“Mai Haheauka Ida Huahua Idia Havaraia” Taudia be Iehova ese Ia Lalokau Henidia

1, 2. (a) Herevana haroro teritori ai momo idia kamonai lasi, to dahaka dainai idia haroro noho taudia edia haheitalai be ita ia hagoadaia? (Laulau ginigunana itaia.) (b) Iesu ese ena “hanua” o teritori ai haroro gaukara ia karaia be edena bamona ia herevalaia? (Futnout itaia.)

UNITED STATES ai, Sergio bona ena adavana Olinda be painia taudia, bona edia mauri lagani be 80 ia hanaia. Hari, edia aena idia hisihisi dainai idia raka haraga be ia auka. To, lagani momo lalodiai idia karaia bamona, daba 7 oklok ai, idia be taoni​—⁠taunimanima momo idia loaloa gabuna​—⁠dekenai idia raka lao. Basi-stopu ta badinai idia helai bona iseda pablikeisen be idia raka hanai taudia dekenai idia hariharilaia. Ena be momo idia kamonai lasi, to Sergio bona Olinda be idia helai noho bona taunimanima idia kiri henia. Dina tubu ai, idia be metairametaira edia ruma dekenai idia raka lao. Ma daba dekenai, 7 oklok ai, idia be basi-stopu dekenai idia giroa lou. Lagani ta ta ai, wiki ta ena daba siks lalodiai, inai abidadama headava taudia be Basileia sivaraina idia harorolaia hanaihanai.

² Sergio bona Olinda bamona, iseda tadikaka taihu momo danu be lagani momo lalodiai edia teritori ai haroro gaukara idia karaia, herevana taunimanima idia kamonai lasi. Bema emu haroro teritori ai unai bamona hekwakwanai ia vara to oi haheauka noho, vadaeni oi ai hanamoa.a Iehova oi hesiai henia noho karana ese momo​—⁠lagani momo idia haheauka tadikaka danu​—⁠ia hagoadaia. Sekit naria taudia edia hereva haida be inai: “Haroro ai, unai bamona tadikaka goadadia ida lau gaukara hebou neganai, edia haheitalai be lau idia hagoadaia.” “Edia abidadama be lau ia hagoadaia lau haheauka totona, bona mai gari lasi ida lau haroro.” “Edia haheitalai ese lau idia hamoalea.”

3. Edena henanadai toi do ita herevalaia, bona dahaka dainai?

³ Iesu ese ita dekenai ia henia haroro gaukarana ita goadalaia totona, namona be inai henanadai toi ita haerelaia: Dahaka dainai nega haida ita lalomanoka? Edena dala ai huahua ita atoa diba? Dahaka ese ita do ia durua mai haheauka ida huahua ita atoa noho totona?

DAHAKA DAINAI NEGA HAIDA ITA LALOMANOKA?

4. (a) Edena dala ai Iuda taudia edia kara ese Paulo ia hahisia? (b) Dahaka dainai Paulo be unai bamona hemami ia abia?

⁴ Aposetolo Paulo bamona, reana nega ta ai oi lalomanoka badina emu teritori ai oi haroro to momo idia kamonai lasi. Paulo be lagani 30 lalodiai haroro gaukara ia karaia, bona ia durua taudia momo be Keriso ena hahediba taudia ai idia lao. (Kara 14:21; 2 Kor. 3:2, 3) To, Paulo ia durua Iuda taudia​—⁠ena bese taudia​—⁠haida sibona be Keristani taudia ai idia lao. Momokani, idia momo be Paulo ena hereva idia kamonai lasi, bona haida be ia idia dagedage henia. (Kara 14:19; 17:1, 4, 5, 13) Edena dala ai Iuda taudia edia kara ese Paulo ia hahisia? Ia gwau: “Lau be Keriso lau badinaia dainai, lau hereva momokani . . . lau be lau lalometau bada bona egu kudouna ia hisihisi noho.” (Roma 9:1-3) Dahaka dainai Paulo be unai bamona hemami ia abia? Badina ia be haroro gaukara ia ura henia bada. Bona ia ese Iuda taudia ia laloa bada dainai, ia haroro henidia. To, Paulo ia lalometau badina Iuda taudia be Dirava ena hebogahisi karana idia dadaraia.

5. (a) Dahaka dainai ita ura eda dekena taudia ita haroro henia? (b) Dahaka dainai nega haida ita lalomanoka?

⁵ Paulo bamona, taunimanima ita haroro henia badina idia ita laloa bada. (Mat. 22:39; 1 Kor. 11:1) Dahaka dainai? Badina ita sibona eda mauri amo ita itaia, Iehova idia hesiai henia taudia be hahenamo momo idia davaria. Iseda teritori ai idia noho taudia ita laloa neganai, ita sibona ita laloa, ‘Namona be idia ai durua, unai amo do idia itaia idia be dahaka gau namodia idia reaia noho!’ Unai dainai, hanaihanai idia ita hagoadaia Iehova sivaraina bona taunimanima totona do ia karaia gaudia idia dibaia totona. Unai be hegeregere, ita haroro henia taudia ita hamaoroa: ‘Ai be harihari gauna namona ta ai mailaia oi totona. Mani oi abia dae.’ To taunimanima ese unai harihari gauna idia abia dae lasi neganai, reana ‘eda kudouna ia hisihisi,’ Paulo bamona. Momokani, ita lalohisihisi badina eda abidadama ia manoka lasi, to badina haroro gaukara ita ura henia bada. So ena be nega haida ita lalomanoka to ita haheauka. Lagani 25 lalodiai painia gaukara ia karaia taihuna, Elena, ena hereva ita abia dae, ia gwau: “Lau dekenai haroro gaukara be ia auka. To, inai gaukara sibona ia noho lau karaia totona.”

EDENA DALA AI HUAHUA ITA ATOA DIBA?

6. Edena henanadai be hari do ita herevalaia?

⁶ Herevana edeseniai ita haroro, to dahaka dainai ita diba momokani Iehova be eda gaukara dekenai ia moale? Unai henanadai badana ita haerelaia totona, mani Iesu ena parabole rua ita herevalaia, badina be inai hereva, “huahua ia atoa” karana ia gwauraia danu. (Mat. 13:23) Vain parabolena mani ita herevalaia guna.

7. (a) “Biru tauna,” “vain,” bona “rigi” be daidia idia laulaulaia? (b) Ita ura edena henanadai ita haerelaia?

⁷ Ioane 15:1-5, 8 duahia. Iesu ese ena aposetolo taudia ia hamaoroa: “Lauegu Tamana ese hanamoa ia abia dalana be inai, umui ese huahua momo umui havaraia noho bona umui hamomokania umui be egu hahediba taudia.” Iesu ia gwau ia be “vain momokanina,” ena hahediba taudia be “rigi,”b bona Iehova be “biru tauna.” To, Keriso ena hahediba taudia ese dahaka huahua idia havaraia be namo? Inai parabole lalonai, Iesu be unai huahua ena ladana ia gwauraia lasi, to ia gwauraia hereva badana ta ese ita ia durua unai henanadai ita haerelaia totona.

8. (a) Dahaka dainai inai parabole ai inai hereva “huahua” anina be, hahediba taudia matamatadia lasi? (b) Iehova ena kara be edena bamona?

⁸ Iesu ese ena Tamana be inai bamona ia herevalaia: “Lau dekenai idia noho rigi ibounai bema huahua idia havaraia lasi, egu Tamana ese do ia kokidia.” Ita gwau diba, Iehova ena hesiai taudia ai ita lao dalana tamona sibona be, bema huahua ita havaraia. (Mat. 13:23; 21:43) So, inai parabole ai inai hereva “huahua” anina be, hahediba taudia matamatadia lasi. (Mat. 28:19) Teritori haida ai taunimanima be idia kamonai lasi dainai, Witnes taudia goadadia idia hekwarahi ta be hahediba tauna ai idia halaoa totona​—⁠unai Witnes taudia ese huahua ia havaraia lasi “rigi” ia laulaulaia be lalohadai kererena! Dahaka dainai? Badina taunimanima ita doria diba lasi hahediba taudia ai idia lao totona. Iehova be lalokau Diravana. Bona ia ura lasi ena hesiai taudia ia doria idia hagugurua diba lasi gaukaradia idia karaia totona. Momokani, Iehova be ita hagugurua diba gaukaradia sibona be ita dekenai ia henia hanaihanai.​—⁠Deut. 30:11-14.

9. (a) Edena gaukara dekenai huahua ita havaraia? (b) Edena parabole do ita herevalaia, bona dahaka dainai?

⁹ To, huahua be dahaka ia laulaulaia? Ia hahedinaraia goevagoeva, huahua be ita ta ta ese ita karaia diba gaukarana ta ia laulaulaia. Edena gaukara dekenai ‘huahua ita atoa” diba? Dirava ena Basileia ena sivarai namona harorolaia gaukarana.c (Mat. 24:14) Iesu ese ia gwauraia hadohado tauna ena parabole be unai ia hahedinaraia. Mani parabole iharuana ita herevalaia.

10. (a) Inai parabole lalonai, uhe bona tano be dahaka idia laulaulaia? (b) Uiti auna ese dahaka ia havaraia?

¹⁰ Luka 8:5-8, 11-15 duahia. Hadohado tauna ena parabole lalonai, uhe be “Dirava ena hereva,” o Basileia sivaraina ia laulaulaia. Tano be taunimanima edia kudouna ia laulaulaia. Bona tano namona dekenai uhe ia moru neganai, uiti auna ia tubu. Bena, “huahua 100 [ia] atoa.” To, unai uiti auna tamona be dahaka do ia havaraia? Uiti ena au maragidia, a? Lasi, uhe matamatadia ia havaraia​—⁠unai uhe be gabeai do idia tubu bona uiti au ma haida ai do idia lao. Unai parabole lalonai, uiti uhe tamona ese uhe 100 ia havaraia. Edena dala ai unai parabole be iseda haroro gaukara ida ia hegeregere?

11. (a) Edena dala ai hadohado tauna ena parabole be iseda haroro gaukara ida ia hegeregere? (b) Edena dala ai Basileia ena uhe matamatana ita havaraia?

¹¹ Witnes taudia haida o eda Keristani tama sina ese Basileia sivaraina be nega ginigunana ita dekenai idia harorolaia neganai, unai be hegeregere tano namona ai idia be uhe ta idia hadoa. Idia itaia unai sivarai be ita abia dae neganai, idia moale bada. Unai uhe be ia tubu noho ela bona uiti auna ai ia lao, bena uhe ma haida ia havaraia. Uiti auna be uiti ena au maragidia ma haida ia havaraia lasi, to uhe matamatadia ia havaraia. Unai hegeregerena, ita be Basileia ena uhe matamatana ita havaraia, hahediba taudia matamatadia lasi.d Edena dala ai Basileia ena uhe matamatana ita havaraia? Nega iboudiai, Basileia sivaraina be ma haida dekenai ita harorolaia neganai, unai be hegeregere eda kudouna dekenai idia hadoa vadaeni uhe ibounai be gabu idauidau ai ita hadoa. (Luka 6:45; 8:1) Unai dainai, inai parabole ese ita ia hadibaia gauna be, Basileia sivaraina ita harorolaia noho neganai, ia be “mai haheauka ida huahua [ita] havaraia” noho.

12. (a) Iesu ese ia gwauraia vain bona hadohado tauna edia parabole amo dahaka ita dibaia? (b) Unai parabole be edena bamona oi ia durua?

¹² Iesu ese ia gwauraia vain bona hadohado tauna edia parabole amo dahaka ita dibaia? Ita dibaia gauna be, ita be huahua ita havaraia diba, herevana iseda teritori ai taunimanima idia kamonai eiava lasi. Unai dainai, ita haroro hanaihanai be gau badana. Paulo ia gwau: “Idia ta ta be edia hekwarahi hegeregerena ahuna do idia abia.” (1 Kor. 3:8) Iehova be eda hekwarahi amo ita havaraia anina hegeregerena ahuna do ia henia lasi, to eda hekwarahi hegeregerena ahuna do ia henia. Lagani 20 lalodiai painia gaukara ia karaia taihuna, Matilda, ia gwau: “Lau moale badina lau diba Iehova be eda hekwarahi hegeregerena ahuna ia henia.”

EDENA DALA AI MAI HAHEAUKA IDA HUAHUA ITA HAVARAIA DIBA?

13, 14. Roma 10: 1, 2 ena hereva bamona, dahaka dainai Paulo ia haroro noho, herevana haida be Basileia sivaraina idia dadaraia?

¹³ Dahaka ese ita do ia durua mai haheauka ida huahua ita havaraia noho totona? Paragraf 4 ai ita itaia bamona, Paulo ia lalomanoka badina Iuda taudia be Basileia sivaraina idia dadaraia. To, Paulo be idia dekenai ia haroro noho. Ia ese Roma ena Keristani taudia ia torea henia neganai, unai Iuda taudia be inai bamona ia herevalaidia: “Egu kudouna ai lau ura gauna bona Dirava lau noinoi henia goadagoada gauna be inai, ia ese Israela taudia do ia hamauria. Idia dekenai lau gwauraia hedinarai, idia be idia ura dikadika Dirava idia hesiai henia, to diba maoromaoro hegeregerena idia karaia lasi.” (Roma 10:1, 2) Dahaka dainai Paulo ia haroro noho?

¹⁴ Ginigunana: Paulo ia ura Iuda taudia ia haroro henia noho badina be ena “kudouna ai [ia] ura gauna” be unai. Oibe, ia ura bada Iuda taudia haida ia hamauria. (Roma 11:13, 14) Iharuana: Paulo be “Dirava [ia] noinoi henia goadagoada” idia totona. Oibe, guriguri amo Dirava ia noia Iuda taudia ta ta do ia durua Basileia sivaraina idia abia dae totona. Ihatoina: Paulo ma ia gwau: “Idia be idia ura dikadika Dirava idia hesiai henia.” Oibe, Paulo be ia diba taunimanima namodia haida do ia davaria. Ia diba, unai kudou-maoro taudia be Keriso ena hahediba taudia idia lao diba, badina ia danu be unai bamona ia karaia.

15. Edena dala ai Paulo ita tohotohoa diba? Haheitalai haida gwauraia.

¹⁵ Edena dala ai Paulo ita tohotohoa diba? Ginigunana: Ita ura bada ita hekwarahi “mauri hanaihanai idia ura kudou-maoro taudia” ita tahua totona. Iharuana: Guriguri amo Iehova ita noia kudou-maoro taudia edia lalona ia kehoa totona. (Kara 13:48; 16:14) Lagani 30 lalodiai painia gaukara ia karaia taihu, Silvana, ia gwau: “Egu haroro teritori dekenai lau do lao lasi neganai, guriguri amo Iehova lau noia lau dekenai lalohadai maorona ia henia totona.” Ita danu be guriguri amo Dirava ita noia, aneru amo ita do ia hakaua kudou-maoro taudia ita davaria totona. (Mat. 10:11-13; Apok. 14:6) Lagani 30 lalodiai painia gaukara ia karaia tadikaka, Robert, ia gwau: “Aneru ida ita gaukara hebou be moale gauna, badina idia be ruma taudia dekenai idia vara gaudia idia diba.” Ihatoina: Ita diba taunimanima namodia be do ita davaria. Lagani 50 gunanai ia bapatiso elda ta, Carl, ia gwau: “Bema ruma tauna ia kiri, ia badu lasi, henanadai namodia ia henia, o unai bamona toa maragidia ia hahedinaraia, maoromaoro lau abia dae lau be taunimanima namona ta lau davaria vadaeni.” Oibe, Paulo bamona, mai haheauka ida huahua ita havaraia diba.

“EMU IMANA DO IA LAGA-ANI LASI”

16, 17. (a) Hadibaia Tauna 11:6 amo dahaka ita dibaia? (b) Edena dala ai eda gaukara ese ita idia itaia taudia edia lalona ia veria diba? (Haheitalai ta gwauraia)

¹⁶ Ena be ita itaia haida be ita harorolaia Basileia sivaraina idia kamonai henia lasi, to iseda gaukara ese unai bamona taudia edia lalona ia veria diba. (Hadibaia Tauna 11:6 duahia NWT.) Momo be ita idia kamonai henia lasi, to ita idia itaia. Oibe, idia be eda dabua namona, eda kara namodia, bona ita moale dalana idia itaia. Idia haida be matamanai ita dekenai lalohadai kererena idia abia, to eda kara dainai, hari lalohadai maorona idia abia. Paragraf 1 ai ita herevalaia taudia, Sergio bona Olinda dekenai be unai bamona ia vara.

¹⁷ Sergio ia gwau: “Nega ta, ai ruaosi ai gorere dainai, basi-stopu dekenai dina haida ai lao lasi. To ai giroa neganai, momo idia henanadai, ‘Dahaka ia vara? Umui ai reaia.’” Olinda be mai kiri ida ma ia gwau: “Basi idia taria taudia momo be edia imana idia davea ai dekenai, bona draiva ma haida be edia helai gabudia amo idia boiboi, ‘Gaukara namona umui karaia!’ Ai dekenai magasin idia noia danu.” Sergio bona Olinda idia moalelaia gauna ta be, edia haroro troli badinai tau ta ia stopu, idia dekenai flaoa haida ia henia, bona edia gaukara namona dainai idia ia tanikiu henia.

18. Dahaka dainai oi ura “mai haheauka ida huahua [oi] havaraia”?

¹⁸ Momokani, Basileia ena uhe hadoa gaukarana dekenai, “[eda] imana do ia laga-ani lasi” be namo, unai amo mai anina bada sivaraina be ‘bese ibounai ese idia kamonaia diba.’ (Mat. 24:14) Gau badana be, ita moale badina ita diba “mai haheauka ida huahua idia havaraia” taudia be Iehova ese ia lalokau henidia!