naria tauna! Iehova ese ita ia hamauria!” Elda taudia ese dina bona hanuaboi idia karaia gaukarana oi laloa bada, a? Elda taudia haida be hekwakwanai badadia hanamoa ena hahemaoro komiti gaukaradia idia karaia. Inai elda taudia be idia karaia gaudia dainai idia hekokoroku lasi; to edia gaukara amo namo idia davaria taudia idia moale bada.​—⁠Mat. 6:​2-4.

10. Elda taudia be dahaka gaukara ma haida idia karaia?

¹⁰ Hari, elda taudia be pepa gaukaradia idia karaia danu. Hegeregere, elda orea ena kodineita be wiki ta ta ena hebou sediual ia hegaegaelaidia. Kongrigeisen ena seketere be hua bona lagani ta ta edia haroro ripoti ia naria. Sikuli naria tauna be do ia karaia sediual ia lalohadailaia namonamo guna. Hua toi toi murinai, kongrigeisen ena akaun idia odit. Elda taudia be brens opesi amo idia mai revareva idia duahia bona ena hakaua dalana idia badinaia, unai ese idia ia durua edia “abidadama ia tamona” totona. (Efe. 4:​3, 13) Unai elda taudia be idia gaukara goada dainai, ‘gau ibounai idia karaia namonamo bona dala maorona ai idia karaia.’​—⁠1 Kor. 14:⁠40.

“Umui Idia Naria”

11, 12. Daidia be kongrigeisen idia naria, bona edena dala ai unai idia karaia?

¹¹ Paulo ese Tesalonika ena tau badadia ia herevalaia neganai, ia gwau idia be unai kongrigeisen “idia naria.” Idaunegai Grik gado ai, unai hereva ena anina be “vairanai gini” bona ena anina ma haida be “hakaua bona gunalaia.” (1 Tes. 5:12) Paulo ma ia gwau unai elda taudia be idia “gaukara goada.” Ia ese naria tauna tamona ia herevalaia lasi, to unai kongrigeisen idia naria tau badadia ibounai ia herevalaia. Hari elda taudia momo be kongrigeisen vairanai idia gini bona hebou idia hakaua. Vanegai inai ladana, “elda orea edia kodineita” idia abia, unai ese ita ia durua, elda taudia ibounai be tauanina tamona bamona ita itaia totona.

¹² Kongrigeisen “idia naria” ena anina be, hadibaia gaukara sibona idia karaia lasi. Unai hereva tamona be 1 Timoteo 3:4 dekenai idia gaukaralaia danu. Paulo ia gwau, elda tauna be “dala maorona ai iena ruma bese ia naria, bona iena natudia be mai laloa namonamo ida iena henunai idia noho.” Inai siri ai idia gaukaralaia herevana “naria” ese ia hahedinaraia, elda tauna be ena natudia ia hadibadia sibona lasi, to ena ruma bese ia gunalaia bona ena ‘natudia be iena henunai idia noho.’ Oibe, elda taudia be kongrigeisen idia gunalaia, bona tadikaka taihu idia durudia Iehova ena henunai idia noho totona.​—⁠1 Tim. 3:⁠5.

13. Dahaka dainai elda edia hebou ai abia hidi ta idia karaia haraga lasi?

¹³ Elda taudia ese mamoe idia naria namonamo totona, idia ese tadikaka taihu durua daladia idia herevalaia. Bema elda tamona ese gau ibounai ia karaia, toana be gaukara do ia heau haraga diba. To, aposetolo edia negai ia noho hakaua oreana ena haheitalai idia tohotohoa, hari elda oreana idia herevahereva hebou bona Baibel amo heduru idia tahua. Edia tahua gauna be inai: Idia ura Baibel ena hakaua herevadia amo kongrigeisen idia durua. Elda ta ta be edia hebou totona idia hegaegae neganai, idia ese Baibel siridia bona igui hesiai tauna oreana amo idia mai hakaua herevadia idia tahua namonamo. Momokani, unai idia karaia totona nega bada idia haorea. Nega haida elda taudia edia lalohadai be idauidau gau ta dekenai, hegeregere aposetolo edia negai bamona, hakaua oreana ena lalohadai be idauidau kopina utua karana dekenai. Bema unai bamona ia vara, nega idia atoa unai gauna idia tahua bona idia karaia abia hidi be Baibel ena hereva ida ia hegeregere be namo.​—⁠Kara 15:​2, 6, 7, 12-14, 28.

14. Elda taudia be mai lalotamona ida idia gaukara hebou karana oi laloa bada, a? Dahaka dainai unai bamona oi laloa?

¹⁴ Bema elda ta ia ura elda ma haida ese ena lalohadai sibona idia badinaia, dahaka ia vara diba? Eiava bema ta be Diotrepe bamona heai ia havaraia, be edena bamona? (3 Ioa. 9, 10) Kongrigeisen taudia ibounai be do idia lalohisihisi. Bema Satani be aposetolo edia negai ia noho kongrigeisen lalonai badu ia havaraia, vadaeni ita diba, ia ura hari kongrigeisen ena maino ia hadikaia danu. Reana ia ese tauanina ena ura dikana ta, hegeregere ladana bada tahua karana do ia gaukaralaia. Unai dainai, elda taudia be manau karana idia hahedinaraia bona tauanina tamona bamona idia gaukara hebou. Elda taudia idia manau bona tauanina tamona bamona idia gaukara hebou karana ita laloa bada, ani?

“Umui Idia Sisiba Henia”

15. Dahaka dainai elda taudia ese tadikaka ta o taihu ta idia sisiba henia?

¹⁵ Paulo be tau badadia ese do idia karaia gaukara badana​—⁠mamoe sisiba henia gaukarana unai​—⁠ia herevalaia. Ta oi sisiba henia karana ese ia hahedinaraia lasi ia oi badu henia. (2 Tes. 3:15) Hegeregere, Paulo ese Korinto taudia ia tore henia neganai, ia gwau: “Inai gaudia lau torea, umui lau hahemaraia totona lasi, to umui be egu lalokau natudia dainai umui lau sisiba henia.” (1 Kor. 4:14) Paulo ese ma haida ia lalokau henia dainai, idia ia sisiba henia.

16. Elda taudia ese ma haida idia sisiba henia neganai, dahaka idia laloatao be namo?

¹⁶ Elda taudia idia laloatao, ma haida idia sisiba henia neganai, ia idia kara henia dalana be mai anina bada. Idia hekwarahi Paulo bamona, idia manau, lalokau idia hahedinaraia bona kerere tauna idia durua namonamo. (1 Tesalonika 2:​11, 12 duahia.) Oibe, elda taudia be ‘edia hadibaia karana lalonai hereva momokani idia dogoatao auka, vadaeni hereva momokani amo haida do idia hagoadaia.’​—⁠Tito 1:​5-9.

17, 18. Elda ta ese oi ia sisiba henia neganai, dahaka oi laloatao be namo?

¹⁷ Momokani, elda taudia be goevadae lasi bona idia gwauraia herevadia dainai, gabeai idia lalohisihisi. (1 Kin. 8:46; Iam. 3:⁠8) Danu, elda taudia idia diba, sisiba idia abia tadikaka bona taihu be ‘unai idia moalelaia lasi, to idia lalohisihisilaia.’ (Heb. 12:11) Unai dainai, elda ta ese tadikaka o taihu ta ia do sisiba henia lasi neganai, do ia herevalaia gaudia ia laloa dobu bona ia gurigurilaia. Bema elda ta ese oi ia sisiba henia, iena lalokau karana oi abia dae, a?

¹⁸ Bema oi be gorere ta oi davaria bona medikol dalanai unai gorere ena anina idia gwauraia diba lasi. Bena doketa ta ese unai gorere ena badina ia davaria bona ia gwauraia hedinarai, to unai oi abia dae be auka. Oi be unai doketa do oi badu henia, a? Lasi! Bema ia gwau oi be opereisen do oi abia, unai do oi abia dae badina oi diba unai be oiemu namo totona. Doketa ese unai ia herevalaia dalana amo emu hemami ia hadikaia diba, to unai ese oi ia koua abia hidi ta oi karaia lasi totona, a? Reana lasi. Unai hegeregerena, namo lasi oi idia sisiba henia dalana ese oi ia koua Iehova bona Iesu ese idia gaukaralaia taudia oi kamonai henia totona. Badina idia ese oi idia durua hereva momokani dekenai oi noho bona emu hetura karana Iehova ida oi gimaia totona.

Elda Taudia be Iehova ese Ia henia, Idia Ita Laloa Bada

19, 20. Iehova ese “harihari gaudia bamona” ia henia taudia be edena bamona oi lalodia bada?

¹⁹ Bema harihari gauna ta oi abia, dahaka do oi karaia? Emu laloa bada karana oi hahedinaraia totona, unai do oi gaukaralaia, a? Iehova ese oi totona Keriso ena amo “taunimanima be harihari gaudia bamona” ia henia. Unai harihari gaudia oi laloa bada dalana ta be, elda taudia ese idia henia tok oi kamonai namonamo bona idia gwauraia point namodia oi badinaia toho. Danu, hebou gabudiai haere oi henia, unai amo oi hahedinaraia idia oi laloa bada. Elda taudia ese idia gunalaia gaukarana, haroro gaukara unai, oi durua. Bema elda ta ena sisiba amo namo oi abia, ia dekenai unai oi herevalaia be namo, ani? Bona danu, namona be oi hahedinaraia elda taudia edia ruma bese oi laloa bada, ani? Laloatao, elda tauna be kongrigeisen totona ia gaukara goada dainai, ena ruma bese ida do ia noho hebou negana ia hamaragia.

²⁰ Oibe, ita hahedinaraia elda taudia ita laloa bada ena badina be inai: Idia be ita huanai idia gaukara goada, ita idia naria, bona ita idia sisiba henia. Momokani, Iehova ena lalokau dainai, “taunimanima be harihari gaudia bamona” ia henia!

Oi Laloatao, A?

• Dahaka badina haida dainai Tesalonika tadikaka taihu ese edia gunalaia taudia idia laloa bada?

• Edena dala ai emu kongrigeisen elda taudia be oi totona idia gaukara goada?

• Edena dala ai oi idia naria elda taudia amo namo oi davaria?

• Elda ta ese oi ia sisiba henia neganai, dahaka oi laloatao be namo?

[Picture on page 27]

Elda taudia ese dala idauidau ai kongrigeisen idia naria karana oi laloa bada, a?