Pepapepa Idauidau Gaukaralaia Hereva Hamatamaia Totona
1 Haroro namona oi henia totona, herevahereva dalana oi hamatamaia be namo, ani? Namona be ruma tauna ena lalona veria herevana ta oi gwauraia bena ia ura oi danu ia herevahereva hebou. To edena bamona unai ita karaia namonamo diba?
2 Pablisa momo idia davaria vadaeni idia abia hidi namonamo herevadia ida Baibel idia herevalaia pepapepa idauidau idia henia toho karana amo herevahereva dalana idia hamatamaia diba. Edia hereva kwarana ese lalona idia veria, bona edia laulau be mai edia kala idauidau bona hairai. Pepapepa ese tau ta ia hagaria lasi, badina ia hahedinaraia hereva momo idia noho lasi ia duahia totona. To, pepapepa lalonai idia noho sivarai kwadogina ese lalona idia veria bona ita gaukaralaia diba Baibel stadi hamatamaia totona.
3 Witnes taihu ta ena lalohadai be inai bamona, ia gwau: “Inai tanobadana lalonai taunimanima idia bisi bada dainai, nega momo idia ura lasi nega bada idia haorea duahiduahi karana dekenai, to pepapepa edia lata be hegeregere mai anina bada hereva idia henia totona, to idia be lata herea lasi dainai, taunimanima ese idia do duahia lasi neganai idia negea kava lasi. Pepapepa momo lau duahia bona bena hereva momokani lau dibaia.” Dirava ena Hereva ena siahu unai toretore kwadogidia lalonai ita laloa maragi lasi be namo.—Heb. 4:12.
4 Auka Lasi Karadia Hani: Auka lasi dala idia gaukaralaia dainai momo ese anina idia havaraia. (1) Ta dekenai pepapepa haida oi hahedinaraia bona oi nanadaia edena ia ura henia. (2) Ta ia abia hidi murinai, oi hegaegaelaia henanadai namona ta amo unai pepapepa ena hereva badana oi henanadailaia. (3) Henanadai ena haere henia totona, pepapepa lalonai ia noho paragraf eiava siri ta oi duahia. (4) Bema ia kamonai namonamo, pepapepa ena hereva oi herevalaia noho eiava Dahaka Ita Karaia? buklet ena kahana ta oi herevalaia eiava Diba bukana ena karoa ta amo hereva haida oi gwauraia. Unai dala amo reana do oi hegeregere Baibel stadi ta do oi hamatamaia totona. Henunai idia noho herevadia ese oi do idia durua pepapepa hani oi gaukaralaia neganai oi gwauraia diba herevana oi hegaegaelaia totona.
5 Reana pepapepa ta ena ladana “Daika ese Tanobada Ia Lohiaia?” be henanadai ta bamona oi gwauraia diba: Bema oi ida ia herevahereva tauna ena haere be “Dirava” eiava “lau diba lasi,” rau 2 ena sentens ginigunadia rua bona rau 3 ena paragraf ginigunana oi duahia. Ioane Ginigunana 5:19 bona Apokalupo 12:9 herevalaia. Herevana unai tauna ese Satani Diabolo ia noho eiava lasi ia daradaralaia eiava iena siahu tanobada dekenai ia abia dae eiava lasi, hereva kwarana maragina, “Tanobada ai Idia Vara Gaudia amo Diba Ita Abia” amo lalohadai haida oi gaukaralaia diba umui hereva noho totona. Bema ia kamonai namonamo, pepapepa ena rau 3 bona 4 dekenai idia noho hereva oi gaukaralaia Satani ia mai dalana oi hahedinaraia totona.
6 Pepapepa ladana “Helaro Namona Mase Taudia Totona be Ia Noho A?” ese maoromaoro edia ura ia habadaia diba. Reana hereva oi hamatamaia totona oi nanadaia:
◼ “Oi laloa iseda lalokau mase taudia do ita itaia lou diba, a?” Ia haere murinai, pepapepa ena rau 4 dekenai paragraf iharuana oi hahedinaraia bona Ioane 5:28, 29 oi duahia. Bena oi hahedinaraia unai ese ita ia durua pepapepa ena hereva kwarana maragina ginigunana henunai ia noho herevana ita lalo-pararalaia totona. Oi hamaoroa unai umui herevalaia hebou diba.
7 “Emu Famili Oi Moalelaia” pepapepana be famili iboudiai ese idia ura henia. Unai oi gaukaralaia neganai, oi gwau diba:
◼ “Lau laloa lau ida oi lalo-tamona, hari inai negai famili be hekwakwanai momo idia davaria noho. Oi laloa dahaka idia karaia be namo famili ena noho hanamoa totona?” Ruma tauna ia haere murinai, rau 6 ena paragraf ginigunana amo hereva haida oi herevalaia. Pepapepa ena rau 4 bona 5 dekenai idia torea hanai siri ta oi abia hidi, bona ena anina oi gwauraia hedinarai. Bena ia dekenai davana lasi Baibel stadi oi herevalaia.
8 Pepapepa ladana “Bible Oi Abidadama Henia Diba” be reana inai dala amo oi gaukaralaia diba:
◼ “Taunimanima momo ese Kaino bona Abela edia sivarai idia kamonai vadaeni, Baibel ena buka ginigunana lalonai ia noho. Unai sivarai Genese lalonai ese Kaino ena hahine ia herevalaia danu. Nega ta oi laloa, ia be edeseni amo ia mai, a?” Pepapepa ena rau 2 ena paragraf 5 oi gaukaralaia haere oi henia totona. Oi hahedinarai unai pepapepa ese Baibel ena mai anina bada herevadia vaira nega totona ia herevalaia danu. Rau 5 ena paragraf 3 amo oi hamatamaia bona idia noho hamomokania siridia oi gaukaralaia emu hereva oi karaia noho totona.
9 Baibel idia herevalaia pepapepadia hariharilaia karana be idia tohoa vadaeni dala namo hereana sivarai namona ita harorolaia namonamo totona. Idia be oi lao henia gabu ibounai dekenai oi abia lao diba dainai, oi gaukaralaia namonamo diba emu ruma-ta-ruma-ta gaukarana lalonai bona nega bona gabu idauidau dekenai oi haroro negadiai danu. Pepapepa be gaukara badana idia karaia iseda haroro gaukara ita karaia namonamo totona. Namona be pepapepa idauidau oi abia loaloa, bona oi gaukaralaia goadagoada hereva oi hamatamaia totona.—Kol. 4:17.