Dahaka Dainai Ita Haroro Noho?

¹ Basileia harorolaia gaukarana be nega daudau emu noho gabuna dekenai umui karaia, a? (Mat. 24:14) Bema oibe, reana oi laloa kongregesen ena teritori ibounai be umui karaia haorea vadaeni. Hari oi haroro neganai, reana oi davaria taudia momo ese Basileia ena sivarai idia ura henia lasi. Gabu haida dekenai, toana be ita karaia gaukara bona hekwarahi be bada, to iseda haroro gaukara ai ita havaraia anina be bada lasi. Dahaka dainai ita haroro noho?

² Ieremia Oi Laloatao: Namona be haroro gaukara dekenai ita haheauka noho, herevana taunimanima idia kamonai eiava lasi. Ieremia be lagani 40 lalonai teritori tamona dekenai ia haroro, ena be momo idia kamonai lasi bona ia gwauraia sivaraina idia ura henia lasi. Dahaka dainai Ieremia ia haroro noho? Badina Dirava ese ia oda henia gaukarana ia karaia bona vaira negana ai do idia vara gaudia ia diba dainai, unai ese ia doria ia haroro noho totona.​​—Ier. 1:​17; 20:9.

³ Iseda noho danu be unai bamona. Iesu ese ita ia ‘hadibaia, taunimanima ibounai dekenai do ita haroro, bona do ita gwauraia hedinarai, Dirava ese inai Tau ia abia hidi vadaeni, mauri taudia bona mase taudia edia kota biaguna gaukara do ia karaia totona.’ (Kara 10:42) Ita gwauraia sivarai namona idia kamonai taudia ese mase eiava mauri do idia abia. Taunimanima ese sivarai namona idia kara henia hegeregerena, edia davana do idia abia. Unai dainai, iseda maduna be ita abia oda hegeregerena do ita kara. Ena be taunimanima idia ura lasi idia kamonai, to unai ese dala ia kehoa iseda lalokau ena bada idia totona ita hahedinaraia bona Iehova ita badinaia dainai ita karaia gaukara do ita karaia noho. To gau ma haida danu idia vara.

⁴ Namo Ita Abia Noho: Herevana iseda teritori ai taunimanima idia kamonai eiava lasi, Dirava ena ura ita karaia ese ita dekenai lalo-maino, lalo-namo, bona moale ia havaraia, bona unai gaudia be ma dala ta amo ita davaria diba lasi. (Sal. 40:8) Unai neganai iseda mauri be mai anina momokani. Haroro gaukara ita karaia badabada neganai, iseda kudouna bona lalona ai Dirava ena tanobada matamata dekenai ita noho ena helaro bona moale do ita laloa noho. Unai Baibel ena gwauhamata lalohadailaia karana ese lauma dalanai ita ia hanamoa bona iseda hetura karana Iehova ida ia hagoadaia.

⁵ Ena be iseda haroro gaukara ai anina namona ita itaia haraga lasi, to hereva momokani ena uhe be reana ta ena kudouna ai ita hadoa vadaeni, bona Iehova ena nega korikori ai anina do ia havaraia. (Ioa. 6:​44; 1 Kor. 3:6) Iehova ena taunimanima edia hekwarahi amo taunimanima hida, iseda noho gabudia ai eiava tanobada hegegemadai ai, ese Basileia do idia dibaia be ita diba lasi.

⁶ Namona be mai eda karaharaga lalohadaina ida Iesu ena hadibaia herevana ita laloa: “Umui naria namonamo, umui noga noho, badina be inai gaudia idia mai nega umui diba lasi. Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui naria noho.’ ” (Mar. 13:​33, 37) Unai dainai namona be ita ibounai ese Basileia ena sivarai namona ita harorolaia noho, Iehova ena kudouna ita hamoalea noho, iena ladana badana bona helagana ita hahelagaia noho lalonai.