Iehova be Gau Ibounai Ia Karaia Diba

IDIA GAUKARA DABA AMO ELA BONA DINA IA DIHO

Lau be lagani 1937 ai lau vara, unai be kolkhoz o farm ta dekenai, ia be Tokmok, Kyrgyzstan kahirakahira. Emai famili be Kyrgyz taudia, bona Kyrgyz gado ai gaukaralaia. Egu tama sina be biru taudia, bona kolkhoz dekenai idia gaukara daba amo ela bona dina ia diho. Uma gabu dekenai idia gaukara taudia be nega ibounai aniani idia abia, to lagani tamona ai idia be nega tamona sibona pei idia abia. Egu sinana ia hekwarahi bada lau bona egu tadina kekeni ia naria totona. Lagani 5 lau sikuli murinai, kolkhoz dekenai lau gaukara matamaia danu.

Lau noho hanuana ai, taunimanima momo be idia ogogami, bona ibounai idia hekwarahi bada mauri durua gaudia idia abia totona. Lau be mero matamata dainai, mauri ena badina o vaira nega lau laloa bada lasi. Lau laloa lasi Iehova Dirava bona ena ura dekenai lau kamonai hereva momokani ese egu mauri do ia haidaua. Unai sivarai be Kyrgyzstan bona gabu momo dekenai ia lao be moale gauna. Ia be egu hanua Kyrgyzstan ena not kahana ai ia matamaia.

IDIA GUIA TAUDIA ESE KYRGYZSTAN DEKENAI HEREVA MOMOKANI IDIA MAILAIA

Lagani 1956 ai, Kyrgyzstan dekenai momo be Iehova Dirava ena hereva momokani idia kamonai matamaia. Unai hereva idia abia dae totona, idia ese guna idia dogoatao auka lalohadaina idia dadaraia be namo. Dahaka dainai? Badina Kyrgyzstan be guna Union of Soviet Socialist Republics (USSR) henunai ia noho. USSR ese ia naria tanodia ibounai dekenai, Iehova ena Witnes taudia be politikol karadia amo idia gini siri. (Ioa. 18:36) Unai dainai dagedage bada idia davaria, badina haida idia gwau idia be Komiunis gavamani idia inai henia. To herevana unai ia vara, kudou-maoro taudia momo be Dirava ena Hereva idia abia dae. Oibe, lau dibaia mai anina bada gauna be, Iehova be “gau ibounai ia karaia diba.”​—⁠Mar. 10:27.

Ena be Kyrgyzstan ai Iehova ena Witnes taudia idia dagedage henia, to edia namba ia bada daekau. Dahaka dainai? Siberia be USSR henunai, bona Gavamani idia inai henia taudia be unuseniai idia guidia. Unai taudia idia ruhaia neganai, idia momo be Kyrgyzstan dekenai idia giroa, bona idia haida ese hereva momokani idia mailaia. Idia ta be Emil Yantzen, ia be lagani 1919 ai, Kyrgyzstan dekenai ia vara. Emil be dibura kamepa ta dekenai idia siaia lao bona unuseniai Witnes taudia ia hedavari henia. Ia ese hereva momokani ia abia dae bona lagani 1956 ai, ena hanua dekenai ia giroa lou. Emil be Sokuluk kahirakahira ia noho, egu hanua unai. Lagani 1958 ai, Sokuluk dekenai kongrigeisen ginigunana idia hamatamaia.

Lagani ta bamona murinai, Victor Vinter be Sokuluk dekenai ia lao. Unai tadikaka be dagedage bada ia davaria. Iena gini siri karana dainai, nega rua dibura ruma dekenai idia atoa, unai nega ta ta ai ia be lagani toi ia noho, bona ma lagani 10 idia hadiburaia bona lagani 5 idia guia. Ena be unai dagedage ia vara, to tomadiho momokani be ia bada ia lao.

EGU HANUA DEKENAI HEREVA MOMOKANI IA MAI

Lagani 1963 ai, Kyrgyzstan dekenai Witnes taudia be 160 bamona, idia momo be Germany, Ukraine, bona Russia amo. Idia ta be Eduard Varter, ia be guna idia guia bona lagani 1924 ai Germany dekenai ia bapatiso. Lagani 1940 lalodiai, Nazi taudia ese dibura kamepa dekenai ia idia siaia lao, bona lagani haida murinai, USSR ena Komiunis taudia ese Eduard idia guia. Lagani 1961 ai, ia be taoni ta ladana Kant dekenai idia abia lao. Unai taoni be egu hanua kahirakahira.

Iehova ia hesiai henia taihu ta, Elizabeth Fot, be Kant dekenai ia noho danu. Sibona durua totona ia be dabua ia turidia. Ia be turituri ia diba namonamo dainai, doketa bona tisa taudia edia dabua ia turidia danu. Ia amo dabua ia hoia hahine ta be Aksamai Sultanalieva, iena adavana be loea tauna ta. Aksamai be Elizabeth dekenai dabua haida hoia totona ia mai, to mauri ena anina bona mase taudia totona henanadai momo ia henia. Elizabeth ese Baibel amo iena henanadai ibounai ia haerelaia. Gabeai Aksamai be sivarai namona harorolaia goadagoada taihuna ai ia lao.

Unai nega ai, Nikolai Chimpoesh, ia be Moldova amo, be sekit tauna ai ia lao bona kahirakahira lagani 30 unai gaukara ia karaia. Nikolai be kongrigeisen ia vadivadi henia sibona lasi, to buka bona magasin ia printaia bona hariharilaia danu. Ia karaia gaukarana be ofesa taudia ese idia itaia. Eduard Varter ese Nikolai ia hagoadaia, ia gwau: “Bema ofesa taudia ese oi idia nanadaia, oi hamaorodia iseda buka bona magasin be iseda hedikwota Brooklyn amo ita abia. KGB ofesa tauna ena vairana do oi itaia. Oi gari lasi.”​—⁠Mat. 10:19.

Edia herevahereva murinai, Nikolai be KGB edia hedikwota dekenai idia abia lao, unai be Kant dekenai. Ia vara gauna ia herevalaia, ia gwau: “Ofesa tauna ese lau ia nanadaia, iseda buka bona magasin be edeseni ita abia. Ia lau hamaoroa, Brooklyn amo ai abia. Ofesa tauna ia diba lasi dahaka do ia hereva. Lau ia ruhaia bona gabeai lau ia boiria lou lasi.” Egu hanua dekenai, unai be Kyrgyzstan ena not kahanai, Witnes taudia be mai gari lasi ida sivarai namona idia harorolaia. Lagani 1981 ai, egu hahine, Mairambubu, be Iehova ena hereva momokani ia abia dae, bena gabeai ai ese ai abia dae danu.

EGU HAHINE ESE HEREVA MOMOKANI IA ABIA DAE

Mairambubu be Kyrgyzstan ena taoni ta Naryn amo. Dina ta August 1974 ai, ia be egu taihuna ia vadivadi henia, unai be nega ginigunana ai ruaosi ai hedavari. Bona Mairambubu lau ura henia. Unai dina tamona dekenai ai ruaosi ai headava.

Lagani 1981 ai, Mairambubu be basi ta ia guia bona maketi dekenai ia lao noho lalonai, matamanai lau gwauraia herevana ia kamonai. Egu hahine ia ura diba ma haida ia abia, unai dainai unai hahine ena ladana bona adres ia noia. Iena ladana be Apun, to ia naria namonamo badina unai nega ai Iehova ena Witnes taudia edia gaukara idia do taravatua. Apun ese egu hahine dekenai ena adres ia henia lasi, to emai adres ia abia. Egu hahine be mai moale ida ruma dekenai ia giroa.

Mairambubu ia gwau: “Lau be hereva namodia lau kamonai. Hahine ta be lau ia hamaoroa daudau lasi taunimanima be do idia mase lasi. Uda sisia danu be do idia manau.” Lau dekenai unai be gori sivarai ta bamona. Lau gwau: “Ita naria ela bona ia vadivadi neganai, ia gwauraia herevana do ia hahedinaraia.”

Hua toi murinai, Apun be ai ia vadivadi henia. Unai murinai, taihu ma haida be ai idia vadivadi henia, unai nega ai Witnes ginigunadia ai idia lao Kyrgyz taudia haida ai hedavari henia. Unai taihudia ese ai dekenai Iehova bona ena ura taunimanima totona idia herevalaia. Bona ai ida From Paradise Lost to Paradise Regained bukana idia stadi henia.a Tokmok gado ai, inai buka ena kopi be tamona sibona dainai, ai sibona emai kopi ai toredia.

Ai dibaia gauna ginigunana be Genese 3:15 ai ia noho peroveta herevana. Unai peroveta herevana be Iesu dekenai ia guguru, badina ia be Dirava ena Mesia King. Unai mai anina bada sivaraina be taunimanima ibounai ese idia kamonai be namo! Unai dainai unai sivarai harorolaia gaukarana ai durua be namo. (Mat. 24:14) Daudau lasi, Baibel ena hereva momokani ese emai mauri ia haidaua matamaia.

TARAVATU HENUNAI AI HEBOU BONA BAPATISO

Tokmok ai, Keristani tadikaka ta ese wedin ta dekenai ai ia boiria. Lau bona egu adavana ai itaia Witnes taudia edia kara be idau. Wedin ai kekero muramura be lasi, bona aria be dala maorona ai idia karaia. To ai lao henia wedin ma haida ai, vadivadi taudia be nega momo idia inuinu kekero, idia kara kava, bona hereva dikadia idia gwauraia.

Tokmok ai ia noho kongrigeisen ena Keristani hebou haida dekenai ai lao danu. Bema weda ia namo, unai heboudia be au momo gabudia dekenai idia karaia. Tadikaka taihu idia diba pulisi taudia be nega momo ai idia itaia, unai dainai tadikaka be gima tauna ta idia atoa. Paraka negana ai ruma ta lalonai ai hebou. Nega haida, pulisi be ai hebou rumana dekenai idia mai bona ai idia sekea. July 1982 ai, lau bona Mairambubu be Chüy Sinavaina dekenai ai bapatiso neganai, ai naria namonamo. (Mat. 10:16) Tadikaka be orea maragidia dekenai idia mai bona uda dekenai idia haboua. Basileia ane ai abia bona bapatiso ena tok ai kamonai.

EMAI HESIAI GAUKARA AI HABADAIA

Lagani 1987 ai, tadikaka ta ese lau ia noia, Balykchy taoni dekenai ia noho kamonai tauna lau vadivadi henia totona. Unuseni lau lao totona, trein amo hora 4 do lau lao. Nega ta ta ai, Balykchy dekenai haroro totona ai lao, bona unuseniai kamonai taudia momo ai davaria. Unai be nega namona emai hesiai gaukara ai habadaia totona.

Lau bona Mairambubu be nega momo Balykchy dekenai ai lao. Wikeni momo unuseni ai noho, ai haroro, bona Keristani heboudia ai karaia. Taunimanima momo be iseda buka bona magasin idia ura henia. Tokmok amo, iseda pablikeisen be mishok (poteto idia udaia puse) lalonai ai udaia. Hua ta ta ai, puse rua be iseda buka bona magasin amo ai hahonua, to unai be hegeregere lasi. Trein amo Balykchy dekenai ai lao mai neganai, pasendia ai haroro henidia.

Lagani 1995 ai, Balykchy dekenai kongrigeisen ta ai matamaia​—⁠emai vadivadi ginigunana bena lagani 8 idia hanaia murinai unai ia vara. Tokmok amo Balykchy dekenai ai lao totona, moni bada ai negea. Emai moni be bada lasi, to dahaka ese ai ia durua? Keristani tadikaka ta be ai ia durua totona, nega momo ai dekenai moni ia henia. Iehova ia itaia ai ura emai hesiai gaukara ai habadaia, unai dainai ai dekenai “guba ena uindo” ia kehodia. (Mal. 3:10) Momokani, Iehova be gau ibounai ia karaia diba!

FAMILI BONA HARORO GAUKARA DEKENAI AI BISI

Lagani 1992 ai, Kyrgyz taudia edia elda ginigunana ai lau lao. Tokmok ai, haroro teritori matamatadia ai davaria. Sikuli ta dekenai idia lao Kyrgyz matamata taudia ida Baibel ai stadilaia. Ai stadi henia matamata tauna ta be hari Brens Komiti ta, bona ma rua be idia spesel painia. Emai kongrigeisen taudia haida danu ai durua. Lagani 1990 lalodiai, iseda pablikeisen bona hebou be Russia gado dekenai ai karaia. To, kongrigeisen taudia momo be Kyrgyz gado idia gaukaralaia. Unai dainai idia totona hereva lau hahanaia, unai amo hereva momokani idia lalopararalaia diba.

Lau bona Mairambubu ai hekwarahi danu emai famili ai naria totona. Haroro gaukara bona kongrigeisen heboudia dekenai emai natudia ai hakaua lao. Emai natuna kekeni Gulsayra​—⁠unai neganai ena mauri lagani be 12​—⁠be nega momo idia raka hanai taudia dekenai Baibel ia herevalaia. Bona emai natudia be idia ura bada Baibel ena siri idia lalodiatao. Unai dala amo emai natudia, bona gabeai emai tubudia, be kongrigeisen ena gaukara idauidau idia durua. Emai natudia 9 bona tubudia 11 amo, 16 be Iehova idia hesiai henia o edia tama sina ida hebou dekenai idia lao noho.

GAU HAIDA AI HAIDAUA

Lagani 1950 lalodiai, emai tano ai Iehova ena gaukara idia hamatamaia taudia be hari idia vara noho senisi dekenai do idia hoa bada. Lagani 1990 amo, taravatu idia kokia bona ai be sivarai namona ai harorolaia bona hebou badadia ai karaia diba.

Lagani 1991 ai, lau bona egu hahine be nega ginigunana hebouhebou ta dekenai ai lao. Unai be Alma-Ata ai idia karaia, hari idia gwauraia Almaty, Kazakhstan ai. Bona lagani 1993 ai, Kyrgyzstan tadikaka ese Bishkek ena Spartak Steidiam ai, hebouhebou ginigunana idia karaia. Hebouhebou ia do matamaia lasi neganai, pablisa be wiki tamona lalonai unai steidiam idia hagoevaia. Steidiam ia naria tauna be unai kara dekenai ia hoa bada dainai, gwaumaoro ia henia unai gabu do ai gaukaralaia davana lasi.

Lagani 1994 ai, Kyrgyz gado dekenai emai pablikeisen matamata ai abia. Hari Bishkek ena brens ofesi ai, trensleisen tim ta ese Kyrgyz gado ai buka bona magasin idia hahanaia. Oibe, lagani 1998 ai, Kyrgyzstan dekenai gavamani ese Witnes taudia dekenai gwaumaoro ia henia. Orea ena namba ia bada daekau, bona hari pablisa ibounai be 5,000 ia hanaia. Hari kongrigeisen ibounai be 83 bona grup maragidia be 25, idia be Chinese, English, Kyrgyz, Russia, Russia Saini gado, Turkish, Uighur, bona Uzbek. Unai tadikaka taihu ibounai be mai lalotamona ida Iehova idia hesiai henia, herevana edia tano be idauidau. Iehova ese unai senisi ibounai ia karaia.

Iehova ese egu mauri ia haidaua danu. Egu famili be idia ogogami bona greid 5 sibona lau haorea. To Iehova ese lau ia durua dainai, elda maduna lau abia bona diba bada taudia dekenai Baibel ena hereva momokani lau hadibaia diba. Oibe, Iehova be gau ibounai ia karaia diba. Egu ekspiriens ese lau ia hagoadaia, Iehova lau gwauraia hedinarai noho totona, badina ia be “gau ibounai ia karaia diba.”​—⁠Mat. 19:26.