April bona May Lalonai Gima Kohorona Ita Gaukaralaia
1 Lagani 1879 lalonai Watchtower magasin idia halasia matamaia, bona hua ta ta iboudiai dekenai kopi 6,000 sibodia, gado tamona dekenai idia printaia. To hari, unai nega ena lagani 111 murinai, hua ta ta iboudiai dekenai unai magasin matamatadia iboudiai be 15 milion mai kahana, bona gado idauidau 111 dekenai idia printaia. Unai gaukara ia bada ia lao dainai ia hahedinaraia Iehova ese inai magasin ia gaukaralaia taunimanima ese hereva momokani iena Basileia dekenai idia diba totona.
2 Herevana oi ese Gima Kohorona be lagani momo lalodiai oi duahia eiava hari sibona oi duahia matamaia, to oi diba namonamo unai magasin amo lauma dalanai oi davaria hahenamona dainai oi moale. Gima Kohorona magasin ena hereva ese helaro namona Bible amo ita ia henia. Oiemu abidadama Dirava ena Basileia dekenai ia hagoadaia, bona oi diba unai Basileia sibona ese maino hanaihanai do ia mailaia diba inai tanobada dekenai. Ena hereva amo oi lalo-parara ita be “nega dokonai” ita noho dainai metau dikadia momo do idia vara. (2 Tim. 3:1-5) Ena hereva ese oi ia durua Buka Helaga dekenai idia torea herevadia amo lalo-maino oi abia totona, bona sisiba namona oi ia henia Dirava ena Hereva, Bible amo. (Roma 15:4; Sal. 119:105) Gima Kohorona magasin edia hereva amo heduru ita abia, unai dainai ita ura ma taunimanima haida ese unai hereva idia diba danu, ani? April bona May lalonai, Gima Kohorona magasin ena sabskripsen do ita hariharilaia toho; lagani tamona lalonai magasin 12 do idia davaria bona ena davana be K3.00.
MAI GOADA DANU ITA GAUKARA
3 Gima Kohorona magasin lalonai Dirava ena aonega herevadia idia noho, taunimanima edia aonega herevadia lasi. Hari inai nega lalonai, taunimanima iboudiai ese Dirava ena aonega herevadia idia kamonai be gau badana. Gima Kohorona magasin ese taunimanima edia mauri dalana idia hanamoa bona idia durudia lalohadai maoro idia abia totona. Unai be gau badana bema idia ura idia ‘mauri noho.’ (Her. 9:1-6) Unai hereva iboudiai ita abia dae dainai, mai goada danu sabskripsen do ita hariharilaia toho, badina ita diba ita dekenai taunimanima durua gauna namona ia noho. Namona be magasin matamatana ta ita abia neganai ita duahia namonamo guna, taunimanima durua hereva ita diba totona. Bema unai bamona ita hegaegae guna, mai goada danu haroro gaukara dekenai magasin do ita hariharilaidia.
4 Gima Kohorona magasin ena davana be maragi, to idia duahia taudia ese hahenamo bada do idia abia, unai dainai nega ibounai mai iseda goada danu sabskripsen ita henidia toho, ena davana be K3.00. Gima Kohorona magasin ena davana be maragi, tanobada magasin idauidau edia davana be bada.
GIMA KOHORONA ESE HAHEDIBA GAUKARANA IA DURUA
5 Namona be ita goada karaia magasin idia abia taudia iboudiai ita lou henidia totona. Taunimanima haida ese magasin idia abia hanaihanai, unai dainai tadikaka ese idia lou henidia hanaihanai, magasin matamatana ia mai neganai. Bema taunimanima ta ese Gima Kohorona eiava Noga! magasin ta ia duahia, ena lalona ia veria diba. Unai dainai namona be ita lou henia magasin matamatana ta ita abia neganai, bona unai magasin dekenai do ia moalelaia herevana ita hahedinaraia ia dekenai. Reana magasin haida ia duahia murinai, do ia ura sabskripsen ta ia abia. Bema sabskripsen idia abia taudia ita lou henidia bona ita durudia magasin edia hereva namodia idia tahua totona, unai ese ia durudia danu.
6 April bona May lalonai Gima Kohorona magasin ita hariharilaia gaukarana amo moale bada do ita davaria. Unai magasin amo heduru ita abia vadaeni, unai dainai, mai eda goada ibounai danu taunimanima dekenai ita henidia toho diba. Namona be ita hagoadadia sabskripsen idia abia totona, bona magasin idia duahia totona, bena ita durudia diba idia be Iehova ena kahana dekenai idia gini totona.
[Questions]
1. Dahaka ese ia hahedinaraia Iehova ese Watchtower o Gima Kohorona gaukaralaia karana ia hanamoa?
2. (a) Taunimanima milion momo ese dahaka hahenamo idia davaria Gima Kohorona magasin idia duahia dainai? Gima Kohorona magasin ena hereva ese oi edena bamona ia durua? (b) Gima Kohorona magasin amo hahenamo momo oi davaria dainai, dahaka oi ura karaia?
3. (a) Dahaka dainai taunimanima iboudiai ese Gima Kohorona magasin idia abia be mai anina bada? (b) Dahaka ese ita ia durua mai goada danu Gima Kohorona magasin ita hariharilaia totona?
4. Edena magasin edia davana idia bada, Gima Kohorona magasin eiava tanobada ena magasin idauidau?
5. Dahaka dainai magasin idia abia taudia iboudiai ita lou henidia be namo?
6. (a) Dahaka dainai mai eda goada ibounai danu magasin sabskripsen ita henia toho taunimanima dekenai? (b) Bema unai bamona ita karaia dahaka do ita davaria?