Iehova Hesiai Henia, Gau Ta ese Oi Ia Koua Lasi
(Kahana 1)
1 “Edia Dirava be Iehova taudia idia moale!” (Sal. 144:15) Ena be kara dika negana lalonai ita noho, to Pavapava David ena hereva be idia do momokani, ani? (Ef. 5:16) Oibe! Keristen taudia ese Iehova hesiai henia gaukarana idia do moalelaia. Nega haida iseda dala be ia auka. Satana be “metau dikadia” ita dekenai ia havaraia, to ita lalohisihisi lasi. (2 Tim. 3:1, 2) Inai tanobada ena kara dika ia bada ia lao, bona unai ese ia hahedinaraia Dirava ena Basileia be kahirakahira inai kara bodaga tanobadana do ia haorea, bona mai ena goeva tanobada matamatana do ia havaraia. (2 Pet. 3:13) Inai tanobada ena dibura karadia be iseda moale helarona ena diari ia habodoa diba lasi; oibe, Basileia dekenai iseda helaro be ia diari bada noho. Inai dibura tanobadana lalonai Iehova oi hesiai henia ena diari oi hahedinaraia dainai oi moale, ani?—Fil. 2:15.
2 Ita ta ta ibounai be iseda hesiai gaukara Iehova dekenai ita naria namonamo be gau badana. Dahaka dainai? Badina Satana be taunimanima Koua Tauna Badana. Diksenari ta ia gwau “koua” ena anina be “veria oho,” “hadibaia eiava hakaua (ta ena lalona veria) ma gau ta ia laloa totona, eiava gau momo nega tamona ia laloa totona,” bona “lalohadai bona ura idauidau amo ia hasiahua eiava ia hadaradaraia.” Inai tanobada dekenai Satana idia negea diho murinai, ia ese taunimanima ia “koia noho.” Hari inai negai idia vara gaudia edia anina momokani do idia laloa lasi totona, ia ese dala idauidau amo taunimanima edia lalona ia veria. (Apok. 12:9) Ena be idia ore lagani 100 lalodiai Iehova ena Witness taudia ese Basileia ena sivarai idia harorolaia, to mai anina bada sivaraidia, hegeregere, Dirava ena ladana hahelagaia, bona Dirava ena Basileia ese iena lohia dalana ena maoro do ia hamomokania sivaraidia, be taunimanima hida idia laloa bada? Momo lasi. (1 Ioane 5:19) Satana be inai tanobada dekenai taunimanima bilion momo ia veridia oho vadaeni, bona bema ita naria namonamo lasi, ita do ia veria eiava iseda lalona ia ania diba bona Iehova ena hesiai gaukara do ita rakatania diba. Madi, Satana be iseda tadikaka haida ia veridia vadaeni. Idia koua lasi dainai edia lalona ia veria kara idauidau idia karaia totona. Hari inai negai taunimanima edia lalona veria gaudia be momo herea. Idia haida ita lalodia.
3 Moni Hekwakwanaidia Bona Kohu Ura Henia Karadia: Kahirakahira tanobada ena kahana ibounai dekenai, taunimanima momo be moni gaukara idia davaria diba lasi, bona gau ibounai edia davana ia bada ia lao dainai idia lalo-hekwarahi bada. Momokani, ita bona iseda ruma bese taudia totona aniani, dabua, bona ruma ita abia be gau badana. To mauri durua gaudia abia totona bema ita lalo-hekwarahi momo, unai sibona do ita lalohadailaia diba. Unai neganai, reana iseda mauri lalonai tauanina durua gaudia ita abia totona do ita laloa bada, to Basileia gaukara ita durua do ita laloa maragi. Aposetolo Paulo be Heberu 13:5, 6 dekenai unai kara dainai sisiba ia henia. Iesu Keriso ese ita ia hadibaia bema Basileia ita tahua guna do ita lalo-hekwarahi lasi; Iehova ese tauanina durua gaudia ita ia henia. (Mat. 6:25-34) Tanobada ibounai lalonai pioneer bona ful-taim hesiai gaukara idia karaia taudia ese unai idia hamomokania diba.
4 Satana ena tanobada be kohu ura henia karana ia gwauraia bada. Taunimanima milion momo be kohu abia totona eiava naridia totona idia hekwarahi bada. Iesu ena nega lalonai unai bamona idia karaia danu. Mai ena taga bada tauna ese Iesu ia nanadaia dahaka do ia karaia diba mauri hanaihanai do ia abia totona. Iesu ia haere henia, ia gwau: “Bema oi ura oi namo herea momokani, oiemu kohu oi lao hoia, ogogami taudia dekenai oi henia, guba ena kohu oi abia. Vadaeni lauegu murina dekenai oi raka mai.” (Mat. 19:16-23) Reana, unai tauhau ena kohu be bada herea dainai, iena lalona idia veria bona ena lalona ibounai ida Dirava ena hesiai gaukara ia karaia diba lasi. Ena kohu ia ura henidia bada. Iesu ia diba bema ena lalona idia veria kohu ia negedia, unai tauhau ese namo do ia davaria. Idia ese idia koua dainai mai ena lalona ibounai ida Dirava ia abidadama henia diba lasi. Oi be edena bamona? Oi manadalaia vadaeni mauri dalana oi moalelaia noho totona, emu moni gaukara horadia oi habadaia, a? Unai ese emu hesiai gaukara Iehova dekenai ia hamaragia, a? Kohu abia eiava naria totona oiemu nega bona goada bada ia ania dainai, oi be nega bona goada lasi Basileia ena gaukara oi karaia totona, a? (Mat. 6:24) Lauma gaudia do oi tahua momo totona oiemu nega idia ania kava gaudia oi negedia diba, a?
5 Mauri Dinadia Edia Hekwarahi: Bema ita naria namonamo lasi, mauri ena hekwarahi ese iseda lalona do idia veria bona reana lauma gaukarana be sisina sisina ita rakatania diba. Noa ena negai idia noho taudia oi lalodia tao. Mauri ena hekwarahi idia laloa bada, hegeregere, idia aniani, idia inuinu, idia headava bona edia natudia idia headava gaukarana idia karaia, unai dainai, Noa ese Abata do ia vara ena sisiba herevana idia kamonai henia lasi. Taunimanima idia laloa lasi dahaka do ia vara, bena Abata ranuna ese idia ibounai ia abia lao. Edia lalona ia ania gaudia dainai idia mase. Iesu ia gwau: “Taunimanima ena Natuna do ia mai neganai danu unai bamona do ia vara.” (Mat. 24:37-39) Oibe, hari inai nega lalonai, mauri ena hekwarahi ese taunimanima momo herea ia guidia, unai dainai, ita mailaia sisiba herevana idia kamonai henia lasi. Lauma gaudia idia laloa bada lasi.
6 Oiemu mauri lalonai taunimanima ida moale karadia momo oi karaia dainai lauma gaukaradia oi lalodia momo lasi, a? Nega ta ai, Mareta bona Maria edia ruma dekenai Iesu idia boiria mai. Maria be mai ena lalona ibounai ida Iesu ena hereva ia kamonai. To, Mareta be “abia dae karadia dekenai ia hekwarahi.” Mareta ia hekwarahi badina ia ura vadivadi taudia ubudia hahine namona ta ai ia lao. To ia laloa lasi namona be nega ia atoa Iesu ena hereva ia kamonai henia totona. Iesu be mai ena hebogahisi danu Mareta ia hamaoroa, gau momo ia hegaegaelaia be anina lasi; lauma gaudia ia laloa bada be gau badana. Unai sisiba oi badinaia, a? (Luka 10:38-42) Danu, Iesu ese ita ia sisiba henia, ia gwau namona be ita naria namonamo, namo lasi ita aniani bada bona ita inuinu bada, bena unai ese iseda laloa namonamo karana ia koua. Hari inai nega lalonai, taunimanima be metau idauidau momo idia davaria, unai dainai ita gima noho be gau badana.—Luka 21:34-36.
Moale Karadia Ura Henia Bada Karana:
(Kahana 2)
1 Taunimanima be Basileia do idia laloa lasi totona, Diabolo ese lalona veria gauna badana ta ia gaukaralaia, unai be moale karadia ura henia bada karana. Kerisendom lalonai, taunimanima milion momo ese Dirava idia dadaraia bona ena gabu dekenai moale karadia idia karaia. Idia ura lalona veria karana ta idia moalelaia, idia ura lasi Dirava ena Hereva idia laloa namonamo. (2 Tim. 3:4) Momokani, moale karana namona be ia dika lasi. To, pura ta ta iboudiai bema nega bada ita negea televisen, muvini piksa, vidio, spot gadara, tanobada edia buka duahia, eiava diba ta ita tahua totona, iseda kara dika kudouna ese ita ia koia diba bona Iehova dekena amo ita ia veria diba. (Ier. 17:9; Heb. 3:12) Edena bamona unai ia vara diba? Dala be inai: Keristen heboudia lalonai, nega haida reana oi ese ma gau ta oi lalohadailaia; reana moale karadia do oi karaia totona oi ura hebou do ia ore haraga. Daudau lasi murinai, reana dala do oi tahua ruma dekenai do oi noho totona, bena hebou dekenai do oi lao lasi eiava haroro gaukara do oi karaia lasi. Hari be nega namona emu mauri karana oi tahua totona, bena oi diba unai gaudia ese emu lalona idia veria eiava lasi. (Luka 8:14) Moale karadia dekenai mai anina bada negana ita negea, to unai nega sisina ita kokia iseda goada lauma dalana ai ita habadaia totona be namo, ani?
2 Nega Bada Ia Ania Karadia: Haida ese hari inai negai idia vara hekwakwanai hanaia toho karadia lalonai idia vareai. Tanobada taudia be hanaihanai mauri ena hekwakwanai bona kara maoromaoro lasi karadia hanaia dalana idia hepapahuahulaia, to Keristen taudia be idia dekena amo idia gini siri be gau badana. (Ioane 17:16) Unai kara ibounai be Satana ese ia havaraia, ia ura lasi taunimanima ese Baibel ena sisiba idia badinaia, bona ia ura lasi inai idia diba: hekwakwanai kokia ela bona hanaihanai dalana be tamona sibona—Dirava ena Basileia. Bema dika ta ita davaria eiava ta be ita dekenai ia kara maoromaoro lasi, namona be ita naria namonamo, namo lasi ita lalohisihisi badabada eiava dika davana ita henia bena ita laloaboio ita be Iehova ena Witness taudia. Inai ita laloatao, ita lasi to Iehova idia hadikaia, bona ita ese iena ladana ita hahelagaia be gau badana.—Isa. 43:10-12; Mat. 6:9.
3 Ena be ita ibounai be gorere momo lasi maurina ita ura abia, to gorere koua totona bema taunimanima edia lalohadai idauidau bona idia gwauraia hanamoa dala idauidau ita tahudia momo, gorere koua karadia do ita lalo-hekwarahilaia bada. Tauanina bona lalona gorere hanamoa totona, taunimanima momo herea be dahaka ita ania, dahaka muramura ita abia, bona kara ma haida idia gwauraia hedinarai, to unai kara dekenai lalo-tamona be lasi. Bema Baibel ena taravatu ia hamakohia lasi, gorere koua totona dahaka oi karaia be oi sibomu emu ura. Namona be hanaihanai Dirava ena Basileia dekenai ita abidadama, ia sibona be taunimanima edia gorere iboudiai do ia kokidia diba.—Isa. 33:24; Apok. 21:3, 4.
4 Oi Gini Goada, Do Oi Marere Lasi: Dokona negana be ia kahirakahira neganai, Iehova ena hesiai gaukara amo oi ia veria oho totona, Satana be ena lalo-ani karadia do ia habadaia. To, “abidadama dekenai do [oi] gini goada.” (1 Pet. 5:9) Edena dala amo? Namona be Dirava ena lalohadai amo sibona oi hagoadaia. (Mat. 4:4) Namona be dala oi koua bena inai tanobada ena lalo-ani karadia be oi bona emu ruma bese taudia edia nega do ia ania kava lasi, bona nega ia noho Dirava ena Hereva umui lalohadailaia namonamo totona. Ruma bese idia aniani hebou neganai, taunimanima hagoadaia ekspiriens bona lauma gaukara ena hereva ma haida umui kikilaidia diba. Sediual oi karaia bona hanaihanai oi badinaia sibomu emu stadi karaia totona bona hebou totona oi hegaegae.
5 Hekwakwanai dainai bema oi lalo-hekwarahi momo, namona be guriguri amo oi lalo-hekwarahilaia gaudia be Iehova imana dekenai oi atoa. Namona be oi diba ia ese oi ia naria. (1 Pet. 5:7) Dirava ena maino ese emu kudouna bona oi laloa gaudia do ia naria namonamo. (Fil. 4:6, 7) Lalo-ani gaudia oi koua bena lauma dalana ai emu matadia idia itaia namonamo diba. Hanaihanai Iehova oi laloa, Iesu ia karaia bamona. (Kara 2:25) Namona be oi tahua gauna oi raraia hanaihanai, Hereva Lada-isidia 4:25-27 ese ita ia sisiba henia hegeregerena, ia gwau: “Oiemu matana be emu vairana kahana sibona dekenai idia itaia lao be namo, oibe, oiemu matana namona be emu vairana kahana dekenai idia noho gaudia sibona idia itaia be namo. Emu lao dalana oi karaia namonamo oi hekwakwanai garina, bona emu lao daladia iboudiai idia maoromaoro bona idia auka be namo. Umui heau idauidau lasi, idibana kahana amo eiava lauri kahana amo; emu lao dalana be kara dika amo do ia raka siri.”
6 Hebou iboudiai dekenai oi lao, bona sibona oi hagoadaia Dirava ena Hereva amo oi kamonai hadibaia herevadia oi hakala henia namonamo totona. (Heb. 2:1; 10:24, 25) Bona inai kara bodaga tanobadana dekenai moale karadia do oi tahudia lasi, to namona be oi tahua gauna be oiemu haroro gaukara amo huahua oi havaraia noho. Unai gaukara amo moale bona lalo-namo ela bona hanaihanai oi davaria diba. (1 Tes. 2:19, 20) Hereva dokona be inai, dala oi koua bena gau ta lasi eiava tau ta lasi ese oi ia veria oho diba Iehova ena hesiai gaukara amo. “Do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba emui gaukara Lohiabada totona be umui hekwarahi kava lasi.”—1 Kor. 15:58.
[Questions for Part 1]
1. Inai metau dikadia negana lalonai Keristen taudia be edena bamona idia moale diba?
2. Taunimanima koidia totona Satana ia gaukaralaia dalana ta be dahaka?
3. Bema ita naria namonamo lasi, Satana be edena dala amo ita ia veria oho diba bena mai anina bada Basileia gaukarana do ita karaia lasi?
4. (a) Satana ena tanobada be dahaka ia gwauraia bada? (b) Mai iseda lalona ibounai ida Iehova Dirava ita abidadama henia dalana ta be dahaka?
5. Dahaka ese ita idia veria diba bena lauma gaudia do ita lalodia lasi?
6. Dahaka dainai taunimanima ida moale karadia momo ita karaia be namo lasi?
[Questions for Part 2]
1. Hereva momokani amo ia veridia oho totona, Satana ese dahaka ia gaukaralaia taunimanima edia lalona ia veria totona?
2. Kara maoromaoro lasi karadia be edena bamona ita idia guia diba?
3. Dahaka dainai gorere koua daladia idauidau ita tahua momo karana be namo lasi?
4. (a) Satana ia hekwarahi noho dahaka do ia karaia toho totona? (b) Ruma bese lalonai unai ia vara lasi totona dahaka ita karaia diba?
5. Lalo-ani gaudia ese iseda lauma matana ia hadikaia garina dahaka do ita karaia be namo?
6. Dahaka dainai haroro gaukara amo huahua ita havaraia be gau badana?