Ma Haida Ita Durua Iehova Idia Hanamoa Totona
1 Mai anina bada sivaraina be tanobada hegegemadai taunimanima dekenai idia hadibaia noho: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.” (Apok. 14:6, 7) Iseda hahenamo be unai sivarai ita harorolaia. Taunimanima ese Iehova idia gari henia bona idia tomadiho henia totona dahaka idia diba be namo?
2 Ena Ladana: Hari inai negai idia tomadiho henia dirava koikoidia be momo dainai, taunimanima ese Dirava momokanina tamona ena ladana idia diba be namo. (Deu. 4:35; 1 Kor. 8:5, 6) Momokani, Baibel idia torea taudia ese Iehova ena ladana hereadaena be nega 7,000 mai kahana idia gaukaralaia. Ita ese edena negai Dirava ena ladana do ita gaukaralaia be ita laloa namonamo be namo, to namo lasi ita hunia eiava ita hemarailaia. Dirava ia ura taunimanima ibounai ese ena ladana idia diba.—Sal. 83:18.
3 Ena Kara: Taunimanima ese Iehova idia hanamoa totona, namona be idia diba ia be edena bamona Diravana. Namona be idia dekenai ena kara badadia, hegeregere lalokau, aonega, kota maorona, bona siahu, ita hadibaia bona ena hebogahisi, hebogahisi mai lalokauna, bona ena kara namodia ma haida danu. (Eso. 34:6, 7) Danu, idia ese Dirava gari henia karana idia dibaia, ia idia matauraia bada, be gau badana, bona namona be idia diba edia mauri lalonai Iehova ena lalo-namo idia abia be mai anina bada.—Sal. 89:7.
4 Dirava Kahirakahira Idia Lao: Taunimanima be Dirava ena hahemaoro dinana ai idia mauri totona, namona be Iehova idia abidadama henia. (Roma 10:13, 14; 2 Tes. 1:8) Anina be Dirava ena ladana bona ena kara idia dibaia sibona be hegeregere lasi. Namona be taunimanima ita durua, Iehova do idia tura henia bona mai edia kudouna ibounai ida ia do idia abidadama henia. (Aon. 3:5, 6) Idia dibaia gaudia idia badinaia, mai momokani ida Dirava idia guriguri henia, bona edia mauri lalonai iena heduru idia mamia neganai, edia abidadama do ia bada ia lao bona unai ese idia ia durua Iehova kahirakahira do idia lao.—Sal. 34:8.
5 Namona be mai eda goada ibounai ida Dirava ena ladana ita herevalaia bona ma haida ita durua, ia idia abidadama henia bona idia gari henia totona. Ita ese reana momo do ita durua, Iehova idia diba bona ia do idia hanamoa badina ia be ‘idia ia hamauria Diravana.’—Sal. 25:5.