Iseda Hamatamaia Hereva bona Hua Ena Harihari Gauna Hakapua Dalana
1 Hari hua lalonai oiemu kiki herevana oi hegaegaelaia neganai, namona be oiemu teritori lalonai taunimanima idia davaria hekwakwanai badadia oi laloa, bena magasin matamatana eiava buklet dekena amo Bible ese unai hekwakwanai hanaia daladia oi hahedinaraia.
2 Gabu haida dekenai taunimanima idia lalo-hekwarahi badina moni gaukara davaria lasi taudia idia momo idia lao bona mauri durua gaudia davana be idia bada idia lao. Bema oiemu teritori lalonai unai kara ia vara, namona be oiemu hamatamaia herevana dekenai oi gwauraia.
Reana do oi gwau:
◼ “Ai be emu dekena taudia dekenai taunimanima iboudiai be moni gaukara bona ruma idia davaria totona dahaka idia karaia diba ai kikilaia. Oi laloa gavamani ese dala do ia kehoa unai ia vara totona be maoro, a? [Naria ela bona ruma tauna ia haere.] Unai hekwakwanai hanaia dalana ia diba tauna ta ia noho; mani inai gwauhamata herevana Isaia 65:21-23 oi itaia. [Oi duahia.] Ita ia Havaraia Tauna ese unai ia gwauhamatalaia bona ita ia hagoadaia totona taunimanima ia hasiahua unai hereva idia torea totona, badina hekwakwanai negana lalonai hagoadaia hereva ita abia be gau badana, ani?—Reasoning buka, rau 11.
3 Hari, oiemu kiki herevana dekenai magasin matamatana eiava buklet ta ena hereva oi hakapua be namo. Bema oi ese magasin gaukara oi karaia, namona be magasin dekena amo unai sivarai ia gwauraia herevana oi hahedinaraia. Bema oi ese buklet ta, hegeregere “Itaia!” buklet oi hariharilaia, namona be ena vairana bona murina laulaudia amo taunimanima iboudiai ese gaukara bona ruma do idia davaria karana oi hahedinaraia. Namona be oi kehoa namonamo ruma tauna ese kahana rua nega tamona do ia itaia totona.
4 Teritori haida dekenai taunimanima idia davaria hekwakwanai idia idauidau neganai, namona be hamatamaia hereva idauidau oi hegaegaelaidia. Bema English gado oi diba, namona be Reasoning buka ena rau 12 dekenai, “Kingdom” henunai ia noho hamatamaia hereva iharuana oi karaia toho diba.
Reana do oi gwau:
◼ “Ai be emu dekena taudia dekenai henanadai ta ai henidia. Ai ura oiemu lalohadai ai diba danu. Reana oi diba vadaeni, Iesu ese ita ia hadibaia ita guriguri Dirava ena Basileia do ia mai, iena ura gauna tanobada dekenai ita karaia, guba dekenai idia karaia bamona. Oi laloa unai guriguri do ia guguru bona Dirava ena ura inai tanobada dekenai do ia vara diba, a?”—Isa. 55:10, 11; Apok. 21:3-5.
5 Memero kekeni be Basileia ena sivarai be lagani bada taudia dekenai danu idia harorolaia namonamo diba.
Pablisa mero o kekeni matamatana ta be Isaia 65:21-23 ia herevalaia gwauraia neganai, do ia gwau diba:
◼ “Lau diba oiemu lagani idia bada dainai oiemu diba mauri ena hekwakwanai dekenai ese lauegu diba ia hanaia, to inai Bible siri ese ita ibounai ia hagoadaia diba.” (Isaia 65:21-23 oi duahia.)
6 Oi henia gaudia iboudiai oi torea namonamo be gau badana. Badina oi lou henidia neganai oi torea gaudia ese oi idia durua edia kamonai karana do oi habadaia totona.