Diba Bukana amo Hahediba Taudia Halaoa Dalana

¹ Keristani taudia ibounai dekenai, tahua gauna namona ta be hereva momokani ma haida dekenai idia hadibaia bona “mauri hanaihanai abia totona taudia” be hahediba taudia ai idia halaoa. (Kara 13:48; Mat. 28:​19, 20) Iehova ena orea ese ita dekenai heduru gauna namona ta ia henia unai gaukara hagugurua totona​—⁠Diba ese Mauri Dekenai Ita Ia Hakaua Lao bukana. Iena ladana ia hahedinaraia Baibel stadi karaia karana taunimanima edia ruma lalonai be mai anina, badina be Iehova, Dirava momokanina tamona, bona ena Natuna, Iesu Keriso, do ita dibaia be mauri hanaihanai abia dalana.​—⁠Ioa. 17:⁠3.

² Hari, Diba bukana be Society ena buka badana taunimanima edia ruma dekenai Baibel stadi karaia totona. Ita gaukaralaia neganai, hereva momokani be ia auka lasi herevadia, anina ia hahedinaraia goevagoeva herevadia, bona hereva momo lasi amo do ita hadibaia. Ita hadibaia taudia edia kudouna do ia hamarerea. (Luka 24:32) Momokani, stadi naria tauna be hadibaia daladia namodia ia gaukaralaia be gau badana. Unai dainai, inai pepa ai hegaegaelaia, heduru daladia ai gwauraia totona bona hadibaia daladia dekenai anina bada idia havaraia vadaeni daladia ai gwauraia lou totona. Mai emu lalo-parara ida, bona umui ta ta emui noho dalana hegeregerena, reana inai heduru daladia haida eiava ibounai do oi gaukaralaia matamaia. Namona be inai pepa oi dogoatao, bona nega momo oi gaukaralaia. Ena hereva haida ese oi do idia durua, Diba bukana amo taunimanima be hahediba taudia ai oi halaoa gaukarana ena namo oi habadaia.

³ Anina Bada Ia Havaraia Baibel Stadi Oi Karaia: Namona be emu stiuden tauna ena namo oi laloa badabada, reana gabeai ia be Keristani hahediba tauna bona lauma dalanai emu tadikaka o taihu ai do ia lao. Namona be mai emu moale ida oi gado namo henia, bona stadi oi moalelaia. Iena hereva hakala henia namonamo karana amo ia do oi dibaia​—⁠iena ruma bese ena sivarai bona mauri dalana do oi dibaia​—⁠unai amo do oi diba lauma dalanai edena bamona ia do oi durua. Namona be oi hekwarahi emu stiuden tauna durua totona.​—⁠1 Tes. 2:⁠8.

⁴ Stadi umui karaia hanaihanai neganai, namona be Diba bukana ena karoa 1 ai oi hamatamaia ia lao 19 ai, edia namba hegeregerena umui stadilaia. Unai ese stiuden tauna do ia durua ena lalo-parara hereva momokani dekenai ia habadaia noho totona, badina be inai buka ese Baibel ena hereva badadia ta ta ia hahedinaraia dala maorona ai. Namona be stadi ia auka lasi bona stiuden ena kamonai urana ia habadaia, unai amo stadi do umui moalelaia bona do ia heau namonamo. (Roma 12:11) Emu stiuden ena mauri dalana bona diba hegeregerena, reana karoa momo be ta ta amo, hora tamona bamona lalonai, stadi neganai ai do umui haorea diba, to namo lasi umui karaia haragaharaga. Bema wiki ta ta ai stiuden tauna bona tisa tauna ese stadi ena nega idia reaia lasi, stiuden do ia goada ia lao haraga. Unai dainai, reana taunimanima momo ida buka ena karoa ibounai 19 be hua 6 bamona lalonai do umui stadilaia haorea diba.

⁵ Namona be stadi negadia ta ta ai, hamatamaia hereva haida oi laloa, idia amo stiuden ena lalona do oi veria stadi ia ura henia totona. Karoa ta ta edia ladana be edia sinado, namona be oi herevalaia badabada. Kwara maragidia ta ta ese hereva badana ta ia hahedinaraia, oi do idia durua karoa ena sinado oi laloa noho totona. Naria namonamo oi hereva momo garina. Namona be stiuden oi hagoadaia ena lalohadai ia gwauraia hedinarai. Stiuden dekenai durua henanadaidia oi henia ia diba vadaeni gaudia amo, unai ese ia do idia durua unai gauna herevalaia bona haere maorona davaria totona. (Mat. 17:​24-​26; Luka 10:​25-​37; Haroro School Ena Buka, rau 17, paragraf 6-9 itaia.) Diba bukana lalonai idia printaia gaudia oi badinaia. Hereva ma haida oi atoa kau lasi hereva badadia ia reaia garina bona buka stadilaia negana do oi halataia garina. (Ioa. 16:12) Bema henanadai ta ia vara bona ia be umui stadilaia noho herevana hegeregerena lasi, namona be stadi ia ore neganai umui kikilaia. Unai amo wiki ena stadi do umui haorea. Stiuden oi hamaoroa, gabeai, stadi ma haida dekenai, ena henanadai momo edia haere do ia davaria.​—⁠Haroro School Ena Buka, rau 22, paragraf 8.

⁶ Bema stiuden tauna ese Toi Tamona, mase diba lasi soul, hel ena lahi, eiava unai bamona koikoi herevadia ia abidadama henia momokani, bona Diba bukana ena hereva be hegeregere lasi ia dekenai, Buka Helaga Herevalaia bukana eiava unai gauna ia herevalaia buka ma ta oi henia. Ia oi hamaoroa, ia duahia bona laloa murinai, do umui kikilaia.

⁷ Iehova ena hakaua bona hahenamo noia gurigurina amo stadi negana oi hamatamaia bona koua neganai, umui be unai nega do umui matauraia, bona Iehova, Hadibaia Tauna korikorina, do umui laloa. (Ioa. 6:​45) Bema stiuden be kuku eiava buatau ia do ania noho, reana ia do oi noia stadi negana lalonai ia ania lasi.​—⁠Kara 24:16; Iam. 4:⁠3.

⁸ Baibel, Haheitalai, Bona Riviu Henanadai amo Oi Hadibaia Namonamo: Ena be guna nega momo unai buka ia stadilaia, to hadibaia tauna namona ese unai stiuden ta do ia laloa, bona stadi do ia riviulaia. Tisa do ia durua stiuden ese do ia henia henanadai edia haere ia laloa guna totona. Hadibaia namonamo totona, karoa ena hereva badadia oi tahua. Baibel siridia oi duahia bona paragraf ida hahegeregerea, bona edena be stadi negana ai do umui duahia oi abia hidi. Namona be oi ese idia noho haheitalai bona karoa ena dokona ai idia noho riviu henanadai, edena bamona do oi gaukaralaia, oi lalohadailaia.

⁹ Baibel siridia oi gaukaralaia namonamo neganai, stiuden do ia lalo-parara Buka Helaga ia stadilaia. (Kara 17:11) Diba bukana ena rau 14 ai “Emu Baibel Oi Gaukaralaia Namonamo” mauana oi gaukaralaia Baibel siri ia davaridia dalana hadibaia totona. Stadi lalonai idia torea hanai Baibel siridia ia davaria totona ia oi hadibaia. Emu nega hegeregerena, idia torea hanai lasi siridia umui tahua bona duahia. Namona be siri ese paragraf ena hereva idia habadaia eiava idia hahedinaraia dalana be stiuden ese ia gwauraia. Baibel siridia edia hereva badana ena anina oi hahedinaraia namonamo bena stadi ena badina do ia lalo-pararalaia. (Neh. 8:⁠8) Nega momo, hadibaia tauna ese Baibel siridia ma haida be buka lalonai idia noho vadaeni siridia ida do ia atoa kau lasi. Namona be Baibel buka edia ladana bona edeseniai idia noho do ia diba ena namo oi herevalaia. Reana stiuden do ia durua bema June 15, 1991, Watchtower, rau 27-​30 ia duahia.

¹⁰ Theocratic Ministry School Guidebook ena stadi 34 ese haheitalai edia namo ia herevalaia; ta ena laloa dalana idia hagoadaia bona lalohadai matamatadia ia abia dae dalana idia haharagaia. Bema gau ta oi herevalaia sibona, ma ta do ia mamia bada lasi, to haheitalai o parabole ese ta ena lalona idia veria bona ena kudouna idia hamarerea. (Mat. 13:34) Diba bukana ai hadibaia haheitalai namodia momo idia noho, idia auka lasi to idia be mai edia siahu. Hegeregere, karoa 17 ese Keristani kongregesen amo lauma dalanai Iehova ia henia aniani, dabua, bona ruma ia haheitalaia. Diba bukana ena laulau hairaidia oi gaukaralaia ta ena lalona veria totona. Rau 185 ena kwarana maragina “Toreisi Lou Negana Ena Moale” henunai, paragraf 18 umui karaia neganai, bema stiuden ese rau 86 ena laulau ia itaia, mamina do ia abia. Reana unai ese ia do ia hagoadaia Dirava ena Basileia henunai toreisi lou do ia vara momokani lalohadaina ia abia totona.

¹¹ Namona be Baibel idia stadilaia taudia be edia stadi ta ta dainai lauma dalanai idia goada idia lao. Unai badina dainai, karoa ibounai edia dokona ai “Emu Diba Oi Tohoa” mauana lalonai idia noho henanadai oi reaia lasi. Namona be iena haere oi kamonai neganai haere maorona sibona oi tahua lasi. Unai henanadai haida idia torea dalana be ia ese ena kudouna amo ia haere totona. Hegeregere, rau 31 ai, stiuden dekenai henanadai ta be inai: “Dahaka kara, Iehova ena, be oi moalelaidia bada?”​—⁠2 Kor. 13:⁠5, NW.

¹² Stiuden Oi Hadibaia Edia Stadi Totona Idia Hegaegae: Iena stadi ia duahia guna, haere ia makaia, bona sibona ena hereva lalonai haere ia hegaegaelaia stiuden ta be lauma dalanai do ia goada ia lao haraga. Oiemu haheitalai bona hagoadaia herevadia amo, ia oi hadibaia ena stadi totona ia hegaegae. Oiemu buka, haere ena hereva badadia oi makaia bukana, be ia dekenai oi hahedinaraia. Oi hadibaia edena dala ai idia torea henanadai edia haere maorodia ia davaria diba. Durua dalana ta be karoa ta umui hegaegaelaia hebou. Ia oi hagoadaia sibona ena hereva amo haere ia gwauraia. Unai amo do oi diba stadi ia lalo-pararalaia, eiava. Bema buka amo ena haere ia duahia, namona be iena laloa dalana oi hagoadaia bona oi nanadaia sibona ena hereva amo edena bamona do ia gwauraia, ma ta ia hadibalaia totona.

¹³ Stiuden oi hagoadaia wiki ta ta ai iena stadi ia hegaegaelaia neganai, idia torea hanai lasi Baibel siridia ia duahia guna, badina be stadi negana ai nega do ia hegeregere lasi ibounai duahia totona. Iena hekwarahi oi hanamoa. (2 Pet. 1:⁠5; August 15, 1993, Gima Kohorona, rau 13-​14 ai, Baibel stadi ena namo habadaia totona heduru herevadia, hadibaia tauna bona stiuden dekenai oi itaia.) Unai dala amo, stiuden do oi hadibaia kongregesen hebou ai haere namodia ia hegaegaelaia bona henia totona. Diba bukana ia stadilaia haorea murinai, sibona ena stadi karaia karana ia dibaia vadaeni dainai, ia do ia durua hereva momokani ai do ia goada ia lao noho totona.​—⁠1 Tim. 4:​15; 1 Pet. 2:⁠2.

¹⁴ Iehova Ena Orea Dekenai Oi Hakaua: Ta be hahediba tauna ia halaoa tauna ena maduna be Iehova ena orea dekenai ia do ia hakaua lao. Stiuden be lauma dalanai do ia lo haraga bema orea ia diba, ia laloa bada, bona ia ura ia vareai. Ita ura ia ese Dirava ena taunimanima edia hebamo ia moalelaia bona do ia ura Kingdom Hall ai ita ia bamoa; unuseniai Keristani kongregesen ese lauma aniani ia henia bona ena laloa ia hagoadaia.​—⁠1 Tim. 3:​15.

¹⁵ Buklet ladana Iehova Ena Witness Taudia be Lalo-Tamona Ai Dirava Ena Ura Idia Karaia Tanobada Ibounai Dekenai be taunimanima ia durua Iehova ese ena ura hagugurua totona ia gaukaralaia tanobada oreana tamona do idia diba. Stadi umui karaia hanaihanai neganai, stiuden dekenai kopi ta oi henia be namo, ani? Stadi ena matamaia negana amo, stiuden oi boiria hebou dekenai. Hebou ena heau dala oi herevalaia. Sunday ta ai do oi kamonai pablik tok ena ladana oi gwauraia eiava do idia karaia Gima Kohorona Stadi herevana oi hahedinaraia ia dekenai. Reana nega ginigunana gabu matamatana ia lao ena gari haorea dalana ta be hebou idia karaia lasi negana ai umui lao Kingdom Hall dekenai. Reana ia oi boiria emu motuka ai ia guia bona hebou dekenai umui lao hebou. Ia lao neganai, namona be ia oi abia dae mai moale ida, ia hemarai lasi totona. (Mat. 7:​12) Witness taudia ma haida, elda taudia danu, idia hedavari henia be namo. Bena reana, do ia laloa kongregesen be ena ruma bese lauma dalanai. (Mat. 12:​49, 50; Mar. 10:​29, 30) Tahua gauna oi atoa ia totona, hegeregere wiki ta ta ai hebou ta ai do ia lao, bena gabeai unai tahua gauna do ia habadaia.​—⁠Heb. 10:​24, 25.

¹⁶ Baibel stadi umui karaia noho Diba bukana ai neganai, kongregesen hebou lao henia loulou karana idia kikilaia kahadia oi hahedinaraia badabada. Rau 52, 115, 137-9, 159, bona karoa 17 oi itaia be namo. Oiemu lalona amo ia mai hemami Iehova ena orea dekenai oi gwauraia hedinarai. (Mat. 24:​45-​47) Emu kongregesen ena namo bona hebou ai oi dibaia gaudia oi herevalaia. (Sal. 84:10; 133:​1-3) Namona be stiuden ese Society ena vidio iboudiai ia itaia, Jehovah’s Witnesses​—⁠The Organization Behind the Name ia itaia guna be namo. Orea dekenai ita hakaua lao totona lalohadai ma haida do oi davaria June 1, 1985, Gima Kohorona, rau 15-20, bona June 1993 Iseda Basileia Gaukara pepana, “Iehova Ena Ruma Dekenai Ita Lao”, kahana 1 bona 2 ai.

¹⁷ Stiuden Oi Hagoadaia Ma Haida Idia Haroro Henia Totona: Taunimanima ida ita stadi neganai, iseda tahua gauna be hahediba taudia, Iehova totona idia haroro taudia, ai idia ita halaoa. (Isa. 43:​10-​12) Ena anina be tisa tauna ese stiuden ia hagoadaia Baibel amo ia dibaia gaudia be ma haida ia hamaorolaia. Unai oi karaia dalana ta be oi henanadai sibona, oi gwau: “Oiemu famili taudia dekenai, inai hereva momokanina be edena bamona do oi gwauraia hedinarai?” eiava “Edena Baibel siri do oi gaukaralaia emu turana dekenai inai hereva hamomokania totona?” Diba bukana ai haroro gaukara ia herevalaia kahadia, hegeregere rau 22, 93-5, 105-6, bona karoa 18 oi herevalaia badabada. Oi laloa ia hegeregere neganai, stiuden dekenai reana pepapepa haida oi henia nega bona gabu idaudia ai idia davaria taudia ia haroro henia totona. Reana oi hagoadaia ena famili taudia ia boiria ena stadi dekenai. Iena turadia haida idia ura stadi idia abia? Ia oi noia oi ia durua unai taudia oi davaria totona.

¹⁸ Haroro Sikuli bona Hesiai Hebou lao henia karana amo, hahediba tauna ai ia lao noho tauna ese treinini ma haida do ia abia bona ia do ia hagoadaia sivarai namona harorolaia pablisa ta ai ia lao totona. Ia ura sikuli ia vareai eiava bapatiso lasi pablisa gaukara ia hamatamaia neganai, Hesiai Gaukara bukana rau 98 bona 99 ena hakaua herevadia be mai anina. Bema iena mauri lalonai gau ta dainai ia hegeregere lasi, Society ena buka bona magasin amo ena manoka gauna do idia durua herevadia oi tahua bona ia ida oi herevalaia. Hegeregere, reana stiuden ta ia hekwarahi kuku o buatau ania, eiava drag ma haida ia rakatania totona. Buka Helaga Herevalaia bukana be Keristani taudia ese unai bamona kara dikadia amo idia gini siri ena badina badadia Baibel amo ia hahedinaraia, bona rau 112 bona 113 ai hadokoa tohoa taudia durua dalana ia noho. Ia ida unai gauna umui gurigurilaia, Iehova tabekau henia karana ia habadaia totona.​—⁠Iam. 4:⁠8.

¹⁹ Haroro gaukara ia hamatamaia totona ia hegeregere eiava lasi oi diba dalana be Gima Kohorona, January 15, 1996, rau 16, paragraf 6 ai do oi davaria. Stiuden ia hegeregere pablisa gaukara hamatamaia totona neganai, namona be ia danu umui hegaegae ena haroro dinana ginigunana totona. Mai laloa moale ida emu teritori dekenai idia noho taudia edia kara bona ura lasi herevadia oi kikilaia. Bema mai dalana, namona be ruma-ta-ruma-ta gaukara dekenai ia hamatamaia guna, bena hesiai gaukara ma haida karaia daladia oi hadibaia. Bema oiemu hamatamaia herevana ia kwadogi bona ia auka lasi, do ia tohotohoa diba. Ia oi hagoadaia, bona unai gaukara oi moalelaia, bena ia danu do ia karaia mai siahu danu bona do ia moalelaia. (Kara 18:25) Namona be hahediba matamata tauna ena tahua gauna be sivarai namona harorolaia goadagoada pablisa namona ta ai ia lao. Reana ia oi durua haroro sediual namona ia karaia totona. Iena haroro dalana ia hanamoa totona, reana ia oi hagoadaia Watchtower, August 15, 1984 gauna, rau 15-​25; July 15, 1988 gauna, rau 9-​20; January 15, 1991 gauna, rau 15-​20; bona Gima Kohorona, January 1, 1994 gauna, rau 20-5 ia itaia be namo.

²⁰ Oi Hagoadaia Iena Mauri Ia Gwauhamatalaia Bona Ia Bapatiso Totona: Kudou maoro tauna be Diba bukana stadilaia karana amo do ia hegeregere Dirava dekenai ena mauri ia gwauhamatalaia bona bapatiso ia abia. (Kara 8:​27-​39; 16:​25-​34 itaia.) To, tau ta be iena mauri do ia gwauhamatalaia lasi bema Iehova badinaia karana ia do goadalaia lasi. (Sal. 73:​25-​28) Stadi umui karaia neganai, Iehova ena kara laloa bada karana ia habadaia daladia oi tahua. Emu kudouna ena hemami Dirava dekenai be oi gwauraia hedinarai. Namona be stiuden oi durua Iehova tura henia karana ia habadaia totona. Bema ia ese Dirava ia dibaia bona ia lalokau henia momokani, Ia do ia hesiai henia mai kamonai ida, badina Dirava badinaia karana ena badina be Iehova ena kara toana ita diba.​—⁠1 Tim. 4:​7, 8; School Guidebook, rau 76, paragraf 11.

²¹ Oi hekwarahi stiuden ena kudouna oi hamarerea. (Sal. 119:11; Kara 16:14; Roma 10:10) Namona be ia itaia diba hereva momokani ia badinaia neganai dahaka namo ia davaria bona ia dibaia gaudia dainai dahaka ia karaia be namo. (Roma 12:⁠2) Wiki ta ta ai ia kamonai hereva momokanina ia abia dae momokani, a? (1 Tes. 2:​13) Unai oi dibaia totona, stiuden dekenai inai bamona lalona veria henanadai oi henia: Inai gauna be edena bamona oi laloa? Edena dala ai oiemu mauri lalonai oi badinaia? Iena hereva amo do oi diba edena heduru oi henia iena kudouna oi hamarerea totona. (Luka 8:​15; School Guidebook, rau 52, paragraf 11.) Diba bukana ena rau 172 bona 174 ai idia noho laulaudia ai inai henanadai idia noho: “Guriguri lalonai Dirava oi gwauhamata henia vadaeni, a?” bona “Dahaka ese oiemu bapatiso ia koua?” Inai henanadai ese ia do ia ha-uraia kara ta ia karaia totona.

²² Bapatiso lasi pablisa be bapatiso ia ura ia abia neganai, do ia badinaia karana be Gima Kohorona, January 15, 1996, rau 17, paragraf 9 ai ia noho. Diba bukana torea dalana be ia stadilaia tauna ese Hesiai Gaukara bukana ena murina kahana ai “Idia Ura Bapatiso Taudia Edia Henanadai” do idia haerelaia diba totona, elda taudia be ia ida idia riviulaia neganai. Bema Diba bukana lalonai idia printaia henanadai edia haere oi herevalaia badabada, elda taudia be bapatiso henanadai idia henia neganai, stiuden tauna do ia hegeregere ia haerelaia.

²³ Baibel Stadi Idia Haorea Vadaeni Taudia Oi Durua: Ta ese Diba bukana ia stadilaia ore murinai, ita laloa iena kara momokani bona iena Dirava hesiai henia urana do ia hedinarai. (Mat. 13:23) Unai dainai buka ena kwarana maragina ginigabena ena henanadai be, “Edena Bamona Do Oi Kara?” Paragraf ginigabedia be stiuden idia hamaoroa ia bona Dirava huanai ia noho hetura karana ia laloa namonamo noho, ia abia dibana ia gaukaralaia, bona namona be karaharaga Iehova lalokau henia toana ia hahedinaraia. Diba bukana idia stadilaia haorea taudia ida, buka ma ta do ita stadilaia lasi. Dirava ia henia dibana ia badinaia lasi stiuden tauna dekenai mai hebogahisi ida oi hahedinaraia goevagoeva dahaka ia karaia diba lauma dalanai ia goada ia lao totona. Reana nega ta ta ai ia oi vadivadi henia, do ia diba mauri hanaihanai dekenai ia hakaua lao dalana ia do noho bema kara ta ia karaia.​—⁠Had. 12:⁠13.

²⁴ Hereva momokani ia abia dae bona ia bapatiso hahediba tauna matamatana ese diba ma haida bona lalo-parara ma haida do ia abia be namo, hereva momokani dekenai ia gini auka totona. (Kol. 2:​6, 7) Diba bukana umui stadilaia haorea murinai, buka ma ta do umui stadilaia lasi, to ia do oi durua lauma dalanai ia goada totona. (Gal. 6:​10; Heb. 6:⁠1) Ia danu be iena lalo-parara ia habadaia diba dina ta ta ai Baibel duahiduahi amo, ‘hesiai tauna mai ena kamonai’ idia henia Gima Kohorona bona buka bona magasin ma haida stadilaia, hebou hegaegaelaia bona lao henia, bona iena tadikaka ida hereva momokani herevalaia karadia amo. (Mat. 24:​45-​47; Sal. 1:2; Kara 2:​41, 42; Kol. 1:​9, 10) Hesiai Gaukara bukana duahia bona badinaia karana amo, tiokratik dalanai ena hesiai gaukara do ia goadalaia diba.​—⁠2 Tim. 2:2; 4:⁠5.

²⁵ Hadibaia Dalana Namona Abia: Iseda gaukara be ‘bese ibounai be diba tahua taudia do ita halaoa bona idia do ita hadibaia.’ (Mat. 28:​19, 20) Badina hadibaia dalana bona hahediba taudia ai halaoa gaukarana idia gaukara hebou, namona be iseda hadibaia dalana ita hanamoa noho. (1 Tim. 4:​16; 2 Tim. 4:⁠2) Hadibaia dalana hanamoa sisibana do oi davaria bema inai oi duahia: Haroro School Ena Buka, stadi 7, “Hadibaia Dalana Namona Dibalaia” bona School Guidebook, stadi 15, “Reaching the Heart of Your Listeners”; Insight, Volume 2 ai, “Teacher, Teaching”; bona Gima Kohorona herevadia, “Lahi ese Ia Araia Haraga Diba Lasi Gaudia amo Ita Haginia” bona “Ta Oi Hadibaia Neganai, Iena Kudouna Oi Hamarerea,” May 1, 1985 gauna amo; “Bible Ena Hereva Oi Herevalaia Goevagoeva A?,” November 1, 1986 gauna amo; bona “Taunimanima be Hahediba Taudia ai Halaoa Karana Moalelaia Dalana,” February 15, 1996 gauna amo.

²⁶ Diba bukana amo ma haida be hahediba taudia ai halaoa gaukarana oi karaia noho lalonai, “hadoa gauna ia hatubua tauna,” Iehova, dekenai oi guriguri loulou emu Basileia ena sivarai namona harorolaia gaukarana amo taunimanima edia kudouna do oi hamarerea diba totona. (1 Kor. 3:​5-7) Ma haida oi hadibaia, mauri hanaihanai dekenai ia hakaudia lao dibana idia lalo-pararalaia, laloa bada, bona badinaia karana dekena amo, namona be moale bada oi abia!

This article is repeated in km 7/01