Biaguna Ena Kohu Ia Naria

¹ Baibel negadiai kohu ia naria hesiai tauna be iena biaguna ese ia abidadama henia bada. Aberahamo ese iena hesiai tauna dekenai iena natuna mero, Isako, ena adavana do ia tahua gaukarana ia henia. (Gen. 24:​1-4) Momokani, unai hesiai tauna ena maduna be Aberahamo ena bese ia bada dalana ia gimaia. Unai be maduna badana! Unai dainai aposetolo Paulo ia gwau: “Hesiai tauna ena gaukara lalonai gau badana momokani be inai: Iena biaguna ena ura do ia karaia momokani”!​—1 Kor. 4:2.

Keristani Hesiai Gaukara

² Keristani haroro gaukara ena kahana haida be Baibel ese ia gwauraia hesiai gaukaradia. Hegeregere, aposetolo Paulo be Efeso taudia dekenai ia gwau “Dirava ese iena hariharibada dekena amo, umui durua totona, inai gaukara badana lau dekenai ia henia vadaeni.” (Ef. 3:2; Kol. 1:25) Idau bese taudia dekenai sivarai namona do ia abia lao gaukarana be mai ena kamonai ida do ia karaia hesiai gaukarana ta bamona ia laloa. (Kara 9:15; 22:21) Aposetolo Petero ese iena horoa tadikaka dekenai inai ia torea: “Umui ta ta ese emui ruma dekenai emui Keristani varavara taudia do umui abia dae, do umui maumau lasi. Iena hariharibada dekena amo, Dirava ese umui ta ta ibounai dekenai harihari gaudia idauidau ia henia vadaeni. Unai dainai, umui ese inai harihari gaudia do umui gaukaralaia, emui Keristani varavara taudia do umui durua totona. Unai dekena amo umui be Dirava ena hesiai taudia namodia, bona iena hariharibada idauidau umui hedinaraia noho.” (1 Pet. 4:​9, 10; Heb. 13:16) Unai aposetolo edia negai idia noho Keristani taudia be Dirava ena hariharibada amo, unai kohu idauidau idia abia. Unai dainai, idia be unai kohu idia naria taudia bona Keristani dalanai idia gaukaralaidia be namo.

³ Hari, Iehova ena Witness taudia edia lalohadai be unai bamona danu. Idia be Iehova Dirava dekenai edia mauri idia gwauhamatalaia bona idia laloa edia gau ibounai​—edia mauri, edia goada, edia kohu​—be Dirava ese ia henia hariharibada gaudia idauidau. Idia be hesiai taudia namodia, unai dainai idia mamia unai gaudia idia gaukaralaia dalana ai idia be mai edia maduna Iehova Dirava dekenai. Ma danu, sivarai namona ena diba ia henidia. Unai danu be ia henidia gauna badana ta bona idia ura dala namona ai do idia gaukaralaia: Iehova ena ladana idia abia isi bona ma haida idia durudia hereva momokani idia diba totona.​—Mat. 28:​19, 20; 1 Tim. 2:​3, 4; 2 Tim. 1:​13, 14.

⁴ Iehova ena Witness taudia be edena bamona edia hesiai gaukara maduna idia huaia? Lagani ena ripoti ia hahedinaraia lagani 1997 ai, tanobada hegegemadai idia ese hora ibounai bilioni ta mai kahana idia haorea “Basileia ena Sivarai Namona” harorolaia gaukarana ai, bona kamonai taudia ida Baibel stadi 4,500,000 mai kahana idia karaia. (Mat. 24:14) Idia ese tanobada hegegemadai gaukarana durua totona bona edia Kingdom Hall dainai kontribusen idia henia, loaloa naria taudia bona ma haida dekenai heabidae karana idia hahedinaraia, bona idia dabu taudia dekenai edia hebogahisi idia hahedinaraia badabada​—hegeregere tuari dainai hisihisi idia davaria taudia idia durudia​—unai kara amo idia hahedinaraia idia be Iehova ena hesiai taudia mai edia kamonai. Keristani taudia korikoridia edia orea ese edia Biaguna ena kohu idia naria namonamo noho.

“Kohu Naria Tauna mai Ena Kamonai, Bona mai Ena Kara Maoromaoro”

⁵ Taunimanima ta ta ese hesiai gaukara idia karaia sibona lasi to orea ibounai ese ia karaia danu. Iesu ese horoa Keristani kongregesen tanobada ai ia gwauraia “kohu naria tauna mai ena kamonai, bona mai ena kara maoromaoro.” (Luka 12:42) “Kohu naria tauna mai ena kamonai” ena maduna be “aniani” do ia henia bona tanobada hegegemadai sivarai namona harorolaia gaukarana do ia gunalaia. (Apok. 12:17) Unai hegeregerena, hesiai tauna mai ena kamonai oreana, Hakaua Oreana ena amo ia gaukara, be Dirava ese maduna ia henia ena kohu bona lauma gaudia ia gaukaralaia namonamo totona. (Mat. 25:15) Mai ena kamonai hesiai tauna ena haheitalai hegeregerena, brens ta ta idia gaukara goadagoada kontribusen moni be dala maorona ai idia gaukaralaia, Basileia gaukara idia habadaia totona. Tadikaka ese moni idia henia neganai idia diba do idia gaukaralaia namonamo, bona “kohu naria tauna mai ena kamonai, bona mai ena kara maoromaoro” ena maduna be mai aonega ida bona namo bada havaraia dalana ai unai moni do ia gaukaralaia namonamo.

⁶ Vanegai laganidia lalonai, Iehova ena Witness taudia edia printa gaukara ia bada ia lao ese ia hahedinaraia kontribusen monidia be mai aonega ida idia gaukaralaia. Baibel bona Baibel hadibaia bukadia​—magasin, buka, buklet, pepapepa, bona Basileia Sivarai pepadia​—idia haria karana be inai “nega dokona” ai “Sivarai Namona” harorolaia gaukarana ia durua bada. (Mar. 13:​10; 2 Tim. 3:1) Bona Gima Kohorona magasin be gaukara badana ia karaia “Dirava ena bese taudia” bona “hutuma bada herea” ena “mamoe idaudia” dekenai “aniani neganai aniani do ia henia” totona.​—Mat. 24:45; Ef. 2:19; Apok. 7:​9, NW; Ioa. 10:16.

⁷ Matamanai, Iehova ena Witness taudia edia buka ibounai be printa kampani haida ese idia karaia. To lagani 1920 murinai, tadikaka idia laloa Iehova ena hesiai taudia be sibodia edia buka idia printaia be namo badina do idia karaia namonamo bona lauma dalanai namo do idia davaria. Lagani 1920 ai, Brooklyn, New York ai dala maragina amo printa gaukara idia hamatamaia bona ia bada ia lao ela bona ia bada herea momokani. Lagani 1967 ai, printa gaukara karaia rumadia be siti ena blok hani dekenai idia gini. Tano ma haida ai printa gaukara idia karaia danu, to idia momo edia gaukara be Tanobada Ibounai Tuarina Iharuana ese ia koua.

⁸ Ena be printa gaukara United States dekenai ia bada ia lao, to ena bada ia hegeregere lasi tanobada hegegemadai dekenai buka siaia lao totona. Unai dainai, tuari murina laganidia ai tano haida hegeregere, Canada, Denmark, England, Greece, South Africa, Switzerland, bona West Germany dekenai printa gaukara idia matamaia. Lagani 1970 murinai, Australia, Brazil, Finland, Ghana, Japan, Nigeria, bona Philippines dekenai danu printa gaukara idia matamaia. Unai tano haida dekenai buka badadia idia printaia danu. Danu lagani 1970 murinai, Gilead misinari taudia be printa gaukara idia hadibadia bona tano haida dekenai idia siaidia printa gaukara ai tadikaka idia durua totona.

⁹ Lagani 1980 murinai, magasin idia printaia tanodia edia namba ia bada daekau lao 51.a Unai be Biaguna ena kohu gaukaralaia namonamo dalana! Unai ese ia hamomokania Basileia ena gaukara be ia bada ia lao! Unai ese ia hamomokania goevagoeva Iehova ena hariharibada Witness taudia milioni momo be edia dava bada gaudia amo Iehova idia hanamoa! (Aon. 3:9) Unai amo, idia hamomokania idia be hesiai taudia namodia, Iehova ese ia henidia hahenamo gaudia idauidau idia naria namonamo.

Gau Haida Idia Haidaua

¹⁰ Lagani 1970 ia lao lagani 1980 murinai, printa gaukara daladia bona masini matamatadia idia havaraia, bona Iehova ena Witness taudia ese unai gaudia idia gaukaralaia. Guna, idia ese letterpress printa dalana idia gaukaralaia. Metairametaira unai idia haidaua bona offset printa dalana matamatana idia gaukaralaia. Unai amo idia ese laulau namodia mai edia kala buka bona magasin idia karaia, letterpress dalana gunana ai laulau be kala rua (korema bona ma kala ta) sibona ai idia printaia. Ma danu, kompiuta matamatadia ese printa gaukara hegaegaelaia dalana ia haidaua. Iehova ena Witness taudia ese Multilanguage Electronic Phototypesetting System (MEPS) idia karaia, ia be kompiuta program ta bona hari gado idauidau 370 ai buka bona magasin printaia gaukara ia durua. Ma kampani ta ese ia karaia program ta be MEPS ena gado idauidau dekenai ia gaukara dalana ia hanaia lasi.

¹¹ MEPS kompiuta program bona program ma haida, hegeregere electronic mail dainai ita moale bada, badina idia dainai lauma aniani be nega korikori ai ita abia dalana ma ta ia kehoa. Guna, masini gunadia idia gaukaralaia neganai, English gado magasin idia halasia bena gado idaudia magasin edia hereva be hua haida eiava lagani ta murinai idia halasia. Hari, nega tamona ai Gima Kohorona be gado idauidau 115 ai idia halasia, bona Awake! be gado 62 ai idia halasia. Unai anina be tanobada hegegemadai, pura ta ta ai, Iehova ena Witness taudia edia Gima Kohorona Stadi dekenai idia lao taudia 95 pesen be hereva tamona idia stadilaia. Unai be hahenamo badana ta! Momokani unai aonega gaudia matamatadia idia gaukaralaia be Biaguna ena kohu gaukaralaia namonamo dalana!

Gaukara Daladia Idia Idau

¹² Unai printa gaukara matamatana ese tanobada hegegemadai Iehova ena Witness taudia edia printa gaukara ia haidaua. Web offset printa masini be haraga momokani, letterpress printa masini gunana bamona lasi, to edia davana be bada herea danu. Printa gaukara idia durua kompiuta gaudia, hegeregere, toretore, gado hahanaia gaukara, laulau karaia gaudia bona magasin ena toana idia hegaegaelaia gaudia, ese gaukara gaudia gunadia idia hereaia, to edia davana be bada herea danu. Daudau lasi murinai ia hedinarai tano idauidau 51 ai magasin do idia printaia be moni bada do idia halusia. Unai dainai, lagani 1990 murinai, “kohu naria tauna mai ena kamonai” ese unai gaudia ia tahua lou. Dahaka ia davaria?

¹³ Tahua gaudia idia hahedinaraia Iehova ena Witness taudia bona edia turadia ese idia henia ‘dava bada gaudia’ do idia gaukaralaia namonamo bema printa gaukara idia hatamonaia. Unai dainai brens haida dekenai printa gaukara idia koua. Germany ese Eastern bona Western Europe tanodia momo edia magasin bona buka ia printaia, bona guna sibodia edia buka bona magasin idia printaia tanodia haida edia ia karaia danu. Italy ese Africa ena tano haida bona Europe ena sautist tanodia bona Greece bona Albania edia magasin bona buka printaia gaukarana ia karaia. Africa dekenai, magasin idia printaia gaukara be Nigeria bona South Africa sibona dekenai idia karaia. Tanobada kahana ma haida dekenai unai bamona idia karaia danu.

Idia Laloa Gaudia

¹⁴ July 1998 ai, magasin printaia gaukara inai Europe tanodia haida dekenai do idia hadokoa, idia be Austria, Denmark, France, Greece, Netherlands, bona Switzerland. Europe ena printa gaukara be Britain, Finland, Germany, Italy, Spain, bona Sweden ese do idia karaia. Unai dala amo moni do idia haorea kava lasi bona kontribusen moni be dala namona ai do idia gaukaralaia tanobada hegegemadai gaukara durua totona. Edena bamona idia abia hidi, edena tano ai printa gaukara do idia karaia noho bona edena tano ai do idia hadokoa? Ena Biaguna ena kohu be mai aonega ida do ia naria ena oda hegeregerena, “kohu naria tauna mai ena kamonai” ese brens ta ta edia printa gaukara idia karaia ena namo idia tahua.

¹⁵ Tano haida dekenai printa gaukara idia hadokoa bona tano ma haida dekenai idia hatamonaia ena badina badana be gaukara do ia heau namonamo totona. Tano tamona ese tano haida totona printa gaukara ia karaia be namo bona dava bada masini idia gaukaralaia namonamo diba. Hari printa gaukara idia karaia tanodia dekenai moni bada idia negea lasi, idia gaukaralaia kohu idia noho, bona magasin bona buka be gabu ta ta dekenai siaia gaukara totona gau ibounai be hegeregere bona namo. Unai amo, Biaguna ena kohu be idia gaukaralaia namonamo. Momokani, tano ta dekenai printa gaukara idia hadokoa, to haroro gaukara be ia doko lasi. Idia printaia gaudia momo herea do idia abia noho diba, bona unai tano lalodiai Iehova ena Witness taudia tausen momo be mai goada danu edia dekena taudia dekenai “maino ena Sivarai Namona” do idia herevalaia noho. (Ef. 2:17) Danu, unai gaukara haidaua karana ese namo ma haida ia havaraia danu.

¹⁶ Gau namona ta be, Denmark, Greece, Netherlands, bona Switzerland dekenai idia gaukaralaia printa masini matamatadia be Nigeria bona Philippines dekenai idia siaia lao. Europe amo unai masini gaukaralaia dalana idia diba momo taudia be unai masini danu idia lao bona unai tano tadikaka dekenai masini gaukaralaia dalana idia hadibaia. Unai amo, unai tano ese hari magasin mai edia toana namo herea idia abia, tano ma haida ese idia abia noho bamona.

¹⁷ Mani gau namona ma ta ita laloa: Magasin printaia gaukara ena davana be printa gaukara idia karaia noho tanodia haida sibona ese do idia karaia. Unai dainai, printa gaukara idia hadokoa tanodia dekenai edia moni idia hegeregere gaukara ma haida karaia totona, hegeregere Kingdom Hall idia haginidia bona ogogami tanodia ai edia tadikaka edia dabu gaudia dekenai heduru idia henia. Biaguna ena kohu gaukaralaia namonamo karana amo, Paulo ena hereva Korinto taudia dekenai be tanobada hegegemadai dekenai ia momokani diba: “Lau ura lasi umui be hekwarahi bada do umui abia, to idia dekenai umui henia taudia be do idia laga-ani kava sibona. Lasi, to umui ibounai hegeregere umui noho be namo . . . Inai dala dekenai ibounai ta ta be hegeregere do idia noho.”​—2 Kor. 8:​13, 14.

¹⁸ Inai printa gaukara hatamonaia dalana amo, Iehova ena Witness taudia tanobada hegegemadai be idia kahirakahira momokani. Ena be guna Witness taudia Denmark dekenai be sibodia edia magasin idia printaia, to hari Germany ese ia printaia bona idia lalohisihisilaia lasi. Edia Germany tadikaka edia gaukara idia moalelaia bada. Iehova ena Witness taudia Germany dekenai idia badu badina edia kontribusen monidia be Denmark​—o Russia, Ukraine bona ma tano haida​—edia Baibel bukadia printaia totona do idia gaukaralaia, a? Lasi momokani! Idia moale badina idia diba hari unai tano dekenai tadikaka edia kontribusen monidia idia gaukaralaia diba mai anina bada gaudia ma haida idia karaia totona.

Kohu Idia Naria

¹⁹ Tanobada hegegemadai, Iehova ena Witness taudia edia Kingdom Hall iboudiai lalonai, namona be kontribusen maua ta idia makaia “Society Ena Tanobada Ibounai Gaukarana Durua Monina​—Mataio 24:14” ia noho. Unai maua lalonai sibodia edia ura hegeregerena idia udaia monidia idia gaukaralaia gaukara idauidau idia karaia totona. Unai kontribusen monidia be edena bamona do idia gaukaralaia be “kohu naria tauna mai ena kamonai” bona brens opesi ta ta ese ia abia hidi. Unai hegeregerena, bema taravatu ese idia ia koua lasi, tano ta ai kontribusen maua lalonai idia udaia monina ese Iehova ena Witness taudia edia gaukara tano ma ta ai do ia durua. Kontribusen monidia idia gaukaralaia vadaeni lai dikana, tano mareremarere, bona tuari dainai dika idia davaria tadikaka durudia totona. Bona tano haida dekenai unai harihari gaudia idia gaukaralaia tano 200 lalonai misinari taudia durua totona. Unai hegeregerena, Papua New Guinea lalonai kongregesen iboudiai ese Society Ena Basileia Gaukarana totona idia makaia goevagoeva kontribusen mauana idia atoa be namo. Hua ta ta ai unai maua amo idia abia monina be brens opesi dekenai idia siaia. Namona be kongregesen ibounai be mai edia kontribusen maua ta Society Ena Kingdom Hall Monina totona, bona ta be kongregesen ena gaukara totona idia atoa vadaeni.

²⁰ Iehova ena Witness taudia edia kongregesen lalonai, vaia moni herevadia be hua ta ta lalonai nega tamona sibona idia gwauraia​—bona miniti haida sibona lalonai. Moni gogoa mereki idia siaia loaloa lasi Kingdom Hall o hebouhebou gabudia dekenai. Taunimanima ta ta dekenai moni totona idia noinoi lasi. Moni karaia totona moale karadia idia karaia lasi. Vaia, lagani ta ta ai Gima Kohorona be hereva tamona sibona ia halasia tanobada hegegemadai gaukara idia durua totona kontribusen idia ura idia henia taudia dekenai ia hahedinaraia edena bamona brens opesi dekenai unai kontribusen idia siaia diba. Awake! lalonai Society be ena moni ia gaukaralaia dalana ia herevalaia momo lasi. Vadaeni, tanobada hegegemadai sivarai namona harorolaia gaukarana badana, Kingdom Hall haginia gaukarana, spesel ful-taim hesiai gaukara dekenai idia noho taudia durua gaukarana bona Keristani taudia dekenai heduru henia gaukarana be edena bamona idia karaia? Iehova ese ena taunimanima be henia karana ena ura ia henidia. (2 Kor. 8:2) Ai ura edia dava bada gaudia amo Iehova idia hanamoa taudia ibounai ai tanikiu henia bada. “Kohu naria tauna mai ena kamonai” ese Biaguna ena kohu do ia naria namonamo noho, bona unai idia abia dae diba. Bona ai guriguri Iehova ese tanobada hegegemadai gaukara ia bada ia lao totona idia karaia gaukara ibounai do ia hanamoa noho.

[Footnote]