Sivarai Namona Harorolaia—Mauri Hanaihanai Bukana Amo
1 Hari hua lalonai iseda haroro gaukarana ai, Mauri Hanaihanai bukana do ita hariharilaia. Ita ibounai be unai buka gaukaralaia karana ita moalelaia. Papua New Guinea ai, haroro gaukara lalonai taunimanima momo idia ura henia. Baibel stadi momo be unai buka dekena amo idia karaia bona ia ese taunimanima momo ia durudia hereva momokani idia diba totona. Iseda Kiki Herevana “Dahaka Dainai Baibel Ita Stadilaia?” ita kikilaia murinai unai buka be namo ita hahedinaraia totona.
2 Ruma ta ruma ta gaukarana ita karaia neganai, hanamoa herevana ita gwauraia murinai reana inai bamona do ita hereva diba: “Reana oi laloa hari tanobada dekenai moale momokanina ita abia diba lasi badina hekwakwanai momo ita davaria, hegeregere, ita gorere, ita buruka ita lao, nega haida ita hitolo, raskol karadia dainai bona ita noho namonamo lasi dainai, unai bamona oi laloa, a? [Naria ruma tauna do ia haere totona.] To badina haida dainai lau diba mai moale danu tanobada dekenai mauri hanaihanai ita abia diba. Unai badina ta be Dirava ese unai ia gwauhamatalaia. Namona be Salamo 37:29 ena hereva oi itaia. [Unai siri duahia.] To guna lau gwauraia moale hadikaia gaudia be edena bamona? Apokalupo 21:4 ai, Dirava ia gwauhamata unai gaudia do ia haoredia totona. [Unai siri duahia.] Lau diba oi ura hereva ma haida do oi kamonai, bona oi ia durua buka namo hereana ai mailaia.” Bena murinai Mauri Hanaihanai bukana oi hahedinaraia ia dekenai.
3 Unai buka ena hereva ita diba vadaeni. Haroro gaukara dekenai ita hariharilaia bona reana ia dekena amo ta ita stadi henia. Unai buka do ita hariharilaia neganai, reana, hereva namodia haida ita hegaegaelaia vadaeni, ruma taudia danu ita kikilaia hebou totona. Bema ita ura buka ena rau 10 paragraf 9 ita duahia diba bena murinai rau 8 bona 9 ita kehoa tanobada dekenai idia vara hekwakwanai ita kikilaia totona, bona rau 11-13 ita kehoa Paradaiso sivaraina ita kikilaia totona. Bema nega ia noho, rau 5 ita kehoa bona Anina henunai ruma tauna ena lalona do ia veria karoa haida edia ladana do oi gwauraia diba.
4 Guna unai buka ita hariharilaia neganai, pablisa taudia momo idia gwau ruma taudia momo be Mauri Hanaihanai bukana idia ura henia, to unai nega lalonai edia moni be lasi. Unai taudia idia lou henidia neganai idia haida be buka idia abia. Nega haida ita lou henidia neganai idia ura lasi kamonai bona idia ura lasi buka idia abia. To sivarai namona ta do idia duahia diba totona, namona be pepapepa ta ena sivarai ita gwauraia sisina bona ita henidia. Bema edia moni be lasi Mauri Hanaihanai bukana idia abia totona, kahirakahira idia iboudiai be pepapepa ta do idia ura abia. Eiava magasin ita henidia toho diba, unai neganai ruma taudia be lalona veria noho sivaraina do idia duahia diba.
5 Mai moale danu tanobada dekenai do ita mauri ela bona hanaihanai be helaro namona, bona taunimanima hutuma bada be unai mauri idia abia diba. (Apok. 7:9) Ita ura taunimanima momo ita durudia bena ita bamona unai helaro namona do idia abia. Iehova ia gwauhamata ia idia lalokau henia taudia ese unai helaro do idia abia diba, unai dainai haroro gaukara dekenai Mauri Hanaihanai bukana ita hariharilaia neganai, ita goada karaia unai kamonai taudia iboudiai dekenai Baibel stadi ita hamatamaia toho totona.
[Questions]
1. Hari hua lalonai, ruma ta ruma ta gaukara dekenai, dahaka dainai Mauri Hanaihanai bukana hariharilaia gaukarana do ita moalelaia?
4. (a) Bema ruma tauna ia ura buka ia abia to ena moni be lasi, dahaka do ita karaia? (b) Bema buka ia abia lasi, dahaka ita henia toho diba?
5. Dahaka dainai ruma tauna dekenai ita ura Mauri Hanaihanai bukana ita hariharilaia?
This article is repeated in km 7/95.