Oi Laloa Painia Gaukara amo Iehova Oi Hesiai Henia Diba, A?

¹ Painia taudia edia kara namodia ita itaia neganai, unai ese ita ia hagoadaia. Aposetolo Paulo ena negai, idia gaukara goadagoada taudia dekenai ia gwau, idia be ‘kara namodia idia karaia.’ (Tito 2:14) Hari be edena bamona? Tadikaka ta be ena mauri lagani 65 ia abia bena pura rua murinai painia gaukara ia hamatamaia, ia gwau: “Egu mauri lalonai, hahenamo momo abia negana hereadaena be painia gaukara lau karaia lagani 10 ai.” Oi danu, emu hesiai gaukara helagana ai unai bamona mamina oi abia diba, a?

² Painia Urana Oi Habadaia: Oi ura painia gaukara oi karaia neganai, gau ginigunana be painia urana oi habadaia. Unai be dahaka? Haroro gaukara ena hahegani dekenai unai be lalohadai maorona eiava ura namona. Anina be taunimanima ita laloa bada. Inai tanobada dokona ai, Dirava ena ura ita karaia be moale gauna. Haida be mauri dalana namona idia tahua noho neganai, painia idia ura karaia taudia be idia ura sibona edia mauri idia gaukaralaia taunimanima idia durua totona. (Mat. 13:​45, 46) Painia taudia sibona ese painia urana idia hahedinaraia, a? Lasi. Momo be unai ura ia noho to edia noho dalana dainai idia painia diba lasi.

³ Edena bamona do oi diba bema painia gaukara be emu noho dalana hegeregerena oi karaia diba? Reana emu kongregesen ai painia taudia eiava guna idia painia taudia haida idia noho. Danu, emu sekit naria tauna be ia hegaegae oi ia durua totona. Idia oi hereva henia be namo, ani? Idia ese heduru hereva haida do idia henia diba sediual namona ta oi hegaegaelaia totona. (Efe. 5:16) Ta ese sibona ena stadi karana bona ruma bese maduna be ena haroro gaukara ida ia hahegeregerea be namo. Nega ia atoa tauanina durua gaudia abia totona bona unai dainai reana moni gaukara ia karaia be namo. Unai dainai moni do ia gaukaralaia namonamo be namo. Bema gau momo oi tahua lasi bona Dirava ena Basileia oi atoa guna, oi be Iesu Keriso oi tohotohoa noho bona painia gaukara ai moale do oi davaria.

⁴ Koua Gaudia Kokia Daladia: Bema moni dekenai oi hegeregere painia gaukara oi karaia totona, to oi diba lasi gorere ese oi do ia koua eiava bema sediual namona ta oi karaia diba, dahaka oi karaia? Emu noho oi hahegeregerea noho lalonai hua haida lalonai heduru painia gaukara oi karaia, ani? Bema ia namo, bena lagani ta lalonai painia gaukara oi karaia toho. Unai ese nega daudau lalonai do oi karaia gaukarana lalonai dala do ia kehoa gorere, sediual, bona unai bamona gaudia oi itaia totona. Ai daradara lasi painia ena moale oi mamia neganai do oi ura lasi hadokoa; to bema oi dekenai ia hegeregere lasi, unai lagani ai oi karaia ful-taim hesiai gaukara ai oi davaria hahenamo do oi laloa bada.

⁵ Oi hekwarahi ta oi abia hidi oi ida ia gaukara totona, a? Haida ita hagoadaia heduru eiava regula painia gaukara idia karaia totona, be dala namona painia turana oi abia totona. Ma haida oi hereva henia bona oi hadibaia do oi moale bema idia ida oi gaukara hebou, unai ese idia ia hagoadaia idia tohoa totona. Oi boiria bona hagoadaia hereva kwadogina oi henia be hegeregere.

⁶ Lalohadai Maorona: Ita ibounai be lauma dalanai ita tubu noho lalonai, painia gaukara do ita ura karaia ena mamina do ita abia. Oibe, ita ibounai ese painia urana ita abia diba, ena be noho dalana ese momo do ia koua unai hesiai gaukara idia karaia totona. Reana oi be vanegai sibona sikuli oi haorea eiava oi haorea gwauraia. Oiemu mauri dekenai dahaka do oi karaia? Ia gwauhamata bona bapatiso ia abia matamata tauna be painia gaukara ia laloa bada be namo.

⁷ Tadikaka ta be lagani 25 lalonai ia karaia regula painia gaukarana ia laloa lou neganai, ia gwau: “Inai nega namodia bona moale negadia ibounai lau laloaboio diba lasi, unai negai gau haida lau hagugurua, matahakani haida lau abia bona gau haida dekenai sibona egu ura dadaraia karana lau mamia. To, ita abia gauna ese ita halusia gauna ia hereaia.​—Mareko 10:​29, 30.” Hua 7 murinai unai tadikaka ia mase, painia gaukara ia do karaia noho lalonai. Painia urana dekenai haheitalai namona ia hahedinaraia! Ia mamia hegeregerena oi mamia diba, a? Herevana oi hegeregere regula eiava heduru painia oi karaia, eiava bema emu noho dalana dainai dala lasi idia ta oi karaia totona, to bema ‘kara namodia oi karaia’ noho, unai bamona nega namodia oi moalelaia diba.