Henanadai Mauana
◼ Hebou dekenai, edena bamona ita ese haere namodia ita henia diba?
Ita moale kongregesen heboudia ita lao henia diba. Unuseniai iseda haere karana amo iseda abidadama ita hahedinaraia bona ma haida ita hagoadaia. (Aon. 20:15; Heb. 10:23, 24) Haere henia karana be hahenamo ta bona namona be hanaihanai ita karaia. Edena bamona unai ita karaia namonamo diba?
Gau ginigunana be oi hegaegae. Do idia kikilaia bukadia oi duahia bona laloa guna be gau badana. Unai ita duahia neganai, hereva edia mamina ita laloa. Ena be guna unai gauna idia kikilaia, to namona be anina idia habadaia herevadia oi tahua. Hereva ena kwarana laloa noho. Bema Baibel buka tamona ia kikilaia buka oi stadilaia, hegeregere Apokalupo Hagugurua Negana bukana, haere oi hegaegaelaia neganai, namona be siri ta ena anina ma siri haida dekenai oi hahegeregerea. Unai sisiba oi badinaia neganai, oiemu laloa dalana do ia hagoadaia. Oi do ia durua haere namodia oi hegaegaelaia totona bona moale do oi davaria.
Haere namodia be idia kwadogi, auka lasi, bona edia anina be emu stadi buka amo. Namona be haere ginigunana ia henia tauna ese maoromaoro henanadai ia haerelaia, bena ma haida ese idia habadaia diba. Namona be nega bada idia haorea haere latadia oi karaia lasi, ma haida idia haere diba lasi garina. Paragraf amo oi duahia lasi to ena anina herevalaia. Reana idia torea Baibel siridia edia hereva badadia oi kikilaia diba. Haere ia henia tauna ena hereva oi hakala henia namonamo oi gwauraia lou bona nega halusia kava garina.
Paragraf iboudiai oi haerelaia toho lasi to namona be nega haida oi haere totona imana oi abia isi. Namona be memero kekeni ese haere idia henia. Bema oi gari, namona be stadi naria tadikaka oi hamaoroa edena henanadai oi ura haerelaia, bena reana oi ia abia hidi diba.
Tadikaka ese henanadai bona haere kahana idia karaia neganai, namona be ita ibounai ita gaukara goadagoada haere henia totona. Laloaboio lasi, hebou ena namo be mai eda ura ida haere henia karana ita karaia bona haere namodia ita henia.—Sal. 26:12.