Tadikaka Ma Haida Idia Painia be Namo
1 Paulo ese ita ia hagoadaia, ia gwau, “nega ibounai Lohiabada ena gaukara do umui karaia goadagoada.” (1 Kor. 15:58) Taunimanima momo dekenai ena anina be painia gaukara idia hamatamaia. September 1995 lalonai, taunimanima 5,000 ia hanaia be painia gaukara idia hamatamaia!
2 Harihari inai tano ai, iseda painia momo be taihu taudia. (Sal. 68:11, NW) Kongregesen taudia do idia moale bada herea bema tadikaka ma haida be ful-taim hesiai gaukara idia hamatamaia! (Sal. 110:3) Ita diba tadikaka momo edia maduna be metau, moni gaukara dekenai bona edia famili idia naria dainai. Ma haida idia gaukara goadagoada lauma dalanai kongregesen idia naria totona. Unai taudia ita laloa bada badina edia goada idia henia Basileia durua totona.—1 Tim. 4:10.
3 To, umui tadikaka ma haida e, painia gaukara umui hamatamaia diba, a? Bema oiemu adavana ese painia gaukara ia karaia vadaeni, ia oi bamoa diba, a? Bema oi ritaea vadaeni, hari emu nega gaukaralaia namonamo dalana be ful-taim hesiai gaukara lalonai, ani? Bema sikuli oi haorea gwauraia, oi ese painia gaukara oi laloa namonamo mai guriguri ida, bona unai dala amo reana hesiai gaukara ma haida do oi karaia diba, ani?—Ef. 5:15-17.
4 Tadikaka ta be ena bisinesi namona ia hoia bona pat-taim gaukara ia abia, painia gaukara ia hamatamaia totona. Iena haheitalai namona dainai ena natudia hani amo toi be sikuli idia haorea murinai, painia gaukara idia hamatamaia. Namba 4 natuna ia ura dikadika idia danu do ia painia. Unai tadikaka bona ena famili ese hahenamo momo idia abia vadaeni.
5 Iduara Badana Ia Kehoa: Painia gaukara be “iduara badana ia kehoa vadaeni, bona hari be gaukara badana bona mai anina ena nega namona.” (1 Kor. 16:9) Kongregesen ese painia gaukara idia karaia tadikaka idia gaukaralaia momo diba. Mai goada ida haroro gaukara idia karaia dainai, tiokratik dalanai idia goada idia lao. Painia gaukara amo hahenamo ma haida idia abia diba. Painia gaukara ena lagani ginigunana ia haorea murinai, Painia Gaukara Sikuli dekenai ia lao diba. Reana gabeai tadikaka haida do idia hegeregere sekit naria gaukara karaia totona. Idia headava lasi hesiai taudia bona elda taudia idia hekwarahi diba Hesiai Gaukara Hadibaia Sikuli lao henia totona. Oibe, painia gaukara ese Iehova ena orea lalonai hahenamo momo dekenai ia lao iduarana ia kehoa diba.
6 Regula painia gaukara idia tahua tadikaka be edia henia karana idia habadaia dainai, moale bada herea do idia davaria.—Kara 20:35.