Lagani 1991 Lalonai, Dahaka Do Oi Karaia Sikuli Dekenai?
1 February ena hua lalonai sikuli taudia idia lou lao sikuli dekenai. Unai neganai, tisa matamatadia, hadibaia herevadia matamatadia bona hekwakwanai matamatadia danu be Witness memero bona kekeni momo ese do idia davaria. Sikuli dekenai oi lao, diba abia totona, to sikuli ai ma haida oi hadibaia diba danu. Basileia ena sivarai namona oi gwauraia diba, oiemu tisa taudia dekenai bona oi ida idia sikuli hebou taudia dekenai danu. Bema sikuli dekenai aonega dalanai oi haroro, Iehova ena ladana oi hanamoa diba bona moale oi davaria diba.
IEHOVA IA URA GAUNA
2 Iehova ia ura memero kekeni ese tomadiho momokani idia badinaia. (Sal. 148:12, 13) Idia be mai edia gabu iena hesiai gaukara lalonai. (Sal. 110:3; Mat. 19:13, 14) Sikuli gabuna ai sikuli memero kekeni oi haroro henidia bona kara maoromaoro oi badinaia neganai, oi be Iehova ena ladana oi abia isi. (Her. 27:11) Oiemu kamonai karana amo reana ma haida do oi hagoadaia diba bena idia danu Iehova Dirava do idia hanamoa.—Mat. 21:15, 16.
3 Gaukara ta karaia namonamo totona, namona be diba oi abia bona oi gaukaralaia loulou. Reana ta ese oi ia hadibaia vadaeni gita oi hataia totona, to bema oi karaia loulou lasi oi hataia namonamo diba lasi. Hegeregere, memero kekeni be haroro gaukara idia karaia namonamo totona, namona be idia karaia loulou. Namona be oi tubu daekau noho mai emu aonega ida, Iesu ia mero neganai ia karaia bamona. (Luka 2:52) Duahiduahi dalana oi dibaia namonamo. Sikuli ena stadi oi karaia namonamo. Oiemu Bible stadi, ruma bese taudia ida bona kongregesen lalonai oi karaia, be oi laloa namonamo. Bema unai bamona oi karaia taunimanima ese oi do idia gwauraia namo, tauhau Timoteo idia gwauraia namo hegeregerena.—Kara 16:1, 2.
TAMA SINA ESE DAHAKA IDIA KARAIA DIBA?
4 Tama sina e, emui natuna mani umui durua bona umui hagoadaia, sikuli ai idia haroro totona. Idia umui hadibaia, bema hereva momokani idia badinaia bona idia harorolaia, unai ese idia ia naria bona idia ia gimaia, sikuli ai kara dika idia karaia garina. Danu, Witness lasi natudia ese idia do idia matauraia.
5 Nega momo tisa taudia ese dala idia lailaia sikuli memero bona kekeni be sikuli lasi negana lalonai, kara idaudia haida idia karaia totona, o gabu ta idia vadivadi henia totona, bena sikuli natudia ese Witness natudia idia doria toho unai kara idia karaia totona, o unai laolao dekenai idia lao totona. Tisa taudia bona gadara naria taudia ese memero kekeni idia doria, sikuli lasi negana lalonai idia gadara totona, bona nega momo natu edia goada be hegeregere lasi edia doria karana idia dadaraia. Hadibaia herevadia namodia be Sikuli bona Iehova ena Witness Taudia buklet, rau 22-25 lalonai. Unai hereva ese ita ia durua lalohadai maorona ita goadalaia totona. Memero Kekeni bukana lalonai danu ma hadibaia herevadia haida idia noho. Namona be nega oi abia hidi, ia lalonai oiemu natudia ida unai hereva do umui herevalaia hebou totona, badina unai kara amo namo do ia vara.—Her. 22:6.
6 Sikuli gabunai, Keristen taravatudia oi badinaia neganai, oi diba Iehova ena amo hahenamo momo do oi davaria, harihari bona vaira negana lalonai danu. Hereva Lada-isidia 20:11 ia gwau: “Mero ta ena kara amo sibona ia hahedinaraia, ena kara be goeva bona maoromaoro eiava lasi.”—Salamo 37:37 itaia danu.
SIKULI NARIA OREADIA IDIA MOALE
7 Bema sikuli naria oreadia ita hadibaia Iehova ena Witness taudia edia lalohadai be dahaka sikuli karadia idauidau dekenai, do idia moale. Quebec, Canada ai, Witness tauna ta ese Sikuli buklet ta sikuli naria tauna dekenai ia henia, bena gabeai unai sikuli naria tauna ese ia hamaoroa, ia gwau: “Inai buklet ese ai do ia durua emui natudia edia kara do ai diba namonamo totona, bona danu emui taravatu do ai laloa, gaukara ta idia dekenai ai henia gwauraia neganai.”
8 Bena ia ese Witness tauna ia nanadaia, ia gwau: “Oi be sikuli ta ta totona buklet 8 oi mailaia diba, a?” Witness tauna ese ia hamaoroa idia do ia mailaia diba, hekwarahi lasi, bena sikuli naria tauna ia gwau: “Bema hekwarahi lasi, mani buklet 40 oi mailaia.” Ma ia gwau: “Bema misini iboudiai ese edia hahediba herevadia idia gwauraia hedinarai ai dekenai, hekwakwanai momo be edia natudia dekenai do idia vara lasi. Tanikiu bada herea.”
WITNESS MEMERO KEKENI IDIA MOALE
9 Witness kekeni ta, Georgia, United States dekenai, ia gwau Sikuli buklet ta be iena tisa dekenai ia henia, bena ia duahia murinai, ia doria lasi sikuli ena kara haida ia karaia totona. Hari Witness kekeni ese Society ia tore henia, ia gwau: “Inai buklet be gau badana sikuli memero kekeni dekenai. Unai buklet dainai lau ura umui lau tanikiu henia. Lau moale badina Society ese memero kekeni dainai ia laloa momo bona ia durudia edia hekwakwanai idia hanaia totona.”
[Questions]
1. (a) Hari lagani ai Witness natudia be sikuli dekenai do idia lou lao neganai, dahaka gau matamatadia do idia davaria? (b) Witness sikuli memero kekeni be dahaka gaukara namona idia karaia diba? (c) Lagani 1991 lalonai do oi sikuli neganai, edena bamona moale oi davaria diba?
2. (a) Salamo 148:12, 13 ia hahedinaraia Iehova ia ura memero kekeni ese dahaka do idia karaia? (b) Witness memero kekeni ese Hereva Lada-isidia 27:11 ena sisiba edena bamona idia badinaia diba? (c) Bema Witness memero kekeni be haheitalai namodia idia hahedinaraia, dahaka ia vara diba?
3. (a) Witness memero kekeni be haroro taudia namodia ai edena bamona idia lao diba? (b) Witness memero kekeni be dahaka idia karaia diba, Iesu bona Timoteo idia tohotohoa totona?
4. (a) Witness memero kekeni ese Witness lasi memero kekeni edia hemataurai idia dekenai edena bamona idia habadaia diba? (b) Tama sina ese edia natudia edena bamona idia durua diba?
5. (a) Witness natudia be sikuli dekenai edena hahetoho idia davaria? (b) Tama sina be edena hereva edia natudia ida idia stadilaia diba?
This article is repeated in km 1/93.