Emu Kudouna Ibounai ida Oi Karaia!
1 Iehova ita tanikiu henia ena badina momo idia noho. Idia be guna ia karaia gaudia, hari ia karaia noho gaudia, bona nega vairai do ia karaia gaudia. Unai gaudia ita laloa bada dainai dahaka do ita karaia be namo? Davida ena salamo ta ia haere, ia gwau: “Nega ibounai Lohiabada do lau hanamoa. Ia do lau tanikiu henia ela bona hanaihanai.”—Sal. 34:1.
2 Baibel ese ia hahedinaraia goevagoeva haheganina be haroro gaukara ita karaia be namo. Iehova dekenai unai gaukara be ‘mai iseda kudouna ibounai ida ita karaia.’ (Kol. 3:23) Bema mai iseda kudouna ibounai ida ita haroro, edena bamona do ita karaia? Iehova ena lalokau ita totona ita laloa neganai, iseda kudouna ese ita do ia doria iena kara bona iena ura namona do ita harorolaia goadagoada! Iseda goada hegeregerena do ita karaia.
3 Ita diba bema tau ta be mai ena kudouna ibounai ida ia ura Iehova ia hesiai henia, hesiai helagana gaukara do ia laloa bada. Salamo torea tauna ena hemami be unai bamona dainai, ia gwau: “Dina ta ta lalonai, nega 7 lau ese oiemu ladana lau hanamoa noho.” (Sal. 119:164) Salamo torea tauna ena lalohadai bamona idia laloa taudia ese Iehova hanamoa daladia idia tahua. Edia mauri daladia hegeregerena, mai edia ura ida idia gaukara.
4 Iehova Hanamoa Daladia Idauidau Momo Ita Davaria Diba: Ita naria lasi ela bona ruma-ta-ruma-ta gaukara ita karaia neganai iseda sivarai namona harorolaia gaukarana hamatamaia totona. Iseda gaukara taudia, sikuli taudia, varavara, bona ita davaria taudia ibounai ese Basileia ena sivarai idia kamonai be namo. Ita loaloa neganai, hotel, aniani gabuna, o petrol abia gabudia ai idia gaukara taudia, eiava taxi motuka idia taria taudia ida herevahereva ita matamaia bena ita haroro henidia. Ruma dekenai ita noho neganai, dekena taudia, eiava deliverymen ita haroro henia diba danu. Bema ita be hospital dekenai ita noho, nega idaudia ai ita davaria taudia, hegeregere nesi, doketa, bona gorere taudia dekenai ita haroro diba.
5 Nega Bona Gabu Idaudia ai Haroro Gaukarana ese Anina Ia Havaraia: Nega ta, Witness taudia rua be laga-ani gabuna ta lalonai idia raka loaloa neganai, iena natuna ida ia raka loaloa tau matamata ta danu idia herevahereva. Gabeai, ia bona ena adavana be hereva momokani idia abia dae. Unai murinai, unai tau matamatana ese ia hahedinaraia nega sisina gunanai, Witness rua ia do davaria lasi neganai, Dirava dekenai ia guriguri, ia noia, ‘Bema momokani oi noho, mani lau oi durua oi lau dibaia totona.’ Ia laloa Iehova ese ena guriguri ia haerelaia unai laga-ani gabuna ai.
6 Mai edia lalona ibounai ida lauma dalanai ma haida idia durua taudia edia moale ia bada herea. Idia diba unai bamona hesiai gaukara, ‘mai edia kudouna ibounai ida’ idia karaia gaukarana, ese Iehova ia hamoalea bada.—1 Siv. 28:9.