Iehova ese Siahu Ia Henia
1 Oiemu lalohadai aposetolo Paulo dekenai be edena bamona? Kara bukana ita duahia neganai, iena goada Iehova ena hesiai gaukara dekenai do ita laloa bada. Edena dala ai Paulo ese ia karaia gaudia ibounai ia hagugurua? Ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.” (Fil. 4:13, NW ) Ita danu be Iehova ese ia henia siahuna amo namo do ita abia diba. Edena dala ai? Dala be lauma dalanai ita ia hagoadaia totona ia henia harihari gaudia 6 ita abia dae.
2 Dirava Ena Hereva: Iseda tauanina idia goada totona aniani ita ania be namo, unai hegeregerena lauma dalanai ita mauri totona Dirava ena Hereva amo sibona ita ubua be namo. (Mat. 4:4) Baibel ese ita ia durua siahuna ia henia. Hereva momokani ita laloa bada noho totona, namona be sibona eda stadi bona laloa dobu karadia ita goadalaia, bema mai dalana dina ta ta ai unai ita karaia.—Sal. 1:2, 3.
3 Guriguri: Heduru badadia ita abia be mai anina negadiai, Iehova kahirakahira ita lao be gau badana. Guriguri amo ia dekenai idia noinoi taudia be iena lauma helaga amo siahu bada ia henidia. (Luka 11:13; Ef. 3:16) Baibel ese ita ia hagoadaia, ‘guriguri do ita goadalaia nega ibounai.’ (Roma 12:12) Unai oi karaia, a?
4 Kongregesen: Kongregesen heboudia dekenai siahu bona goada ita abia bona iseda tadikaka bona taihu ida ita moalelaia hebamo karana amo danu. (Heb. 10:24, 25) Hekwakwanai ita davaria neganai, idia ese ita idia hagoadaia bona mai lalokau ida ita idia durua.—Aon. 17:17; Had. 4:10.
5 Haroro Gaukara: Haroro gaukara karaia hanaihanai karana ese ita ia durua Basileia bona ena hahenamo ita laloa noho totona. Bema haida ita durua Iehova idia dibaia totona, unai ese iseda lalona ia hagoadaia. (Kara 20:35) Heduru idia ura abia gabudia dekenai ita ibounai do ita lao diba lasi eiava ful-taim hesiai gaukara do ita karaia diba lasi, to dala ma haida dekenai hesiai gaukara ita goadalaia diba.—Heb. 6:10-12.
6 Keristani Elda Taudia: Elda ese idia henia hagoadaia herevadia bona heduru daladia amo namo ita abia. Iehova ese idia ia abia hidi iena mamoe oreana do idia naridia namonamo. (1 Pet. 5:2) Paulo be ena negai ia karaia bamona, loaloa naria taudia be idia hesiai henia kongregesen idia hagoadaia.—Roma 1:11, 12.
7 Abidadama Taudia Edia Sivarai: Gunaguna bona hari idia gaukara abidadama taudia edia sivarai namodia ita laloa neganai goada ita abia. (Heb. 12:1) Bema oi ura goada oi abia neganai, iseda magasin lalonai hagoadaia mauri sivaraidia ta, Yearbook dekenai ripoti namona, eiava Proclaimers bukana lalonai hari inai negai Iehova ena Witnes taudia edia sivarai oi duahidia be namo, ani?
8 Tadikaka ta be ia mero neganai hereva momokani ia abia dae, bona hari iena mauri lagani be 95 bamona. Ia matamata neganai, iena abidadama idia tohoa. Gau ginigunana be, kongregesen idia bamoa taudia haida be Iehova ena orea idia rakatania. Bena ia davaria ruma-ta-ruma-ta gaukarana ia karaia be ia auka. To, hanaihanai Iehova dekenai ia tabekau. Unai murinai hesiai gaukara ia moalelaia. Bona hari inai negai be edena bamona? Iena tauanina be ia goada lasi, to ia be Brooklyn Betele famili ena memba ta, bona Hakaua Orena lalonai ia gaukara. Iehova ena orea lalonai ia noho dainai ia lalohisihisi lasi.
9 Britain Betele famili ena taihu ta be ena mauri lagani be 13 lalonai bapatiso ia abia. Lagani ta murinai ena kakana badana ida painia gaukara idia karaia, bona lagani ta murinai, ena tamana be Tanobada Ibounai Tuarina Iharuana lalonai ia vareai lasi dainai dibura dekenai idia atoa. Unai taihu be Iehova ena siahu dekenai ia tabekau, bona Dirava momokanina ia hesiai henia noho. Gabeai, abidadama tadikaka ta ia adavaia, bona Iehova ena ura idia karaia hebou. Edia headava laganidia 35 murinai, iena adavana ia mase. To Iehova amo goada ia abia lou, bona ia hesiai henia noho, ia ura Iehova ena tanobada besena lalonai do ia hesiai henia noho ela bona hanaihanai.
10 Iehova ese ena abidadama hesiai taudia ia durua bona ia hagoadaia. “Manoka bona hesiku taudia be Lohiabada ese ia hagoadaia noho, bona goada lasi taudia edia goada ia habadaia noho.” Ia ore diba lasi siahuna ita abia diba bema ita herevalaia harihari gaudia 6 do ita abia dae. Mani oi laloatao: “Lohiabada dekenai idia abidadama henia taudia ese, edia goada do idia hamatamataia lou. . . . Idia be do idia heau, bona do idia manoka lasi. Idia be do idia raka lao, bona do idia moru lasi.” (Isa. 40:29-31) Paulo be goada totona Iehova dekenai ia tabekau, bona namona be ita danu.