Lagani 1998 “Dirava Ia Gwauraia Mauri Dalana” Distrik Bona Intenesenel Hebouheboudia
1 Aonega Herevadia 10:29 (NW) ese ita ia hadibaia “Iehova ena dala be gabu goadana.” Inai lagani ena hebouhebou ena sinado be namo herea—“Dirava Ia Gwauraia Mauri Dalana”! Edena dala ai unai dina toi edia program lalonai unai sinado ena anina do idia hahedinaraia? Ita ibounai be mai eda ura ida idia hegaegaelaia gaudia ita naria noho. Bona mai anina bada herevadia do idia henia.
2 Tano haida dekenai Intenesenel Hebouhebou idia karaia vadaeni, bona tano ma haida amo idia lao taudia tausen momo be unai intenesenel heboudia idia karaia siti dekenai idia noho. Papua New Guinea amo tadikaka haida be Vancouver, Canada dekenai idia lao bona ekspiriens namodia idia moalelaia, bona October bona November lalonai tadikaka ma haida be Australia ai hebouhebou dekenai do idia lao. Idia giroa mai bona edia ekspiriens oi kamonai neganai, edia ekspiriens ese oi do idia hagoadaia. Hebouhebou ena program lalonai Iehova ese teritori idauidau ai gaukara ia hanamoa sivaraidia do idia herevalaia.
3 Ita Lao Totona Ita Hekwarahi be mai Anina Namona: Africa dekenai iseda tadikaka momo be idia hekwarahi badina unai tano badana ena kahana haida dekenai tuari bona heiriheiri idia vara noho. Idia laloa Iehova ena taunimanima edia hebouhebou be mai anina bada edia mauri dekenai. Haida be gabu daudau amo idia raka hebouhebou dekenai idia lao totona, to hebou ta do idia reaia lalohadaina idia abia lasi. Democratic Republic of Congo (guna ena ladana be Zaire) dekenai, ena mauri lagani be 73 tadikakana ta be kilomita 450 bamona ia raka, hebouhebou ta dekenai ia lao totona. Ia raka matamaia, bena dina 16 murinai ia ginidae, ena aena idia gudu, to ia noho dainai ia moale. Hebouhebou murinai, lauma dalanai ia goada bona mai moale bada ida ena noho gabuna dekenai ia raka giroa lao. Lagani momo lalonai ia be unai bamona ia karaia!
4 Mozambique dekenai, distrik naria tauna ta bona ena adavana ese ororo badana idia daekau bona tano gagaena badana idia raka hanaia sekit hebouhebou dekenai idia lao totona. Hora 45 lalonai unai kilomita 90 laolaona idia karaia. Unai taudia edia haheitalai namona ese hebouhebou dekenai idia lao taudia iboudiai ia hagoadaia bada. Ruma bese taudia momo be unai bamona idia hekwarahi unai hebouhebou dekenai idia lao totona. Distrik naria tauna ia gwau tadikaka haida, bona ena mauri lagani be 60 tadikakana ta danu, be kilomita 200 idia raka!
5 Palani oi karaia vadaeni inai lagani ena hebouhebou dekenai oi lao totona, a? Reana oi be gabu daudau amo do oi raka lasi, to namona be oi hekwarahi sisina emu ura gaudia oi dadaraia, oi bona oiemu ruma bese be hebouhebou dekenai umui lao totona. Oi hegaegae program ia matamaia ela bona ia doko negana ai oi noho totona. Baibel stadi taudia momo be idia goada idia lao dainai, kahirakahira gwauhamata do idia karaia. Hebouhebou dekenai idia noho ese idia do ia durua edia lalona idia hadaia maoromaoro totona. Emu Baibel stiuden taudia bona kamonai taudia ma haida oi boiria vadaeni oi ida hebouhebou dekenai umui lao totona, a?
6 Dina Toi Hebouhebouna: Hari inai lagani ai, Papua New Guinea dekenai, dina toi hebouhebouna be gabu hani ai do idia karaia. Hebouhebou rua be New Guinea Pidgin gado dekenai do idia karaia, ta be English gado dekenai bona ta be Hiri Motu gado dekenai. English gado hebouhebou dekenai Sign Language gabuna ta do ia noho.
7 Dina Rua Hebouhebouna: Dina rua hebouheboudia do idia karaia danu, New Guinea Pidgin gado bona Hiri Motu gado dekenai. Iseda Basileia Gaukara pepana, September 1998 gauna, ese hebouhebou iboudiai edia dina bona gabu edia lista ia hahedinaraia bona edena hebouhebou dekenai oi emu sekit do ia lao ia hahedinaraia danu.
8 Friday bona Saturday ai, program be 9:00 dabai do ia matamaia, bona 4:30 adorahi ai do ia ore. Sunday ai, program be 9:30 dabai do ia matamaia, bona 4:00 adorahi ai do ia ore. Taravatu dainai helai gabudia do idia abia kava lasi ela bona 8:00 dabai murinai.
9 Hebouhebou ita lao henia neganai, bona hebouhebou amo ita giroa mai neganai, namona be dala ita tahua dala idauidau ai ita haroro totona. Bensini abia gabuna ai idia gaukara taudia, sitoa ai idia gaukara taudia, peleini ia diho gabudia eiava bouti idia vareai gabudia ai idia gaukara taudia be reana idia ura Basileia ena sivarai idia kamonai. Unai oi karaia totona oi hegaegae, bona pepapepa maragidia, magasin matamatadia, buklet, eiava ma buka haida oi laohaia, bena dala ia kehoa neganai, reana ma nega ta ai sivarai namona idia kamonai diba lasi taudia dekenai oi haroro diba.—2 Tim. 3:17, NW.
10 “Umui Emui Kamonai Do Umui Naria Namonamo”: Hebouhebou dekenai idia lao taudia be Luka 8:18 ena sisiba idia badinaia be aonega karana. Taunimanima ibounai ai hagoadaia Baibel, ane buka, bona noutbuk idia laohaia. Hereva ta ta iboudiai amo hereva badadia oi kamonai henia namonamo, bona hereva haida oi torea. Sibona oi nanadaia edena dala ai oi be unai hereva oi badinaia diba. Hebouhebou ena hanuaboi ta ta ai, oi do mahuta lasi neganai, namona be oi torea herevadia oi itaia lou bona edena bamona Iehova ia gwauraia mauri dalana oi badinaia noho oi laloa namonamo.—Aon. 4:10-13.
11 Program ia heau noho lalonai, tadikaka haida be helai gabuna idia rakatania bona daudau gabuna dekenai idia helai, unai dainai program ena hereva idia kamonai lasi. Ma haida be helai bona kamonai negana ai idia loaloa kava. Gunaguna, Iehova ena hesiai taudia haida be edia mauri lalonai kerere badadia idia karaia badina Iehova ena hahediba herevadia idia kamonai henia namonamo lasi. Momokani, ita ura lasi unai bamona kerere ita karaia. (2 Ki. 17:13-15) “Hesiai tauna mai ena kamonai, bona mai ena kara maoromaoro” ese ita ibounai totona hadibaia hereva namodia ia hegaegaelaia. Dina toi hebouhebouna ena program ena kahana ta ta ibounai dekenai ‘ita kamonai gaudia, do ita dogoatao bona badinaia’ be mai anina bada. Dina ta ta ai ita dekenai mai anina bada gaudia, bona vaira negana ai iseda mauri ena dala do ia hanamoa herevadia danu, do idia henia. Unai hebouhebou dekenai Iehova ia henia lauma gaudia ita kamonai henia bena ita gaukaralaia namonamo neganai, iseda helaro do ia hagoadaia, bena Dirava ia gwauraia mauri dalana amo “do ita boio” lasi.—Mat. 24:45; Heb. 2:1.
12 Iehova Idia Hanamoa Dabua: Inai nega aukadia lalonai, gau badana be ita kamonai namonamo bena inai tanobada ena lalohadai ese ita do ia veria lasi. (1 Kor. 2:12) Namona be iseda dabua bona tauanina ena toana amo hemataurai karana bona ita tomadiho henia Diravana ena hairai ita hahedinaraia. (1 Tim. 2:9, 10) “Iseda Hahemauri Tauna, Dirava, ena hahediba herevadia do idia hahairaia” taudia huanai ita noho totona, davana bada dabua be mai anina bada lasi. (Tito 2:10, NW.) June 15, 1997 ena Gima Kohorona, rau 17 bona 18, paragraf 14-18 ai ia noho Baibel ena sisiba namona mani oi laloa. Ita laloa boio lasi bema iseda dabua hahedokilaia dalana ese Iehova ia hanamoa bada, haheitalai namona do ita hahedinaraia diba.
13 Iehova Idia Hanamoa Karadia: Ita diba iseda Keristani kara dainai, taunimanima ese tomadiho momokani do idia gwauraia namo eiava dika. Unai dainai, namona be nega ibounai iseda kara amo ita hahedinaraia ita hegeregere sivarai namona ita abia bona Iehova ita hanamoa.—Fil. 1:27.
14 Lagani gunanai, ia be nega ginigunana Angola ena not kahana dekenai distrik hebouhebou idia karaia. Hebouhebou ena dina iharuana ai, pulisi opesa rua idia siaia hebouhebou gabuna dekenai do idia itaia gau ibounai ia heau namonamo eiava. Dina ta ibounai dekenai idia noho. Dina ena dokona ai, idia kamonai henia gaudia bona taunimanima edia kara namodia dainai edia hanamoa herevadia idia gwauraia. Idia ta ia gwau: “Dahaka dainai ai idia siaia iniseniai? Ai diba Iehova ena Witness taudia be edia hebou dekenai idia kara namo.”
15 Africa tanona ta dekenai politikol pati ta ena memba tauna ta be haida ese iena pati ena memba taudia iboudiai idia alaia mase neganai, ia heau mauri bona Europe dekenai ia lao. Ia ese hekwakwanai momo ia davaria bona ia lalohisihisi. Gabeai ia ese Baibel stadi ia abia. Iena nega ginigunana distrik hebouhebou ia lao henia neganai, taunimanima idauidau be mai maino bona lalo-tamona ida idia hebou karana ia laloa bada. Ia diba hereva momokani ia davaria vadaeni, bona unai hebouhebou lalonai ena lalona ia hadaia iena politikol bamodia do ia rakatanidia. Gabeai bapatiso ia abia, bona hari ia bona iena natudia be Iehova idia hesiai henia.
16 Inai lagani ai, nega ginigunana hebouhebou dekenai idia mai taudia be iseda kara dainai dahaka do idia laloa? Volantia gaukara ita karaia hebou neganai, iseda lalo-tamona do idia itaia, a? Idia ese gabu ena goeva toana bona ita be hebouhebou gabuna ita do rakatania lasi neganai, ita bona iseda natudia ese iseda helai gabuna kahirakahira ia haboua momoru ita abia isi idia itaia neganai, do idia laloa bada, a? Hebouhebou gabuna dekenai ita lao neganai bona iseda noho gabudia dekenai ita giroa lao neganai, iseda kara namodia do idia itaia, a? Do idia itaia ita tama sina be nega ibounai iseda natudia ita naria namonamo, a? Namona be iseda kara ita naria namonamo bena ita idia itaia taudia ibounai be ita do idia laloa bada.
17 Hebouhebou Dekenai Ita Gaukaralaia Gaudia Edia Davana: Hari inai negai, spot gadara ta eiava idia hahedinaraia karana ma ta steidiam dekenai eiava hebouhebou gabuna ta dekenai, helai gabuna oi abia totona, tanobada taudia be davana bada idia atoa diba. Unai idia karaia ena badina ta be siti lalonai unai gabu gaukaralaia edia renta davana be bada herea. Hanaihanai Society ese “davana lasi helai gabudia, bona moni gogoa lasi” taravatuna ia atoa hebouhebou dekenai. Unai dainai, edena dala ai renta davana bona hebouhebou ena davana ma haida do idia karaia? Hebou dekenai idia lao taudia ese sibona edia ura ida kontribusen idia henia karana amo. Ai diba henia karana do oi hahedinaraia, gunaguna Dirava ena hesiai taudia ese Iehova Dirava bona Iesu Keriso idia tohotohoa hegeregerena. (2 Kor. 8:7) Tadikaka haida idia hekwarahi bada kontribusen moni ibounai idia naria, idia torea, bona dala maorona ai idia gaukaralaia totona. Bema seke amo kontribusen oi henia, namona be inai ladana “International Bible Students Association Convention” ia dekenai oi torea.
18 Helai Gabudia: Lagani momo lalonai ai henia vadaeni sisiba ai ura gwauraia lou: OI ABIA HELAI GABUDIA ENA NAMBA BE EMU RUMA BESE TAUDIA BONA OI IDA IDIA MAI TAUDIA EDIA NAMBA HEGEREGERENA SIBONA. Unai ese lalokau hahedinaraia karana hebouhebou dekenai ia habadaia. Gabu momo ai helai gabudia dekenai oi vareai lao be sisina auka, to ma haida dekenai oi lao haraga diba. Mani emu kara, ma haida oi laloa bona haraga idia davaria diba helai gabudia oi rakatania buruka taudia bona idia hegeregere lasi taudia totona. Laloaboio lasi, “lalokau be sibona ena gau ia tahua lasi.”—1 Kor. 13:5; Fil. 2:4.
19 Kamera, Vidio, Bona Kaset Teipi: Kamera bona rekodia gaudia oi gaukaralaia diba hebouhebou dekenai. To, namona be oi gaukaralaia neganai, ma haida edia kamonai karana oi hadikaia lasi. Bema program lalonai ita loaloa piksa ita abia totona, unai ese program idia kamonai taudia edia kamonai karana do ia hadikaia. Hereva rekodia gaudia be hebouhebou ena paua poin dekenai eiava saun gaudia dekenai oi gwadaia kau be taravatu, danu taunimanima edia raka gabudia eiava idia itaia namonamo karana oi koua lasi.
20 First Aid: First Aid Dipatmen ese bero eiava gorere be hebouhebou lalonai idia davaria taudia sibona do idia durua. Mani emu kara sibona emu muramura, hegeregere aspirin, toto kumia muramurana, pini, bona unai bamona gaudia do oi mailaia, badina be hebouhebou dekenai unai gaudia do idia noho lasi. Bema haida be seizures, suga gorerena, kudou gorerena, eiava unai bamona gorere idia abia, namona be edia muramura idia mailaia. Namona be iena gorere ia diba bona bema emergency ta ia vara heduru ia henia diba ruma bese tauna ta eiava kongregesen tadikakana ta ese ia ia bamoa. Bema gorere tauna naria totona ruma bese tauna be lasi, namona be elda taudia idia hamaoroa bona idia ese dala idia karaia heduru idia henia totona.
21 Aniani Hebouhebou Gabuna Dekenai: Namona be idia mai taudia iboudiai be sibona edia aniani idia mailaia, bona dina tubua ena laga-ani negana kwadogina lalonai, hebouhebou gabuna idia rakatania lasi murimuri ai aniani idia hoia totona. Tauanina ia hagoadaia bona ia auka lasi huaia totona anianina sisina be reana do ia hegeregere. November 1995, Iseda Basileia Gaukara pepana lalonai idia udaia gauna, ena paragraf 21 ese oi mailaia diba gaudia ia gwauraia. Hebouhebou gabuna dekenai galasi kavabu bona kekero muramura be taravatu. Gau badana be eski bona baege edia bada be hegeregere helai gabuna henunai oi atoa diba. Haida be program ia heau lalonai idia aniani bona inuinu. Unai be hebouhebou dekenai hemataurai karana ia hahedinaraia lasi.
22 Ita moale bada herea badina kahirakahira iseda “Dirava Ia Gwauraia Mauri Dalana” Hebouhebouna do ia matamaia! Palani oi karaia vadaeni oi lao totona, a? Ai ura emu laolao do ia namo bona ruma dekenai oi giroa lao neganai oiemu mamina be do ia namo, bona emu lalona do oi hadaia Iehova ena hesiai gaukara namona do oi karaia noho, bona Dirava ia gwauraia mauri dalana do oi badinaia dainai, hahenamo do oi abia ela bona hanaihanai.
[Box on page 10]
Hebouhebou Ena Hereva Haida
▪ Bapatiso: Bapatiso do idia abia taudia be Saturday dabai, program ia do hamatamaia lasi neganai, idia makaia gabuna dekenai do idia helai be namo. Idia ta ta ibounai ese edia digudigu dabua, mai hemataurai gauna, bona tauele do idia mailaia. Guna haida be idia hegeregere lasi dabua idia hahedokilaia, bona unai dabua ese nega namona idia hadikaia. Kongregesen elda taudia ese bapatiso gwauraia taudia ida Hesiai Gaukara bukana ena henanadai idia herevalaia neganai, do idia hamomokania unai gaudia idia lalo-pararalaia be namo. Ta ese ena mauri ia gwauhamatalaia dainai bapatiso ia abia neganai, unai be mai anina bada gauna ia bona Iehova ihuanai. Unai dainai idia bapatiso neganai, do idia bapatiso taudia rua be imana idia dogoatao eiava idia rosia be maoro lasi.
▪ Lapel Kadi: Mani emu kara, hebouhebou dekenai oi lao eiava oi rakatania negadia ai, lagani 1998 ena lapel kadi oi atoa. Nega momo unai ese dala ia kehoa witness namona ita henia totona. Kadi bona udaia gauna be kongregesen amo oi abia be namo, badina hebouhebou gabuna ai do oi abia diba lasi. Oi naria lasi ela bona hebouhebou be dina haida sibona lalonai do ia matamaia bena oi bona emu ruma bese taudia edia kadi totona oi henanadai. Laloaboio lasi, emu Advance Medical Directive/Release kadi, mai ena deit maorona, oi dogoatao.
▪ Bookroom: Palani ai karaia lasi buka bona magasin momo bookroom dekenai do ai atoa totona. Bema buka matamatadia idia halasia idia sibona do idia noho, to bema kongregesen haida edia buka bona magasin be momo, unai idia hahedinaraia diba, pablisa taudia idia abia totona. Mai edia taravatu gaudia, hegeregere, kaset teipi bona vidio, Baibel mai edia kopi manokadia, bona ma gau haida be reana do idia noho lasi bema kongregesen ese edia davana idia do karaia lasi.
▪ Mahuta Gabudia: Namona be kongregesen edia seketere taudia be idia siaia haraga hebouhebou ena adres dekenai. Bema unai dala amo mahuta gabuna oi abia bona oi hegeregere lasi oi lao totona, namona be karaharaga hebouhebou ena Mahuta Gabudia ia naria Dipatmen oi hadibaia bena unai mahuta gabuna do idia henia diba ma tadikaka haida dekenai.
▪ Volantia Gaukara: Nega sisina oi atoa diba hebouhebou dipatmen ta dekenai oi gaukara totona, a? Bema hora haida sibona lalonai tadikaka oi durudia, unai be heduru bada bona moale do oi davaria. Bema heduru oi henia diba, namona be Volantia Gaukara Dipatmen hebouhebou gabuna dekenai oi lao. Mauri lagani 16 idia do abia lasi natudia ese heduru namona idia henia diba bema edia tama sina eiava tadikaka o taihu badana ma ta ida idia gaukara hebou.
▪ Umui Naria Namonamo: Namona be nega ibounai emu motuka oi lokaia, bona emu kohu be idia itaia gabunai oi atoa lasi, ta ena lalona ia veria bona ia henaoa garina. Raskol taudia ese hutuma bada bogaraginai idia gaukara. Oiemu helai gabuna dekenai kohu oi rakatania be aonega karana lasi. Oi diba momokani lasi, idia noho taudia ibounai be Keristani taudia, eiava. Ta oi dibagania lasi be namo, ani? NEGA IBOUNAI OIEMU NATUDIA OI ITAIA BE NAMO. Natudia maragidia be mei rumana dekenai idia lao neganai, namona be hanaihanai tama sina eiava tau badana ta ese ia bamodia. Namona be idia oi hadibaia mei rumana idia gaukaralaia namonamo, imana idia huria, bona unai gabu ena goeva toana idia laloa bada bona idia hamiroa lasi.
Mani emu kara, hebouhebou gabuna idia naria taudia oi rini henia eiava oi tore henia lasi, hebouhebou gaudia oi nanadaia totona. Bema elda taudia idia diba lasi, brens opesi oi tore henia diba bona oi do idia durua toho.